#အဘရေ_မိုးတွေညို့လာပြီတော့
( ဇာတ်သိမ်း)
#သုမောင်
မသန်းမြသည် ရေဟောင်းများ ထည့်ရာ ဒန်ဇလုံဟောင်းကြီး အတွင်းသို့ ကြမ်းတိုက်လက်စ ရေစိုအဝတ်ကို ကြံရည် ညှစ်သလို ညှစ်ထည့်လိုက် ပါသည်။ ဒန်ဇလုံထဲမှ ရေနှင့် အဝတ်မှ ညှစ်ထုတ် လိုက်သော ရေတို့သည် အရောင် အတူတူ ဖြစ်နေပါသည်။ ကြံရည်ရောင်ပင် ဖြစ်ပါ၏။
အဝတ်ဟောင်းကို ရေသစ် ထည့်ထားသော ဒန်အိုးထဲ ပစ်ထည့်လိုက်ပြီး ခါးဆန့်လိုက်သည်။ နဖူးမှ ချွေးသီးများကို လက်ညှိုးဖြင့် သပ်လိုက်သည်။ ကြံရည်ရောင် ချွေးသီးများ လက်ညှိုးများမှာ ပါလာ၏။
ဖုန်များ သဲများကြောင့်လော ... လိမ်းထားသော သနပ်ခါးများ အရည်ပျော် ကျသွား သောကြောင့်လော မပြောတတ်ပါချေ။
ကြံရည်ရောင်ချွေး။
နှာသီးနှင့် ပါးမို့ကြားမှ စီးကျလာသော ချွေးစကလေး တစက် နှုတ်ခမ်းသို့ လာထိသည်။ ယောင်ရမ်းပြီး လျှာဖျားကလေးဖြင့် သပ်လိုက်မိသေးသည်။ ငန်ညိုညိ။
ငန်ညိုညိ ချွေး။
“ဟဲ့ ... မြ ... နင်က ငါရောက် နေတာတောင် မသိဘူး၊ ဟင်း ကောင်မ ... ရွှေမင်းသား လာမယ် ဆိုတာနဲ့ ရင်ကွဲနာ ကျအောင် ကုန်းလုပ် နေတာလား”
သူငယ်ချင်းဖြစ်သူ ကျူကျူ၏ အသံကြောင့် အလန့်ထညက် လှည့်ကြည့်မိသည်။
“ဘာရယ် ... ကျူ ... ရွှေမင်းသား ဘာတွေ လာပြောနေတာလဲ”
“ဟင်း ... ကောင်မ ... မသိချင်ဟန် ဆောင်မနေနဲ့၊ သတင်းက မြို့ထဲမှာတောင် ပြန့်နေပြီဟာ ...”
“ငါလဲ မြို့ထဲ မရောက်တာ ကြာပြီပဲ ကျူရယ်၊ အိမ်က အလုပ်တွေ ပိနေလို့ ... ကဲ-ခုလဲ ဧည့်သည်တွေ တပြုံတမကြီး ရောက်လာမယ် ဆိုလို့ တအိမ်လုံးကို တယောက်ထဲ ကုန်းလုပ် နေရတာ ... လူကို ပင်ပန်းနေပြီ”
“အဓိပ္ပါယ် မရှိတာ မြရယ်၊ ဒီမှာတည်းမယ့် ဧည့်သည်ကို ဒီလူက မသိဘူးလို့ ... ဟီဟိ ...”
ပြောင်စပ်စပ် လုပ်နေသော ကျူကျူကို မသန်းမြ နားမလည်နိုင်ချေ။ ယောင်နန ဖြစ်နေသော မသန်းမြကို ကျူကျူက အနိုင်ကျင့်တတ်သော သူငယ်ချင်းမျိုး အပြုံး ပြုံးပြီး ...
“ကိုင်း ... လုပ်မနေနဲ့ ဒီမှာ အော်တိုစာအုပ်၊ တော်ကြာ တို့က သူ့အနား ကပ်ချင်မှ ကပ်ရမှာ၊ ပြီးတော့ လူတွေ ရုန်းရုန်း၊ ရုန်းရုန်း ကြားထဲမလဲ အရေးခိုင်းရမှာ ရှက်လို့ ... ညည်းပဲ ကူညီပြီး ရေးခိုင်း ပေးစမ်းပါ။ ထိုးမြဲ လက်မှတ်ကလေး ရယင် တော်ပါပြီ .... လိပ်စာရယင် ပိုကောင်းတာ ပေါ့ဟယ် ...”
