#နင့်အမေဝှေးစေ့ခြောက်လုံး(ပုံ-နာဂသိန်းလှိုင်)
(နောက်ဆုံးပိုင်း)
#ညီပုလေး
ခန္တီး ခလရ ၅၂ တပ်ထဲမှာ ညစာစားပွဲကြီး ကျင်းပပြီးတော့ ရှစ်ရက်၊ ကိုးရက်လောက် ကြာတော့ ကျွန်တော့်ဆီ ကြေးနန်းတစ်စောင် ဝင်တယ်။
"တိုင်းကျန်းမာရေးမှူးနဲ့ လာတွေ့ပါ" ဆိုတဲ့ ကြေးနန်းဆိုတော့ ကျွန်တော် တောင်းဆိုထားတဲ့ ဆေးစာရင်းရယ်၊ ရေးထားတဲ့ ကျန်းမာရေး စီမံချက်တွေ ယူပြီး မန္တလေး ဆင်းခဲ့တယ်။
ကျွန်တော် တောင်းထားတဲ့ဆေး၊ အကုန်ရမယ်တော့ မထင်ဘူး၊ ခွဲတမ်း တစ်ခုခုတော့ ရလိမ့်မယ်လို့ ထင်ခဲ့တာ။
ဆရာ ဦးထွန်းမင်းကို သွားသတင်းပို့တဲ့အခါ ကျွန်တော့်ကို သူက ဆီးပြီး အပြစ်တင်တယ်။
"မောင်သိန်းလှိုင် ရောက်ပြီလား၊ လာထိုင်ဦး"
"ဟုတ်ကဲ့"
"မင်း အလုပ် သိပ်လုပ်တာ ဆရာတို့ ကြားတယ် ဒါပေမယ့် မင်း ရန် ခဏခဏ ဖြစ်တယ်ကွာ၊ အဲဒီလို မ ..."
"ဟာ ဆရာကလည်း တောက်တီးတောက်တဲ့ ရန်မဖြစ်ပါဘူး၊ ကိုယ့်အလုပ်နဲ့ ကိုယ်တောင် မအားပါဘူး"
ဆရာ ဦးထွန်းမင်း လေသံနှိမ့်ပြီး အသံ ခပ်အုပ်အုပ်နဲ့ ပြောလိုက်တဲ့စကား ကျွန်တော့်အတွက် သိပ်ကို ထူးဆန်းပြီး အံ့ဩစရာကြီး။
"မင်း အဝတ်အစားအပိုတွေ ဘာတွေ ပါသလား"
"မပါဘူး ဆရာ"
"မင်းကို ခေါ်တာ စစ်ခုံရုံး တင်မလို့၊ မင်းကို ပြန်လွှတ်တော့မယ် မထင်ဘူး"
"ကျွန်တော့်မှာ ဘာအပြစ် ရှိလို့လဲ ဆရာ"
"ကဲပါ အဝတ်အစားက ငါစီစဉ်လို့ ရပါတယ်၊ မင်းမိသားစုက အခု ဘယ်မှာလဲ ခန္တီးမှာလား၊ ရန်ကုန်မှာလား"
"ရန်ကုန်မှာပါ"
"အေး ကောင်းတယ်၊ တစ်ခုခုလိုရင် မန္တလေး လိုက်လာလို့ လွယ်တာပေါ့။ ခန္တီးကဆိုရင် လေယာဉ်ပတ်ကြုံမှ လာရမှာ"
စိတ်ထဲမှာ နည်းနည်း အနှောင့်အယှက် ဖြစ်မိတာ အမှန်ပဲ။ ကားတစ်စီး ထိုးစိုက်လာတယ်။ ... ထင်းရှူးပင်တံဆိပ် ကပ်ထားတဲ့ တပ်အရာရှိတစ်ယောက် ပါလာတယ်။ ဒေါက်တာ ဦးထွန်းမင်းရယ်၊ ဒေါက်တာ ဘနာဂျီရယ်၊ ကျွန်တော်ရယ် ကားနောက်ခန်းက ထိုင်ပြီး လိုက်သွား ကြတယ်။ ကားက ပုံမှန် မောင်းစေချင်တာ ကားမောင်းတဲ့ ရဲဘော်ကို ဘယ်လိုညွှန်ကြား လိုက်တယ် မသိဘူး။ သိပ်ကို အရေးပါတဲ့ တရားခံ တစ်ယောက်ကို လမ်းမှာ မသမာသူတွေ ဖြတ်လုကြမယ်လို့ ကြိုတင် သတင်းရထားလို့ မောင်းသလိုမျိုး။ မြင်းလှည်းတွေ၊ စက်ဘီးတွေ၊ ဆိုက်ကားတွေကြား အမြန် ဝီခနဲ၊ ဝဲခနဲ မောင်းပြီး ကားချင်းလည်း အမြဲ ကျော်တက်သွားတာပဲ။
ကျွန်တော့်ကို ခေါ်သွားတာ ဗိုလ်မှူးကြီး သူရဖေအောင် အခန်း ခေါ်သွားကြတာ။
"ဒေါက်တာသိန်းလှိုင် ရောက်ပြီလား"
ဆရာ ဦးထွန်းမင်းတို့၊ ဒေါက်တာ ဘနာဂျီတို့က ရောက်ပါပြီလို့ ဖြေတော့
"လာ အထဲမှာ ထိုင်"
