#ခေမာရီ
#ဂျာနယ်ကျော်မမလေး
(၁)
တော်သလင်း လကွယ်နေ့။
အရပ် လေးမျက်နှာစလုံး မှောင်အတိ ဖုံးကာ ဘယ်နေရာ ကြည့်ကြည့် အလင်းရောင် ဟူ၍ မရှိ။ မိုးမှောင်ကြီး ကျနေလေသည်။
ခင်မေသည် ခေါင်းအုံးအောက်က နှစ်တောင့်ထိုး လက်နှိပ်ဓာတ်မီး ကလေးကို ဆွဲယူကာ လက်ပတ်နာရီကို ထိုးကြည့်လိုက်၏။ ၁၂ နာရီ ထိုးသွားပြီ။
ငေါက်ကနဲ အိပ်ရာမှ ထလိုက်ကာ ခြင်ထာင်ကို မလျက် အပြင်သို့ ထွက်ထိုင် လိုက်သည်။ တဘက်က ခြင်ထောင်ထဲတွင် အိပ်နေကြသော ကြီးတော်နှင့် မဦးတို့ အသံကို လှမ်း၍ နားစွင့်လိုက်၏။ အိပ်မောကျနေမှန်း စိတ်ချလက်ချ ရှိမှ ညဦးက အိပ်ရာထဲတွင် ဝှက်ထားသော လွယ်အိတ်ကို ကောက်ယူ လွယ်လိုက်သည်။ အသံ မကြားအောင် ဖြေဖျားထောက်လျက် အခန်း အပြင်သို့ စမ်းထွက်လာခဲ့သည်။ မီးဖိုချောင်ဘက်သို့ ထွက်သော တံခါးမှ ဂျက်ကို ဖြည်းဖြည်းကလေး မ ဖွင့်ကာ၊ မီးဖိုချောင်ထဲသို့ ဝင်သွားလေ၏။ ခင်မေသည် မီးဖိုထဲတွင် တအောင့်တွေးပြီး စဉ်းစားနေသေးသည်။ အပြင်ရောက်ဖို့ တံခါးတထပ် ကျန်သေးသည်။ ညများ ချွတ်ဆိုလျှင် လန့်တတ် ကြောက်တတ်သည်။ အဖော်မပါလျှင် တယောက်ထဲ မထဝံ့။ ထချင်လျှင် မဦးကို နှိုးရ၏။ ယခုတော့ ကြောက်ရမှန်း၊ လန့်ရမှန်းပင် မသိတော့။
ခြေလှမ်း သွက်သွက်ကလေး လှမ်းလျက် မီးဖိုထဲရှိ နောက်ဖေး တံခါးပေါက်ကို အသာ သွားဖွင့်သည်။ အပြင်ဘက်တွင် ပိန်းမှောင် နေလေ၏။ နောက်ဖေးလှေကား သုံးလေးထစ်ကို အတော်ပင် စမ်းပြီး ဆင်းရ၏။ မှောင်လိုက်တာ မဲလို့။
မြေကြီးပေါ်သို့ နင်းမိလျှင် လမ်းကိုလည်း မမြင်၊ ချုံကိုလည်း မမြင်ရ၍ လက်နှိပ်ဓာတ်မီး ထိုးလျက် လမ်းရှာကြည့်ရသည်။ ဓာတ်မီး ထိုးရတာ တယောက်ယောက် မြင်သွားမှာလည်း စိုးရသည်။ မြေကြီးပေါ်၌ လမ်းအတိုင်း မှန်းလျှောက် သွားလေသည်။ ချုံပုတ်တွေထဲ ရောက်သွားလျှင် လမ်းမြင်အောင် မီးကို အသုံးပြုရပြန်သည်။ ခင်မေသည် မှောင်ကြီးမဲကြီးထဲတွင် တောင်ကုန်းပေါ်သို့ မနဲအားခဲ၍ တက်နေရလေ၏။
တောင်ပေါ်၌ တရုပ်စကားပင်များ ဖုံးအုပ်ထားသော အဆောက်အဦလေး ရှိလေသည်။ အဆောက်အဦလေးမှာ လူမနေသော ကမ္မဋ္ဌာန်း ဝါးကျောင်း ဖြစ်၍ တံခါးပေါက်များ ဟာလာဟင်းလင်း ပွင့်နေပေသည်။ ခင်မေသည် ခက်ခဲစွာပင် ကမ္မဋ္ဌာန်းကျောင်းလေး ရှိရာသို့ ရောက်လာခဲ့၏။ ကျောင်းလှေခါးကို နင်းတက်လိုက်ကာ၊ ခင်မေသည် ဇွတ်မှိတ်ပြီး ထွက်လာခဲ့သော ဇရပ်ကလေး ရှိရာသို့ ပြန်လည် ကြည့်မိလေ၏။
ကျောင်းပေါ်တွင် တံခါးပေါက်တွေကို တပေါက်မကျန် အရင် လိုက်ပိတ်လေသည်။ တံခါးကို အလုံပိတ်ပြီးမှ မှောင်ထဲတွင် ကျကျနန ထိုင်လိုက်သည်။ လွယ်အိတ်ထဲမှ ဖယောင်းတိုင်ထုပ်နှင့် မီးခြစ်ကို ထုတ်ယူသည်။ ဖယောင်းတိုင်ကို မီးညှိကာ၊ ဖယောင်းစက် ချ၍ ကြမ်းပေါ်၌ စိုက်ချလိုက်သည်။ မီးထွန်းပြီးလျှင် လွယ်အိတ်ထဲမှ ပစ္စည်းတွေကို တခုစီ ဆွဲ၍ ထုတ်သည်။
ပထမ မှန်ကလေးတချပ် ထွက်လာသည်။ နောက် မောင်းချဓား၊ နောက် ကပ်ကျေး။ မှန်ကလေးကို နံရံနှင့် ကပ်၍ ထောင်လိုက်ကာ၊ မောင်းချဓားကို ဖွင့်လေသည်။ မောင်းချဓားမှာ မောင်းသန်၍ တော်တော်နှင့် ဖွင့်မရ၊ ပါးစပ်နှင့် အားရှိပါးရှိ ကိုက်ဖွင့်မှ ပွင့်၍ သွားသည်။ ဓားပွင့်လျှင် ဓားသွားကို လက်မနှင့် သပ်ကြည့်လိုက်သည်။
