#အိမ်ကလေး ( ၆ ) #နေဝင်းမြင့်

#အိမ်ကလေး ( ၆ )

#နေဝင်းမြင့် 

 ရှေးအခါက တစ်ဘက်ရန်သူတို့၏ အခြေအနေကို သိရှိကြားနာနိုင်ရန်လည်းကောင်း ၊ လုံခြုံမှုအရ လည်းကောင်း ‘ ကင်း ‘ များချထားရာ၌ ကင်းတို ကင်းရှည် စနစ်ကို သုံးခဲ့ကြသည်။အနီးအပါး ဝန်းကျင် လှည့်လည် ကြည့်ရှုစစ်ဆေးခြင်းသည် ကင်းတို၊ မြစ်ကုး ချောင်းခြား ဝေးလံသော အရပ်အထိ အထောက်အလှမ်းပြုသည်က ကင်းရှည်။

ကျွန်တော်တို့ နေထိုင်ရာ မြစ်ကမ်းပါးထိပ်က ကင်းစင်ကြီးကတော့ ဘာကင်း အမျိုးစားထဲပါသည်မသိ။ရပ်ကွက်ကတောာ့ မယုတ်မလွန် ကင်းခြေတံရှည်လို့ ခေါ်ကြလေသည်။ကင်းရှည်လည်းမဟုတ် ၊ ကင်းတိုလည်းမမည်၊ ကင်းလက်စကလည်း မဆိုနိုင်ရကား ကင်းရှည်တံရှည် ဟူသော အမည်ကသာ သည်ကင်းမျှော်စင်ကြီး၏ ပကတိအသွင်ဏ္ဍာန်နှင့်  ကိုက်ညီလေသည်။

ပြီးတော့ သည်မြစ်ဆိပ်စောင့် ကင်းရှည်တံရှည်ကြီးက အထင်ကရ ကင်း မဟုတ်လေတော့ ကင်းစစ် ၊ ကင်းစာရေး ။ ကင်းတိုက် ၊ ကင်းကြပ် ၊ ကင်းအုပ် ၊ ကင်းဝန် ဟူ၍ ကင်းရာထူး ဖွဲ့စည်းပုံမရှိ။ရေကင်း ၊ ကြည်းကင်းကို စောင့်ကြပ်ကွပ်ကဲရသူတို့က အမှုထမ်း ပေါ့မပေါ့ ၊လျော့မလျော့ စစ်ဆေးရန်လည်း အကြောင်းမရှိ။အဘယ့်ကြောင့် ဆိုသော် သည်ကင်းခြေတံရှည်၏ အတ္ထုပ္ပတ္တိကို မည်သူမှ ကျကျနန မသိတာလည်း ပါပါသည်။ခေတ်သမိုင်းကို ဆစ်ပိုင်း၍ ခြေရာကောက်နိုင်သူတို့ပင် သည်ကင်းခြေတံရှည်၏ ဇာစ်မြစ်ကို ကုပ်မိဖို့မလွယ်။

 “ မပြောတက်ပေါင်ကွာ ငါတို့ ငယ်ငယ်ကတည်းက မြစ်ထိပ် သည်လို ငုတ်တုတ်ကြီး ရှိနေသာပါပဲ။ဟိုတုန်းက သည်နေရာမယ် အိမ်ရယ်ဘာရယ် မရှိတော့ ကင်းစင်ဘေး အခင်းသွားကြသာပဲ။မကောင်းသူ မကောင်းသား မခိုကပ်နိုင်အောင် ဘေးကခြုံတွေ တို့ပဲ ရှင်းခဲ့ရသာ။ခုတော့ လူနေရပ်ကွက်နဲ့ ဘာနဲ့ဆိုတော့ သန့်သန့်ရှင်းရှင်း ဖြစ်ပြီပေါ့ကွာ”

 အသက်ခုနှစ်ဆယ်ကျော် ဘိုးမှန်သည်ပင် ခပ်ဝါးဝါးသာ ရှင်းပြနိုင်ပါသည်။ရေကင်းလား မီးကင်းလားဆိုတာကလည်း မသေချာ။အောက်ခြေကားကား ထိပ်ရှူးရှူး ကင်းခြေတံရှည်ကြီးပေါ်က တစ်နေရာမှာ သင်္ဘောဆေးဖြင့် မီးကင်းဟူ၍လည်းကောင်း ၊ ထုံးဖြူဖြင့် ရေကင်းဟူ၍လည်းကောင်း ဝိရောဓိသဘောဆောင်သော ပဋိပက္ခ အဓိပ္ပာယ် နှစ်ရပ်ဖြင့် စာနှစ်တန်းထီးထီးကြီး ရှိလေတောာ့ တိတိကျကျ ပြောဖို့ ခက်လေသည်။တချို့ကတော့ ရပ်ကွက်ကို မီးဘေးက ကာကွယ်နိုင်ရန် အလို့ငှာ တည်ဆောက်ထားဟန် တူသဖြင့် မီးကင်း ကို အတည်ယူကြသလို တချို့ကလည်း မြစ်ဆိပ်ကမ်းပါးထိပ်မှာ ရှိနေသဖြင့် ရေကင်း ဘက်ကို မဲတင်းလေသည်။