ကျွန်တော်က ဒေါက်တာ ထွန်းမင်းတို့၊ ဒေါက်တာ ဘနာဂျီတို့ကို ခေါ်တော့ သူတို့ မဝင်ရဘူးတဲ့။ ကျွန်တော် တစ်ယောက်တည်း ထိုင်နေရမှာတဲ့။ ကျွန်တော့်ကို ကိတ်မုန့်နဲ့ လက်ဖက်ရည်နဲ့ ဧည့်ခံတယ်။ ကျွန်တော်ကလည်း ဒါမျိုး မစားရ မသောက်ရတာ ကြာတော့ ဟန်မလုပ်နိုင်ဘူး။ စားလို့ သောက်လို့ ပြီးခါနီးမှ အရာရှိငယ်လေးတစ်ယောက် လာခေါ်လို့ ကျွန်တော်တို့ နှစ်ယောက် ထွက်ခဲ့ကြတယ်။ လမ်းလျှောက်ရင်း ပါးစပ်ထဲက ဝါးလက်စ ကိတ်မုန့်တွေစား၊ ပါးစောင်ထဲက မုန့်တွေ လျှာနဲ့ ကလော်ထုတ် ပြန်ဝါးလုပ်ခဲ့ရတယ်။
အခန်းကျယ်ကြီး တစ်ခုထဲမှာ နိုင်ငံတော် အလံတွေ အနောက်မြောက်တိုင်း အလံတွေ သားသားနားနား၊စိုက်ထူထားတယ်။ တစ်ခန်းလုံး တိတ်ဆိတ်ငြိမ်နေလိုက်တာ၊ ကျွန်တော်တို့ သုံးယောက်ရဲ့ ခြေသံတွေပဲ ညံ့နေတော့တယ်။ ခဏနေတော့ ကျွန်တော့်ရဲ့ အရာရှိ ဒေါက်တာ ဦးထွန်းမင်းနဲ့ ဒေါက်တာ ဘနာဂျီတို့ ရောက်လာကြတယ်။ ကျွန်တော် ထိုင်ခါနီး ဗိုလ်မှူးကြီး စိန်မြ နောက်က နံရံမှာ ချိတ်ထားတဲ့ ဗိုလ်ချုပ်အောင်ဆန်း ပုံကို တည့်တည့်ကြည့်ပြီး ဦးညွှတ် အလေးပြုလိုက်တယ်။ ဗိုလ်မှူးကြီး စိန်မြကတော့ သူ့ကို အလေးပြုတယ်လို့ ထင်ချင် ထင်လိမ့်မယ်။ ကျွန်တော့် စိတ်ကတော့ ဗိုလ်ချုပ်အောင်ဆန်းကိုပဲ ရည်ရွယ်တာပါ။
ဗိုလ်ချုပ် အလေးပြုပြီးတော့ ကျွန်တော် ထိုင်ရမယ့် နေရာမှာ ထိုင်တော့ မနီးမဝေးမှာ ခလက ဥက္ကဋ္ဌ ဒုတိယဗိုလ်မှူးကြီး မောင်ရှိန်းက ထိုင်နေတော့ ကျွန်တော် ဝမ်းသာအားရ လှမ်းနှုတ်ဆက်လိုက်တယ်။
"ဟာ - တပ်ရင်းမှူးကြီးလည်း ရောက်နေတာကိုး"
ပြောပြောဆိုဆို နှုတ်ဆက်ရင်း ကျွန်တော် ကုလားထိုင်ကို သူ့ဘက်နီးတဲ့ နေရာရွှေ့တော့ သူက သူ့ကုလားထိုင်ကို ကျွန်တော်နဲ့ဝေးရာ ခြေတစ်လှမ်းလောက် ရွှေ့တယ်။ကျွန်တော်က လိုက်ရွှေ့တော့ သူက ထပ်ရွှေ့တယ်။ ဒီကုလားထိုင်ရွှေ့တဲ့ ဖြစ်စဉ်ကို လူကြီးတွေက လှမ်းကြည့်နေကြတယ်။ အားလုံး နေရာယူပြီးချိန်မှာ စတော့တာပဲ။
နောက်တော့မှ ပြန်စဉ်းစားကြည့်တာ၊ လူငယ်က သူ့ထက်ကြီးတဲ့သူ ခရိုင်က ဥက္ကဋ္ဌကို ယဉ်ယဉ်ကျေးကျေး၊ နှုတ်ဆက်ပေမယ့် လူကြီးတစ်ယောက်က ခက်ခက်ထန်ထန် ပြုမူနေတာကို တိုင်းမှူးတွေ မြင်လိုက်ရတာပေါ့။ ဒုဗိုလ်မှူးကြီး မောင်ရှိန်းရဲ့ပထမဆုံး စွဲချက်၊ တိုင်တန်းချက်က
"ဒေါက်တာသိန်းလှိုင်ဟာ နိုင်ငံတော်ကို မပျက်ပျက်အောင် ဖျက်လိုဖျက်ဆီး လုပ်နေတယ်"
ကျွန်တော်က လေသံအုပ်အုပ်နဲ့
"ရင်းမှူးကြီး ကျွန်တော် ဘာလုပ်လို့လဲ"
လူကြီးတွေက အဲလို စကားဖြတ်ပြောတာကို တားတယ်။
"ဒေါက်တာသိန်းလှိုင် ပြီးမှ ကိုယ်တိုင်လျှောက်လဲပါ"
ကျွန်တော် လျင်လျင်မြန်မြန် စဉ်းစားတယ်။ အလိုလိုနေရင်း သူပုန်လိုလို၊ သူကန်လိုလို၊ တော်လှန်သမားလိုလို ဖြစ်နေပြီ။ စွဲတဲ့ စွဲချက်ကလည်း သေဒဏ်ကို တန်းနေအောင်ပို့တဲ့ စွဲချက်။
"ဒေါက်တာသိန်းလှိုင် လျှောက်လဲပါ"
တော်တော် အူကြောင်ကြားနိုင်တဲ့ စွဲချက်ပဲလို့ ကျွန်တော် ကောက်ချက်ဆွဲမိတယ်။