“ထက်လိုက်တာ မြနေတာဘဲ၊ ထက်မှ ... ထက်မှ”
ဓားသွားကို လက်မနှင့် စမ်းသပ်ရင်း၊ စိတ်တိုင်း ကျတော့မှ ဓားကိုချကာ ခေါင်းက ဆံထုံးကို ဖြေလေသည်။
“သူတို့ ဘယ်လိုပြောပြော နားမထောင်ဘူး၊ မိနဲ့ဖနဲ့ မနေရတဲ့ ဘဝ၊ ကုသိုလ်ဆိုးတဲ့ ဘဝ၊ အဖေ မရှိရင် လောကမှာ နေဘို့ မကောင်းပါဘူး”
ခင်မေ၏ ဆံပင်များမှာ တင်ပါးဖုံးအောင် ရှည်လျားလေ၏။ ဆံပင်တွေကို လက်တဘက်နှင့် အပေါ်ပင့်တင် ဆုပ်ကိုင်ထားလျက် အရင်းမှ ဆံပင်ဖျားအထိ ရှေ့သို့ ခပ်ဖြေးဖြေး ဆွဲပြီး သပ်ချနေသည့်အခိုက် ငေးငိုင်နေပြန် လေသည်။
(၂)
မိမိ တသက်တာတွင် မိခင် ဖြစ်သူအား ဓာတ်ပုံ ထဲ၌သာ တွေ့ဘူးလေသည်။ လူမှန်းသိသည့် အရွယ်လေးက ကွယ်လွန်သွား၍၊ အမေ မရှိဘဲ အဖေနှင့်ပင်၊ ညီအစ်ကို မောင်နှမ မရှိ၊ တကောင်ကြွက် နေထိုင်ခဲ့ရ၏။
“ငါ့သမီးကလေး၊ မိတဆိုးကလေး” ဟု မိမိအပေါ်တွင် သက်ညှာ ထောက်ထားလျက် နောက်အိမ်ထောင် မပြုရှာသော ဖခင်။ သားအဖနှစ်ယောက် စည်းစည်းလုံးလုံးနှင့် နေခဲ့ထိုင်ခဲ့သော အချိန်တုန်းက အဖေ အလိုလိုက်ပုံ၊ ချစ်ခင်ပုံ၊ ယုယပုံတွေမှာ အမေ မရှိသည့် အဖြစ်ကိုပင် မေ့၍ နေစေ၏။ ခင်မေသည် အမေဟူ၍ တွယ်တာစရာ ချစ်စရာ မရှိ၍၊ အဖေ့ကိုပင် အဖေလို၊ အမေလို ချစ်၏။ အရွယ်ကလေး ရောက်၍ ကျောင်းထားစက ဆိုလျှင် အဖေပါ ကျောင်းသို့ လိုက်နေရလေသည်။ မိမိအလစ် အဖေ အိမ်ပြန် သွားသည်ဆိုလျှင် တကြော်ကြော် အော်ငိုခေါ်လျက် အဖေ့နောက်သို့ ကောက်ကောက်ပါအောင် ပြေးလိုက်တတ်၏။ ခင်မ၏ ကစားဖော်မှာ အဖေ ဖြစ်သည်။ ထမင်းအိုး၊ ဟင်းအိုး ချက်တမ်း ကစားလျှင်၊ အိုးပုတ်ကလေး ထဲတွင် သဲများထည့်ကာ အဖေနှင့် နှစ်ယောက် ချက်ကြသည်။
ထမင်းကျက်၍ သဲတွေကို ခွက်ကလေးထဲ ထည့်ကာ “စားပါအုံး အဖေ” ဟု အဖေ့ကို အတင်း စားခိုင်းလေသည်။ ခွက်ကို ပါးစပ်နားတွင် တေ့ယူပြီး၊ ပါးစပ်ကို တပြတ်ပြတ် မြည်သံပြုလျက် အဖေက စားပြရလေသည်။ ခင်မေ၏ အဖေမှာ လျှောက်လွှာစာရေးကြီး ဖြစ်သည်။ ရုံးတက်လျှင် ခင်မေကို ကျောင်း၌ ဝင်ထားခဲ့ကာ၊ ညနေရုံးဆင်းလျှင် ကျောင်း၌ ဝင်ကြိုသည်။
အိမ်တွင် မိန်းမဖေါ် မရှိ၊ ကုလားအဘိုးကြီး ဘူတားက ခင်မေတို့ သားအဖ နှစ်ယောက်အား ထမင်းချက်ကြွေး လေသည်။ ခင်မေနှင့် အဖေကြားတွင် ကြားဝင်နိုင်သောသူမှာ ဘူတားပင် ဖြစ်သည်။ တော်တော်ကလေး ကြီးပြင်းလာလျှင် ခင်မေသည် ဘူတားကိုပင် စိမ်းချင်လာသည်၊ သူအဖေနှင့်သူ နှစ်ယောက်တည်း၊ သည်လိုသာ ရေတွက်ချင်သည်။
ခင်မေ ဆယ်နှစ်လောက် အရွယ်တွင် အဖေ ကွယ်လွန်သွား ပြန်၏။ အဖေ့မသာ ချသည့် နေ့၌ပင် ခင်မေကို အဖေ့အမ ကြီးတော်ကြီးက သူ့အိမ်သို့ ခေါ်ဆောင်သွား လေတော့၏။ “မိန်းကလေး ကျောင်းထားလို့ အပိုပါဘဲ” ဟု ကြီးတော်ကြီးက ဆိုကာ၊ အဖေ ဆုံးပြီးနောက်၊ ခင်မေကို လေးတန်းနှင့် ကျောင်းနုတ်လိုက်လေသည်။
ကြီးတော်အိမ်တွင် ခင်မေသည်၊ ခင်မေ တယောက်တည်းသာ ဖြစ်နေသည်။ ကြီးတော်၏ သားကိုလည်း အကိုဟု ခင်မင်ခြင်း မရှိ ၊ စိမ်းနေ၏။ ကြီးတော်ကိုလည်း ဝေးဝေးကသာ နေ၍ စကားပြောသည်။ “ဒီကောင်မလေးဟာ ဥတလုံးလေး” ဟု ကြီးတော်က ဆိုမြည်ပြောလျှင်၊ သည်စကားမှာ ခင်မေ့ အကြိုက်ပင် ဖြစ်သည်။ အဖေ မရှိတော့ တယောက်ထဲဘဲဟု အောက်မေ့ထားသည်။ ကြီးတော်ကြီးက ဘာဆင်ဆင်၊ ဘာဝယ်ပေးပေး ခင်မေသည် စုံစုံမက်မက် ဟက်ဟက်ပက်ပက် မရှိ၍ ကြီးတော်ကြီးက အခါတိုင်းပင် မေးကြည့်ရသည်။