 “ ရေကင်းဆိုရင် ဆယ့်နှစ်မှူးမင်းတိုင်း ကုန်တွေနဲ့ ပတ်သက်ရမှာပေါ့ဗျ ။ မြစ်ဆိပ်က တက်လာသမျှ တမာစေး ၊ ကော် (သားရေ) ၊ လျှော် ၊ အုံတုံ ၊ တင်လဲ ၊ လဲမှို့ ။ ဥသျှစ် ၊ မရိုးစစ်၊ မီးသွေး ၊ ထန်းဖူးစည်း ၊ မန်ကျည်းမှည့် ၊ ရေနံ ၊ ပွဲ့လျက် ၊ ကင်းခွန် ရှိရမှာပေါ့ ။ဒါတွေ မရှိဘူးဆိုကတည်းက ရေကင်း မဟုတ်လို့ပဲ”

 ‘ မီးကင်းပထမ’ သမားတွေက ရှေးစာ အကိုးအကားဖြင့် သက်သေထူလေတော့ ရေကင်းဆရာတို့ကလည်း အားကျမခံ။ “ ရေနံတော့ ထွက်နေတာပါပဲကွာ” တဲ့။တကယ်တော့ သည်ကင်းခြေတံရှည် ကိုယ်တိုင်က ဟုတ်ဟုတ်ငြားငြား မဖြစ်လောက်သော်လည်း သူ့ကိုတည်မှီ၍ ဆွေးနွေးချက်တွေက ရွှေဘုံနိဒါန်းနှင့် ချီလေသည်။

 “ ဆိပ် ၊ တည် ၊ ပွဲ ၊ ကင်း ၊ ကူးတို့ ခွန်တဲ့ ခင်ဗျ ၊ လှေဆိပ် လှည်းဆိပ်က ရတဲ့အခွန် ၊ ကင်းဆိပ်များက ရတဲ့အခွန် ၊ ဆိုင်ကနားနဲ့ အတည်ရောင်းဝယ်တဲ့ အခွန် ၊ ပွဲစား ပွဲပြတ်များထံက ရတဲ့အခွန် ၊ ကင်းဆိပ်များက ရတဲ့ အခွန်၊ ကူးတို့ လှေများက ရတဲ့အခွန်ရယ်လို့ မဟာမုနိဘုရားသမိုင်းကျောက်စာ ၊ တော်စိန်ခိုရဲ့ လွှတ်တော်မှတ်တမ်းများမှာ ဆိုလေတော့ သည်ကင်းခြေတံရှည်ဟာ”

 ထားပါတော့။မည်သည့်ကင်းဖြစ်ဖြစ် အရေးမကြီးပါ။ရပ်ကွက်ထဲ လက်ဖက်ရည်ဆိုင်ထဲ တခါတလေ စိတ်ရောက်လျှင်လည်း ငြင်းကြ၊ခုံကြတာမျိုး ၊ သူနိုင်ကိုယ်နိုင် ပြောကြတာမျိုးရှိတုန်းက ရှိခဲ့သော်ငြား အခုတော့ သည်ကင်းနှင့် ပတ်သက်လို့ စိတ်ဝင်စားမှု နည်းကြပြီ။

ကင်းခြေတံရှည်ကြီးကလည်း ဟောင်းမြင်းလှပြီ။သည်ကင်းခြေတံရှည်ကြီးနှင့် မလှမ်းမကမ်းမှာ မြေစိုက်ကင်းတဲကလေးတစ်တဲ ရပ်ကွက်က တာဝန်ယူဆောက်လုပ်လိုက်ကြတာ မကြာသေးပါ။နွေအခါ မီးကင်းနှင့် ညရေးညတာ လုံခြုံရေးကို သည်မြေစိုက် ကင်းတဲကလေးက တာဝန်ယူနေပြီ။မြစ်ရေကြီးသည့်အခါ သဲအိတ်အလုံးနှစ်ဆယ်လောက် ချထားပြီး ရေကင်းဖြစ်ရသည်လည်း ရှိသည်။မီးကပ်မီးချိတ် လေးစုံ ၊ ရေအိုး ၊ သဲကျင်း ၊ သံချောင်းခေါက်ရန် မော်တော်ကား ဒစ်ဝှီးဟောင်းတစ်လုံး ချိတ်လိုက်သည်နှင့် မီးကင်း၏ အဆောင်ယောင် ပြည့်စုံသွားသည်။နို့ဖြင့်လျှင် ကျွန်တော်ပြောခဲ့သည့် ကင်းခြေတံရှည်ကြီးက အပိုဖြစ်သွားပြီပေါ့။

 မဖြစ်ပါ။သည်ကင်းခြေတံရှည်ဟောင်းကြီးက အိမ်ကလေး သုံးလုံးဖြစ်သွားခဲ့ပြီ။သည့်ထက် အသေးစိတ်ဆိုရလျှင် မိသားစု သုံးစုတို့ အသီးသီး အသက အသက နေရာဝင်ယူကာ ကင်းခြေတံရှည် အဖြစ်မှ သုံးထပ်အိမ် အဖြစ်သို့ ရောက်ခဲ့ပြီ ဖြစ်၏။

ကင်းခြေတံရှည်၏ ပုံပန်းကို ကျွန်တော်အရင် ပြောချင်ပါသည်။ငါးပတ်လည် သစ်တိုင်လေးတိုင်က ပျှမ်းမျှအောက်ခြေ ရှစ်ပေပတ်လည်မှာ မြေချကာ အပေါ်သို့ ခပ်ရှူးရှူးကားသွားလေ၏။အမြင့်က စိတ်အထင် ပေနှစ်ဆယ်လောက် မြင့်လိမ့်မည်။

အလယ်လောက်မှာတော့ တိုင်လေးတိုင်ကို တန်းပစ်ကာ ကြမ်းခင်းတစ်ထပ်ခင်းသည်။တိုင်ဖျားမှာတော့ ကင်းသားတို့ နေခဲ့ဖူးဟန်ရှိသည့် အခန်းကျဉ်းကလေးရှိ၍ လေးဖက်လေးတန်မှာတော့ တစ်တောင်လောက်မြင့်သည့် အပိတ်ပတ်လည် ရှိသည်။အနီးစပ်ဆုံးဆိုလျှင် စစ်ကားတွေထဲမှာ ပါတက်သည့် တပ်စခန်းထောင့်က မီးမောင်းဆလိုက်ထိုး မျှော်စင်မျိုးဖြစ်သည်။

သစ်တွေက အရင်းအဖျားညီသော သစ်ယောကျာ်းလား ၊ အဖျားသွယ်သော သစ်မိန်းမလား ဆိုတာတော့ ဘုရားရှင်မှ သိတော်မှုလိမ့်မည်။ဆွဲချသစ်လား ၊ သစ်ဘီလူးလား ၊ လမ်းချောင်းကူးလား ၊ သူကောင်တင်လား ၊ သစ်မျောက်လား ၊ နပုံးသသစ်လား ၊ သစ်နဂါးလား ၊ တံစို့သစ်လား ။ဒါလည်း မသေချာ။တွဲလွဲကျလား ၊ ထက်ကြီးအောက်ရှူးလား ၊ ချောင်းကူးလမ်းကူးလား ၊ အလယ်ပူလား ၊ သစ်ကြိတ်လား ၊ နွယ်ပတ်လား ၊ ပျားတို့လား။ပိုလို့တောင်ဝေးသေး။သည်မျှော်စင်ခြေတံရှည်ကြီး စဆောက်တုန်းက ကြက်သွန်နီ ၊ ဆိတ်ချေး ၊ ဆေးဒန်း ၊ လင်းနေ ၊ ရှိန်းခို ၊ ကန့်၊ မြင်းချေး စသော ဆေးခုနှစ်ပါးကို ဆန်ပုန်းရည်ဖြင့် ဖျော်ပြီး မြေကိုလည်းကောင်း တိုင်ကိုလည်းကောင်း ၊ သုတ်ခဲ့လိမ်းခဲ့ရဲ့လား ။သည်လို လောကီ အစီအရင်တွေ ရှိသလားဆိုတာတောင် သိကြသူတွေ မဟုတ်။

 ဤသို့အားဖြင့် အောက်ဆုံး မြေညီနေရာကျယ်ကျယ်မှာ တစ်အိမ်ထောင် ။ အလယ်ထပ် မကျဉ်းမကျယ်မှာ တစ်အိမ်ထောင် ၊ အပေါ်ဆုံးထပ် ကျဉ်းကျဉ်းမှာ တစ်အိမ်ထောင်၊ သူ့ဘုံနှင့် သူ့နေရာ စံမြန်းကြကုန်၏။