"တပ်ရင်းမှူးကြီးရဲ့ စွပ်စွဲချက်ဟာ အမှန်ပဲဆိုခဲ့ရင် ကျွန်တော်ဟာ ဗိုလ်ချုပ်နေဝင်းရဲ့ တော်လှန်ရေးကောင်စီကို တိုက်ခိုက်ဖျက်ဆီးနေသူ တစ်ယောက်လို့ ဆိုလိုရာ ရောက်ပါတယ်။ တိုင်းမှူးကြီးတို့ စုံစမ်းကြည့်စေလိုပါတယ်။ ကျွန်တော်ဟာ အမှန်တကယ် ပျက်စီးရာ ပျက်စီးကြောင်းတွေ လုပ်ဆောင်နေတာ ထင်ရှားရင် နိုင်ငံတော်စရိတ်နဲ့ ကနေဒါနိုင်ငံ ဒါမှမဟုတ် အမေရိကန်ကို ပြည်နှင်ဒဏ် ပေးစေလိုပါတယ်"
လူကြီးတွေ တစ်ယောက်နဲ့ တစ်ယောက် ကြည့်သူ ကြည့်ကြ၊ ငါတို့ပဲ နားအကြား လွဲလေသလား။ ကျွန်တော့်ကိုလည်း အကဲခတ်ကြ၊ ဒုတိယဗိုလ်မှူးကြီး မောင်ရှိန်းကိုလည်း လှမ်းကြည့်ကြ။ အဲဒီ ပုဂ္ဂိုလ်ကတော့ ရှုကြီး တင်းထားလိုက်တာမှ ဒီဒေါက်တာ ပြုတ်ဖို့ နာရီပိုင်း၊ မိနစ်ပိုင်းပဲ လိုတော့တယ်ဆိုတဲ့ ရှုမျိုး။
"ဘာ အမေရိကန် ဟုတ်လား"
"ပြစ်မှု ထင်ရှားရင် ပြည်နှင်ဒဏ် ဝေးဝေး ပေးစေချင်တာပါ"
ခုံရုံး လူကြီးတွေ အံ့ဩကုန်ကြတယ်။
"တရုတ်ပြည်ဆိုရင် နီးတော့ ဒီတော်လှန်မှုကို ပြန်လာပြီး လုပ်ရင် လုပ်နေဦးမယ်၊ ကနေဒါ ဆိုရင် ပိုကောင်းတာပေါ့"
ဒုဗိုလ်မှူးကြီး ဗန်ကူးတို့၊ သူရဖေအောင်တို့ ပြုံးစေ့စေ့ လုပ်နေကြတယ်။
"ဒေါက်တာသိန်းလှိုင် နိုင်ငံတော် ပျက်စီးရာ ပျက်စီးကြောင်း တကယ် လုပ်သလား အမှန်အတိုင်း ပြောပါ"
ဗိုလ်မှူးကြီး စိန်မြက မျက်နှာထား တည်တည်နဲ့ စူးစူးစိုက်စိုက် ကြည့်ပြီး မေးတယ်။
"ကျွန်တော် အမှန်အတိုင်း ပြောပါမယ်"
တစ်ခန်းလုံး အသံတွေ ပြန်တိတ်သွားတယ်။ လက်နှိပ်စက် ရိုက်သူတောင် ရပ်သွားတယ်။
"ကျွန်တော်သာ ဗိုလ်ချုပ်နေဝင်းရဲ့ တော်လှန်ရေးကောင်စီကို ပျက်လိုပျက်စီး တော်လှန်ရေး လုပ်တယ်ဆိုရင် ဒုတိယဗိုလ်မှူးကြီး မောင်ရှိန်းသည် ကျွန်တော်နဲ့ အလိုတူ အလိုပါ ဖြစ်လိမ့်မယ်။ သူ အခုမှ လာတိုင်တာဟာ သစ္စာဖောက်ပြီး လာတိုင်တာပါ။
ကျွန်တော်ဟာ တကယ်ကို ပုန်ကန်နေမှန်း၊ တော်လှန်ရေး လုပ်နေမှန်းသိရင် ခန္တီးမြို့မှာတင် ကျွန်တော့်ကို ထိန်းသိမ်းရပါလိမ့်မယ်။ ပြီးတော့ ကျန်းမာရေးဝန်ကြီး ဌာနရဲ့ဝန်ကြီးတို့၊ ညွှန်ကြားရေးမှူးချုပ်တို့ဆီ ဖမ်းပိုင်ခွင့် အမိန့် တောင်းဆိုရမှာပါ။ ကျွန်တော်နဲ့အတူ ခရီးတွေထွက်၊ တစ်ပါတည်း အမှုထမ်းနေကြပြီး အခုမှ လာတိုင်တာဟာ ဒုတိယဗိုလ်မှူးကြီး မောင်ရှိန်း သူလိုချင်တာ ကျွန်တော့်ဆီက တစ်ခုခု မရလို့ အလိုတူ အလိုပါကနေ သစ္စာဖောက်သလိုမျိုး ဖြစ်နေပါတယ်။
ဒါကြောင့် ဒီအမှုမှာ ပြစ်မှုထင်ရှားရင် ကျွန်တော့်ကို ပြည်နှင်ဒဏ် အမေရိကန်ပို့ပြီး ဒုတိယဗိုလ်မှူးကြီး မောင်ရှိန်းကို တရုတ်ပြည် ပြည်နှင်ဒဏ် ပို့ပါ။