“ကြိုက်ကဲ့လား”
ခင်မေသည် ခေါင်းကိုသာ ငြိမ့်လိုက်လေသည်။ အဖေဆုံးပြီး ငါးနှစ်လုံးလုံး ကြီးတော်အိမ်တွင် အချိန်ကုန်လွန်ရ လေသည်။ ကြီးတော်သွား သွားခြင်း၊ ကြီးတော်ထိုင် ထိုင်ခြင်း၊ ကြီးတော်နှင့်သာ ကပ်နေရသည်။
မန္တလေး ဘုရားဖူး သွားမယ်ဟု ကြီးတော်သည် ခင်မေကို မန္တလေး ခေါ်လာလေသည်။ ခင်မေသည် ဆယ့်ငါးနှစ်သမီး ရောက်မှ ခရီးသွားဘူး ရသည်။ ခရီးထွက်လာရ၍ စိတ်ထဲ ပျော်လှတယ်လည်း မဟုတ်ဘဲ ပျံ့ပျံ့ပျူးပျူး ဖြစ်သလိုမျိုးသာ ဖြစ်သည်။
ခရီးသွားကြတုန်း လမ်းတွင် လက်တိုလက်ရှည် ခိုင်းရန် မဦးဆိုသည့် ကလေးမလေးကိုပါ ကြီးတော်က ခေါ်လာလေသည်။ ခင်မေသည် မဦး အနား ကပ်လာလျှင် တယ်မကြိုက်၊ မဦး စကားပြောလျှင်လည်း စကားများရန်ကောဟု နားငြီးသည်။
မန္တလေး၌ မိုးလင်းလျှင် တည်းအိမ်က ထွက်လာကြကာ တနေ့လုံး သွားလာ လည်ပတ်ပြီးနောက် မိုးချုပ်မှ အိမ်ပြန် ရောက်ကြ၏။ မန္တလေး တမြို့လုံး ဘယ်သွားသွား၊ ဘယ်ရောက်ရောက် ခင်မေ့ မျက်စိထဲတွင် မြင်မြင်သမျှနှင့် စိမ်းနေ၏။ ဘယ်အရာမျိုးမှ ခင်မေ့ကို မဆွဲဆောင်နိုင်၊ ဘယ်ဟာနှင့်မှ နီးကပ်ခြင်းလည်း မရှိ။ မြို့ကမြို့ တခြား၊ သူကသူ တခြား။ တယောက်ထဲ ... တယောက်ထဲ ဆိုသော အသိထဲသို့ ဘယ်အရာဝတ္ထုမှ ဝင်လာမရော၊ ပေါင်းလို့ စပ်လို့မရ ဖြစ်နေလေ၏။
မန္တလေးတွင် တပတ်နေကြပြီးနောက် “ကြီးတော်ကြီး မန္တလေး ရောက်တုန်း စစ်ကိုင်းက သူ့ဇရပ်တွင် တလ ကိုးသီတင်း ဥပုသ် သွားစောင့်အုံးမယ်” ဆိုကာ စစ်ကိုင်းဘက်သို့ ကူးလာခဲ့ကြလေသည်။
(၃)
ခင်မေသည် ပျော်သလိုလိုပင် ဖြစ်လာလေသည်။ စစ်ကိုင်း မဂ္ဂင်ချောင်ရှိ ကြီးတော်၏ ဇရပ်လေးကို ရောက်ကာမှ လူလည်းတမျိုး၊ စိတ်လည်းတမျိုး လန်းဆန်းလာသည်။ နေ့စဉ်နေ့တိုင်း ကြီးတော်က သီလယူသလို၊ ခင်မေလည်း သီလခံသည်။ နေ့လည်နေ့ခင်း ကြီးတော် တရေးတမော အိပ်နေလျှင် ဇရပ် ရှေ့တံခါးပေါက်တွင် ထွက်ထိုင်ကာ၊ ဇရပ်ရှေ့၌ ဥဒဟို ဖြတ်သန်း သွားလာနေကြသော သီလရှင်တွေကို ငေးမော၍ နေလေသည်။ ခင်မေမှာ သီလရှင်တွေကို မြင်စကပင် ခင်မင်သွားသည်။ တသီးတခြား ဖြစ်နေကြသော ဘဝကိုသွား၍ မျက်စေ့ကျနေသည်။
နံနက် ည ဘုရားဝတ်တက်ချိန်တို့၌ မဂ္ဂင်ချောင် တချောင်လုံး သီလရှင် အပါး ငါးဆယ်ခန့် ဘုရားကျောင်းသို့ ဝတ်တက်ရန် စုရုံး၍ သွားကြသည်။
ဘုရားကျောင်းထဲ၌ မယ်သီလရှင်များ ကြားထဲတွင် လူဝတ်ကြောင်နှင့် မိမိ တယောက်တည်းသာ ရှိ၍ ထူးထူးခြားခြား ကြောင်ကြောင်ကျားကျား ဖြစ်နေသည်။
“မမြစာရီရေ ... ဆရာဘုရားဆီမှာ နေ့ဝါ တက်ပြီလား”
“တပည့်တော် ညဝါတောင် ဆိုနေပြီ ဘုရာ့”
သီလရှင် အချင်းချင်း စကားပြောပုံကို ခင်မေသည် ငေးလျက် နားထောင်နေသည်။ သီလရှင်တို့၏ လေယူ လေသိမ်းသံကိုပင် နားထဲတွင် တမျိုးတဖုံ စွဲငြိနေ၏။
“လောကီ ကာမဂုဏ် အာရုံတွေ ထွေပြားတဲ့ လူ့ဘောင်ကြီးရဲ့ ဆင်းရဲခြင်းတရားကို ရှင်တော်ဘုရားက ...”