မြေညီထပ် အဲလေ့့  အောက်ဆုံးမြေကမ္ဗလာပေါ်မှာ နေကြသည့် အိမ်ထောင်စုက သဲလှေသမားတွေ ဖြစ်သည်။သဲလှေသမားဆိုတာကလည်း နူတ်ကျိုးနေသည့် ဒေသအခေါ်သာ ဖြစ်သည်။သဲကို လှေနဲ့သွားကျူံးတာလည်းမဟုတ် ၊ လှေပေါ်က ထမ်းချတာလည်းမဟုတ်။သဲမော်တော် ခေါ်ကြသည့် လုံးတော်နေတော် မော်တော်ကြီးက အလုပ်သမားလေးငါးယောက်ဖြင့် မြစ်လယ်ကို သဲသွားစုပ် ၊ မြစ်ဆိပ်ရောက်တော့ သဲကန်ထဲကို ရေတွေသဲတွေပါ မှုတ်တင် ၊ သဲကန်ကြီးတွေ ရေတွေစစ်သွားတော့ သဲသန့်သန့် ကျန်လေသည်။ဒါကိုမှ မြစ်ဆိပ်ကို သဲလာဝယ်ကြသည့် ကားတွေကို သဲမော်တော်ပိုင်က ရောင်းချသည်။သည်လို သဲမော်တော်ပေါ် လိုက်ကြသူ ၊ ဒါမှမဟုတ် သဲကန်ထဲက သဲကို ကားပေါ်ရွက်တင်ကြသူ မည်သူ့ကိုမဆို သဲလှေသမား ခေါ်ကြတာ များသည်။အခုလည်း သည် ကင်းခြေတံရှည်ကြီးအောက်မှာ လာနေကြသူတွေက သဲလှေသမားတွေ။လင်က သဲမော်တော်နှင့် မြစ်လယ်အထိလိုက်လာ သဲစုပ်ရသူဖြစ်၍ မယားက မြစ်ဆိပ်သဲကန်ထဲက သဲကို ကားပေါ်သဲတောင်းရွက်တင်ရသူတွေ ဖြစ်သည်။ကလေးတွေချည်း ငါးယောက်။သည်လင်မယား သဲဆိပ်ဆင်းကြတော့ သည်ကလေးတွေကို အကြီးမလေးဆိုသော်လည်း ရှိလှမှ ရှစ်နှစ်သမီးလောက် ရှိဦးမည်။ခြောက်လုံးပတ်ဆရာက ပတ်လုံးကလေးခြောက်လုံး အလိုက်သင့် လိုက်တီးသလို မောင်နှမ ဘုစုခရုကလေးတွေကို သူပဲထိန်းသည်။မိုးရွာတော့ သစ်ပင်ရ်ိပ်ကို ပြေးချင်ပြေး။မနီးမဝေးက ဓမ္မာရုံကို ပြေးချင်ပြေး။သဲလှေ လင်မယားရောက်လာတော့ မြေပေါ်မှာ အုတ်ခဲသုံးလုံးမီးဖိုမှာ ကမန်းကတန်းချက် ၊ကမန်းကတန်းစား ။Life is beautiful. နေစရာ ၊ စားစရာ ၊ ဝတ်စရာ ရှိလျင် ဘဝသည် ပြည့်စုံပြီ မဟုတ်လော။

 အလယ်ထပ်မှာ နေသူကတော့ လင်မယားနှစ်ယောက်တည်းသမား ဖြစ်သည်။လင်က ဇာတ်တစ်ဇာတ်က မီးစက်မောင်းသူဟု ဆိုသည်။ဇာတ်ထွက်တော့ မယားပဲ ကျန်ရစ်သည်။သားသမီးမရှိကြတော့ လင်ဇာတ်ထွက်နေချိန်မှာ မယားက ဆေးပေါ့လိပ် ယူလိပ်နေတက်သည်။ တစ်ခါတစ်ခါ ကင်းခြေတံရှည်ပေါ်က အထက်ကလေးဆီက ညဥ့်နက်သန်းခေါင် မီးခွက်ကလေး မှိတ်တုတ် ၊ ကတ်ကြေးသံ တစ်ချပ်ချပ် ရှိနေတက်သည်။တစ်ခါတစ်ခါတော့ သီချင်းသံကလေးပင် ကြားရသည်။လင်ဖြစ်သူက ဇာတ်ပွဲကပွဲ လက်ခံပြက္ခဒိန်အရ သွားချည်ပြန်ချည် ။ပွဲချိန်ကျဲတော့ မယားနှင့် များများနေရရုံ။