စစ်ခုံရုံး ဥက္ကဋ္ဌ ဗိုလ်မှူးကြီး စိန်မြက ဒုတိယဗိုလ်မှူးကြီး မောင်ရှိန်းကို ဘယ်တုန်းက ခန္တီးမြို့မှာ တာဝန် ထမ်းဆောင်သလဲ ဆိုတဲ့ မေးခွန်း မေးတော့ သူက ပြန်ဖြေတယ်။ သူရောက်တာ နှစ်တွေနဲ့ချီ ကြာခဲ့ပြီ။ နောက်ထပ် စွဲချက်တစ်ခု အတင်ခိုင်းတဲ့အခါ သူက
"ဒေါက်တာသိန်းလှိုင်မှာ မွေးစားသားတွေ ရှိတယ်၊ နာဂလူမျိုးကလေးတွေပါ။ အဲဒီထဲက ကလေးတစ်ယောက်ကို ကျွန်တော့်နာမည် မှည့်ခေါ်ပြီး လူသူ စည်ကားရာ အရပ်မှာ ခွေး တစ်ကောင်လိုလို ကလေးလိုလို ပြောဆိုဆက်ဆံပါတယ်" တဲ့။ တိုင်းမှူးတွေကို တိုင်တဲ့ စာရွက်ကိုင်ပြီး တစ်ချက်ချင်း စွဲချက်တင်နေတာ။ လူကြီးတွေကလည်း သူ့တိုင်စာကို ဖတ်ပြီးကြပြီးသား။ ဒါပေမယ့် ထုံးစံနဲ့အညီ လုပ်ဆောင်နေကြရတာ။
"ကျွန်တော့်မှာ မွေးစားသား နာဂကလေးမောင်ရှိန်း ဆိုတာ ရှိပါတယ်။ သူ့ကို ခွေးလို ပြောဆို မဆက်ဆံပါဘူး။ နာဂလေးကို၊ ခန္တီးမြို့မှာ ပထမဆုံး လာရောက် တာဝန်ထမ်းဆောင်တဲ့ ဒုတိယဗိုလ်မှူးကြီး တစ်ယောက်ရဲ့ နာမည် မှည့်ခေါ်ထားတာဟာ ဒီကလေး ရာထူးတာဝန်ကြီးတဲ့ ပုဂ္ဂိုလ်တွေ အားကျအတုယူစေလိုတဲ့ စေတနာနဲ့ မှည့်ခေါ်တာပါ။ သူတို့ အနာဂတ်ရည်မှန်းချက် မြင့်မားစေချင်တဲ့ မေတ္တာနဲ့ ဒီနာမည် ပေးတာပါ။ အခု ကျွန်တော့်သားက ကြီးလာရင် စစ်ထဲဝင်မယ်လို့ ပြောလို့ ကျွန်တော့်မှာ ဝမ်းသာ ရပါသေးတယ်"
"ဒုတိယဗိုလ်မှူးကြီး မောင်ရှိန်းကို ဂုဏ်ပြုပြီး မှည့်ခေါ်တာ ဖြစ်ပါတယ်။ ဗိုလ်ချုပ်နေဝင်းဟာ ဒီနိုင်ငံမှာ ဩဇာအာဏာ အရှိဆုံး ပုဂ္ဂိုလ်ပါ။ သူ့အမိန့်နဲ့ မွေးသမျှ ကလေးတွေ၊ သူ့နာမည်တွေ၊ အမှည့်ခိုင်းလို့ မရပါဘူး။ ဒါပေမယ့် မိဘတွေက သူတို့သဘောနဲ့ သူတို့ မှည့်ခေါ်ထားတဲ့ နေဝင်းတွေ အများကြီးရှိသလို၊ စောနေဝင်း၊ နေဝင်းတင့်၊ နေဝင်းမြင့်၊ နေဝင်းမောင်၊ နေဝင်းသိန်း၊ နေဝင်းသန်း နာမည်တွေ အများကြီး ရှိပေမယ့် ဗိုလ်ချုပ်နေဝင်းက တရားတဘောင် လုပ်တယ်လို့ တစ်ခါမှ မကြားဖူးပါဘူး"
ကျွန်တော့်မှာ လျှောက်လဲသာ လျှောက်လဲနေရတာ ဆရာသိန်း မျက်နှာချည်း၊ မြင်ယောင်နေတယ်။ စစ်ခုံရုံး သဘာပတိ အဖွဲ့ဝင်တွေ အားလုံး ငြိမ်ပြီး နားထောင်နေကြတယ်။
"ဒုတိယဗိုလ်မှူးကြီး မောင်ရှိန်းကို မေးခွန်းတစ်ခုလောက် မေးချင်တယ်၊ ဗိုလ်မှူးကြီးက မောင်ရှိန်း ဆိုတဲ့နာမည် ဗမာပြည်တစ်ခုလုံး ဘယ်သူမှ မှည့်ခေါ်ခြင်း မပြုရ၊ မောင်ရှိန်းရဲ့ မူပိုင်ဖြစ်ကြောင်း ရုံးတော်မှာ ဘယ်နေ့ ဘယ်ရက်က မှတ်ပုံတင်အမှတ် ဘယ်လောက်နဲ့ မူပိုင် မှတ်ပုံတင်ထားတာများ ရှိပါသလားခင်ဗျာ"
စစ်ခုံရုံး အဖွဲ့ဝင်တွေ ခေါင်းချင်းဆိုင်ပြီး တီးတိုး တီးတိုး လုပ်ကြရပြန်တယ်။ သူတို့ တိုင်ပင်ပြီးတဲ့အခါ နောက်ထပ် စွဲချက်တစ်ခု တင်ဖြစ်ရော။
