#ကလေးချစ်
( ဇာတ်သိမ်း)
#မောင်ထင်
တနေ့သောအခါ အမာကြည်က သူ၏ လက်ဝါးကလေးကို ဖြန့်ပေးရင်း “ဆရာကြီးကလဲ ရိုက်ထာဘဲ၊ ဆရာကလေးကလဲ ဆရာကြီးထက် ဆိုးချင်သေးတယ်” ဟု မောင်မင်းဟန်အား လေချိုနှင့် ပြောသည်။
“ငါက နင့်ကိုသာ ရိုက်ထာ မဟုတ်ပါဘူး။ အားလုံးကို စာမရရရင် ရိုက်တာချည်းပါဘဲ။ ဆရာကလဲ ဖျင်းတဲ့လူကို ရိုက်သာရိုက်လို့ ဆိုတာကိုး”
မောင်မင်းဟန်က သူလုပ်တာ နည်းလမ်းကျကြောင်း ဆင်ခြေ ပေးသည်။
“ဟုတ်တယ်၊ ငါ့တော့ နိုင်တိုင်း ရိုက်တယ်။ ဟိုရာဇဝတ်အုပ် သမီး မခင်ညွန့်ကိုတော့ မရိုက်ဝံ့ဘူး”
“မနေ့က မခင်ညွန့် အတွက်တပုဒ် မှားလို့ ငါ တချက် ရိုက်တယ်။ နင်က နှစ်ပုဒ်မှားတော့ ငါ နှစ်ချက် ရိုက်တယ်။ အဲဒါ ဘာဖြစ်သေးသလဲ။ အရိုက်မခံချင်ရင် ငါ့အတန်းထဲမှာ မနေကြနဲ့ပေါ့”
ဤသို့ အချီအချ ဆရာတပည့် နှစ်ယောက် စကားပြောနေ မခင်ညွှန့်က ဝင်၍ တောသည်။
“ဒို့တော့ တော်ပါပြီက္ခယ်။ ခဏခဏ အရိုက်ခံရတယ်။ ခုတော့ ဝဋ်ကျွတ်ပါပြီ။ ဒို့မကြာခင် ဒီမြို့က ပြောင်းရတော့မယ်။ ပြောင်းခါနီးမှာ နောက်ထပ် ဒို့ကိုများ ရိုက်မယ့်ကြံရင် အဖေ့ကို တိုင်လိုက်မယ်”
မောင်မင်းဟန်သည် မခင်ညွန့်၏ အဖေကို မကြောက်။ သို့သော် မခင်ညွန့် အဖေက သူ၏ အဖေကို သွား၍ တိုင်လျှင် သူကိုယ်တိုင် အရိုက်ခံရမည်ကို ကြောက်သည်။
ထို့ကြောင့် ယခုတပတ်၌ ဒုတိယတန်း ဂဏန်းသင်္ချာ ပြသည့်အခါ မခင်ညွန့် အနားသို့ မသွားပဲ အမာကြည် အနား၌သာ ရစ်သီရစ်သီ ရပ်၍နေ၊ လုပ်၍နေသည်။ အမာကြည်ကလည်း ဥာဏ် ခပ်လေးလေး ဖြစ်ရကား ယနေ့အဖို့ဆိုလျှင် အတွက် ငါးပုဒ် ပေးထားရာ ငါးပုဒ်စလုံး မှားသည်။
ထို့ကြောင့် မောင်မင်းဟန်က အမာကြည်ကို လက်ဝါး ဖြန့်ခိုင်းသည်။ အမာကြည်သည် မောင်မင်းဟန်အား သူ၏ ဝိုင်းစက်သော မျက်လုံးကလေးများဖြင့် လှန်၍ကြည့်သည်။
မောင်မင်းဟန်၏ ရင်ထဲ၌ အတော် သနားသွားသည်။ သို့သော် ဝတ္တရားသည် ဝတ္တရားပင်။ ထိုကြောင့် ငါးချက်တိတိ ဂွေးချိုရိုးဖြင့် ရိုက်သည်။
