#ကလေးချစ်
#မောင်ထင်
ဆရာကြီး ဦးချစ်ပန်းသည် အိမ်ဦးခန်းရှိ လေးချောင်းထောက် စားပွဲကလေး ရှေ့၌ တင်ပျဉ်ခွေ ထိုင်ကာ ကြိမ်ကို ဝင့်လျက် ရှိသည်။ စားပွဲ၏ အကျယ်အဝန်းမှာ အလျား သုံးပေ အနံ နှစ်ပေမျှ ရှိပေလိမ့်မည်။ ဗေဒင်ဆရာများ အသုံးပြုသော ခြေထောက်တိုတိုနှင့် စားပွဲမျိုး ဖြစ်ရာ ထိုစားပွဲမျိုးကို ယနေ့တိုင် မြန်မာဆံသော အိမ်များ၌ တွေ့နိုင်ကြလေသည်။
ဆရာကတော် ဒေါ်ကြီးမေကား အိမ်၏ ဖိနပ်ချွတ်တွင် ပဲကြီးလှော်များကို စက္ကူကတော့ ထဲ၌ တပြားဖိုးစီ လီ၍ ထုပ်နေသည်။ သူ့ရှေ့၌ အဆင့်သုံးဆင့် ရှိသော ဈေးစင်ကလေး ရှိသည်။ အောက်ဆုံးထစ် အဆင့်၌ ဆီးသီး၊ ဂွေးချိုသီး၊ စိမ်းစားဥ၊ ကြံ စသော စားစရာများကို ဗမ်းထဲ၌ ထည့်ကာ တည်ခင်း၍ ထားသည်။ ဒုတိယ အဆင့်၌မူ စားတော်ပဲ၊ ကုလားပဲ၊ ပေါက်ပေါက်၊ ဆီးမုန့် စသည်တို့ကို ပုလင်း အသီးသီးတွင် ထည့်၍ ဗမ်းပြ ထားသည်။ တတိယ အဆင့်၌မူ ပေါက်ပေါက်ဆုပ်၊ မြေပဲယို၊ နှမ်းပြစ်၊ ကြံသကာ၊ ထန်းလျက်၊ အုန်းယို၊ တရုတ်မုံ့ စသည်တို့ကို မှန်သေတ္တာကလေးများနှင့် ထည့်၍ လှပစွာ ပြင်ဆင်ထားသည်။
အိမ်ဟူ၍ပင် ကျွန်ုပ်တို့က ခေါ်စေကာမူ စင်စစ် ဆရာကြီး ဦးချစ်ပန်း၏ အိမ်မှာ ကျောင်းဖြစ်သည်။ အဖိတ်နေ့နှင့် ဥပုသ်နေ့များတွင် အိမ်ဖြစ်၍ ကျန်ငါးရက်မှာ စာသင်ကျောင်း ဖြစ်သည်။ စာသင်ကျောင်းဟု ဆိုကြစေကာမူ ယခုခေတ် ကျောင်းများကဲ့သို့ အခန်းကြီးငယ် အသွယ်သွယ်ဖွဲ့၍ ဆောက်လုပ်ထားခြင်း မဟုတ်။ ရိုးရိုး မြန်မာအိမ် ဖြစ်သည်။ သို့သော် စာသင်ရသော နေရာ ဖြစ်သောကြောင့် အိမ်ကို ငါးပင်လေးခန်း ဖွင့်ထားသည်။
တံခါးမှာ ခေါက်တံခါး ဖြစ်သည်။ ငါးပင်လေးခန်း အိမ်မှာ အကျယ်ကြီး ဖြစ်သည့်ပြင် တအိမ်လုံးမှာ ဧရာမအခန်းကြီးသဖွယ် ဖြစ်ရကား ထိုခန်းမထဲတွင် သူငယ်တန်းမှ စ၍ လေးတန်းသမားအထိ ကြမ်းတပြေးတည်း စာသင်နိုင်ကြသည်။ ကျောင်းသားမှာ ပျမ်းမျှကြေး ရှစ်ဆယ်ကျော် အမြဲ ရှိသည်။ လယ်သမားတို့် လယ်ဆင်းချိန် နယုန် ဝါဆိုနှင့် ငါးပိသမားတို့ ပင်လယ်ဆင်းချိန် တော်သလင်း သီတင်းကျွတ် လောက်၌ ကျောင်းသူ ကျောင်းသား အနည်းငယ် ပါးသည်။ ထိုအချိန်များ၌ ကျောင်းသား ကျောင်းသူ အစုစုပေါင်းမှာ အမြဲတမ်း ငါးဆယ်ကျော်မျှသာ ရှိတတ်သည်။ ပြာသို၊ တပို့တွဲမှ စ၍ သင်္ကြန်တော် ပိတ်ရက် ရောက်သည့်တိုင် လေးငါးလ အချိန် အတောအတွင်း၌ကား ကျောင်းသား ကျောင်းသူပေါင်း တရာ့အစိတ်လောက်နှင့် အတော် စည်ကားပေသည်။
ဆရာကတော် ဒေါ်ကြီးမေ၏ ဈေးဆိုင်ငယ် တည်ခင်းထားသည့် ဖိနပ်ချွတ်နှင့် ခပ်လှမ်းလှမ်း ခေါင်းရင်းဖက် ရေအိုးစင် အနီးတွင် ချိတ်ဆွဲထားသော ‘အစိုးရ အထောက်အပံ့ခံ မြန်မာ စာသင်ကျောင်း’ ဟူသော ဆိုင်းဘုတ် ရှိသည်။
ထိုဆိုင်းဘုတ်မှာ ဈေးကြီးထဲမှ သံဖြူဆရာ ဦးသာလှ ကိုယ်တိုင် ပြုလုပ် စီမံပေးသော ဆိုင်းဘုတ် ဖြစ်သည်။ ရွှေဒင်္ဂါး ရေနံဆီပုံးလွတ် တခုကို ဖြန့်၍ ညီညာအောင် ပြန်ထုပြီးလျှင် အစိမ်းပုပ်ရောင် ကြက်တူရွေးတံဆိပ် သင်္ဘောဆေးကို အောက်ခံသုတ်ပြီးလျှင် မြင်းဖြူတံဆိပ် သင်္ဘောဆေး အဝါရင့်ရောင်ကို စာလုံးရေးခြယ်၍ ပျဉ်းကတိုးသားများဖြင့် လေးဖက် လေးတန် ဗောင်ခွေထားသော ဆိုင်းဘုတ် ဖြစ်သည်။
ထိုဆိုင်းဘုတ်မှာ အနိယတ္တ မဟုတ်ချေ။ သံဖြူဆရာ ဦးသာလှက သူ၏သားကို ကျောင်းအပ်သောအခါ ကျောင်းဝင်ကြေးသဖွယ် ကန်တော့ထားသော ဆိုင်းဘုတ် ဖြစ်သည်။
ကျောင်းထဲ၌ စာအံသံများသည် တညံညံနှင့် ရှိရာမှ အသံပလံတို့သည် တဖြည်းဖြည်းနှင့် တိတ်သွားသည်။ ရောင်ပေစူးနှင့် ကျောင်းသား နှစ်ဦးသည် ဆရာကတော်ထံ ချဉ်းကပ်၍ “ကျွန်တော်တို့ ကမ်းနား ဆင်းပါရစေ” ဟု ခွင့်ပန်နေသည်။ ဆရာကတော်က ဗြုန်းကနဲ ချက်ချင်း ခွင့်မပေး။ ဘာလုပ် ခဏခဏ ကမ်းနား ဆင်းချင်ရသလဲ။ မကြာခင်ကပဲ တခါတက်လာ။ ယခု တခါ ဆင်းပြန်ရသလော။ သူတပါးဆိုင်က စုန်းပြူးသော ပဲကြီးလှော်များကို ခဏခဏ စားရသောကြောင့် ယခုကဲ့သို့ ကမ်းနား ဆင်းရသည် မဟုတ်လော။ အကယ်၍ ဆရာကတော် ဒေါ်ကြီးမေ၏ ပဲကြီးလှော် ကျွတ်ကျွတ်ကလေးကိုသော် ၎င်း၊ မြေပဲလှော်နှင့် ကြံသကာကို၎င်း စားခဲ့ပါလျှင် ယခုကဲ့သို့ ခဏခဏ ကမ်းနား ဆင်းရသည့် ဝဋ်ဒုက္ခမှ ကျွတ်ရမည် မဟုတ်ပါလော။