 အပေါ်ထပ်ကလူကတော့ သူရထားသည့် နေရာနှင့် သူ့အခြေအနေ အံကိုက်ဖြစ်သည်။တစ်ယောက်တည်းသမား။သူက သစ်လုံးမသူ ဖြစ်သည်။မြစ်ကမ်းနားက ဧရာမ သစ်လုံးကြီးတွေကို ကျွဲလှည်းပေါ် တင်ပေးရသူ ဖြစ်သည်။ကျွဲလှည်းကလည်း မြစ်ဆိပ်ကတက် ရပ်ကွက်သစ်စက်တွေဆီ မောင်းတော့ နောက်က လိုက်ကြရသည်။သစ်စက်ရောက်တော့ အလိုက်သင့် နေရာချပေး။မြစ်ဆိပ်မှာ သစ်လုံးအရေအတွက်များလျှင် များသလို အလုပ်လုပ်ရသည်။သူကိုယ်တိုင်က ကျွဲပေါက်တစ်ကောင်နှင့်တူနေပြီး အင်္ကျီရယ်လို့ ဝတ်ထားတာမျိုး မြင်ရခဲသူ ဖြစ်သည်။တစ်ကိုယ်ရေတစ်ကာယ သမားဆိုတော့ ကြုံရာမှာ တော်သလိုစားလိုက်သည်ချည်း။ညနေစောင်းတော့ ပင်ပန်းခြင်းကို အကြောင်းပြု၍ အရက်ဆိုင်ထိုင်နေတက်သည်။တစ်ခါတစ်ခါတော့ ဗွီဒီယိုရုံထဲမှာ မူးမူးနှင့် သွားအိပ်နေတက်သည်။ဗွီဒီယို ပြီးသည်အထိ မထသေးလျှင် နိုးစရာမလို ၊ နောက်တစ်ကားပြီးသည်အထိ သူအိပ်လိမ့်မည်။ပထမ မြန်မာဇာတ်ကား ဒုတိယ နိုင်ငံခြားကား ပြီးတော့မှ နှစ်ကားစာ သူ ရုံခပေးကာ သူကင်းခြေတံရှည်ကို ပြန်တက်သည်။တကယ်တော့ ဗွီဒီယိုကြည့်ချင်တာထက် ရုံဝင်ခပေးပြီး လာအိပ်ခြင်း ဖြစ်သည်။တစ်ခါတစ်လေ ရုံပိုင်ရှင်က ပထမကား လူဝင်များလို့ အိပ်တော့ မအိပ်နဲ့ဗျာ ၊ ခင်ဗျား အိပ်တော့ နေရာပုတ်တယ်လို့ ငေါက်ရင်တော့ “ ကျုပ်လည်း ခင်ဗျားဖောက်သည်ပဲဗျာ ၊ အိပ်တဲ့ဖောက်သည်လေ” လို့ ပြန်ပြောတက်သည်။မည်သို့ပင်ဖြစ်စေ ညဥ့်ကလေးနက်လျှင်တော့ သူ့ကင်းခြေတံရှည်ပေါ်တက်မြဲ။

 ကျွန်တော်ပြောခဲ့သော ထို ဆင် ၊ မျောက် ၊ ခါ သုံးဦးတို့အကြောင်း ကျွန်တော်သိထားသလောက် အဲ့သလောက်သာ ရှိသည်။သွားရင်းလာရင်း ကျွန်တော်မြင်သလောက် ၊ သူတို့ အလုပ်အကိုင်နှင့် ပတ်သက်၍ ကျွန်တော်ကြားသလောက်မှာလည်း အဲ့သလောက်သာ ဖြစ်သည်။တစ်ရက်မှာတော့ ကျွန်တော့်စာအုပ်စင်ကလေးအတွက် သစ်ကလေး အနည်းအပါး ဝယ်ဖို့ဖြစ်လာတော့ ရပ်ကွက်ကလေးထဲ ကျွန်တော်သွားရသည်။လက်သမားဆရာနှင့် ကျွန်တော်သစ်ရွေးတော့ လွှစက်ဆရာ ကိုမောင်မောင်က သစ်မာကလေးတွေ ရွေးပေးသည်။သည်နောက်တော့ ကိုမောင်မောင်နှင့် ကျွန်တော်ခင်မင်သွားသည်။သူ့ကို ကျွန်တော်က လွှဆရာလို့ခေါ်၍ ကျွန်တော့်ကို စာရေးဆရာလို့ ခေါ်သည်။ကင်းခြေတံရှည်အကြောင်း ကျွန်တော်မေးတော့ သူအံ့သြနေသည်။

 “ စာရေးဆရာက သူတို့ကို စိတ်ဝင်စားလို့လား ၊ ကျွန်တော်နဲ့ ခင်ပါတယ်။သစ်စက်ထဲ အလေးအပင် မရင် သူတို့ ဘောက်တွေ ပြေးခေါ်ရတာ ဆရာရဲ့။သဲလင်မယားက နာမည်အရင်းတွေတော့ မသိဘူး။ရပ်ကွက်ကတော့ ကပ္ပလီ ၊ ကပ္ပလီမလို့ ခေါ်ကြတာပဲ။မီးစက်သမားက သန်းညွန့်တဲ့။မယားက ပုကျစ်တဲ့။အပေါ်ထပ်က ကောင်က ဖိုးသောင်း ။ သူတို့ သည်လိုနေကြတာ ကြာပြီ.။တစ်ခါတစ်လေ ကျွန်တော်အလုပ်လုပ်လို့ သွားခေါ်လျှင် အိမ်ပေါ်တက်ပါဦး ဆရာရဲ့ လို့ ပြောကြသေးတာ”