ကျူကျူ လှမ်းပေးသော စာအုပ် ကလေးကို ကိုင်ယင်း မသန်းမြ ကြောင်နေ၏။ မိတ်ဆွေများ၊ ဆွေမျိုးများ၊ နိုင်ငံကျော်များ၏ စာတန်း ကလေးများ၊ အမှတ်တရ ဓာတ်ပုံ ကလေးများ ထိုးမြဲလက်မှတ် ကလေးများကို စုစည်းပြီး အမြတ်တနိုး သိမ်းထားရာ စာအုပ်ရှည်ရှည် လက်တဝါးစာကလေး ...။
ကျူကျူသည် မြို့လယ်မှာ နေသော လူလတ်တန်းစား ကျောင်းနေဘက် သူငယ်ချင်း ဖြစ်၏။ အော်တို စာအုပ်ကလေး ဆောင်ထား တတ်သည်မှာ မဆန်းမှန်း မသန်းမြ သိပါသည်။
သို့သော် ... ခုဟာ ဘယ်သူ့ထံ အရေးခိုင်းမှန်း၊ ဘာကြောင့် ရေးခိုင်းမှန်း ... အို ... ပြီးတော့ ဧည့်သည်တဲ့၊ ရွှေမင်းသားတဲ့။ ရှုပ်လိုက်တာနော် ...။
“ငါ့ကို နားရှင်းအောင် ပြောစမ်းပါ ကျူကျူရယ်”
ကျူကျူ တွေသွား၏။
“ဟဲ့- နင်တကယ် မသိတာလား”
ပြီးတော့ ကျူကျူသည် မသန်းမြကို သနားကရုဏာ ဖြစ်သွား၏။ အားလည်း အားနာမိ လေသည်။ အဘယ်ကြောင့် ဆိုသော် ... ဟုတ်သားပဲ ... မသန်းမြသည် သူတို့ သူငယ်ချင်းတွေ ထဲမှာ အဆင်းရဲဆုံး၊ ရှစ်တန်းနှင့် ကျောင်းထွက် လိုက်ရပြီး တံငါသည် တပိုင်း ဖြစ်နေသူ ကလေး။
“ဆောရီးပဲဟယ်၊ နင်တကယ် မသိတာလား၊ နှင့်အဖေတို့ ကလေ ပြောမပြဘူးလား”
“ဟေ့အေး”
“ဟယ်တော့ ... အံ့ပါရဲ့၊ နက်ဖြန် နင်တို့ ဗိုလ်တဲမှာ ရုပ်ရှင်အဖွဲ့ လာတည်းမယ် လေဟာ၊ အဲဒါ ကိုတာ ပါမယ်တဲ့”
“ဟင် ...”
မသန်းမြသည် အာမေဍိတ် ကလေး မပွင့်တပွင့် ပြုယင်း ဆတ်ကနဲပင် တုန်သွားမိ၏။ ကိုတာ ... တဲ့။ ကိုတာ ...။
ရုပ်ရှင်မင်းသား “ကိုမျိုးတာ” သည် ကနေ့ နာမည် အလွန် ကြီးနေသော မင်းသား ဖြစ်၏။ လူငယ်ပရိသတ်က အထူးသဖြင့် နှစ်ခြိုက်၏။ ကြိုက်၏။ နာမည်ကိုပင်လျှင် “ကိုတာ” ဟူ၍ အဖျားစွတ်ပြီး ခေါ်ကြသည် အထိ။ မိမိတို့နှင့် တအိမ်တည်း နေသော မိသားစု တဦးလိုပင် သူတို့ စိတ်ထဲမှာ ထားကြ၏။
မသန်းမြ၏ ရင်တွင် အတန်ကြာ ငြိမ်နေပြီးမှ ရုတ်တရက် အမှတ်မထင် ပေါက်ကွဲလာသော မီးတောင်ဟောင်း တခုကဲ့သို့ ဘာမှန်း မသိသော ခံစားမူတခု ဝင်လာ၏၊ ဝမ်းသာသလို ကြောက်လန့် သွားသလိုလို။
“ကိုတာ” ကို စွဲလမ်းသူများ ထဲတွင် မသန်းမြလည်း ပါပါသည်။ ရှစ်တန်းကျောင်းသူ ဘဝကဆိုလျှင် ဓာတ်ပုံ ပို့ပေးပါနော်။ ခင်မင်တတ်ယင် စာပြန်ပါနော် ... (ဟုတ်သည် မဟုတ်သည် အပထား) “ကိုတာ့ ကားတွေဆို မလွတ်တမ်း ကြည့်တာရယ်ပါ။ မာနများ ကြီးတတ်သလား ဟင် ... စသော သနားစဖွယ် ခရာတာတာ မိတ်ဆက်စာ ကလေးများပင် ရေးမိခဲ့ဖူး၏။ စာပို့သမား၏ အလာကို မျှော်ရသည် မှာလည်း နေ့လား ညလား ဆိုသလိုပင် ပြန်စာလေး ရေးပို့ ဖြစ်ခဲ့လျှင် ဓာတ်ပုံဘောင် အလွတ် တခုမှာ ကပ်ပြီး နံရံမှာ ချိတ်ထားမည် ဟူ၍ပင် သူ စိတ်ကူးကလေးတွေ ယဉ်ခဲ့ဖူး၏။
သို့သော် တကယ်တန်း လက်တွေ့ ဘဝသည် သူမ၏ စိတ်ကူး ကလေးများကို ရယ်မော လှောင်ပြောင်လျက်။ ခရု ကလေးများ ရှိရာ သဲသောင်ပြင်နှင့် ငါးညှီနံ့ သင်းနေသော တံငါတဲကလေးများ ဆီသို့ ခေါ်ယူ သွားခဲ့သည်မှာ နှစ် အတန်ကြာခဲ့ပြီ မဟုတ်လား။
ဟော ... ခုတော့လည်း သူမ ရှိရာသို့ ရွှေမင်းသား ကပင် အရောက်လာတော့ မတဲ့။ မြင်ရတော့မှာပဲဟုစိတ်ထဲတွင် ကြည်နူးမိ ပြန်သည်။ မှန်၏။ မြင်ရတော့မှာပဲ ...ဟူသော မျှော်လင့်ချက်ထက် တဆင့် တက်ဖို့ရာ စိတ်ကူးဖို့ပင် စိတ်မကူး နိုင်ပါ ... မဟုတ်လား။
“ကဲ ... ငါ မြို့ထဲ ပြန်အုံးမယ်၊ နင် ကူညီ ပါဟယ်နော်၊ ပြီးတော့ သူတို့က ဒီပင်လယ်ဝမှာပဲ ရိုက်မှာဆိုတော့ ငါလဲ လာကြည့်အုံးမှာပါ၊ ဒါပေမယ့် နင်က အနီးကပ် နေရမှာပါ၊ ဒါပေမယ့် နင်က အနီးကပ် နေရမှာ ဆိုတော့ ပို အခွင့်အရေး သာတာပေါ့၊ ငါရှက်လို့ပါဟာနော် ...”