"ဒေါက်တာသိန်းလှိုင်ဟာ နာဂအသိုင်းအဝိုင်းမှာ သူ့ကိုယ်သူ နာဂနတ်ဆိုပြီး ခန္တီးလေး တစ်ခရိုင်လုံးမှာ ဩဇာတိက္ကမ အလွန်ကြီးသူလို့ အထင်ရောက်ပြီး သူရဲ့ ကျန်းမာရေး ခရီးစဉ်တွေကို ခရိုင်လုံခြုံရေးနဲ့ အုပ်ချုပ်မှုကော်မတီ၊ မြို့နယ်လုံခြုံရေးနဲ့ အုပ်ချုပ်မှုကော်မတီ၊ ရပ်ကွက်လုံခြုံရေးနဲ့ အုပ်ချုပ်ရေးကော်မတီ သုံးကော်မတီ စလုံးကို လုံးဝ အသိမပေးဘဲ၊ သူ့သဘော သူဆောင်ပြီး တောင်ပေါ် တက်ချင်တဲ့ အချိန်တက်၊ ဆင်းချင်တဲ့အချိန်ဆင်း လုပ်နေပါတယ်။
"အိန္ဒိယ နယ်စပ်ဘက် အသွားမှာ သူရိက္ခာပြတ်တဲ့အတွက်ပန်ဆောင်မှာရှိတဲ့ တပ်က ဒုက္ခဆင်းရဲ ရောက်နေတဲ့ ဒေါက်တာသိန်းလှိုင်ကို ကူညီရမလားလို့ အမေးရှိလို့ ကျွန်တော်က ကူညီလိုက်ပါလို့ အကြောင်းပြန်ခဲ့ရပါတယ်။ နောက်နောင်ကို ကိုယ့်သဘော ကိုယ်ဆောင်ပြီး ခရီးထွက်ခြင်းမျိုး မပြုလုပ်ဘဲ၊ သက်ဆိုင်ရာ လူကြီးများကို အသိပေး လျှောက်လွှာတင်ခဲ့ရင် ကုန်သွယ်ရေးက ရိက္ခာများ ဝယ်ယူခွင့်ရမှာ ဖြစ်ပါတယ်"
ဒုတိယဗိုလ်မှူးကြီး မောင်ရှိန်း အဲဒီလို စွဲချက်တင်နေချိန်မှာ ကျွန်တော့်ဘောင်းဘီ ညာဘက်အိတ်ကို လက်နှိပ်လိုက်တော့ ကျွန်တော် လိုချင်တာ တစ်ခုကို စမ်းမိတယ်။ သူစွဲချက်ပြီးချိန်မှာ ကျွန်တော် ထုချေရပြီ။
"ကျွန်တော်ဟာ ဗမာလူမျိုး ဗုဒ္ဓဘာသာဝင် တစ်ယောက်ပါ။ နတ် ဘယ်ဖြစ်ချင်မလဲ၊ ဒါပေမယ့် နာဂနတ်ဆိုတာ အမှန်ပါပဲ။မြေပြန့်မှာ ကျွန်တော့်ကိုယ် ကျွန်တော် နာဂနတ်လို့ ပြောရင် လူရယ်စရာ ဖြစ်မှာပါပဲ။ ဒါပေမယ့် တောင်ပေါ်မှာတော့ ကျွန်တော်ဟာ နာဂနတ် အစစ်ပဲ။ ကျွန်တော့်ဘာသာ နတ်ဖြစ်ချင်လို့ ဖြစ်ခွင့် မပြုပါဘူး။ သူတို့ပေးတဲ့အဆင့်၊ နာဂတွေ သတ်မှတ်တဲ့ နတ်ပါ"
ဒုတိယဗိုလ်မှူးကြီး မောင်ရှိန်းရဲ့ စွဲဆိုချက်နဲ့ ပတ်သက်ပြီး ခုံသဘာပတိ အဖွဲ့ကို သက်သေပြစရာ ရှိပါတယ်။ တင်ပြခွင့်ပြုပါ။
ဗိုလ်မှူးကြီး စိန်မြက ခေါင်းညိတ်တယ်။ ဗိုလ်မှူး ဗန်ကူးလ်က တင်ပြပါတဲ့။
ဒါနဲ့ ကျွန်တော် သူတို့ရှိရာကို ရင်ကော့လျှောက်ပြီး ဘောင်းဘီအိတ်ထဲမှာ ပါလာတဲ့ စာရွက်ကို ကမ်းလိုက်တယ်။ ဗိုလ်မှူးကြီး စိန်မြက လှမ်းယူတယ်။ ကျွန်တော့်နေရာ ကျွန်တော် ပြန်လာပြီး ရပ်နေလိုက်တယ်။ စာရွက်ကို ဖတ်ပြီး ဗိုလ်မှူး ဗန်ကူးလ်ကို ပါးတယ်။ ဗိုလ်မှူး ဗန်ကူးလ် ဆီကနေ ဗိုလ်မှူး သူရဖေအောင် အဲဒီကနေ အဆင့်ဆင့် လက်ဆင့်ကမ်း ဖတ်ပြတယ်။
"ဒုတိယဗိုလ်မှူးကြီး မောင်ရှိန်း ဒေါက်တာသိန်းလှိုင် ပန်ဆောင်မှာ ဆန် အခက်အခဲ ရှိတော့ ကူညီလိုက်ပါလို့ အမိန့်ပေးလိုက်တယ်လို့ ခုနက ပြောတယ် ဟုတ်လား"
"ဟုတ်ပါတယ်"
ခုံသဘာပတိဖွဲ့တွေ ကြိတ်ပြုံး ပြုံးကြတယ်။ ကျွန်တော် ပေးလိုက်တဲ့ စာရွက်က ဗိုလ်ကြီး ဂျိုးဇက်ဆီက ဆိုင်ဖာကြေးနန်းလေ။
"ကျွန်တော်ကို လျှောက်လဲခွင့် ပြုပါ"
"ပြောပါ"