အမာကြည်က “ကြည့်စမ်း၊ အဟုတ် ရိုက်တယ်နော်။ ဆရာကြီး ရိုက်ထားလို့ နာရတဲ့အထဲ သူက အဟုတ် ရိုက်တယ်” ဟု ငိုသံပါနှင့် ပြောသည်။
“ရိုက်တဲ့နောက် အဟုတ် ရိုက်တာပေါ့ဟ”
“ငါ့တော့ ရိုက်လိုက်ထာဟယ်။ မခင်ညွန့်ကိုတော့ မရိုက်ရဲဘူး”
“မခင်ညွန့်က ငါရိုက်ထာ မခံချင်ရင် ငါ သင်မပေးရုံ ရှိတော့မှာပေါ့။ ဒါကြောင့် ငါ ဒီကနေ့ သူ့ကို စာမပြဘူး။ နင့်ကိုသာ စာပြတာ”
“တော်ပါ။ ဒီလိုသာ ရိုက်ရိုက်ပြီး စာပြတာကိုတော့ မတတ်ချင် နေပါစေတော်”
“ငါ စာပြပေးရင် တတ်မှ ကျေနပ်တယ်။ တတ်သစေ့ချင်လို့ ရိုက်သင်တာပဲ”
“အမလေး၊ တော်ပါ။ ရိုက်မှ တတ်ထာ မှုတ်ပါဘူး”
အမာကြည်က “ဘူး” ဟူသော စကားကို ပြောသည့်အခါ နှုတ်ခမ်းကလေးကို စူ၍ သူ၏ ပါးစုံ့ကလေးနှစ်ဖက် ဖောင်းကြွလာအောင် ဘူးမှုတ်၍ ပြောသည်။
မောင်မင်းဟန်က ထိုပါးစုံ့ကလေး နှစ်ဖက်ကိုကြည့်၍ ငိုင်မိသည်။
“တကယ် နာသွားသလားကွယ်”
မောင်မင်းဟန် လေပျော့ သွားသည်။
“မှန်းစမ်း နင့်လက်၊ ငါ ကြည့်စမ်းမယ်။ အေးကွယ်၊ နင်က နုဘဲ နုလွန်းပါတယ်။ ဂွေးချိုရိုးနဲ့ ရိုက်ထာ အရှိုးထင်ဘို့ မကောင်းပါဘူး”
“နို့ ဒီမှာ အရှိုးထင်နေတာဘဲ ဥစ္စာ”
မောင်မင်းဟန်သည် သူ့လက်ထဲတွင် ကိုင်ထားသော ဂွေးချိုရွက် အရိုး၏ အရင်းကို တချက်မျှ စုပ်လိုက်သည်။ ပြီးလျှင် အရိုးကို လွှင့်ပစ်လိုက်လေသည်။
“တော်ပါပြီဟယ်။ ငါက ဘယ်သူ့ကိုမှ ရိုက်ရကောင်းစေ မဟုတ်ပါဘူး။ နင်တို့ စာတတ်စေချင်လို့ပါ။ ဒါလောက်ကလေးနဲ့ အသားနာတယ် ဆိုလဲ မရိုက်တော့ပါဘူး”
မောင်မင်းဟန်က စိတ်နာကျည်းသည့် အသံနှင့် မြည်တမ်းလေသည်။
“ငါကတော့ စိတ်မဆိုးပါဘူးဟယ်။ နင် ရိုက်ထာ နာပေမယ့် ခံနိုင်ပါတယ်။ ငါ့တော့ စာမပြဘဲ မနေနဲ့နော်”
မောင်မင်းဟန်၏ ရင်ထဲတွင် မည်သို့ ဖြစ်သွားသည် မသိ။ ဖိုလှိုက် ဖိုလှိုက် ရှိလာသည်။ သူ့စိတ်ထဲ၌ အမာကြည်ကို ညီမကလေး ချစ်ရသလို ချစ်လာမိသည်။ သို့သော် ထိုအချစ်မှာ သူ့ ညီမကလေးကို ချစ်ရသော အချစ်နှင့်လည်း တူလိမ့်မည် မဟုတ်ဟု ထင်မိသည်။ ဤအချစ်မျိုးကို ရိုးရိုးချစ်ဟု ခေါ်ရပေမည်လော။ ဆန်းဆန်းချစ်ဟု ခေါ်ရပေမည်လော။ မောင်မင်းဟန် နားမလည်။ သို့သော် သူသည် ချစ်မိသည်ကိုပင်လျှင် သူ့ဟာသူ မလုံ။ သည်လို ချစ်မိသည်ကို အပြစ်ရှိသည်ဟူ၍ သူ မယူဆ။ သို့သော် သည်လို ချစ်မိသည်ကို အဘယ့်ကြောင့် သူ ရှက်မိကြောင်း သူ့ဟာသူ အဖြေမပေးတတ်။