ပြောပြောဆိုဆိုပင် ကျူကျူသည် ခုန်ပေါက် ပြေးလွှားသွားယင်း သူ့ စက်ဘီးကလေးကို အသော့နင်း၍ ပြန်သွားလေ၏။ မသန်းမြသည် အော်တိုစာအုပ် ကလေးကို ကိုင်ယင်း ငေးနေရာမှ လက်ခုံကလေးကို နှုတ်ခမ်းပေါ်သို့ ဖွဖွကလေး ဖိလိုက်မိ၏။ ကြံရည်ရောင် ချွေးစတို့သည် ကြံရည်လို ချိုနေပြန် ပါလား။
အိမ်ဘက်သို့ ထွက်ပြေးလာမိသည်။
* * *
“အဘ ... အဘ”
အမောတကော သံဖြင့် အော်လိုက်မိသည်။
“ဟဲ့- မြကလေး၊ ဘာဖြစ် လာတာတုန်း၊ အမောတကောနဲ့”
မသန်းမြသည် ကလေးငယ် တယောက်ပမာ သူ့အဖေ၏ လက်ကို ဆွဲယင်း ...
“ဟင်- အဘတို့ မကောင်းဘူး၊ ဘယ် ... ဧည့်သည်လာမယ် ဆိုတာတောင် သမီးကို ကြိုမပြောဘူး”
သူမ၏ အဖေကလည်း ဘာမှန်း ညာမှန်း မသိသလိုပင် ကြောင်တွေတွေ လုပ်နေပြန်သည်။
“ဘာပြုလှိ့တုန်း မြကလေးရဲ့၊ ဘယ်ဧည့်သည်ပဲ လာလာ ကြိုပြီး သန့်ရှင်းရေး လုပ်ရမှာ အဖေတို့ တာဝန်ပဲ၊ ပြီး အရာရှိ စာထဲမှာကလဲ ဗိုလ်တဲ ရှင်းဖို့နဲ့ အရေးကြီးတဲ့ ဧည့်သည်တွေမို့ ဂရုစိုက်ဖို့ပဲ ပါတာပဲဟ"
“အဲဒါပြောတာပေါ့ အဘရဲ့၊ ခု လာမှာက ကိုတာ ... တို့ဆို"
“ဘယ်က ကိုတာလဲကွယ့်”
“မင်းသားလေ အဘရဲ့၊ ရုပ်ရှင်မင်းသား ကိုမျိုးတာလေ”
“ကွယ်- သူ့ဘာသာသူ ဘာဖြစ်ဖြစ်ပေါ့၊ အဲ့ဒါများကွယ်”
ထိုအချိန်တွင် မီးဖိုချောင်ထဲမှ စကား အလွန်နည်းသော အမေ့အသံသည် စာစာကလေး ထွက်လာ၏။
“ဪ- ဟုတ်ပါ့၊ မနက်ကတော့ ဈေးထဲမယ် အကြား လိုက်သား၊ ရုပ်ရှင်သမားတွေ ဒီကို ရောက်မယ် ဆိုလား”
မသန်းမြသည် သူ့အခန်းကလေး ထဲသို့ ပြေး၊ ကျူကျူ အော်တိုစာအုပ် ကလေး ခေါင်းအုံးအောက် ဝှက်ပြီး ဗိုလ်တဲကြီး ဆီသို့ ပြန်ပြေးခဲ့ ပြန်သည်။
ဗိုလ်တဲအဝင် တံခါးမကြီး အဝတွင် ခါးထောက်ရပ် လိုက်၏။ ခန်းမကြီး တခုလုံးကို မျက်လုံးကစား နေလိုက်သည်။
“အင်း ... အစကနေ ပြန်ပြီး ရေပတ်တိုက်မယ်”
* * *
အခန်း [၄]
နေခြည်နုကလေးသည် ညက ရွာခဲ့သော မိုး၏ အငွေ့အသက်များ ကြားမှ ပြုံးပြုံးကြီး ယပ်တောင်ခတ်လျက် ဝင်ရောက်လာ လေသည်။
မသန်းမြသည် စောစောစီးစီးမှာပင် အိပ်ရေး တဝကြီးဖြင့် နိုးနှင့်လေပြီ။ တနေ့လုံးလည်း ပင်ပန်းခဲ့ပါ၏။ တညလုံးလည်း မှေးကနဲ ပျော်လိုက်၊ အိပ်မက် မက်လိုက်၊ ပြန်နိုးလိုက်နှင့် အိပ်ရေးမဝ ဖြစ်ခဲ့ပါ၏။ သို့သော် သည်မနက်မှာတော့ ဘယ်လိုမှန်း မသိ လန်းဆန်း နေပါသည်။