ဆရာကတော်သည် ဤကဲ့သို့ ဆုံးမဩဝါဒကထာတို့ကို ဆရာကြီး ဦးချစ်ပန်း၏ ကိုယ်စား ဟောကြားလျက် ရှိသည်။
ကျောင်းသား နှစ်ဦးအနက် တဦးက ပိုက်ကိုနှိပ်၍ မျက်နှာရှုံ့မဲ့ပြသည်။ ကျန်တဦးကမူ ကလေးငယ်တို့၏ ဝသီအတိုင်း “သေးထွက်တော့မယ် ဆရာကတော်ရဲ့” ဟု ပြောလေသည်။
“အင်မတန်ရှုပ်တဲ့ ကောင်ကလေးတွေ၊ သွား သွား ငါ့်အိမ်ပေါ် ပါမချနဲ့အုံး။ နေအုံး။ ဟိုအကောင် မနေ့က နင် ကြွေးယူတာ မဆပ်သေးပါလား”
“ဆပ်ပါ့မယ် ဆရာကတော်ရဲ့”
“ဆပ်ချင်ရင် ခုဆပ်၊ မဆပ်ရင် ကမ်းနား မဆင်းရဘူး။ နင့် ဆရာကို တိုင်လိုက်မယ်”
ထိုအခါ အကြွေးပူမိသော ကောင်ကလေးက သူ၏ အိတ်ကပ်ထဲမှ ပိုက်ဆံ တပြားကို ထုတ်ပေးလိုက်လေသည်။
ကျောင်းမှာ အတန်ငယ် တိတ်ဆိတ်သွားသည်။ ဆရာကတော်နှင့် ကျောင်းသား နှစ်ဦးတို့ အချီအချ စကားပြောနေ ကြသည်ကို ဆရာကြီးကပင်လျှင် အတိုင်းသား ကြားရသည်။ ထို့ကြောင့် ဆရာကြီးသည် စားပွဲပေါ်ရှိ ဘုံသုံးကိန်း နှင့် ဘုံညီတိုင်း တွက်နည်း စာအုပ်ကို ခဏချကာ မျက်မှန်ကို နဖူးစပ်ပေါ်သို့ တင်၍ လှမ်းကြည့်လိုက်သည်။ ထိုအခါမှ သုံးတန်းသမားဖက်မှ ကျောင်းသား နှစ်ဦးသည် ရန်ဖြစ်ရာမှ တယောက်နှင့် တယောက် ကျောက်တံနှင့် ထိုးရန် ရွယ်နေသည်ကို မြင်မိသည်။
ဆရာကြီးသည် ထားဝယ်ကြိမ်ကို ဗြုန်းကနဲမြည်အောင် ကြမ်းကို ရိုက်ရင်း လေးချောင်းထောက် စားပွဲဆီမှ ထလာသည်။ အလိုက်သိသော ကမ်းနား ဆင်းချင်သည့် ကျောင်းသားနှစ်ဦးမှာ ဖိနပ်ချွတ်မှ လွှားကနဲ ခုန်ဆင်းပြီးလျှင် ကမ်းနားရေဆင်း တန်တားရှိ အိမ်သာထဲသို့ စွပ်ဝင်ကြလေသည်။
ကျောက်တံနှင့် ထိုးရန်ဟန်ပြင်နေသော ကျောင်းသား နှစ်ဦးကား ဆရာကြီး၏ ကြိမ်ဒဏ်ကို ကော့၍ ခံကြရသည်။ ၎င်းမှ စ၍ ဆရာကြီး၏ ကြိမ်သည် လေးတန်းမှ စ၍ သူငယ်တန်းအထိ ဆက်သွားရာ
“နမော ဗုဒ္ဓါ ယသိဒ္ဓံ၊ အ၊ အာ၊ ဣ၊ ဤ” ဟူ၍၎င်း၊
“ကကြီး ယပင့် ကျ” ဟူ၍၎င်း၊
“ကကြီးရေး ကသတ် ကက်” ဟူ၍၎င်း၊
“ရေပတ်လည် ဝိုင်းသော ကုန်းမြေကို” ဟူ၍၎င်း၊
“တနင်္ဂနွေ ဂဠုန် အရှေ့မြောက်ကြုံ” ဟူ၍၎င်း၊
“ဘောဒေဝ ပုတ္တ အိုနတ်သား” ဟူ၍၎င်း၊
“သုဂတံ၊ သုဂတံ၊ သေဌံ၊ ကုသလံ၊ ကုသလံ၊ ဇဟံ” ဟူ၍၎င်း၊