အမာကြည် အပေါ်၌ စိတ်ထား မရိုးတော့ပြီ။ ထို့ကြောင့် မောင်မင်းဟန်သည် အမာကြည့် အနားသို့ မကပ်ဝံ့တော့ချေ။
စာပြသည့်အခါ အမာကြည်ကို မျက်နှာလွှဲ၍ နေရသည်။ နှစ်ဦးသား မျက်နှာချင်း ဆိုင်ရသည့်အခါ စကားကို ဝတ်ကျေတန်းကျေ ပြောသည်။ အတွက်မှားလျှင် မှားသည်ဟုသာ ဆိုသည်။ ယခင်ကလို အမှန်ကို တွက်ချက်၍ မပြချေ။
ဒုတိယတန်း သမားများကို စာပြရာ၌ မောင်မင်းဟန်သည် ထေရ်ကြီး ဝါကြီး ရဟန်းတော်များကဲ့သို့ အိနြေ္ဒ ကြီးလှပေသည်။
တနေ့သောအခါ မောင်မင်းဟန်သည် ကျောင်းရှေ့ရှိ ဆဲ့နှစ်ရာသီ ပန်းပင်ကြီးကို မှီ၍ ကောက်ညှင်းထုပ် စားနေလေသည်။
သူ့အနား ပတ်ဝန်းကျင်တွင် ကျောင်းသား ကျောင်းသူများ ဆူညံစွာ ကစားနေကြသည်။ လမ်းမပေါ်၌ ကျောင်းသားများက ဖန်ဒိုး လှိမ့်နေကြသည်။ ကျောင်းသားတဦးက ရှုံးသဖြင့် “ကံချာ”တွင်းကို လက်နှိုက်ကာ လက်ကို ခေါက်ထားသည်။ နိုင်သောကျောင်းသားက ရှုံးသူ၏ လက်ခေါက်ကို ဖန်ဒိုးနှင့် ပစ်သည်။ ဂေါက်ကနဲ မြည်သော အသံကို မောင်မင်းဟန် ကြားရသည်။
အခြားတဝိုင်း၌ကား ကောင်မလေးများ ဂုံညင်းကစားနေသည်။ သူတို့ ပိုင်းထဲမှာ ဘဲလိန်၊ ဇီနှင်း၊ ဂံကြီး၊ ဂံကလေး ဟူသော အသံများ ဆူညံနေသည့် အထဲတွင် တဦးနှင့်တဦး “မိုးကျူးပြီ” “မကျူးသေးဘူး” ဟူသော ငြင်းခုန်သံတို့လည်း ဆူညံနေသည်။
အမာကြည်သည် ဂုံညင်းဝိုင်းကို ကြည့်နေရာမှ မောင်မင်းဟန် ကောက်ညှင်းထုပ် စားနေသည့် ဆဲ့နှစ်ရာသီ ပင်ကြီးဆီသို့ လျှောက်လာသည်။ မောင်မင်းဟန်ကား သူ့ကိုမမြင်။ ကျောင်းနှင့် တခေါ်လောက် ဝေးသော ကမ်းနားတန်းတွင် ရန်ကုန် သင်းဘောကြီး ဆိုက်ရောက်လာသဖြင့် ကော်ရင်ဂျီ ကူလီများ အူယားဖားယား ပြေးလွှားနေသည်ကို ကြည့်နေသည်။