“ဟယ် ကြည့်စမ်းပါအုံး၊ ကိုတာ လာမယ် ဆိုတာနဲ့ အချိန် နောက်ကျနေခဲ့သော ပိတောက်ပန်းတွေပင် ရုတ်တရက်ပွင့်နေ ပါပကော“
ဗိုလ်တဲဝင်းကြီး အတွင်း ရှိသမျှ ပိတောက်ပင်တွေ ဝါထိန်လို့ ပါလား။
ဒါနဲ့ ရွှေမင်းသားတို့ ဘယ်အချိန်များ ရောက်လာမှာတဲ့တုံး။
အို ... ဘာဆိုင်လို့တုန်းတဲ့။
ဟော ... ကားသံတွေ ကြားတယ်။
ဟယ် ... ဟုတ်ပါဘူး။ ပင်လယ် လှိုင်းပုတ်သံတွေပါ။
မျက်နှာကြိုသစ် ထားမည်ဟု စိတ်ကူးယင်း နောက်ဖေး ရေကပြင်ဘက် ထွက်လာခဲ့၏။ သူမ သီချင်းညည်း ပြန်သည်။
မြကလေ ... မျှော်ဆဲ ...။
* * *
နံနက် ဆယ်နာရီလောက် ကျမှ ဒေါ့ဂျစ်ကား တစီး၊ ဒတ်ဆန်းကား တစီး လူ အပြည့် ပစ္စည်း အပြည့်နှင့် ခြံဝမှာ လာဆိုက်သည်။ လူတယောက် ဆင်းလာပြီး သူမတို့တဲဆီသို့ လျှောက်လာသည်။
မသန်းမြသည် ရင်ကလေး တခုန်ခုန်နှင့် ငရုတ်သီး ထောင်းယင်း စိတ်တိုနေသည်။ မနက်ကလည်း သူလာမည် ဆို၍ အစောကြီး ထပြီး ရေခတ်ရတာ အမော။ ရေခတ်ရတာကို ရေးကြီးခွင်ကျယ် ပြောရတာမှာ လိုအပ်သည်ထက် ပို၍ ရေတွေ တပုံးပြီး တပုံး မမောတမ်း ခပ်နေမိသောကြောင့် ဖြစ်၏။ ထိုတဲ(ဗိုလ်တဲ?) နှစ်ထပ်စလုံး လုံလောက်အောင် ရေဖြည့်ပြီးသည့် တိုင်အောင် ဗိုလ်တဲဘေးမှ ရေကန်ထဲသို့ပါ မလိုအပ်ပဲ ရေဖြည့်ထားခဲ့မိသည်။
အထူးသဖြင့်မူ ဗိုလ်တဲတွင် အကောင်းဆုံးဟု သူမ သတ်မှတ်ထားသော အခန်းကို အသန့်ဆုံး ဖြစ်အောင် သူမ ပြင်ဆင် ထားမိသည်။ ဘာပဲဖြစ်ဖြစ် မင်းသားကိုတော့ အကောင်းဆုံး အခန်းမှာ ထားကြမှာပဲပေါ့။
ဟော ... အခု သူတို့ ရောက်လာပြီ ဆိုကာမှ အမေက သူမကို မီးဖိုဆောင် တာဝန်ပေးသည်။ အမေ မကောင်းဘူး။ အမေကိုရော အဖေ့ကိုပါ စိတ်တိုရသည်။ ကြည့် ... သော့တွဲကြီး ကိုင်ပြီး အဖေ ထသွားသည်။ အမေက နောက်တော်ပါးက ကော့လန် ကော့လန်နဲ့ အလုပ်မရှိ အလုပ်ရှာပြီး လိုက်သွားသည်။ ဒီကဖြင့် လုပ်လိုက်ရတာ။
ဆူသံပူသံများ၊ ရယ်မောသံများ၊ ပစ္စည်းရွှေ့သံ ချသံများ ယေက်ျားမိန်းမ သံစုံကို မီးဖိုထဲမှ ကြားရလေလေ ဖင်တကြွကြွ ဖြစ်ရလေ။ ပြီးတော့ ခါးကြားထဲ အဆင်သင့် ညှပ်ထားသော ကျူကျူ၏ အော်တိုစာအုပ် ကလည်း ခိုးလိုးခုလု။ ရောက်ရောက်ချင်းပဲ ရေးခိုင်းရတော့ မလိုလို ထင်နေမိသည်။ ထင်နေမိသည် ဆိုသည်ထက် ဘာမှန်းကို မသိပဲ အဆင်သင့် လုပ်ထားမိခြင်း ဖြစ်တန်ရာသည်။ သူ့ အတွက်ပါ စာရွက်တခုနှင့် ရေးခိုင်းရ ကောင်းနိုးနိုး။ ဒါမှမဟုတ် ကျူကျူ၏ စာအုပ်မှာပင် နှစ်ခု ရေးခိုင်းရ ကောင်းနိုးနိုး စဉ်းစားမိသေး၏။