 ဟုတ်ပေသားပဲ။သူတို့အတွက်တော့ အိမ်ဖြစ်လိမ့်မည်။သည့်နောက်တော့ သည်လူတွေအကြောင်း ကျွန်တော်သိခွင့် ရလာခဲ့သည်။သည် ကင်းခြေတံရှည်ကြီးမှာ စနေကြစဉ်က တစ်ပြိုင်တည်းလိုလို နေကြခြင်းမဟုတ်ဘဲ ၊ ပထမဆုံးရောက်သူက လက်ရှိ အပေါ်ဆုံးအခန်းကျဉ်းမှာနေသည့် ကိုဖိုးသောင်းဟု ဆိုသည်။တစ်ယောက်တည်းသမားဆိုတော့ ကင်းခြေတံရှည်ကြီး အောက်ဆုံးက မြေကျယ်ကျယ်မှာ ပုဆိုးပတ်သလိုလို ၊ စောင်ပတ်သလိုလို အခန်းဖွဲ့ နေခဲ့ခြင်းဖြစ်သည်။ဒုတိယ ရောက်လာကြသူတွေက သဲလင်မယား အုပ်စု ။ကလေးတွေက ငါးယောက် ။ ငါးယောက်စလုံးကလည်း ဥမမည် စာမမြောက်တွေ။အပေါ်ထပ် နေဖို့က မဖြစ်နိုင်လေတော့ ကိုဖိုးသောင်းကို အပေါ် ရွှေ့ခိုင်းရသည်။သည်အတိုင်းမရ ။ရွှေ့ပြောင်းခ ငါးရာပေးခဲ့ရသည် ဆို၏။မီးစက် လင်မယားရောက်လာပြန်တော့လည်း ကိုဖိုးသောင်း အပေါ်ဆုံးကို ပြောင်းရပြန်၏။ပြောင်းရွှေ့ခ ငါးရာ။

 “ နေပါဦး ၊ ကိုဖိုးသောင်းက ဘာဖြစ်လို့ အပေါ်ကို ပြောင်းပြောင်းပေးနေရတာလဲ”

 “ ဆရာနှယ် ၊ သူက တစ်ကိုယ်ရေသမားလေ၊ ပြီးတော့ ယောက်ျားသားဆိုတော့ အပေါ် တက်ရပြုရ မခက်ဘူး။ကျန်တဲ့နှစ်စုက မိန်းမတွေ ပါတယ်၊ ကလေးတွေ ရှိပါတယ်ဆိုတော့ အပေါ်တက်ဖို့ မလွယ်ဘူးလေ၊ လှေကားရှိတာ မဟုတ်ဘူး ဆရာရဲ့ ၊ ကုပ်ဖက်တက်ကြရတာ”

 သည်တော့မှ ကျွန်တော် သဘောပေါက်သည်။ဟုတ်သားပဲ။လှေကားရယ်လို့ မရှိ။ကင်းခြေတံရှည်ကြီးက ထောက်လေးထောက်ကို တက်သွားသည့် ငါးပတ်လည် တိုင်ကြီးလေးတိုင်မှာ တစ်ကန့်စာ တစ်ကန့်စာ ချုပ်တန်း ခေါ်သည့် ကြက်ခြေခက်တန်းကြီးတွေ ရိုက်ထားသည်။ပတ်ပတ်လည် ချုပ်တန်း ကြက်ခြေခတ်တန်းကြီးတွေက တက် ၊ ဆင်းတောလည်း ချုပ်တန်းတွေကပဲ ဆင်း။မိန်းမသားနှင့် ကလေးတွေ တက်ဖို့မလွယ် ။ဒါတောင် မီးစက်ဆရာ၏ မယားက အလယ်ဆင့်အထိတော့ တက်ရသေးသည်။ချက်တော့ပြုတ်တော့ကော သည်သုံးစုမှာ တစ်ကိုယ်ရေတစ်ကာယ ဆရာ ကိုဖိုးသောင်းကတော့ ချက်ခြင်း ၊ ပြုတ်ခြင်း ကင်းသည်။သဲလင်မယားနှင့် မီးစက်လင်မယားကတော့ မြေပြင်မှာချက် ၊ မြေပြင်မှာပဲစား။ထင်းရယ် ဘာရယ်မဟုတ်ဘဲ အိမ်မိုးကပ်စဟောင်း ၊ ဝါးယောင်းခြောက်ဟောင်း ၊ ရေမျောထင်းကလေး ဘာလေးနှင့် တစ်နပ်စာကတော့ ပြီးသွားတာချည်း။တစ်ခါတစ်ရံ သဲဆရာကတော်နှင့် မီးစက်ဆရာကတော်တို့ ငြိမ်းချမ်းစွာ အတူယှဉ်တွဲ ချက်ကြတာလည်း ရှိလေသည်။တစ်ခါတစ်လေတော့ အပေါ်နှင့်အောက် အရင့်သီးဆုံးစကားလုံးများနှင့် ပစ်ပေါက်ကြသည်လည်း ရှိသည်ဆို၏။

 “ ငါ့လင်က မီးစက်မောင်းတာဟဲ့ ၊ သဲထမ်းမစားရ ပြီးတာပဲ ၊ ညည်းတို့သာ”