“မင်းဟန်၊ မင်းဟန်။ ငါခေါ်တာတောင် ပြန်မထူးဘူး။ သူ့ ကောက်ညှင်းထုပ်ကလေး ဝေစားရမှာစိုးလို့ ထင်ပါရဲ့”
အမာကြည်က ဤသို့ စကားနာထိုးလိုက်ခါမှ မောင်မင်းဟန်က အမာကြည်ကို လှည့်ကြည့်မိသည်။
“မကြားလို့ပါဟယ်။ ကောက်ညှင်းထုပ် စားချင်ရင် ရော့။ တခြမ်းတော့ ကျန်သေးတယ်”
“ဟင့်အင်း၊ မစားချင်ပေါင်။ ငါမြေပဲလှော် ဝယ်စားလို့ ဗိုက်ပြည့်နေပါပြီ”
“နင် မကစားဘူးလား”
“မကစားချင်ပါဘူး”
“ဘာဖြစ်လို့လဲ”
“ငါကတော့ ဘာမှ မဖြစ်ပါဘူး။ နင်ကတော့ ငါ့ကို မခင်ညွန့်လို အောက်မေ့လို့လား ဟင်။ ငါ့ကို စိတ်နာသလား။ အခုတလော ငါ့ကိုတောင် စာမပြတော့ဘူး။ နင် မပြချင်ရင် နေနိုင် ပါတယ်ဟယ်။ နောက်လဲ ပြရမှာ မဟုတ်ပါဘူး”
အမာကြည်သည် သာမန်အားဖြင့် အာသွက် လျှာသွက် မဟုတ်ချေ။ သို့သော် သူ့ရင်ထဲ၌ မကျေနပ်သည့် အချက်များ ရှိနေ၍ သူ့ရင်ထဲမှ စကားများ ပွင့်ထွက်လာသည်။
“ငါက နင့်ကို စိတ်မနာပါဘူးဟယ်။ နင်ကသာ ငါ့ကို စိတ်နာမလားလို့။ ငါ နင့်ကိုနောက် ဘယ်တော့မှ မရိုက်ပါဘူး”
“ရိုက်ချင် ရိုက်ပါဟယ်၊ ငါ စိတ်မဆိုးပါဘူး။ နင်က ငါ့ကို မရိုက်ပဲ ဒီ့ပြင် ကောင်ကလေးတွေ ကိုသာ မဲပြီးရိုက်နေတော့ ငါ စိတ်မကောင်းပါဘူး။ နင်က ဒို့ဆရာပါ။ ရိုက်နိုင်ပါတယ်။ နောက်ကို ရိုက်ပါနော်”
“ငါရိုက်တာ နာသလား။ စိတ်မဆိုးနဲ့နော်။ ရိုက်တာ မကောင်းပါဘူး။ နင့်လဲငါ မရိုက်ပါဘူး။ တခြား ကောင်ကလေးတွေကိုလဲ ငါ မရိုက်တော့ပါဘူး။ ဒါပေမယ့် နင်က နောက်ကို ငါ စာမပြရတော့ဘူး ဆိုတာက ဘာလဲ။ ငါ့အတန်းမှာ မနေချင်ဘူးလား”
“နေချင်ပါတယ်။ ဒါပေမယ့် အဖေက မအူပင်ကို ပြောင်းရတော့မယ်တဲ့”
“ဟင်၊ ဒါဖြင့် နင်လဲ မခင်ညွန့်တို့လို ကျောင်းထွက်ရအုံးမှာပေါ့”
“အေး”
အမာကြည်က “အေး” ဟု ဆိုပေမယ့် မောင်မင်းဟန်ကလေးမှာ ရင်ပူလာပါသည်။
“နင်တို့က မြို့ကြီး ပြကြီးတွေ ရောက်ရမှာမို့ ပျော်နေမှာပေါ့”
“ပျော်ပါဘူးကွယ်။ ငါက နင်တို့ မြို့ကလေးကို ခင်ပါတယ်”
“တော်တော်ကြာတော့ ဒို့မြို့ကို မေ့မှာပါ။ ဒို့ကိုတောင် သတိရမှာ မဟုတ်ပါဘူး”