မသန်းမြသည် ကလေးငယ် တယောက် မနက်ဖြန် သင်္ကြန် ကျမည်ကို ဒီည ကတည်းက နို့ဆီခွက် ဖက်အိပ်ထား သကဲ့သို့ ဖြစ်ခဲ့ရ လေသည်။
ဘာပဲဖြစ်ဖြစ်။ ခုတော့ အမေက သူ့ကို ငရုတ်သီးထောင်း ခိုင်းထားရစ်သည်။ စိတ်ပျက်လိုက်တာ ...။
ငရုတ်သီးယင်လည်း မြန်မြန်ညက်မှ အလုပ်ယင်လည်း မြန်မြန်ပြီးမှ ...
သူမသည် ဗိုလ်တဲမကြီးဘက်ဆီမှ ပစ္စည်းရွှေ့သံ၊ လူသံဆူသံများကို ကာကွယ်ရန် အလို့ငှာ ဆုံနှင့် ကျည်ပွေ့တို့ ထိခတ်သံကို ပို့၍ ပြင်းထန် နေစေတော့သည်။
* * *
ခဏကြာတော့ အမေ ပြန်ရောက်လာ လေသည်။ ခြေသံကြား ကတည်းက အမေမှန်း သိပါသည်။ သို့သော် သူ မလှည့်ကြည့်ပါ။ စိတ်မရှည်မှန်း ပို၍ သိသာစေရန် ဆောင့်ကြောင့်ထိုင်ယင်း ငရုတ်သီးကို ထောင်းနေ၏။
“ဟဲ့ ... သမီး မြကလေး၊ ဟိုမှာ ညည်းအဖေ တယောက်တည်း သွားပြီး ဝိုင်းပြီး ကူလိုက်အုံး၊ လူတွေ များလွန်းလို့ ငါလဲ ငြီးစီစီ ဖြစ်လာပြီ“
သူမသည် ချက်ချင်းပင် အမေ့ကို ကျေးဇူးတင်မိ ပြန်သည်။ စိတ်တို နေသည်များလည်း ချက်ချင်း ပျောက်သွား၏။ မဆိုင်းမတွပင် ဗိုလ်တဲမကြီး ဘက်သို့ ပြေးလေသည်။
ကြည်နူးပျော်ရွှင် နေရပါလျက် သူမသည် စိတ်တိုစဉ်ကလို ဘာကြောင့် တဒိတ်ဒိတ် ခုန်ရပါသနည်း။
* * *
ဗိုလ်တဲပေါ်မှာ လူတွေ တလှေကြီး ယောက်ယက်ခတ် နေကြသည်။ လူတန်းစား နှစ်မျိုး တွေ့နိုင်သည်။ သူမ၏ အဖေလို အခြေအနေမှန်း သိသာစေသော လူများနှင့် အထက်တန်း ကျသည် ခေါ်ရမလား ... သားသားနားနား ရှိသည် ခေါ်ရမလား အိုက်တင်နှင့် နေကြသည် ခေါ်ရမလား ... သူမ မပြောတတ်သော လူနည်းစုတို့ ဖြစ်ကြ၏။
ထိုလူနည်းစုတို့သည် မည်သူမင်းသား၊ မင်းသမီးမှန်း၊ မိတ်ကပ်ဆရာမှန်း၊ ဇာတ်ရံတွေမှန်း၊ လူရွှင်တော်တွေမှန်း ... မှန်းဆ၍ မရနိုင်ပါ။ အားလုံးတို့သည် ဆေးရောင်စုံကို အဝတ်မှာရော မျက်နှာမှာပါ ခြယ်သ ထားကြ၏။ ဆင်ဆင်တူတွေချည်း။
သူမသည် ထိုလူစုများ ကြားတွင် မယောင်မလည်သာ ရပ်နေမိသည်။ ဘာလုပ်၍ ဘာကူညီရမှန်း မသိ အဖေ ကိုယ်တိုင်လည်း ထောင့်ကွေး တခုတွင် ခပ်ရို့ရို့ကလေး ရပ်နေရှာ၏။
သူမ၏ စိတ်တွင် လတ်တလော အလောတကြီး တွေ့ချင်သူကား ရွှေမင်းသား၊ သူဘယ်မှာပါလဲ၊ သူ့ကိုတော့ မြင်မြင်ချင်းပင် မှတ်မိနိုင်ပါသည်။ တောင်မြောက်လေးပါးကို မျက်လုံးကစား ကြည့်သည်။ ရွှေမင်းသားကို မတွေ့ရချေ။