 “ သဲထမ်းစားတော့ ဘာဖြစ်တုန်း ညည်းလို အပေါ်မတက် ပြီးတာပဲ”

 အပေါ်မတက်တာက ဘာလဲ။ထိုအခါ မှုးမှုးရူးရူး အိပ်နေသည့် အပေါ်က ကိုဖိုးသောင်းက မခံ။

 “ ဟေ့့ မတွေ ၊ ကိုယ့်ပြဿနာကိုယ်ရှင်း ၊ ဘယ်အပေါ်လဲ ၊ တော်ကြာ ငါပါ ပါနေရော့မယ့့့် ဂန်းမတွေ”

 တစ်ခါတစ်လေ မတည့်ကြတုန်း အောက်ထပ်က ကလေးငိုသံတွေ နားငြီးတယ် လုပ်ကြသလို ၊ ဆေးလိပ် ကတ်ကြေးသံ ချပ်ချပ်ကို နားမခံနိုင်ဘူး လုပ်ချင်လည်း လုပ်ကြသတဲ့။သုံးအိမ်ထောင်စလုံး၏ တစ်ကိုယ်ရေ သန့်ရှင်းရေး ဝမ်းမီးဓာတ်စာဟောင်း ကိစ္စကတော့ ဧရာဝတီမြစ်ကို စစ်မှ ပေါ်လိမ့်မည်။ရေချိုးတော့ မြစ်ထဲ။တပိုတပါးသွားတော့ မြစ်ထဲ။ကလေးတွေကတော့ နေ့နေ့ညည မနီးမဝေးမှာ ဗြောင်ထိုင်ဝံ့ကြသူတွေ။သောက်ရေကတော့ တစ်အိုးစီ ရှိကြသည်ဆို၏။မြစ်ရေတစ်အိုး ခပ်ထားလျှင် သောက်ပါလေ့။အလယ်ထပ်က မီးစက်လင်မယားကလည်း ရေတစ်အိုးတော့ အလယ်ထပ်ရောက်အောင် တင်ရသည်။

 တစ်ခါတစ်လေ ခိုက်ရန်မရှိသည့် ငြိမ်းချမ်းရေး ကာလမှာတော့ ဟင်းခွက် အကူးအလူးလို ၊ ဟိုဟာလေး လှမ်းလိုက်ပါဦး ၊ သည်ဟာလေး ကမ်းလိုက်ပါဦးဆိုတာမျိုးလို သုံးအိမ်ထောင် စနစ်တစ်ခုနှင့် နေကြသည်လည်း ရှိလေ၏။

 “ သူတို့အချင်းချင်း နေထိုင်မကောင်းရင်တောာ့လည်း တစ်လှည့်စီ ကုကြတာ စာရေးဆရာရဲ့ ၊ ဗမာဆေး ( မြန်မာဆေး )ပေါ့ ဆရာရယ် ၊ ဘယ် အင်္ဂလိပ်ဆေးခန်း သွားနိုင်ပါ့မလဲ ၊ ကိုဖိုးသောင်းက လူကသာ လူကြမ်း အောက်ဆုံးက သဲလင်မယားကလေးတွေ သူကုနေတာ ခင်ဗျ”

 ကလေးတွေ ဝမ်းတင်းဝမ်းတောင့်တော့ သနပ်ခါးမြစ် သွေးတိုက်သည်။သူငယ်နာ ထသည့်အခါ ကြွေစေ့မီးဖုတ်ပြီး သွေးတိုက်သည်။ဝမ်းကျစေလိုတော့ ပိုးဟပ်ချေး ကျွေးသည်။အပူရေငတ် အတက်ရေငတ် ဖြစ်တော့ ဇွန်းချေး ၊ လှေကားပေါင်ချေး ၊ ထုပ်လျှောက်စွန်းတွင် တင်သည့်ချေး ၊ ကြက်သွန်နီ ၊ နနွင်းခေါင်းကအစ ၊ ဆိတ်ဖူး ၊ လင်းနေ ၊ ခုံညင်းဆံကအစ ရှာဖွေပြီး လက်တစ်ကမ်း ဆေးပညာကို သုံးလေသည်။ကျန်တာ အကုန်ရှာလို့ ရနိုင်သော်လည်း လှေကားလက်ရန်းချေး( လှေကားလက်ကိုင်တန်းမှာ တင်သည့်ချေး) က ရှာဖို့ခက်သည်။

 “ ခက်သဟာ ၊ တို့ သုံးထပ်စလုံးမှာ လှေကားလက်ရန်းချေးတော့ ရှားသား”

 ကြက်ခြေခတ်တန်း တွယ်တက်ရသူတို့ လှေကားလက်ရန်းချေး ရဖို့ ခက်သည်ကော။ကိုဖိုးသောင်းဖျားတော့ သဲဆရာကတော်ရော မီးစက်ဆရာကတော်ပါ ဆရာဝန်တွေ ဖြစ်ကြသည်။ဆရာဝန်ကနှစ်ယောက် ၊ ရောဂါလက္ခဏာ ( symptom ) က တစ်မျိုးစီ ၊ ရောဂါစစ်တမ်း ( diagnosis ) က တစ်မျိုးစီ။