အသံမျိုးစုံတို့သည် တခဲနက် ပေါ်ထွက်လာလေရာ ဆရာကြီး ဦးချစ်ပန်း၏ ကျောင်းတော် ဝိဟာမှာ စိုစိုပြေပြေ ဖြစ်သွားပြန်သတည်း။
ကျောင်းတော် ဝိဟာကြီး စိုစိုပြေပြေ ဖြစ်သည်နှင့်အမျှ သနပ်ခါး တဖွေးဖွေးနှင့် ရှိသော အမာကြည်၏ ပါးပြင်ကလေးမှာ စိုစိုရွှဲရွှဲ ဖြစ်သွားလေသည်။
အမာကြည်သည် သူ၏ တင်ပါးကလေးကို လက်နှင့်ပွတ်ရင်း တရှုပ်ရှုပ်နှင့် ကျိတ်ငိုနေသည်။ သို့သော် ငိုသံကို ကြိုးစား၍ ဖျောက်ပြီးလျှင် ဒုတိယတန်း မြန်မာဖတ်စာကို ကပျာကသီ ဖွင့်ကာ ကုန်း၍ အော်လိုက်၏။
အမာကြည် အော်လိုက်သော စာဖတ်သံထဲတွင် ရှိုက်သံကလေး ပါသည်။ ထိုရှိုက်သံသည် မောင်မင်းဟန်၏ နားထဲတွင် ကျောင်းသားပေါင်း တရာကျော်တို့ ဝိုင်း၍ ငိုကြသော အသံထက် ကြေကွဲဝမ်းနည်းဖွယ် ကောင်းလှသည်။ ထို့ကြောင့် လေးတန်းသမားတို့၏ နေရာ ကျောင်းဦးရှိ ရေအိုးစင် အနားမှနေ၍ ကျောင်းခြေရင်းဖက်တွင် ရှိသော ဒုတိယတန်းသမားတို့၏ နေရာကို မောင်မင်းဟန်က လှမ်း၍ကြည့်လိုက်သည်။
အမာကြည်သည် ဆံရစ်ဝိုင်းကလေးနှင့် မျက်နှာကလေးက ဝိုင်း၊ မျက်လုံးကလေးက ဝန်းဝန်း၊ အသားအရည်က ပြည့်ပြည့်ဖြိုးဖြိုးနှင့် တမျိုးပင် ကြည့်၍ ကောင်းလှသည်။
သူ၏ အဖေမှာ တောအုပ် ဖြစ်သည်။ မကြာမီကမှ ဤမြို့ဤရွာသို့ ပြောင်းလာကြသည်။ အမာကြည် ကျောင်းဝင်သည်မှာ သုံးလမျှပင် မပြည့်သေးချေ။ သို့ရာတွင် ထိုသုံးလမျှသော ကာလတွင်းတွင် အမာကြည်နှင့် မောင်မင်းဟန်တို့သည် ကစားဖော် ကစားဖက် ဖြစ်သွားချေပြီ။
အမှန်မှာ ကစားဖော်ချင်းမျှသာ မကချေ။ မောင်မင်းဟန်မှာ အမာကြည်၏ ဆရာလည်း ဖြစ်ချေပြီ။
မောင်မင်းဟန်မှာ မြို့ခံလူ ဖြစ်သည်။ သူ၏ ဖခင်မှာ ရပ်ရွာတွင် ဩဇာတိက္ကမ ရှိသော မြေပိုင်ရှင် ဖြစ်သည်။ မြေပိုင်ရှင် ဆိုသည်မှာ တောမြို့ကလေးတွင် လယ်သမားကြီး ဟု၍သာ ထင်ရှားပေသည်။ မောင်မင်းဟန်၏ဖခင်မှာ မည်မျှပင် ဩဇာတိက္ကမ ကြီးမားစေကာမူ ရပ်သူရွာသားတို့က ၎င်းကို မြေပိုင်ရှင်ဟု မခေါ်၊ လယ်သမားကြီး ဟူ၍လည်း အသိအမှတ် မပြုကြ။ တောမြို့၏ထုံးတမ်းစဉ်လာအရ ကုန်သည်ဟူသော ဂုဏ်ထူးဝိသေသဖြင့် မှည့်ခေါ်ကြလေသည်။