နာရီဝက် တနာရီလောက် ကြာမည် ထင်သည်။ ထိုအခါကျမှ သူမ မသိသော ဆေးရောင်စုံ အမျိုးသမီး နှစ်ယောက်၏ စိတ်ပျက်ဖွယ် စကား အချီအချ ပြောသံကို ကြားရ၏။
“မထူးပါဘူးဟယ် ... မမနဲ့ပဲ ဟိုဘက်ခန်းမှာ စုအိပ်တာပေါ့“
“ဟိုလွတ်နေတဲ့ အခန်းကကော”
“မင်းသား တည်းဖို့လေ”
“ဟင် ... သူက မြို့ထဲမှာ တည်းတယ်ဆို”
သူမ စိတ်ပျက်ရ လေပြီ။ ဘာကြောင့်မှန်း မသိ ဝမ်းနည်းရ ပြန်သည်။ ဟော ... ရင်တွေလည်း ခုန်လာပြန်ပြီ။
အဖေနှင့် အတန်သင့် ကူညီချင်ဟန် ဆောင်ပြီးနောက်၊ အမေ ကဲ့သိုပင် ပင်ပန်းချင်ဟန် ဆောင်ပြီး အိမ်ပြန်ခဲ့သည်။
အိမ်ရှေ့တွင် အမေနှင့် လူတယောက် စကားပြောနေသည်။ ထိုသူကိုတော့ သူမ ကောင်းကောင်း သတိထားမိသည်။ ထိုသူသည် အင်္ကျီ အကြောင်အကြား ဝက်ထားပြီး စောစောက လူအုပ်ထဲတွင် ဟိုနေရာ သည်နေရာ အနှံ့ လျှောက်သွားနေသူ ဖြစ်သည်။ ဘာရာထူး ရှိမှန်း မသိသော်လည်း အရေးပါမှန်းတော့ သိသာသည်။
ထိုသူနှင့် အမေတို့သည် ထိုနေ့ မနက်စာ ညစာအတွက် သူတို့ ရုပ်ရှင်အဖွဲ့များ ထမင်းဟင်း ကိစ္စကို တိုင်ပင် နေကြသည်။ သားငါးဟင်းလျာ ဝယ်ယူ ရရှိရေး ဖြစ်သည်။
အမေက သူမကို ထိုသူနှင့် မိတ်ဆက်ပေးသည်။ လိုအပ်တာရှိ ခိုင်းပေါ့တဲ့။
ထိုသူက သဘောကောင်းပုံ ရသည်။ လည်လည်ပတ်ပတ် ရှိပုံ ပေါ်သည်။ သူ လောလောဆယ် လိုအပ်သည်များ ကိုလည်း မှာကြားသည်။ ထိုအထဲတွင် ...
“အော် ... ဒါနဲ့ ခလေးမရယ် ပင်လယ်ငါး အကြီးစားခြောက် ကလေးများ တပိဿာလောက် ရယင် ဝယ်ချင်လို့”
“အခုလား ဦး ...”
“ရထားယင်တော့ ကောင်းတာပေါ့၊ မင်းသား အပြန် အပြန်လက်ဆောင် ပေးလိုက်ချင်လို့”
မသန်းမြ အတွက် ပျော်စရာ အကောင်းဆုံး အခိုင်းပင် ဖြစ်လေသည်။
“ရပါတယ်၊ ကျွန်မ ခဏနေ လာပို့ပါမယ်”
“ကိုင်း အဒေါ် ... ခုန ကျွန်တော် ပေးထားတဲ့ အထဲကပဲ ဝယ်ထားပေးပါ။ နောက်မှ စာရင်းရှင်းပါ့မယ်” ဟု ထိုသူက ပြောယင်း ထွက်သွားသည်။
မသန်းမြသည် ချက်ချင်း မဆိုင်းပင် အိမ်မှာ အသင့်ရှိသော ငါးခြောက် တပိဿာခန့်ကို ထုပ်နေမိ လေတော့သည်။
ပြီးတော့ ချက်ချင်းပင် ဗိုလ်တဲဆီသို့ အထုပ်ဆွဲပြီး ပြေးခဲ့သည်။ ထိုလူကြီးကို ရှာသည်။ ငါးခြောက်ထုပ် ပေးယင်းက ဘယ်လို သတ္တိတွေ ဝင်လာသည် မသိ။
“ဒါနဲ့ ဦး ... မင်းသားက ဘယ်တော့ လာမှာလဲဟင် ...”