သီလရှင် အဖွားအိုသည် သီလရှင်များကို တရားပေးရင်း ခင်မေကို တချက် လှမ်းကြည့် လိုက်သည်။
“ဘယ်လို မြွက်တော် မူသလဲ ဆိုရင် အာရုံငါးပါး ကာမဂုဏ်တရား မှန်သမျှ ဒုက္ခကြီးဘဲတဲ့၊ နံ့သာလူးခြင်း၊ ပန်းပန်ခြင်း၊ အဖြူအနီ အကြောင်ကျားတွေနဲ ခန္ဓာကိုယ် အပုတ်ကောင်ကြီးကို ဖုံးလွှမ်း မွမ်းမံနေရခြင်းဟာ ဗျာပါဒဝိတက် ဒုက္ခတရား မဟုတ်လား”
ခင်မေသည် ခေါင်းကို အောက်ချလျက် သူ့ကိုယ်သူ စိုက်ကြည့်မိ၏။
သီလရှင်တို့ ဝတ်ဆင်ထားသော မြေနီဆိုးအရောင် ဝါဝါဝတ်ကို ဆင်တူမို့လား မသိ။ ကြည့်၍ ကောင်းလှသည်ဟု တွေးမိသည်။ နေ့စဉ်နေ့တိုင်း ဒီအဝတ် ဒီအဝတ်သာ ဝတ်ကြပုံကို အမြင်ရ နှစ်သက်နေမိသည်။ ဆယ့်ငါးနှစ် ဆယ့်ခြောက်နှစ် ကိုယ်နှင့် တန်းတူရွယ်တူ သီလရှင် ကလေးများကို ကြည့်ကောင်းကောင်းဖြင့် တတန်းတန်း လိုက်ကြည့်တတ်လေ၏။
မဂ္ဂင်ချောင် ဇရပ် ရောက်၍ မကြာခင်ပင် ခင်မေသည် မယ်သီလရှင် ဖြစ်ချင်စိတ် ပေါက်လာလေသည်။ တလျှာက်လုံး ကိုယ့်ဘာသာကိုယ် နေလာခဲ့သည့် ခင်မေမှာ ကိုယ့်ဘာသာကိုယ် နေရသော ဘဝကို နှစ်သက်သည်။ စင်စစ် ခင်မေသည် သူ့စိတ်နှင့်သူ အပြီး သီလရှင် ဖြစ်ထားပြီးပြီ။ သီလရှင် ဖြစ်နေပြီးသော ခင်မေကို သီလရှင်နှင့် ကိုက်ညီအောင် လုပ်ဘို့ရာသာ အခါအခွင့်ကို စောင့်နေခဲ့ရသည်။
ယနေ့ ညမှပင် ခင်မေ၏ အကြံအစည်များသည် အောင်မြင်ရ ပေတော့မည်။
(၄)
ခင်မေသည် ငေးငိုင် စဉ်းစားနေရင်းမှ စ၍ ဆုပ်ကိုင်ထားသည့် ဆံပင်တွေကို လွှတ်ချလိုက်ရာ၊ ဖားလျား ကျသွားလေသည်။
ဤတွင် ကပ်ကျေးကို ကောက်ယူကာ လက်တဘက်က ဆံပင်များကို အမြစ်ခြေမှ နည်းနည်းစီ ဆွဲလျက် ကပ်ကျေး ထိုးသွင်း၍ ဦးရေနားမှ ကပ် ညှပ်ပစ်သည်။ ညှပ်ပြီးလျှင် လက်ထဲ၌ ပါလာသော ဆံပင်များကို ကြမ်းပေါ်၌ ပုံချထားလိုက်သည်။ ထိုနောက် လက်နှင့် ဆုပ်၍ ဆုပ်၍ တတိတိ ဖြတ်၍ နေတော့၏။ ညဥ့်မှာ တိတ်ဆိတ်၍ နေ၏။ ခင်မေသည် ကိုယ့်ဇောနှင့်ကိုယ် ပတ်ဝန်းကျင်ကို သတိမရမိ။ လက်နှင့် စမ်းကြည့်လိုက်၊ ရှည်နေသော ဆံပင်တွေ့တာ ဟူသ၍ ဆွဲဖြတ်လိုက်၊ စမ်းလိုက်၊ ဖြတ်လိုက်နှင့်ပင် တဖြည်းဖြည်း ဆံပင်ရှည် ဟူသမျှ ကုန်သွားလေသည်။
ခင်မေ၏ ခေါင်း၌ ဆံပင် အငုတ်လေးတွေမှာ ကြွက်ကိုက် ထားသလို အရှည်အတို မညီကြပေ။ တော်တော်လေး ချောသွားလျှင် ခင်မေသည် သက်ပြင်းတချက်မ၍ ဟင်းချလိုက်ကာ၊ မီးရောင်၌ လက်ကိုထိုးပြီး နာရီကို ကြည့်လေ၏။ နှစ်နာရီ လေးဆယ့်ငါးမိနစ်။
ဆံပင်ရှည်တွေတော့ ကုန်ပြီ၊ ဆံပင်ငုတ်တွေတော့ ချောပစ်ရအုံးမည်။ ဒီအတွင်း မပြီးခင် မိုးလင်းရင် အခက် ...။ ဆံပင် အပြတ်အငုတ်ကို စမ်းကာ မောင်းချဓားနှင့် တွန်း၍ ရိတ်ချကြည့်သည်။ ဆံပင်သန်သန်ကို ရေမဆွတ်ဘဲ ရိတ်နေ၍ ရုတ်တရက် မပြတ်နိုင်ဘဲ တရှီးရှီးသာ မြည်နေသည်။ တခါဘူးမျှ ဓားနှင့် ခေါင်းမရိတ်ဘူးသဖြင့်၊ တွန်းရိတ်ပစ်သော်လည်း တော်တော်နှင့် မစင်နိုင်ဘဲ ထပ်တလဲလဲ ပြန်ရိတ်နေရာ ကြန့်ကြာနေလေ၏။
