#ခေမာရီ
( ဇာတ်သိမ်း)
#ဂျာနယ်ကျော်မမလေး
“ဗမာစာပေမှာ စာပေကျမ်းဂန် ဆိုတာ ကျမ်းစာတွေ မတတ်မသိခင်၊ စာပေဖြစ်တဲ့ သဒ္ဒါကြီးကို တတ်သိရတယ်၊ သဒ္ဒါကြီး တတ်မှ စာတတ်တယ်၊ ပထမငယ်အောင်အောင် ကြိုးစား ဖြေရမယ်နော် ... ” ဟု ဆရာက ပြောထားသည့်အတွက် စာမေးပွဲ ဖြေဆိုနိုင်ရန် စာနှင့်သာ အချိန်ကုန် နေရသည်။
တောပန်းတို့၏ ရနံ့မှာ သင်းပျံ့ပျံ့ ရှိလှသည်။
စိတ်ကြည်နူးလာအောင် ဆွဲဆောင်နိုင်သော ရနံ့။ ခေမာရီသည် တောနံ့တောင်နံ့ကို ခံစားမေ့မောလျက် နေခိုက် ဆူညံဆူညံ ကြား၍ လှည့်ကြည့်လိုက်သည်။ ဘုရားဖူး လာသူတို့အတွက် ဘယ်သူကများ လှူထားမှန်း မသိသော ကျောက်ပျဉ် အကြီးအငယ်၊ သနပ်ခါးတုံး၊ အမွှေးတုံး အစုံ၊ ဇရပ်တိုင်များတွင် မှန်တွေ ချိတ်လျက်ရှိသော သုံးထပ်ကန် ဇရပ်ထဲတွင် မိန်းမကြီးငယ်တစု စားကြသောက်ကြ သနပ်ခါး လူးကြနှင့် ဆူညံနေသည်။ မိန်းမငယ်ငယ်နှင့် မိန်းမကြီးကြီး နှစ်ယောက်ကို ကြည့်၍ စိတ်ထဲတွင် သားအမိ တော်ကြည့်လိုက်ကာ ခေမာရီမှာ “အမေ့” ကို သွားတွေးကြည့် မိသည်။ အမေ့ကို သည်လောက် တွေးမရဘဲ အဖေ့ကိုသာလျှင် အမှတ်ရလာ တော့သည်။ ဖွေးညီစွာ မှုန်သထားသည့် မိန်းမရွယ်၏ အဆင်အပြင် အဝတ်အစားကို ကြည့်၍ မျက်ရည်လည်လာ လေသည်။
“အမေများ ... အဖေများ ရှိရင် ...”
ခေမာရီသည် တောစပ်မှ ထလိုက်ကာ မဝဏ္ဏကို ဟစ်ခေါ်လျက် တောင်ဖီလာချောင်သို့ ဆင်းသွားကြလေသည်။ တောင်ဖီလာချောင်မှ မှောင်မှပင် ဇရပ်သို့ ပြန်ရောက်ကြသည်။ ဘုရားကျောင်း၌ ကြေးစည်သံ တစီစီ တဝီဝီ မြည်၍ နေသည်။ သီလရှင်များကား တစုတရုံးကြီး ဘုရားကျောင်းသို့ ဝတ်ပြုရန် သွားကြလေသည်။ ကျောင်းထဲတွင် ငြိမ်သက်စွာ ထိုင်နေကြသော သီလရှင်များမှာ အပါး ငါးဆယ်ခန့် ရှိ၏။ လူစုံသည်နှင့် ဘုရားစ ဝတ်ပြုကြသည်။
မဂ္ဂင်ချောင်တွင် အသံအကောင်းဆုံး ဒေါ်ဩဘာက ဘုရားကို ဦးချလျက် ရှေးဦးစွာ သာသာနာ လျှောက်သည်။
“မဟာသမ္မတ၊ ခတ္ထိယဟု၊ ဂေါတမအလောင်း၊ မင်းကောင်းမင်းမြတ်၊ လောကနတ်ကို ...”