မောင်မင်းဟန်မှာ အသက် ၁၂ နှစ်မျှ မပြည့်သေး။ သို့သော် ပညာပါရမီ ရှိသူ ဖြစ်ရကား ယခုနှစ် ပညာဝန် လာ၍ စာစစ်လျှင် လေးတန်းကို ဝင်ရောက် ဖြေဆိုရတော့မည်။ လေးတန်းတွင် မောင်မင်းဟန်သည် အငယ်ဆုံး ဖြစ်သည်။ ကျောင်းသားပေါင်း တကျိပ်မျှ ရှိသည့်အနက် မောင်မင်းဟန်ကလွဲလျှင် ကျန်သူတို့မှာ အသက်အားဖြင့် ၁၄ နှစ်၊ ၁၅ နှစ်ရှိကြသည်။ အချို့မှာ လူပျိုပေါက်အရွယ်က လွန်ခဲ့ပြီးလျှင် ယခုနှစ် စာစစ် ခံပြီးသည့်နောက် မိဘများက အိမ်ထောင်ရက်သား ပေးစားရန် ကြံရွယ် ထားပြီး ဖြစ်ကြသည်။ ဤလူသိုက်ထဲတွင် မောင်မင်းဟန်သည် စာရေး၊ စာဖတ်၊ အတွက်၊ ပထဝီနှင့် လောကဓာတ် ပညာတို့တွင် အထူးလူရည်ချွန် ဖြစ်ရကား လေးတန်းမှနေ၍ နှစ်တန်းသမားများကို စာဆင်း ပြရသည်။
ယင်းသို့ စာပြရင်းနှင့် မောင်မင်းဟန်နှင့် အမာကြည်တို့မှာ သူငယ်ချင်း ဖြစ်သွားကြသည်။
အမာကြည်မှာ စကား များများမပြော။ မောင်မင်းဟန် စာပြလျှင် ရိုရိုသေသေပင် နာယူလေ့ရှိသည်။ အစဉ်အမြဲ လိုလိုပင် ချိုပြုံးသော မျက်နှာကို ထားတတ်သည်။ မိဖများက အစိုးရ အမှုထမ်း ဖြစ်သောကြောင့် မောင်မင်းဟန်တို့၏ မြို့ထက်သာသော မြို့များတွင် နေထိုင်လာခဲ့လေရာ အနည်းငယ်မျှ တောမဆံချေ။ သူ၏အသက်မှာ အလွန်ဆုံး ၉ နှစ် ၁၀ နှစ်သာ ရှိလိမ့်မည်။ သို့သော် မောင်မင်းဟန်တို့ မြို့နေ ကောင်မကလေးများ ကဲ့သို့ပင် သင်တိုင်းဝတ်၍ ကျောင်းမတက်။ အပေါ်အင်္ကျီ မပါပဲ ရှင်မီး အင်္ကျီဝတ်၍ ကျောင်းမတက်။ တကယ့် မိန်းမကြီးများကဲ့သို့ ချွေးခံအင်္ကျီ ဝတ်ဆင်၍ ကျောင်းတက်သည်။ ရွှေငွေဟူ၍ ဝေဝေဆာဆာ ဆင်မြန်းထားခြင်း မရှိပေ။ သို့သော် ရွှေဒင်္ဂါး ငါးမူးပြားကို ယိုးဒယားခက်များနှင့် ဝိုင်း၍ ရံထားသော ရွှေဆွဲကြိုး တကုံးကိုမူ အမာကြည်သည် အမြတ်တနိုး ဝတ်ဆင်ထားတတ်သည်။
အမာကြည်၏ ရှိုက်သံသည် မောင်မင်းဟန်၏ ဘဝင်ကို လာ၍ ခိုက်သည်။ ထို့ကြောင့် ဒုတိယတန်းဖက်သို့ လှမ်း၍ လှမ်း၍ ကြည့်သည်။
ထိုအတွင်း ဆရာကြီး ဦးချစ်ပန်းက “စာအံချိန် ဖြုတ်ပဟေ့။ အတွက် တွက်ကြရအောင်” ဟု ပြောလေသည်။