ဖယောင်းတိုင်ကို တတိုင်ကုန်လျှင် တတိုင် ထွန်းရလေသည်။ ဓားနှင့် မရိတ်တတ် ရိတ်တတ်၊ ရိတ်ထား၍ ဆံပင်တို့သည် မပြောင်မချော ဟိုတကွက် သည်တကွက် ဖြစ်နေသည်။ တချို့ နေရာများတွင် ကြိုးတိုးကြဲတဲ ကျန်နေသေး၏။ ခင်မေသည် မစင်နိုင်၍ ကြိုးစားပန်းစား ထပ်ကာထပ်ကာ ပြန်ရိတ်ရ၍ လက်ပန်းကျသလို ရှိကာ မောပန်းလာလေသည်။ နောက်ဆုံး လက်ပန်းကျ၍ မောသွားတော့မှပင် ဓားကိုချ၍ ဖယောင်းတိုင် မီးကို မှုတ်ငြိမ်းလိုက်သည်။ ခင်မေသည် ပြူတင်းပေါက် တံခါးကို တွန်းဖွင့်လိုက်သည်။ အထဲသို့ အလင်းရောင် ဝင်လာသဖြင့် အကြံအောင်ပြီဟု စိတ်ချလက်ချ ဖြစ်သွားလေသည်။
ကမ္မဋ္ဌာန်း ကျောင်းကလေး ရှေ့ရှိ ထနောင်းပင်ကြီး ပေါ်မှ ဂျိုးကူသံကို စောစောစီးစီး ကြားရလေသည်။ အနီးအနား ဆူးပုတ်ချုံတွေ ပေါ်၌ တချုံက တချုံသို့ ခုန်ပျံရင်း တကျွိကျွိ အော်နေကြသည့် ဇွေ့ငှက်ကလေးများမှာ အလင်းရာင်ထဲတွင် မြူးနေကြသည်။ ခင်မေသည် ကြည်လင် ချမ်းမြေ့သော စိတ်နှလုံးဖြင့် ဝါးကြမ်းပေါ်၌ အသာလှဲကာ ခွေနေလိုက်သည်။ မဂ္ဂင်ချောင် အတွင်းမှ ဇရပ် အသီးသီးတွင် ဆွမ်းချက်ကြ၊ ဆွမ်းတော် ကပ်ကြနှင့် သီလရှင်တို့ အလုပ်များလျက် ရှိနေကြသည်။
ကြီးတော်ကြီးသည် အစောကြီး ထ၍ ဘုရားဝတ်ပြု နေလေသည်။ မဦးမှာ အိပ်ရာထ ခင်မေ့ကို မတွေ့၍ “မမ ဘယ်ဇရပ်များ သွားပါလိမ့်” ဟု လိုက်ရှာနေလေသည်။ ဟို ဇရပ်မေး၊ သည်ဇရပ်မေးနှင့် နောက်ဆုံး ဘယ်ဇရပ်မှ ရှာမတွေ့၍ တောင်ကုန်းပေါ်သို့ တက်လာလေသည်။ ကမ္မဋ္ဌာန်းကျောင်း ရှေ့တံခါးမှာ ပိတ်ထားသဖြင့် ပွင့်နေသော ပြူတင်းပေါက် ဘက်သို့ လှည့်၍ လျှောက်လာသော တံခါးဝမှ ကဲကြည့်လိုက်သည်။
“အမယ်လေး ... ဆံပင်တွေ မရှိတော့ဘူး၊ မမ ဘာလုပ်တာလဲ”
ခင်မေသည် ခွေလှဲနေရာမှ မျက်စေ့မဖွင့်ဘဲ မဦးကို ပြန်အော်လိုက်သည်။
“ဘာလုပ်လုပ် ... လာမရှုပ်နဲ့ သွား ... သွား”
မဦးသည်ချာကနဲ လှည့်ပြေးလေ၏။ မဦးအသံ ဝေးသွားမှ ခင်မသည် လှဲနေရာမှ ထကာ ကျောင်းရှေ့တံခါးကို သွားဖွင့်ပြီး ဝါးထရံကို ကျောကပ်လျက် ဆောင့်ကြောင့်ကလေး ထိုင်နေသည်။
“မေမေကြီးရေ ... ဆံပင်တွေ မရှိတော့ဘူး ... ကတုံးကြီးနဲ့”
ကြီးတော်ကြီးသည် ဘုရားဝတ်ပြု နေရာမှ ဗြုံးကနဲ ဦးချ၍ “အလိုတော် ... သီလရှင် ဝတ်သလား” ဟု လန့်ဖြန့် အော်မေး၏။
“လုံချည်တွေ အင်္ကျီတွေ ဝတ်လို့၊ သီလရှင်တော့ မဝတ်သေးဘူး၊ ဒါပေမဲ့ ကတုံးကြီးနဲ့”
“အမယ်လေး ... ဘယ်သူက မြှောက်ပေးကြပါလိမ့်၊ သူ့ကို မိတဆိုး ဖတဆိုးလေးမို့ အစစအရာရာ အလိုလိုက် ဆင်ပြင်ထားတာ ...၊ ကောင်းကြသေးရဲ့လား၊ မြင်ဝံ့ ကြသေးရဲ့လား၊ ကတုံးကြီးနဲ့၊ ကျုပ် မကြည့်ဝံ့ပါဘူးတော်”
ကြီးတော်ကြီးမှာ ဂရုဏာ ဒေါသောနှင့် ပါးစပ်က ပြော၍ အားမရသဖြင့် ခုန်ကာပေါက်ကာ တတွတ်တွတ် အော်ဟစ် မြည်တမ်း နေလေရာ၊ ခုန်သံပေါက်သံတို့သည် ပျဉ်ထောင် ဇရပ်၌ တဒိန်းဒိန်း မြည်နေလေသည်။
ဆွမ်းခံချိန် ဖြစ်၍၊ ဇရပ်ရှေ့မှ ဆွမ်းခံရန် ကြွတော်မူသွားသော သံဃာတော်များမှာ စိတ်မချမ်းသာတိုင်း အော်ကြီးဟစ်ကျယ် ဆူပွက်နေသော ကြီးတော်ကြီး၏ အသံကို ကြားကြရ၍ “သီလရှင် ဝတ်တာ လူသေတာ ကျနေတာဘဲ” ဟု အောက်မေ့ မှတ်ထင်တော် မူကြ၏။