သာသနာ လျှောက်သံမှာ အောင်မြင် ခန့်ညားကာ၊ စည်၍ ချိုအေး သာယာသည်။ ဒေါ်ဩဘာ ပြီးလျှင် ခေမာရီက ဘုရားပင့်ရလေသည်။ ဘုရားပင့်ပြီးမှ သီလရှင် အားလုံး သံပြိုင် သီလခံကာ ပရိတ်ရွတ် မေတ္တာပို့ကြသည်။
မေတ္တာပို့ပြီး၍ မစန္ဒာက အမျှဝေသည့်အခါ ဝိုင်း၍ သာဓုခေါ်ကြသော သီလရှင် အသံတို့မှာ ကျောင်းထဲတွင် ဟိန်းနေသည်။ အပြင်ဘက်တွင် လရောင်မရှိ၊ မဲပြာသော မိုးကောင်းကင်တွင် ကြယ်တို့သည် မှိတ်တုံ ပွင့်တုံ မှုန်မှုန်ပင် တောက်လင်းနေသည်။ မြသိန်းတန် စေတီမှ ဆွဲလဲသံမှာ လေထဲတွင် တတင်တင် မြည်နေပေသည်။
ဘုရားကျောင်းမှ သီလရှင် တစုသည် အမှောင်ထဲတွင် လျှောက်ကာ ညဝါဆိုရန် ဇရပ်သို့ ကူးလာကြသည်။ ဇရပ်ထဲတွင် မီးမထွန်းသဖြင့် မှောင်နေသည်။ အမှောင်ထဲ၌ ဆရာ ထိုင်နေသော နေရာကို မှန်းဆ၍ ထိုင်နေကြ နေရာအတိုင်း ကိုယ်စီကိုယ်စီ ဝင်ထိုင် ကြသည်။
“မမာတရံ၊ ပမုခံ၊ ကတွာ၊ တဿ ...”
ဆရာသည်မှောင်ထဲမှ စတိုင် ပေးလိုက်ရာ သီလရှင် တပါးက လိုက်၍ ဆိုလေသည်။ အခြား သီလရှင်များမှာ စိတ်နှင့် လိုက်၍ မှတ်နေသည်။ တပိုဒ်စီ တပိုဒ်စီ နှုတ်တိုက် အလွတ်ချ၍ ရလောက်ပြီ ဆိုတော့မှ အားလုံး သံပြိုင် ဆိုကြသည်။ ခေမာရီမှာ နေ့ဝါတက်လိုက်၊ ညဝါဆိုလိုက်နှင့်ပင် ပထမငယ် အောင်ရန် ကြိုးစားနေလေ၏။ ပထမငယ် အောင်ဘို့ရာကလည်း မလွယ်လှ။ သဒ္ဒါ၊ သင်္ဂြိုလ်၊ မာတိကာ၊ ဓာတုကထာ၊ ဇနက္ကဇာတ် အဋ္ဌကထာ၊ သိင်္ဂါလောဝါဒသုတ်၊ ဓမ္မပဒ အဋ္ဌကထာ စသည်တို့ တက်ဆိုပြီးမှသာ စာမေးပွဲဝင်နိုင်သည်။
အစိုးရ ပထမပြန် စာမေးပွဲ နီးကပ်နေ၍ စာပြန် စာအံရသည်မှာ လည်ချောင်းကို ပွတက် မတတ်ပင် ဖြစ်သည်။ ခေမာရီသည် အင်းဝကူးတို့နှင့် မန္တလေးတွင် စာမေးပွဲဖြေရန် လိုက်လာခဲ့သည်။ ကူးတို့ပေါ်တွင် သီလရှင်များမှာ ပြည့်ကြပ်နေ၏။ စာမေးပွဲ ဖြေမည့် နေရာကား မဟာမြတ်မုနိ ဘုရားကြီးအနီး ဆယ့်လေးခန်း မှန်စီ တစောင်းကြီး၌ ဖြစ်သည်။ ခေမာရီတို့လည်း ဘုရားအနီး ပန်းခုံတိုက်၌ တည်းခိုကြသည်။ စစ်ကိုင်းမှ ယူဆောင်လာသော သရဖီ၊ ဇွန်ပန်းများကို ပန်းထီး၊ ပန်းစေတီပုံ သီကုံးကာ ဘုရားကြီးအား လှူဒါန်းရင်း စာမေးပွဲအောင်ရန် ဆုတောင်းရသည်။ စာမေးပွဲ အောင်လျှင် ဆုလက်မှတ်နှင့် ငွေငါးဆယ်။
(၆)