“ညနေဘက် ရောက်မလား မနက်ဖြန် မနက် ရောက်မလားပဲ”
“ဒါဆို ...”
တော်တော်နှင့် စကားမထွက်။ ကျူးကျူ ထားရစ်ခဲ့သော အော်တိုစာအုပ် ကလေးကိုကား ခါးကြားမှ ထုတ်မိလျက်သား ဖြစ်နေ၏။ ထိုလူကြီးက ဘာကို သဘောပေါက်မှန်း မသိ ... ရယ်ပြီး ...
“အေးပါ ... ငါ ရေးခိုင်းထား ပေးပါမယ် ဟုတ်လား”
ပျော်လိုက်တာလေ။ ကျူကျူရယ် မပြောပါနဲ့တော့ ...။
* * *
ထင်တော့ အထင်သား၊ ညက ကိုးနာရီလောက်မှာ ဗိုလ်တဲရှေ့မှာ ကားတစီးရပ်သံ ကြားခဲ့သည်။ လူသံဆူသံ ကြားခဲ့သည်။ မင်းသားအတွက် ထားသည်ဆိုသော အခန်းမီး လင်းခဲ့သည်။ ရေချိုးခန်း အိမ်သာခန်းဆီမှ ရေသုံးသံ၊ ထိုရေများ ရေတောက်လျှောက်မှ စီးကျသံများ ကိုလည်း ညဥ့်လယ်အထိ မကြာ မကြာ ကြားခဲ့ရသည်။ ဪ ... ငါခပ်ထားတဲ့ ရေတွေ သူ ချိုးမှာပဲ ... သုံးမှာပဲ။ မျက်နှာသစ်မှာပဲ။ ပြီးတော့ ... အို ညကလည်း ကောင်းကောင်း အိပ်မပျော်ခဲ့။
ခုတော့ ထင်သည့် အတိုင်းပင်။
ညက မင်းသားရောက် သတဲ့။
သို့သော် မနက်က အစောကြီး နေထွက်ချိန် နေလုံးကြီးပါ ပါအောင် ရိုက်ရန်အတွက် မင်းသား အပါအဝင် လူတချို့ ပင်လယ်ဘက်သို့ ရုပ်ရှင်ရိုက် ထွက်သွားကြပြီတဲ့။
အစောကြီးထ သနပ်ခါးလူးပြီး ဗိုလ်တဲဘက် ပြေးလာခဲ့မိသည်မှာ ရှက်စရာကြီး။
ပင်လယ်ဘက် ရုပ်ရှင်ရိုက် ထွက်သွားသည် ဆိုတော့လည်း ဗိုလ်တဲကြီးသည် အယင် ဘယ်သူမှ မတည်းခင်က ထက်ပင် ပို၍ ခြောက်သယောင်း နေ၏။ တနေ့လုံး နေမထိ ထိုင်မသာ။ သို့သော် ညနေတော့ သူ ပြန်လာမှာပါ။
သည်ကြားထဲ ဟိုလူကြီး ခိုင်းခဲ့သမျှတွေ ကိုလည်း ထုံးစံ အတိုင်းပင် အမေက သူမကို တာဝန် လွှဲပြောင်းပေး ပြန်၏။
မောရတဲ့အထဲ ... မောရလိုက်တာ။
* * *
အခန်း [၅]
ညနေစောင်းပြီ။
သူတို့ ပြန်လာကြပြီ။
ခြေဖဝါးတွေ ယားလိုက်တာ။ ပြေးတွေ့ လိုက်ချင်သည်။ သို့သော် ခုနှယ် သွားတွေ့တော့ကော ဘာထူးမှာတဲ့တုန်း။ ညစာ ထမင်းစားချိန်လောက်မှ မယောင်မလည် သွားတော့မည်ဟု စိတ်ကူးသည်။
သို့သော် ဟိုလူကြီး အူယားဖားယား ပြေးလာသည်။
“ဟဲ့ ကလေးမ၊ မနက်က ငါးခြောက်မျိုး နောက် တပိဿာလောက် ရအုံးမလား”
“ဘာလုပ်ဖို့လဲ ဦး”
“မင်းသားက ကြိုက်လိုတဲ့၊ ထပ်ဝယ်ခိုင်းတာ”
သူမ မဆိုင်းတော့ပါ။ အိမ်မှာ လက်ကျန်နည်း နေသည်မို့ ဟိုဘက်ခြံမှ တံငါသည်တွေထံ ပြေးခဲ့မိသည်။ ချက်ချင်းပင် ဝမ်းသာအားရ ထုတ်ပေးလိုက်သည်။
ဪ ... သူကြိုက်သတဲ့။ တတ်နိုင်ယင် အလကား ပေးချင် လိုက်တာ။
ဟိုလူကြီးသည် အထုပ်ကို ရသည်နှင့် ဗိုလ်တဲဘက်သို့ ပြန်ပြေး တော့သည်။
“ဦး ဦး ...”