 တစ်ယောက်က မြစ်ဆိပ်မှာ နေပူခံရလွန်းလို့ အကြောင်းပြကာ နေဇာရွက်ဟင်းချက်ကျွေးဖို့ စီမံသလို ၊ တစ်ယောက်ကတော့ နေပူလွန်တာလောက်တော့ ထန်းလျက်နှင့် ကြက်သွန်နီရောစားရုံပါဟု ဆိုလေသည်။သွေးမတော် သားမစပ် ကိုဖိုးသောင်းကြီးကို နှိပ်နှယ်ပေးကြသော်လည်း မီးစက်ဆရာက သော်လည်းကောင်း ၊ သဲဆရာက သော်လည်းကောင်း ငြိုငြင်တာမျိုးမရှိ။

ဤသို့အားဖြင့် အောက် အလယ် အထက် သုံးကန့်သော ကင်းခြေတံရှည်အိမ်၌ ပစိပညတ် နူတ်ဖြင့်သိစေခြင်း ၊ ဝစီပယောဂ နူတ်ဖြင့် လုံလပြုခြင်းတို့သည် အားကောင်းသည့်အခါ ရှိသလို မရှိသည့်အခါ၌ မီးပြင်းတိုက်သောအိုး၌ တည်သောရေပေါက်ကဲ့သို့ ခြောက်ခန်းကြသည်လည်း ရှိလေ၏။

ဤအိမ်သုံးကန့်၌ သုဘာသိတ ၊ အကျိုးစီးပွားနှင့် ယှဉ်သည့် ကောင်းမြတ်သောစကား ကြားခဲ၏။ပီယဝါစာ ချစ်ခင်နှစ်သက်ဖွယ် စကားနာရခဲ၏။ဓမ္မဝါစာ တရားတော်နှင့် ညီညွတ်သော စကားကတော့ မရှိသလောက်ရှားလေသည်။သစ္စဝါစာ ဖြောင့်မတ်သော စကားကတော့ ရှိချင်သည့်အခါ ရှိလေသည်။

 “ ဘုရားစင်ရယ်လို့ မရှိပေမယ့် ဖိုးသောင်းအကန့်မှာတော့ မြတ်စွာဘုရားပုံတော် ချိတ်ထားတာတော့ ရှိလေရဲ့။ဒါပေမဲ့ နတ်စင်ကျတော့ သဲလင်မယားမှာရော မီးစက်မောင်း လင်မယားမှာပါ ရှိပြန်ရော။သဲလင်မယားက ယမားမြင်းဖြူရှင် ကိုးကွယ်ပြီး ၊ မီးစက်လင်မယားက အန္နီမြင်းဖြူရှင် ကိုးကွယ်ကြသည်။မြေစာတွေ ကညွတ်တွေနဲ့ နတ်စင်ကလေးတွေကတော့ မညိုးဘူးဆရာ”

 လွှဆရာ ကိုမောင်မောင်က ပြောပြခြင်း ဖြစ်သည်။

 မည်သို့ပင်ဖြစ်စေ တောင်လေတိုက်ခတ်သော နွေဦး၌ဖြစ်စေ ၊ မြောက်လေတိုက်ခတ်သော ဆောင်းဦး၌ဖြစ်စေ ၊ မိုးမူန်တိုးပ စွေတက်သော မြစ်ရေတို့ ဗောင်းလံချိန်၌ဖြစ်စေ ၊ ကင်းခြေတံရှည်ပေါ်က သီချင်းသံ ၊ ကတ်ကြေးညှပ်သံ ၊ အပေါ်အောက် စကားတွေ ပြောကြသံတွေကတော့ ပြတ်သည်မရှိ။ဤကင်းခြေတံရှည်၌ ဘာသာတရားနှင့် သက်ဝင်ယုံကြည်မှု ရှိသည်။ချစ်ခြင်း ၊မုန်းခြင်း ရှိသည်။အချင်းချင်း စောင့်ရှောက်သော တရားတို့လည်း ရှိသည်။ရေပုပ်တက် မျောဘဝတွေဆိုငြား ကင်းခြေတံရှည်ကလည်း ဘဝကို ထင်ဟပ်သော ချစ်ဖွယ်အိမ်ကလေး ဖြစ်သည်။မကောင်းမှုသည် ကင်းခြေတံရှည်ကြီးအောက်မှာ အရူးတစ်ယောက်လိုပဲ လှည့်နေသော်ငြား ကင်းခြေတံရှည်အိမ်ပေါ်က လူတွေကတော့ ယောင်လို့မှ ငုံ့ မကြည့်ကြသူတွေ ဖြစ်သည်။

------------

နေဝင်းမြင့်

#Typing_Credit_သာထက်ဇော်