ခေမာရီသည် ပုဝါဖြူနှင့် ထုပ်ထားသော စာအိတ်ကို ခေါင်းတင်နှင့် ပတ်ပြီး၊ ခေါင်းပေါ်၌ ရွက်ကာ ဗောဓိချောင် ကုန်းပေါ်သို့ တနဲ့နဲ့နှင့် တက်သွားလေသည်။ မောလာကာ အသက်ရှူ မဝသည်နှင့် ဆက်မသွားနိုင်တော့ပေ။ စိန်ပန်းပင်ကြီး အောက်၌ ဦးကြာဖူး ခုံဖိနပ်ကို ဖင် ခုထိုင်ကာ နားနေလေသည်။
မျက်စေ့ရှေ့၌ သီလရှင်တွေ တပါးပြီးတပါး သွားနေကြသည်။ သီလရှင်တွေ ဝင်သွားသော ခပ်လှမ်းလှမ်းက ဇရပ်ကို ငေးကြည့်နေလေ၏။ ဇရပ် အလယ်၌ စားပွဲ ကုလားထိုင်နှင့် ထိုင်နေသည့် သရိုင်ဆရာကြီး၊ စားပွဲခုံ၏ ရှေ့တူရူ လက်ဝဲဘက်၌ သီလရှင်များ ပြားပြားဝပ် ထိုင်ကာ စာလိုက်ကြသည်။ စားပွဲ၏ လက်ျာဘက် ပျဉ်ထောင် ကာထားသော အတွင်း၌ တဘက်လှေကားမှ တက်၍ သံဃာတော်များက စာလိုက်ကြရလေသည်။
ခေမာရီသည် ပထမငယ်ကိုလည်း အောင်ပြီး၏။ ပထမလတ်ကိုလည်း အောင်ခဲ့၏။ ယခုအခါ အထက်တန်း ပထမကြီး စာမေးပွဲ ဖြေဆိုရန် သရိုင်ဆရာကြီးထံတွင် စာလိုက် နေရလေသည်။ ခေမာရီ၏ နေရေး ထိုင်ရေးကား ရှေးက အတိုင်းပင် ဖြစ်၏။ ကြီးတော်ကြီး တလနှစ်ဆယ် ထောက်ပံ့သမျှနှင့် ခြိုးခြိုးခြံခြံ စားဝတ် နေထိုင်၏။ ရပ်ရွာသို့လည်း တခေါက်မှ မပြန် ၊ ကြီးတ်ာကြီးသာလျှင် ချောင်သို့ တနှစ် တခါလောက် လာတတ်လေသည်။
ချောင်၌ ပဲနှင့် သစ်သီးသစ်ရွက်နှင့် ခါးဝတ် ပိတ်စုံ နှစ်စုံ သုံးစုံလောက်ဖြင့် အသားကျ နေလေပြီ။ စစ်ကိုင်းချောင်ထဲတွင် အောင်းနေသော ခေမာရီ၏ သက်တမ်းမှာ အနှစ်နှစ်ဆယ် ရှိလာချေပြီ။ နှစ်ကြာသော သီလရှင်၏ အခြေအနေသည် သီလရှင် ဖြစ်စ, ယခင်အချိုး အတိုင်းပင် ဘယ်လိုမှ ပြောင်းလဲသွားခြင်းမျိုး မရှိ။ သို့သော် ... ယခု ခေမာရီသည် သီလရှင်ကလေး ခေမာရီ မဟုတ်တော့ပေ။ ယခုမှ သိသာစွာပင် တမျိုး ပြောင်းလဲလာ လေသည်။
စကားပြောလျှင် မောလာသည်၊ အမြဲတန်းလည်း ရင်တုန်တတ်သည်။ ချောင်ဆရာ ဒေါ်သီလစာရီ ကွယ်လွန်သွားမှ ဇရပ်တွင် စာချဆရာ ဖြစ်နေသည်။ သီလရှင်ကလေးများကို သဒ္ဒါ၊ သင်္ဂြိုဟ် စာချပေးနေသည့်အခါ “အသက်ရှူ ကြပ်ရလိုက်တာ” ဟု နှုတ်က ပြောရင်း လေကို ဝဝပင့်သွင်းပြီး ရှူထုတ်နေရသည်။
လေတက်လာ၍ အေ့ ... အေ့ ဟု အသံထွက်လာလျှင် ဇရပ် ခုနှစ်ဆောင် ရှစ်ဆောင်လောက်က ကြားနိုင်လောက်သည်။ အထူးသဖြင့် မျက်စိများလည်း သီဝေကာ မှုန်လာလေပြီ။ သီလရှင် ခေမာရီသည် ဝေဒနာရှင် ဒေါ်ခေမာရီ အဖြစ် တမျိုး ပြောင်းလဲနေချေပြီ။
သစ်ပင်အောက်၌ ခေမာရီသည် တဒိတ်ဒိတ် ခုန်နေသောရင်ကို လက်နှင့် ဖိလျက်၊ အမော သက်သာအောင် ငြိမ်ငြိမ်ကလေး နေရလေသည်။
“ပထမကြီးတော့ အောင်မှ ဖြစ်မယ် ...”