ခင်မေတယောက် သီလရှင် ဝတ်မလို့ ကမ္မဋ္ဌာန်းကျောင်းထဲမှာ ဆံပင်တွေညှပ်ပြီး ခေါင်းရိတ်ထားတယ် ဆိုသော သတင်းမှာ ဇရပ် အဆောင်ဆောင်သို့ တမဟုတ်ခြင်း ပျံ့နှံ့သွားလေ၏။ ခင်မေ နားစွင့်နေသော ခြေသံများသည် ကျောင်းအနီးသို့ ကပ်လာချေပြီ။ ခင်မေသည် မျက်နှာ မထားတတ်အောင် ဖြစ်နေလေသည်။ ခေါင်းက ကတုံးနှင့်၊ ကိုယ်က လူဝတ်ကြောင် အဝတ်ကြီးနဲ့ ... ။
ကျောင်းပေါ်သို့ ရှေ့ဆုံးက တက်ပြေးလာသော သီလရှင် မကုမ္မာရီကို “ဆရာလေး” ဟု ခင်မေက ဆီးခေါ်လိုက်သည်။ “ဟောဒီမှာ ဘုရား ...” ဟု နောက်က လာနေကြသော သီလရှင်တစုကို မကုမ္မာရီက ဝမ်းသာအားရ လှမ်းအော် ပြောလေသည်။ ခင်မေ့နားတွင် သီလရှင်တွေ ဝိုင်းအုံ နေကြလေသည်။
“ကောင်းပါတယ် ... ဝမ်းသာပါတယ် ... သီလရှင် အဝတ်နဲ့ ပျော်ပျော်နေပေါ့”
မိမိအား ဝိုင်းအုံထား၍ တယောက်တခွန်း အားပေး ပြောဆိုနေကြသော သီလရှင်တို့အား ရှက်ကိုးရှက်ကန်းဖြင့် ဘာမှ ပြန်မပြောနိုင်ဘဲ ပြုံးနေလေသည်။ ခေါင်းရိတ်ထားသည် ဆိုသော်လည်း ဆံပင်တွေ မပြောင်သေးဘဲ၊ ကွက်တိကွက်ကျား ဖြစ်နေ၏။ အဝတ်ကလဲ မလဲရသေး။
“ဆရာလေးရယ် ... အဝတ်တစုံလောက် ကူညီပါ၊ နောက် အစား ပြန်ကန်တော့ပါ့မယ် ...”
မကုမ္မာရီလည်း “ရမယ် ... ရမယ်” ဟု ပြောပြောဆိုဆို ကျောင်းပေါ်မှ ပြေးဆင်းသွားကာ သီလရှင် ဝတ်စုံကို သွားယူလာ လေသည်။
“ရော့ ... ဒီခါးဝတ်ကို အရင်လဲ”
ခင်မေသည် မကုမ္မာရီ လက်မှ ခါးဝတ် ဆိုသည်ကို လှမ်း၍ယူသည်။ “ခါးဝတ်” ဆိုသည်မှာ အထက်ဆင် မရှိသော မြေနီ ဆိုးထားသည့် အရောင်ရင့်ရင့် ပိတ်ထမီ ဖြစ်သည်။ ခင်မေသည် ခါးထဲက ထမီနှင့် ခါးဝတ်ကို လဲလိုက်လေသည်။
“အပေါ်အင်္ကျီ ချွတ်ပြီး ဟောဒီ လက်ကြပ်နဲ့ လဲဝတ်”
အဝါမကျ၊ အနီမကျ စပ်ခဲဆိုးထားသော ဘင်္ဂါလီလက်ကြပ် အင်္ကျီကို ခေါင်းလျှို၍ စွပ်ကာ၊ ရှေ့က ပိတ်ကြယ်သီးကလေး များကို စေ့တပ် လိုက်သည်။ မကုမ္မာရီလည်း ထပ်ကိုင်ထားသော အဝတ်ကို လက်တဘက်စီ ခွဲပြောင်း၍ ကိုင်လိုက်ကာ “ဟောဒါက ‘ကိုက်’၊ ဟောဒါက ‘ကိုယ်ရုံ’ ဒါက ‘ခေါင်းတင်’ " ဟု ပြရင်း ကိုက်ကို အရင် ကမ်းပေးလိုက်သည်။ ကိုက်၊ ကိုယ်ရုံ တို့သည် စပ်ခဲဆိုး ဘင်္ဂါလီလက်ကြပ် အင်္ကျီနှင့် တသွေးတရောင်တည်း ဖြစ်ကြသည်။ လက်ကြပ်အင်္ကျီ ပေါ်မှ ထပ်၍ လက်တဘက်ကို လျှိုဝတ်ရသည့် ကိုက်၊ ကိုက်ကို လက်လျှို၍ စွပ်ချလိုက်လျှင်၊ ကိုယ်လုံးနှင့် ကပ်နေလျှက်၊ ခြေသလုံး အလည်လောက် ရောက်အောင် ရှည်လေသည်။
ကိုက်ကို စွပ်ချလိုက်ပြီးနောက် “ကိုယ်ရုံ” အဝတ်ကို ဖြန့်လိုက်လေကာ တစကို ဘယ်ဘက် ပုခုံးပေါ်၌ ချ၍ တစက ညာဘက် လက်အောက်က လျှိုပြီးလျှင် အစခြင်း ထပ်လျှက် လက်ကန်တော့ထိုး လွှမ်းရုံလိုက်ရလေသည်။ ခင်မေသည် ကိုယ်ရုံကို ဝတ်ပြီးနောက် ခေါင်းတင်အဝတ်ကို ပိုက်ထားလျက် မိန်းမပီပီကလေး ဝါးကြမ်းပေါ်၌ ထိုင်၍နေသည်။
“သီလရှင် အဝတ်ကလေးနဲ့ ကြည့်ကောင်းလိုက်တာ၊ ခေါင်းပေါ်က ကွက်တိကွက်ကျားလည်း လုပ်ကြပါအုံး ...”