ဤအတွက်ချိန်ကျလျှင် မောင်မင်းဟန်က ဒုတိယတန်းသို့ ဆင်း၍ အတွက် တွက်ပြရသည်။ ထိုကြောင့် ဆရာကြီး ဦးချစ်ပန်းက အမိန့်ပေးလိုက်သည်နှင့် တပြိုင်နက် မောင်မင်းဟန်သည် အမာကြည် ရှိရာသို့ လာခဲ့သည်။
အမာကြည်၏ ပါးပြင်၌ သနပ်ခါးများ ပြယ်၍ နေသည်။ မျက်ရည်ကြောင့် ပါးပြင်ပေါ်၌ မျက်ရည်ကြောင်းများ ထင်နေသည်။ မောင်မင်းဟန်က မျက်ရည်စများကို သိမ်း၍ ပေးလိုက် ချင်၏။ သို့သော် သူငယ်ချင်း ဖြစ်သည်မှာ သုံးလမျှ မရှိသေးခင် ဤမျှ အကျွမ်းတဝင် လုပ်သော် ကစားဖော် ကစားဖက်တို့က မရှုစိမ့် ဖြစ်ကြဦးမည်။ ထို့ပြင်လည်း မောင်မင်းဟန်က ဆရာ၊ အမာကြည်က တပည့် ဖြစ်သောကြောင့် အိနြေ္ဒသိက္ခာ စောင့်ထိန်းရမည် ဖြစ်သည်။
ထိုကြောင့် မောင်မင်းဟန်သည် စိတ်ထဲတွင် တုန်လှုပ်နေသော အမူအရာကို မပြပဲ အမာကြည်ကို မေးလိုက်၏။
“အမာကြည်၊ ခုနက ဆရာရိုက်တာ အတော် နာသလား”
အမာကြည်က ဝင်းပသော မျက်လုံးကို လှန်ကြည့်ကာ
“အင်း” ဟု ပြန်ဖြေသည်။
“ငါ့မှာလဲ တတောင်ဆစ်ကို ကြိမ်ဖျား ခတ်သွားတယ်။ အတော် နာတယ်ကွယ့်”
“အင်း”
“ဒါပေမယ့် ဒို့တော့ မငိုပေါင်”
“နင်ကတော့ ယောက်ျားလေးကိုး၊ ဘာငိုမလဲ။ ဒို့ မိန်းခလေးတွေကို ဒီလောက် ရိုက်တာ မကောင်းပါဘူးဟယ်”
အမာကြည်နှင့် အတူယှဉ်၍ နေသူမှာ ရာဇဝတ်အုပ်၏ သမီး ဖြစ်သည်။ သူကား ပုလိပ်မျိုးရိုးပီပီ ရာဇမာန် ရှတတ်သည်။ ထိုကြောင့် သူက အမာကြည် ပြောသည်ကို ထောက်ခံရင်း “ဖေဖေ့ကို တိုင်မယ်” ဟု ဆိုသည်။
အမာကြည် ထိုရာဇဝတ်အုပ် သမီးကို ကြောက်ရွံ့ဟန် တူပေသည်။ ရာဇဝတ်အုပ်၏ သမီးမှာ အမာကြည်ထက် များစွာ ကြီးသည်။ စိတ်အထင် မောင်မင်းဟန် ထက်ပင် အသက်ကြီးလေမည်လား မပြောတတ်ချေ။ သို့သော် သူသည်လည်း မောင်မင်းဟန်၏ တပည့်ပင် ဖြစ်သည်။
စင်စစ် မောင်မင်းဟန် ကဲ့သို့သော ဆဲ့နှစ်နှစ်သား အရွယ်၌ ဆရာကြီး၏ အချစ်တော် တပည့်ဦး အဖြစ်ဖြင့် ဆရာကလေး ဘဝသို့ ရောက်နေသည့် အကြောင်းကြောင့် မိမိကိုယ်ကိုမိမိ တကယ့် အဓိပတိ ဆရာသမားပမာ အိနြေ္ဒ တခွဲသားလောက်ကို ဆယ်ရန် စိတ်ကူး ထုတ်မိလိုမှ ထုတ်မိပေလိမ့်မည်။ သို့သော် ဆရာ အဖြစ်ဖြင့် အိနြေ္ဒ ဆယ်နေရသည်မှာ အကြောင်းရှိပေသည်။