ဟိုလူကြီးက ရပ်လိုက်၏။
“ဟို ...ဟို”
“ဪ ... အေးပါ၊ ငါရေးခိုင်း ထားပြီးပါပြီ၊ ညမှ ယူတော့။ ခု သူက ပြန်တော့မှာ၊ ဒါကြောင့် ငါ့မလဲ ပြေးဟယ် လွှားဟယ် ဖြစ်နေတာ”
မသန်းမြသည် ပြေးထွက်သွားသူ လူကြီးကို ကြည့်ပြီး ငေးကြောင် နေမိသည်။ တခုခု ပြုတ်ကျ လွင့်စဉ် သွားသလိုလည်း ခံစားလိုက်ရသည်။
သူ ပြန်တော့မှာတဲ့။
ဘယ်လို ဘယ်လို စိတ်ကူးပေါက်မှန်း သူ့ဖာသာပင် သူ မသိလိုက်။ ဗိုလ်တဲဘက်သို့ ပြေးလိုက်ခဲ့မိသည်။
ကြည့်စမ်း ... ဗိုလ်တဲနား သူ အရောက်။ ကားသစ်ကလေး တစင်း ထွက်တော့မည်ကို လှမ်းမြင်လိုက်သည်။ ဟိုလူကြီးက နောက်ခန်းမှ တစုံတယောက် လက်သို့ ငါးခြောက်ထုပ် လှမ်းပေးသည်။ ထိုစဉ် ကားထွက်သွား၏။ သူမ ပြေးယင်းလွှားယင်း ကြည့်လိုက်သည်။ ရိပ်ကနဲတော့ မြင်လိုက်ရ၏။ ဟုတ်မှာပါ။ သူပဲ ဖြစ်မှာပါ။ ဆံပင် နောက်စကလေးများ ကော့နေတာ သူမှ သူ အစစ်။ ဟုတ်မှာပါ။ ကားကလေး ဝေးသွား၏။
ဟင် ... ဘယ်က ကျလာပါလိမ့်မလဲ။
မျက်ရည်တွေ။
ခဏ ကြာတော့မှ ပျာယီးပျာယာ လှုပ်ရှား နေခဲ့သော ဟိုလူကြီးသည် တာဝန်ကြီးတခု ပြီးသွားသလို သက်ပြင်းချပြီး ပြန်လှည့် လာသည်။
သူမကို မြင်တော့ အနားကို လျှောက်လာသည်။ သူ၏ လက်ဆွဲအိတ် ထဲမှ ကျူကျူ၏ အော်တိုစာအုပ်လေးကို ထုတ်ယင်း ...
“ငါ မမေ့ပါဘူးဟ ... ရော့”
သူ မယူရဲ ယူရဲ လှမ်းယူမိသည်။ ဟိုလူကြီးကို ကျေးဇူးတင်သလို ဒေါသဖြစ်သလို ဖြစ်မိသည်။
“ငါ့နှယ်ဟာ ... မင်းသားကလဲ ဒီတရက်ပဲ ရိုက်ပေးနိုင်တာ ပြီးတော့ နေ့လယ်ကလဲ မိုးတွေညို့ လာလို့ ကားရိုက် ပျက်ပြီတောင် ထင်နေတာ”
စသည်ဖြင့် ဘာတွေမှန်း မသိ ရေရွတ်ယင်း ဗိုလ်တဲပေါ်သို့ တက်သွား လေတော့သည်။
* * *
သူမသည် အော်တို စာအုပ်ကလေးကို အလျင်စလို လှန်ကြည့် လိုက်၏။ နောက်ဆုံးပိုင်းကျကျ စာမျက်နှာသစ်တွင် မင်းသား၏ လက်ရေးဟု သူထင်သော စာကြောင်း ကလေးကို တွေ့လိုက်ရသည်။
တူမလေး ...
စာမေးပွဲ အောင်ပါစေကွယ်။
(... ... ... ...)
လက်မှတ် ထိုးထားသည်။ အမည် ရေးထားသည်။ လက်မှတ်သည် အင်္ဂလိပ်လိုလား၊ ဗမာလိုလား ဖတ်မရပါ။
သူမ ခေါင်းငိုက်စိုက် ချ၍ အိမ်ဘက်သို့ လျှောက်လာမိသည်။ ခြေလှမ်းတွေ လေးနေ၏။ ပြီးတော့ ... တူမလေး ဆိုသည်မှာ သူ့ကို ရည်ရွယ်သလား ကျူကျူကို ရည်ရွယ်သလား ...။
* * *
ထိုအချိန်တွင် မိုးညှို့ နေပါသည်။
-----------------
သုမောင်
၂၇ - ၅ - ၈၄
(ပြောရောပေါ့ ကိုကိုရယ် နှင့် နဝရတ်ကိုးသွယ် (တန်ခူးစာအုပ်တိုက်၊ စာမျက်နှာ ၈၅-၁၂၃)
Tuesday, December 11, 2018
[သန်းထွန်းလေး (အင်းတဲရွာ) ဘလော့ဂ်မှ ကူးယူပါသည်။ဘလော့ဂ်ဂါအား ကျေးဇူးတင်ပါသည်။]
No comments:
Post a Comment