“အမယ်၊ ဒီလို မပြောပါနဲ့ဟယ်။ နင်ကသာ ဒို့ကို မေ့မှာပါ။ ငါလဲ ကြားပါတယ်။ နင် အခု ပညာဝန် ပြန်သွားရင် လေးတန်း အောင်လက်မှတ် ရတော့မယ် မဟုတ်လား”
“အေး၊ အဲဒါ ဘာဖြစ်သလဲ”
“နင် လေးတန်းအောင်ရင် နင့်အဖေက ပုသိန်မှာ အင်္ဂလိပ်ကျောင်း ထားပေးမယ်လို့ ကြားတယ်”
“အေး၊ အဲဒါ ဘာဖြစ်သေးသလဲ”
“ပုသိန်ရောက်တော့ နင်လဲ ငါ့ကို မေ့ရောပေါ့”
“ဟင့်အင်း၊ မမေ့ပါဘူး။ ဘယ်တော့မှ မမေ့ပါဘူး”
* * *
ဦးမင်းဟန်သည် အမာကြည့်ကို မမေ့ပါ။
သူသည် ယခုအခါ ဘောဂဗလ စက်ပိုင်ရှင် ဦးမင်းဟန် ဟူ၍ သူနေထိုင်ရာ မြို့ဝယ် ကျော်စောကိတ္တိ ရှိနေသူတဦး ဖြစ်ပါသည်။ စက်သဌေးကတော် ဒေါ်စိန်ညွန့်နှင့် အလှူရေစက် လက်နှင့်မကွာ ကြည်ဖြူစွာ ပေါင်းသင်း နေထိုင်ခဲ့ရာ ယခုအခါ သမီးအကြီးကပင်လျှင် ဆယ်နှစ်အရွယ် ရောက်နေပြီ။ သားသမီး သုံးယောက် ထွန်းကားရာ အငယ်နှင့် အလတ်မှာ ယောက်ျားကလေးများသာ ဖြစ်ကြသည်။
ယခု သူ့အသက် လေးဆယ်ကျော်ပါပြီ။ သို့သော် သူသည် ကွယ်လွန်သူ ဆရာကြီး ဦးချစ်ပန်း၏ နေအိမ်ရှေ့မှ ဖြတ်၍ စက်ဝင်း အတွင်းသို့ ဆင်းလာတိုင်းလာတိုင်း သူနှင့် အမာကြည်တို့ ဆဲ့နှစ်ရာသီပင်ကြီး အောက်တွင် စကား ပြောဆိုခဲ့ကြသည်ကို အမှတ်ရနေပေသည်။ စင်စစ် ဦးမင်းဟန်သည် ပုသိန် အထက်တန်းကျောင်း၌ စာသင် နေစဉ်တွင်လည်း အမာကြည်ကို မမေ့။ ကောလိပ်ကျောင်းသို့ ရောက်သည့်အခါ၌လည်း အမာကြည်ကို လွမ်းဆွတ်မိသလိုလို။ မိဖတို့က လယ်ယာချောင်းမြောင်းတို့ကို အုပ်ချုပ်စီမံရန် ကောလိပ်ကျောင်းမှ ထုတ်၍ မိန်းမပေးစားသည့် အချိန်အထိ အမာကြည်ကို တမ်းတမိသည်။ နောက်၌ သမီးဦးကလေး ဆယ်နှစ်အရွယ် ရောက်လာသည့်တိုင်အောင် အမာကြည်ကို မမေ့သေး။
အမာကြည်ကို မောင်မင်းဟန်က ကလေးချစ် ချစ်ခဲ့ရသည်။ သို့သော် ထိုစဉ်က တဦးနှင့်တဦး ရေစက်ဆုံကြသည်မှာ ဧည့်သည်ပမာတမျှသာ ဖြစ်သည်။ တဦးနှင့်တဦး မည်သို့မျှလည်း အဆက် မရခဲ့ကြ။ အကယ်၍များ လူပျိုဖျန်းအရွယ် လူမှန်းသူမှန်း သိတတ်သော အရွယ်၌ အမာကြည်နှင့် ချစ်မိကြလျှင်-