အနားရှိ သီလရှင်တို့ ပြောမှပင် မကုမ္မာရီလည်း သူ့ ခေါင်းရိတ် သင်တုန်းဓားကို ပြန်ယူကာ ခင်မေ့ခေါင်းကို ရေဆွတ်လျက် ပြောင်ချောသွားအောင် ထိုင်ရိတ်ပေးလေသည်။ ကျောင်းပေါ်သို့ အလျှိုအလျှို ရောက်လာကြသော သီလရှင်တွေမှာ ခင်မေ၏ အဖြစ်ကို ကြည့်ကာ ဝိုင်း၍ ပီတိ ဖြစ်နေကြ သည်။
“ပျော်ပျော်သာနေ ... ကြားလား၊ ဘုရားသမီးတော် ဖြစ်သွားပြီ၊ ဘာမှ ပူစရာ မရှိတော့ဘူး၊ ဆရာလေးတို့ ကြည့်၊ ဟိုက ဒီက လှူဒါန်းကြတာ ဘာမှ မပူရဘူး၊ စာသင်၊ စာကျက်၊ တရား အားထုတ်နေရတာ သိပ်ပျော်စရာ ကောင်းတာဘဲ၊ ကြီးတော်ကြီး စိတ်ဆိုးလဲ ခဏပေါ့၊ စိတ်ပြေတော့ ထောက်ပံ့မှာပေါ့၊ အားမငယ်ပါနဲ့ ဆရာလေးတို့ ကျွေးထားမယ် ...”
ခင်မေသည် သဒ္ဓါဟုန်၊ ပီတိဟုန် ပြင်းပြစွာဖြင့် ဝမ်းမြောက်ဝမ်းသာ ဖြစ်ကာ၊ နောင် ဝတ်ရေး စားရေးတွေကို တွေးဖို့သာသာ ရှေ့ရှောက် ကိုယ့်စိတ်နှင့် ကိုယ့်ကိုယ်၊ တယောက်တည်း ကိုယ့်ဘာသာကိုယ် နေရတော့မည်ဟု အားရနှစ်သိမ့် ကျေနပ် နေလေသည်။ ကြီးတော်ကြီးသည် ခင်မေအား စိတ်ဆိုးမာန်ဆိုးဖြင့်၊ ထိုနေ့ပင် မဂ္ဂင်ချောင်မှ မန္တလေးသို့ ကူးသွားလေ၏။ လက်ဝတ် လက်စားများကို သိမ်းသွားကာ၊ ငွေကြေး တပြားမှ မပေးဘဲ ထားခဲ့လေ၏။ ခင်မေသည် မဂ္ဂင်ချောင် ဆရာကြီး၏ ညွှန်ကြားချက်အရ သင်္ကန်း၊ ဘိနပ် စသော အလှူဝတ္တုတို့ကို ငွေချေးဝယ်ကာ ဘုန်းကြီးထံ၌ ဘွဲ့တောင်း သွားရလေ၏။
“နာမည် ဘယ်လို ခေါ်သလဲ”
“ခင်မေလို့ ခေါ်ပါတယ် ဘုရား”
“တနင်္လာသမီးလား”
“မှန်ပါ”
“ဒါဖြင့် ဒီ ကနေ့က စပြီး ခင်မေ အမည် ပျောက်ပြီး ခေမာရီ ဟူသော အမည်သို့ ရောက်စေ”
(၅)
ပုညရှင် တောင်ပေါ်မှ ကြည့်လိုက်လျှင် စစ်ကိုင်း တတောင်ရိုးလုံးကို မြင်ရသည်။ တောင်ပူစာ၊ တောင်ထွဋ်တို့တွင် စေတီကြီးငယ် အဆူဆူ၊ ထုံးဖြူ တဖွေးဖွေး ဘယ်ကြည့်ကြည့် စေတီပုထိုး မလွတ်။ စေတီပုထိုး၊ တန်ဆောင်း၊ ပြသာဒ် ကျောင်းဇရပ်တို့ ပြွတ်ခဲလျက်နေသော စစ်ကိုင်း တောင်ရိုးကြီး။
ပုညရှင် တောင်ကမ္ဘား၌ တရုပ်စကားပင်ကြီးများသည် တပင်နှင့် တပင်ယှက်လျက် အရွက်ဆို၍ မရှိ၊ အပွင့်တွေ အပြည့်နှင့် တပြေးတည်း တသားတည်း ဖွေးဖွေးလှုပ်နေသော ပန်းကော်ဇော အခင်းကြီး ဖြစ်သည်။ တောင်ပေါ်၌ အလေ့ကျ ပေါက်နေသော တောပန်းတောင်ပန်း တို့၏ ရနံ့ကား မွှေးကြိုင် သင်းပျံ့၍ မဆုံး။ မိကျောင်းပန်း၊ တောင်ဇလပ်၊ ဂေါ်သဇင်၊ မခင်လေး၊ တောစပယ်၊ ခံပွင့် ... ပန်းပေါင်းစုံ ကြိုင်သင်းနေ၏။ ခေမာရီသည် ပုညရှင်တောင်၏ သုံးထပ်ကန်တဘက်၊ တောစပ်ကလေးနားတွင် အပန်းဖြေ နားနေလေသည်။ တောင်ပေါ်သို့ အတူ တက်လာသော အဖော် သီလရှင် မဝဏ္ဏမှာ တောစပ်ထဲတွင် ဟိုချုံ သည်ချုံ ဆွဲ၍ ပန်းများ ခူးဆွတ် နေလေသည်။