"ဒုတိယဗိုလ်မှူးကြီး မောင်ရှိန်းမှာ အပြစ်မရှိပါဘူး။ တပ်ရင်းမှူးဆိုတာ တပ်မှာ ရာထူးအကြီးဆုံး အာဏာအရှိဆုံး၊ ဩဇာအမြင့်မားဆုံး၊ ကိုယ့်တပ်ကို ကိုယ် ပိုင်ရတယ် နိုင်ရတယ်။ ဒါပေမယ့် ကျွန်တော်က ဒုဗိုလ်မှူးကြီး မောင်ရှိန်းရဲ့တပ်ကို ပိုင်တယ်။ တပ်မတော်ရဲ့ လျှို့ဝှက်ဆိုင်ဖာကြေးနန်းကို ဘာသာပြန်ဆိုနိုင်တဲ့ အရည်အချင်း ကျွန်တော့်မှာ ရှိတယ်။ ဒုတိယဗိုလ်မှူးကြီး မောင်ရှိန်း ကြေးနန်းကို ဘာသာပြန်ဆိုနိုင်ခြင်း မရှိပါဘူး။ အဲဒီတော့ တပ်ကို ပိုင်တာ ဘယ်သူလဲ။ ဒီအခြေအနေကို သူသိပြီး ကျွန်တော့်ကို ကြောက်လို့ တော်လှန်သူတို့ ပျက်ပြားစေသူတို့ လာပြီးစွပ်စွဲတာ ဖြစ်မယ်၊ သူ့မှာ အပြစ်မရှိပါဘူး၊ ကျွန်တော့်မှာ အပြစ်ရှိတာပါ"
ခုံသဘာပတိဆီက စကားသံ ထွက်ချလာတယ်။
"ဟုတ်တယ်၊ တပ်က ဆိုင်ဖာက ဆရာဝန်လက်ထဲ ဘာလို့ ရောက်ရမလဲ"
တပ်ရင်းမှူးကြီး မောင်းပြန်နဲ့ ပစ်လို့ အားမရလို့ ဟောင်ဝဇ်ဇာနဲ့ ထုပါလေရော။
"မြန်မာပြည်ရဲ့ တစ်ခုတည်းသော ဦးဆောင်ပါတီ ဖြစ်တဲ့ မြန်မာ့ ဆိုရှယ်လစ် လမ်းစဉ်ပါတီ ခန္တီးခရိုင် ပါတီယူနစ်ရုံး ရှေ့ကနေ ပါတီယူနစ် ဥက္ကဋ္ဌကို အများပြည်သူ ရှေ့မှာ ဆဲဆိုခဲ့တယ်"
"သက်သေထူစရာ ရှိသလား၊ ဘယ်လို ဆဲသလဲ"
ကုန်သွယ်ရေးရုံးက ဘောက်ချာကို သူက သက်သေထူတယ်။ ဘောက်ချာကိုလည်း ခုနက ဆိုင်ဖာကြေးနန်းလိုပဲ ခုံရုံးအဖွဲ့ဝင်တွေ တစ်လှည့်စီ လက်ဆင့်ကမ်း ဖတ်ကြပြီး၊ ဖတ်ပြီး သူတိုင်းက ပြုံးစေ့စေ့ ဖြစ်ကုန်ကြတယ်။
"ဒေါက်တာ သိန်းလှိုင် ဆဲတယ်ဆိုတာ ဟုတ်သလား"
"ဟုတ်တယ်။ ဗမာပြည်မှာ အဆဲဆုံးလူကြီးက ဗိုလ်ချုပ်တင်ဖေပါ။ ပြီးတော့ ဒုတိယက အဘ မြင့်သိန်းကလည်း အဆဲသန်ပါတယ်။ တတိယက ကျွန်တော်ပါ။ ကျွန်တော်လည်း ဆဲပါတယ်။
"ဗိုလ်မှူးကြီးတို့ ဘယ်လို ဆဲသလဲ၊ ကန်တော့ပါရဲ့ခင်ဗျာ ... နင့် ... ငါ ... မင်း ... အဆဲစုံ ဆဲပါတယ်။ စိတ်ပေါက်ရင် စိတ်ပေါက်သလို ဆဲပါတယ်။
ကျွန်တော် နမူနာ အနေနဲ့ ဆဲတဲ့အထဲမှာ ဟိုဟာ မပါဘူး။
"ခုနက တင်ပြတဲ့ စာရွက်က ဘာများပါလဲ ကျွန်တော် ကြည့်ခွင့် ရှိပါလား"
"ဒေါက်တာ မေးတာကိုပဲ ဖြေပါ"
"တရားခံဆိုတာ တရားလို တင်ပြတာကို ကြည့်ရှုခွင့် ရှိရပါတယ်။ ကြည့်ရှုခွင့် မရှိရင် စစ်ခုံရုံးလည်း မဟုတ်ဘူး၊ တရားရုံးလည်း မဟုတ်တော့ပါဘူး"
"လာယူလှည့်"
ကျွန်တော် သိတာပေါ့။ ဒါပေမယ့် သွားပြီးယူဖြစ်အောင် ယူလိုက်တယ်။ တစ်ဖက်သားကလည်း ဒါမှ ပိုခံစားရမှာလေ။ သူ့စိတ်ထဲမှာ"ကဲ ဘာတတ်နိုင်သေးလဲ ရာမ" ဖြစ်ချင် ဖြစ်နေလိမ့်မယ်။
"ဟုတ်တယ်၊ ဆဲတယ် ဒီအတိုင်း ဆဲတာ"
"ဒါဆိုရင် အပြစ်ရှိလား"
"လုံးဝမရှိဘူး၊ ကျွန်တော့်ကို ရဟတ်ယာဉ် ငှားနိုင်ရင် ခဏငှားပါ။ ခန္တီးကို ရောက်ပြန် ပြန်ခဲ့ပါမယ်။ သက်သေရုံးတော်မှာ ပြချင်လို့ပါ"
"ဘာတင်ပြချင်၊ ဘာသက်သေ ထူချင်တာလဲ"