ဦးမင်းဟန်သည် စက်သဌေးကတော် ဒေါ်စိန်ညွှန့်ကို မြင်မိသဖြင့် ထိုအတွေးကို ဆက်လက် မတွေးဝံ့။ သို့သော် ဒေါ်စိန်ညွန့်နှင့်အတူ ပါလာသော မိန်းမ ဝဝ ပြဲပြဲတဦးကိုမူ အကဲခတ် ကြည့်မိသည်။
“ကိုကို၊ ဟောဒီမှာ တောအုပ်ကြီး ဦးသာဒင်ရဲ့သမီး အမာကြည်ဘဲ။ ကျမတို့ ခရမ်းမှာ နေတုန်းက အသိ ဖြစ်ခဲ့တယ်”
ဒေါ်စိန်ညွှန့်က ဦးမင်းဟန်အား ဤသို့ အမာကြည်နှင့် မိတ်ဆက်ပေးသည်။
“ဒီနာမယ် ကြားဘူးပါတယ်”
“ဟုတ်ကဲ့ စက်သဌေးမင်းရဲ့။ ကြားဘူးမလားတော့ မပြောတတ်ဖူး။ ကျမက လွန်ခဲ့တဲ့ အနှစ် သုံးဆယ်လောက်က ဒီမြို့မှာ နေဘူးပါတယ်။ ကျမအဖေက တောအုပ်ကြီးပါရှင့်”
“အော် ဟုတ်လား။ ကျွန်တော် ခုမှ သတိရသဗျို့။ ကျွန်တော် ကျောင်းနေတုန်းက တောအုပ်ကြီးသမီး အမာကြည် ဆိုတာ ကျွန်တော်တို့နဲ့ အတူတူဘဲ”
“ဘယ်ကျောင်းမှာပါလဲ ရှင်”
“ဆရာကြီး ဦးချစ်ပန်းရဲ့ ကျောင်းလေ”
“ဟုတ်မှာပါဘဲရှင်။ ကျမလဲ ဒီမြို့ကကျောင်းမှာ တနှစ်လောက် နေဘူးပါတယ်။ ဒါပေမယ့် ဟိုတုန်းက ခပ်ငယ်ငယ်မို့ ကောင်းကောင်း မမှတ်မိပါဘူး”
“ဟုတ်မှာပေါ့လေ။ ခင်ဗျားနဲ့ ကစားဖော် ကစားဖက်တွေကိုကော ဘယ်သူ့ မှတ်မိသေးသလဲ”
“ကျမတော့ မှတ်မိသမျှ ရေးတေးတေးပါဘဲ”
“ကျုပ်ကိုကော မမှတ်မိဘူးလား၊ မင်းဟန် ဆိုတာလေ”
“ဗြုန်းကနဲတော့ ဇဝေဇဝါ ဖြစ်နေတာဘဲ”
“ကျုပ်ကတော့ စတုတ္ထတန်းက ဆင်းပြီး ဒုတိယတန်းကို စာပြတဲ့အခါ အဲဒီ အမာကြည် တယောက်ကိုတော့ အတွက်သင်ပေးရလို့ မှတ်မိပါတယ်။ အဲဒီ အမာကြည် ဆိုတာ ခင်ဗျားဘဲလား မပြောတတ်ဖူး”
“ကျမဘဲ ဖြစ်ချင် ဖြစ်မှာပါဘဲ။ ငယ်ငယ်ကလေးက ရောက်ခဲ့ပြီး အခုလို အနှစ်သုံးဆယ်လောက်မှ တခါ ပြန်ရောက်ရတာမို့ ကောင်းကောင်းတော့ မမှတ်မိဘူး”
ဦးမင်းဟန်သည် ဒေါ်အမာကြည်ကို ကြည့်ရင်း ဆရစ်ဝိုင်းကလေးနှင့် မျက်လုံးဝန်းဝန်း ပါးစုံ့ထွက်ထွက် အမာကြည် ဆိုသော ကောင်မကလေးကို ရှာမိ၏။ မတွေ့ချေ။ တင်ဆုံကားကား ပြဲပြဲဝဝ ဒေါ်အမာကြည်ကိုသာ မြင်နေရသည်။ အသား အနည်းငယ် ဖြူသည်ကိုပင် အမာကြည်ဟု ခေါ်ဆိုရမည်လော မသိချေ။