စင်စစ် မောင်မင်းဟန်မှာ ကလေးပင် ဖြစ်သည်။ ထို့ကြောင့် အတုမြင် အတတ်သင် ဆိုသလို ဆရာ့ဟန်ဓာတ် ခုတ်လိုသည်။ ဆရာကြီး ဦးချစ်ပန်းက ကြိမ်ကလေး တဝင့်ဝင့်နှင့် စာပြသလို သူကလည်း စာပြချင်သည်။ သို့သော် ဆရာပေါက်စကလေးအတွက် ထားဝယ်ကြိမ်သတ်သတ် မရှိချေ။
ကျောင်း၏ နောက်ဖေးတွင် ဂွေးချိုပင်ကြီး ရှိသည်။ ထိုဂွေးချိုပင်မှ ဂွေးချိုသီးကို ဆရာကတော် ပိုင်သည်။ သို့ရာတွင် အကိုင်း အရွက်တို့ကိုကား ကျောင်းသားအများတို့က သူတို့ပိုင်ဟု သဘော ထားကြသည်။ ဆရာကတော်သည် ဂွေးချိုသီး ရောင်းရန်အတွက် ဂွေးချိုပင်မှ အသီးများကို ဆွတ်ခူးသည့်အခါ မောင်မင်းဟန်နှင့်တကွ ဆရာကတော့် အပေါ် ကျေးဇူးသစ္စာ စောင့်သိသူများကို ခေါ်၍ ဒွေးချိုပင်ပေါ် အတက်ခိုင်းလေ့ ရှိသည်။ ထိုအခါမျိုး၌ မောင်မင်းဟန်နှင့် အပေါင်း အဖော်သည်တို့သည် ဂွေးချိုသီးကို ချူဆွတ်၍ ဆရာကတော့်အား ပေးပြီးသည့်နောက် အကိုင်းအခက်တို့ကို သူတို့အတွက် ယူသည်။ ဂွေးချိုရွက် နုနုကလေးများကို ပုစွန်ခြောက်၊ ငါးပိ၊ ငန်ပြာရည် စသည်တို့နှင့် သုပ်စားကြသည်။ အရွက်နု ကလေးများကို သင်ပြီး ကျန်ရစ်သော အရိုးတံတို့ကိုမူ စု၍ ထားကြသည်။ ၎င်းနောက် အတန်းထဲတွင် စာအံရင်း၊ ဂွေးချိုရွက်တံ အရင်းကို ကိုက်၍ စားကြသည်။ အရိုးတံမှာ အသီးလောက် အရသာ မရှိသော်လည်း တနေ့မှ မုံ့ဖိုး တပြားရသူတို့ အတွက်ကား များစွာ အာသာပြေစေသည်။
မောင်မင်းဟန်သည် ဒုတိယတန်းသမားတို့ကို ဂဏန်းသင်္ချာ ပြသည့်အခါ ဆရာကြီး ဦးချစ်ပန်းကို တု၍ ဂွေးချိုရွက် အရိုးနှင့် သူ၏ တပည့်များကို ရိုက်လေ့ရှိသည်။ အတွက်၌ ညံ့ဖျင်းသောသူတို့ အထဲတွင် ရာဇဝတ်အုပ်၏ သမီးလည်း ပါသည်။ ၎င်းမှာ အတန်းထဲတွင် မိမိကိုယ်ကို ကြော့နေအောင် ပြင်ဆင်ထားသူ ဖြစ်လေရာ မောင်မင်းဟန်က ရိုက်သည့်အခါ အမြဲ မျက်နှာ စူလေသည်။ သို့သော် အမာကြည်ကား မောင်မင်းဟန် ရိုက်သည်ကို ခံရသောအခါ မျက်နှာကလေး ငယ်ငယ်နှင့် နေရှာသည်။
( ဇာတ်သိမ်းဆက်ရန်) 👇👇👇
No comments:
Post a Comment