"ကျွန်တော့် ဧည့်ခန်းမှာ ချိတ်ထားတဲ့ ပြက္ခဒိန်ဟာ သက်သေပါပဲ။ တစ်မြို့လုံးက မိတ်ဆွေတွေဆီက အဆဲမျိုးစုံ ခံယူပြီး အဲဒီ ပြက္ခဒိန် နောက်ကြောမှာ သူတို့ကိုယ်တိုင် ရေးကြတဲ့ ဆဲနည်းအစုံ ရှိပါတယ် ... ကမ္ဘာ့ ကုလသမဂ္ဂမှာ ဒီအမှုကို တရားစီရင် ခဲ့ရင် ဒီအမှုမှာ ကျွန်တော် ကွင်းလုံးကျွတ်နိုင်တယ်။
အဲဒီအခါ ဗိုလ်မှူး ဗန်ကူးလ်ဆီက အသံဩကြီး ထွက်လာတယ်။
"ဘာလို့လဲ ဒေါက်တာ"
"ပါတီယူနစ် ဥက္ကဋ္ဌ ဗိုလ်ကြီး ထွန်းလင်းရဲ့ မိခင်မှာ ဝှေးစေ့နှစ်လုံး ရှိခဲ့လို့ရှိရင် ဗိုလ်ကြီး ထွန်းလင်းဟာ ...ဖခင် ကိုယ်ဝန်ဆောင်ပြီး မွေးခဲ့တာပဲ ဖြစ်ရလိမ့်မယ်။ ဗိုလ်ကြီး ထွန်းလင်းရဲ့ မိခင်ကို စမ်းသပ်ခွင့် ရှိပါသလား၊ စမ်းသပ် ပါရစေ"
"ဒါပေမယ့် ကျွန်တော့် အဆဲက နှစ်လုံး မဟုတ်ဘူး ခြောက်လုံးပါ၊ ကမ္ဘာမှာ တစ်ယောက်မှ ခြောက်လုံး မရှိပါဘူး"
ခုံသဘာပတိတွေ ဣနြေ္ဒနဲ့ ကြိတ်ပြီး ရယ်ကြတယ်။ ကျွန်တော်ကတော့ တပည့်ကျော် ဟန်စုကိုပဲ မြင်ယောင်နေတယ်။ သူ့ကျေးဇူး။ သဘာဝကျကျ နှစ်လုံးလို့ ဆဲမိရင် ဒီကျော့ကွင်းက ကျွန်တော် လွတ်မှာ မဟုတ်ဘူး။ ဟန်စုရဲ့ များများကောင်းတယ်လေ ဆိုတဲ့ အဆိုအမိန့်ကို ပြန်ကြားယောင်မိတယ်။
စစ်ခုံရုံးက ခရိုင်ထဲမှာရှိ အုပ်ချုပ်ရေးပိုင်းက တာဝန်ရှိတဲ့ ပုဂ္ဂိုလ်တွေကို ရင်းရင်းနှီးနှီး နွေးနွေးထွေးထွေး၊ အဆင်ပြေစွာ နေဖို့နဲ့ အသိပေးသင့်တာတွေ အသိပေးဖို့ မှာကြားလိုက်တယ်။
ကျွန်တော် ထွက်လာချိန်မှာ တိုက်တိုက်ဆိုင်ဆိုင် နောက်ထပ် အများကောင်းကျိုး လိုလားတဲ့ ဆရာဝန် တစ်ယောက်နဲ့ သွားဆုံရတယ်။ သူ့ကိုလည်း စစ်ခုံရုံး တင်မလို့ဆိုတာ အခြေအနေ မြင်လိုက်ကတည်းက သိပ်သေချာနေပြီ။ သူကတော့ ဆရာဝန်လောကမှာ ထင်ရှာတဲ့ ဒေါက်တာ ဉာဏ်ချစ်ပဲ။ သူ့ကိုတော့ လက်နှစ်ဖက်စလုံး လက်ထိပ်ခတ်ထားတယ်။ နံဘေးက အစောင့်တွေက သေနတ်တွေနဲ့။
"ဟေ့ ညီလေး"
"ဟာ အစ်ကိုဉာဏ်"
ကျွန်တော်တို့ နှစ်ယောက် ဝမ်းသာအားရ နှုတ်ဆက်ကြတာကို နံဘေးကလူတွေက အံ့အားသင့်နေကြတယ်။
"မင်း အခြေအနေ ဘယ်လိုလဲကွ"
"ကျွန်တော် သေနတ်တစ်ချက်မှ မဖောက်ခဲ့ဘဲ နိုင်ခဲ့တယ် အစ်ကို"
"အေး ... ဝမ်းသာတယ်ကွ၊ ဆက်ကြိုးစား"
ဆရာ ဦးထွန်းမင်းက ကိုဉာဏ်ချစ်နဲ့ စကားပြောတာကို မကြိုက်ဘူး။ စိုးရိမ်စိတ်ကြောင့် ကျွန်တော့်ကို အချိန်မပေးဘူး၊ ဇွတ်ဆွဲခေါ်ခဲ့တယ်။ သူ့ညီ ဉာဏ်မြင့်က ကျွန်တော့် ဟောက်စ် ဖြစ်ဖူးတယ်။ ဘယ်လိုပဲ ဆွဲခေါ်ပါစေ၊ ကျွန်တော့်ရင်ထဲက ပြောစရာရှိတာတော့ သူကြားအောင် နောက်လည်ပြန်ရင်း ခပ်ကျယ်ကျယ် လှမ်းပြောလိုက်တယ်။
"အစ်ကို့ကို လေးစားတယ် ကိုဉာဏ်ချစ် ... အလေးပြုတယ်"
သူ့ကို ငှက်ဖျား ဖျားနေတုန်း တောထဲက ဖမ်းမိလာတာလို့ နောက်မှ သိရတယ်။
စစ်ခုံရုံးကအပြန် ဆရာဦးထွန်းမင်းက တယ်လီဖုန်းဆက်တော့ တစ်ဖက်က ဘာပြန်ပြောတယ် မသိဘူး။ ကျွန်တော့်ကို ကားပေါ် အတက်ခိုင်းပြီး ခေါ်လာတယ်။
"ဆရာ ကျွန်တော်တို့ အခု ဘယ်သွားကြမှာလဲဆရာ"