တောင်ပေါ်မှ တောင်အောက်၊ ချောက်၊ မြှောင်၊ ကမ္ဘားတို့ကို ငေးမောလျက် ခေမာရီသည် တောတောင် ရေမြေတို့ သယံဇာတ ဖြစ်သော ဘဝကို နှစ်သက် ခင်မင်လျက် ကြည်နူး နေလေသည်။ သီလရှင် ဖြစ်မှ လူတွေ သူတွေနှင့်လည်း မပေါင်း မရောရ၊ လူသူနှင့် ကင်းဝေးနေရသော တယောက်တည်း ဘဝကို နှစ်ခြိုက် ပျော်ပိုက်လေသည်။
သီလရှင် ဝတ်စ၊ ကြီးတော်ကြီး စိတ်မပြေခင်က ချောင်ဆရာတော် ဒေါ်သီလစာရီက သူ့ဇရပ်တွင် ခေါ်ထားကာ ထောက်ပံ့ ကျွေးမွေးထားလေသည်။ ငါးလ ရှိတော့မှပင် ကြီးတော်ကြီလည်း စိတ်ပြေ၍ တတ်အားသ၍ အစိတ် နှစ်ဆယ် ထောက်ပံ့နေသည်။
ခေမာရီ သီလရှင် ဖြစ်ဖြစ်ချင်း ချောင်ဆရာက ဆရာဖြေ၏ ဝတ်ရွတ်စဉ် စာအုပ်ကလေးကို ပေးအပ်ကာ၊ မင်္ဂလာ့သုတ်ကို အရကျက်ခိုင်းသည်။ ပုညရှင် တောင်ပေါ်မှ အရုဏ်တက် တုံးခေါက်လျှင် အိပ်ရာထကာ ဘုရားကျောင်း တက်ရသည်။ ဘုရားကျောင်းမှ အပြန် နံနက်စာ ချက်ပြုတ်လေသည်။ သီလရှင် ဘဝ၊ နံနက်တထပ် ရသ၍နှင့် တင်းတိမ်ရ၏။ ချောင်ထဲမှ ခူးသော သစ်ရွက်သစ်သီးဖြင့် တမယ်ကောင်း လောက်အောင်ပင် သတ်သတ်လွတ် ချက်စားကြသည်။ ပဲကြီးဟင်းချို၊ နှမ်းဖတ်ချဉ်သုတ်၊ ငဲစဉ်းငုံ အရေသောက်၊ ငရုပ်သီးကြော်၊ ပဲအမျိုးမျိုး၊ ဟင်းသီးဟင်းရွက် လက်သုပ် အမျိုးမျိုး ဖြစ်သည်။
နံနက်စာ စားပြီး၍ မွန်းလွဲလျှင်၊ ခေမာရီလည်း တနေ့လုံး စာအုပ်နှင့် မျက်နှာမကွာ အပ်ထားလေသည်။ ညနေ ဘုရားဝတ်တက် ပြီးသောအခါ၌၊ နေ့လည်က ကျက်မှတ်ထာေးသာ စာကို ဆရာအား အံပြရလေသည်။ သီလရှင် ဝတ်၍ ဆယ့်ငါးရက်ခန့် ရှိလျှင် ပရိတ်ကြီး ဆယ့်တစ်သုတ်လုံး အလွတ်ရ၍ ဆရာက အံ့ဩရသည်။
“စာကျက်သံလည်း မကြားရ၊ စာအုပ်ကို ကြည့်ရုံ ကြည့်တာနဲ့ သုတ်တွေကို အလွတ်ရသလား၊ ဆရာတို့များ ငယ်ငယ်က တတွတ်တွတ် တစာစာ အံရတာ”
ပရိတ်ကြီး ကုန်လျှင် ဆရာက သဒ္ဓါ အတက်ခိုင်းသည်။
သဒ္ဓါ မတက်ခင် သုတ်စဉ်ကို အရင် သင်ပေးလေသည်။ သုတ်စဉ်မှာ သန္ဓိ၊ နာမ်၊ ကာကရ၊ သမာသ်၊ တဒ္ဓိတ်၊ အာချပ်၊ ကိတ်၊ သဏုတ် ဟူ၍ ရှစ်ပိုင်း ရှိလေသည်။ သန္ဓိပိုင်းတွင် ပထမ၊ ဒုတိယ၊ ငါးပိုင်းအထိ ရှိလေသည်။ ပထပိုင်းကို ရှေးဦးစွာ ကျက်မှတ်ရ၏။ လူကျောင်းတွင် သင်ပုန်းကြီး သင်စဉ်က ကကြီး၊ ခကွေး စသင်သလို သဒ္ဒါသင်လျှင် သဒ္ဒါ၏ နိဒါန်းသုတ်စဉ်ကို စသင်ရလေသည်။
ခေမာရီသည် နေ့ညမအား စာသင်ရင်း စာပေ ပရိယတ္တိသာလျှင် အဖော်ဖြစ်ကာ နေပေသည်။ သုတ်စဉ်များ ရပြီးနောက် သဒ္ဒါကြီး တက်ရ၏။ သဒ္ဒါကြီးတွင် ပါဠိကို မြင်လျှင် သန္ဓိပုဒ်၊ ကံပုဒ်၊ ကာကရပုဒ်ဖြင့် သိနိုင်သည်။ ကတ္တားဟော၊ ကံဟော၊ ဝိဘတ် ပစ္စည်း၊ ဓာတ်အရကို သိနိုင်သည်။ သုတ်ဝုဒ္ဓိ ၊ ဥဒါဟရုဏ်၊ အနက်သမ္ဘာန်၊ တသုတ်တယူဂ၊ အာဂုံဆောင် ကျက်မှတ်ရလေသည်။
( ဇာတ်သိမ်းဆက်ရန်)👇👇👇
No comments:
Post a Comment