“နို့ နေပါအုံးဗျာ၊ မသိလို့ မေးပါရစေ။ တယောက်ထဲဘဲလား” ဟု ဦးမင်းဟန်က ဒေါ်အမာကြည်ကို မေးလိုက်သည်။
ဒေါ်စိန်ညွန့်က အလိုက်သိစွာဖြင့် ကြားက ဝင်၍ ဖြေသည်။
“သူက အပျိုကြီးရှင့်။ ကိုကိုနဲ့ ကျမတို့ လက်မထပ်ခင် ကထဲက သူ့မှာ လွတ်လွတ်လပ်လပ် ဘဝနဲ့ ပျော်နေခဲ့တာဘဲ”
ထိုအခါ ဒေါ်အမာကြည်လည်း ယခင်ကထက် ပိုမို ရင်းနှီးလာသော အသွင်ကို ဆောင်လေတော့သည်။
“ကျမတော့ လင်စိတ် သားစိတ် မကူးပါဘူးရှင်။ လွတ်လပ်တဲ့ သဘာဝကိုပဲ ကြိုက်ပါတယ်။ ကျမ ဒီမြို့မှာ ဆိုရင်လဲ ဘယ်သူ့မှ မမှတ်မိတော့ပါဘူး။ အဲ၊ ကျောင်းနေတုန်းက ကျောင်းရှေ့က ဆဲ့နှစ်ရာသီပင်ကြီး ကိုတော့ တခါတခါ ပြန်တွေးလိုက်ရင် သတိရတယ် ”
ဒေါ်အမာကြည်က ဤသို့ ပြောလိုက်သော အခါ ဦးမင်းဟန်သည် သူထိုင်နေသော ကုလားထိုင်မှ ငေါက်ကနဲ ထလိုက်သည်။
“ဟေ့၊ ဟေ့ ညွန့်ရဲ့။ ဟုတ်ပါပြီကွယ့်။ သူကသာ မောင့်ကို မမှတ်မိတာ။ မောင် အခု သတိရပြီ။ အမာကြည် ဆိုတာ သူပါဘဲ။ ဟုတ်ပါတယ်။ လက်စသတ်တော့ ကျုပ်တို့ ကျောင်းနေဖက် သူငယ်ချင်းတွေဘဲ။ အနှစ်သုံးဆယ်လောက် ကွဲပြီးမှ အခု ပြန်တွေ့ရတော့တယ်။ ခုဒီမှာ တည်းမယ် မဟုတ်လား။ ကောင်းပါတယ်ဗျာ။ တွေ့ရတာ ဝမ်းသာပါတယ်။ ကိုယ့်အိမ်လို သဘောထားပြီး နေပါဗျာ။ ညွန့်ရေ အဲဒါ ဒို့သူငယ်ချင်းဘဲဟ။ ပြုစုပါကွယ်။ လိုလေသေး မရှိအောင်။ ဝမ်းသာလိုက်တာဗျာ တွေ့ရတာ။”
* * *
ဦးမင်းဟန်သည် ကုန်သည်တို့ ဘာဝ လောကွတ်စကားဖြင့် ဝမ်းသာပါတယ်ဟု ပြောလိုက်စေကာမူ သူတကယ် ဝမ်းသာသည်ဟု ကျွန်ုပ်တို့ အတပ် မစွဲနိုင်။ အဘယ့်ကြောင့် ဟူမူ သူ့ရင်တွင်း၌ကား အောက်ပါအတိုင်း မြည်တမ်းနေသောကြောင့် ဖြစ်သည်။
“ငါ့နှယ်ကွယ်၊ သင်း ဒီလိုသာ ဝဝပြဲပြဲ ဖိုင့်ဖိုင့်ကြီးမှန်း သိရင် ငါဟိုတုန်းက ဒီလောက် စွဲမိမှာ မဟုတ်ပါဘူး။ အော် ဖြစ်မှ ဖြစ်ရလေ ဟိုတုံးက အမာကြည်ကို ချစ်မိတာ ဘာကို ချစ်မိတာပါလိမ့်။”
--------------
မောင်ထင်
၁၉၅၄။
[ မြန်မာဝတ္ထုတိုများ ပေ့ခ်ျမှ ကူးယူပါသည်။ ပေ့ခ်ျအား ကျေးဇူးတင်ပါသည်။]
No comments:
Post a Comment