"စာရေးဆရာ လူထုဦးလှဆီ"
"သူနဲ့ ကျွန်တော် မသိဘူး ဆရာ"
"သူက မောင်သိန်းလှိုင်ကို သိတယ်"
ဒီလိုနဲ့ ကျွန်တော် လူထုတိုက်ကို ရောက်ခဲ့တယ်။ ဦးလေးလှက ဝမ်းမြောက်ဝမ်းသာ ကြိုဆိုပြီး သူရေးတဲ့ စာအုပ်တွေ လက်ဆောင် ပေးလိုက်တယ်။ နာဂတောင်တန်း အကြောင်းလည်း သူသိချင်တာတွေ မေးတယ်။ သူ့မိတ်ဆွေ ကျောင်းဆရာ ကိုတင်လှိုင်ကို သိသလား မေးလို့ ခင်မင်ရင်းနှီးကြောင်း ပြောပြရသေးတယ်။ ကျွန်တော်တို့ တောင်ပေါ်မှာ ကျောင်းဖွင့်တာ မအောင်မြင်တော့ ဆရာ ကိုတင်လှိုင်တို့ ခန္တီးကျောင်းမှာ တကယ် ကျောင်းတက်ချင်တဲ့ နာဂလေးတွေ ကျောင်းတက်နိုင်အောင် စီစဉ်ခဲ့ကြတာလေ။
မန္တလေး စစ်ခုံရုံးကအပြန် ခန္တီးမှာ ဆေးရုံကို အလုပ်သွား အလုပ်ပြန် ဒိပြင်လူတွေ ဆိုရင်တော့ ပါတီယူနစ်ရှေ့က အဖြတ်မှာ ခန္ဓာကိုယ် ကိုယ်ကလေး ခပ်ရို့ရို့နဲ့ သွားသူ ဖြစ်ကောင်း ဖြစ်လိမ့်မယ်။ ကျွန်တော့် စိတ်ရင်းအတိုင်းဆိုရင် အိမ်က ထွက်လာတော့ အေးအေးဆေးဆေးပဲ။ ပါတီယူနစ်ရှေ့ ရောက်ခါနီး၊ ပါတီယူနစ်ရှေ့ ရောက်၊ ပါတီယူနစ်က ကျော်ဖြတ်သွားရင် ရင်ဘတ်ကို မဆိုသလောက် ကော့ထားမိမှာပဲ။ ပြီးရင် သီချင်းလေး တဟိုဟို ဆိုမိမှာပဲ။ ဘာ သီချင်းရယ် မဟုတ်ဘူး။ စိတ်ထဲပေါ်တဲ့ ကမ္ဘာမကြေလည်း ဖြစ်ချင်ဖြစ်မယ်။ နဂါးနီလည်း ဖြစ်ချင်ဖြစ်မယ်။ လူချွန်လူကောင်းလည်း ဖြစ်ချင်ဖြစ်မယ်။
သီချင်း မဆိုဖြစ်ရင်လည်း လေကို အပေါက်အလမ်း မတည့်ပေမယ့် ချွန်ဖြစ်အောင် တရွှီးရွီး တရွမ်းရွှမ်း လုပ်သွားမိမှာပဲ။ ဒါပေမယ့် ကျွန်တော် လူကြီးစိတ် မွေးရတယ်။ မွေးတာမှ မနည်း မွေးရတာ။ လက်ခုပ်တီးသံက ကြားချင်လို့တောင် မကြားရတော့ဘူး၊ ဟေ့လည်း မလုပ်တော့ဘူး။ ကျွန်တော် ပစ်လိုက်တဲ့ သူ့အမေ ပေါင်ကြားထဲက ခြောက်လုံးပြူးက ဥက္ကဋ္ဌ ရင်ဘတ် မှန်သလား၊ နဖူး မှန်သလား မသိဘူး။ ချက်ကောင်း မှန်တာတော့ သေချာတယ်။ ကျွန်တော် အဆဲမျိုးစုံကို အဆဲခံ သုတေသန လုပ်ပြီးမှ ဆေးကျမ်းနဲ့ အညီ ဆဲတာ။ ခန္တီးမြို့သူ မြို့သား ကျွန်တော့်မိတ်ဆွေ ပညာဝန်ကစလို့ ပေါမိုင်းဘုန်းကြီးအဆုံး သူတို့ရဲ့ လက်ရေးနဲ့ အဆဲတွေကို ဘဝရဲ့ အမှတ်ရချက် အော်တိုဂရပ်(ဖ) အနေနဲ့ သိမ်းထားတဲ့ ပြက္ခဒိန် ကျွန်တော် ပြောင်းလေရာ မြို့ကို ယူသွားတာလေ။
ကျွန်တော့်ကို ၇ ရက်အတွင်း အပြုတ်တိုက်ရေး အောင်ပွဲခံ ညစာစားပွဲကြီးဟာ ခန္တီးမြို့ သမိုင်းရေးရင် စာတစ်ကြောင်း၊ နှစ်ကြောင်း၊ သုံးလေးကြောင်း ပါကောင်းပါနိုင်တယ်။
------------
ညီပုလေး
( ဆရာ ညီပုလေး၏ "ထက်မြက်တဲ့ ဓားသွားပေါ်က ချိုမြမြ ပျားရည်စက်" စာအုပ်ကြီးမှ ကောက်နုတ်ချက် ဖြစ်ပါသည်။)
[ မြန်မာဝတ္ထုတိုများ ပေ့ခ်ျမှကူးယူပါသည်။ပေ့ခ်ျအား ကျေးဇူးတင်ပါသည်။]
No comments:
Post a Comment