ခေမာရီသည် ကိုယ့်ကိုကိုယ် အားယူ၍ မတ်မတ် ရပ်လိုက်၏။ ကိုယ်ကို မတ်ရပ်လိုက်လျှင် ခြေထောက် အောက်က မြေကြီးမှာ ချာလပတ် လည်သွားလေသည်။ ခေါင်းပေါ်က စာအုပ်ကလေးမှာ မြေပေါ်သို့ ဖုတ်ကနဲ ကျသွားသည်။ ခေမာရီသည် ကပျာကယာ စိန်ပန်းပင်ကို လှမ်းမှီ လိုက်ရလေသည်။
“အလို ... မြတ်စွာဘုရား”
ခေမာရီသည် မူးနေပြီ။ မြေကြီးပ်ါသို့ အသာ ထိုင်ချလိုက်ကာ သစ်ပင်လုံးကို မှီနေရသည်။ မျက်လုံးများ ပြာလျက် အားလုံး ယိမ်းထိုးနေလေရာ မျက်စေ့ကို မှိတ်ထားရလေသည်။ မူးလွန်းလို့ ထင်ရဲ့၊ ချွေးစေးများ ပြန်လာလေသည်။ တကိုယ်လုံးကား အေးစက်လာသည်။
“ဆရာလေး ... ဆရာလေး”
ခေမာရီသည် မျက်စေ့ မှေးဖွင့်လျက် မျက်မှောင်တွန့်ပြီး ကြည့်ရသည်။ ကြာကြာ ဖွင့်ဖို့ရန်ပင် မတတ်နိုင်တော့။
“ဆရာလေး မူးသလား ... ဖြစ်မှဖြစ်ရလေ တပည့်တော်ကိုမှီ ... မှီထား”
လူချင်း ထိထား၍ နွေးသော အသိကိုသာ သိသည်။ ဘယ်သူ ဘယ်ဝါမှန်းပင် မသိ။ လူတကိုယ်လုံး အထက်သို့ မြောက်ပင့် တက်သွားပြီး အောက်သို့ အရှိန်နှင့် လိမ့်ချောလာကာ မှောင်ထဲ၌ ရပ်တည်ရာ မရနိုင်ဘဲ မောနေရှာသည်။ မောလွန်းသဖြင့် အင်အား ကုန်ခန်းကာ မလှုပ်နိုင်၊ မရှားနိုင်၊ သီလရှင်ကို မှီနေရသည်။
“ဆရာလေးကို တပည့်တော် လိုက်ရှာလိုက်တာ တွေ့ပေလို့ဘဲ၊ ဘယ့်နှယ် နေသေးသလဲ ... ”
ခေမာရီသည် အားယူ၍ မျက်လုံးဖွင့်ကာ သီလရှင်ကို ကြည့်လေသည်။
“နဲနဲ သက်သာပါတယ်”
“ချောင်မှာ သံကြိုးစာ တစောင် ရောက်လာလို့ ဆရာဘုရားက လိုက်ရှာပေးစမ်း ဆိုတာနဲ့ တပည့်တော် လိုက်ရှာတာ”
ပြောပြောဆိုဆို သီလရှင်က ဆုပ်ထားသော စာအိတ် အဝါကလေးကို ထိုးပြ၍ “ဖောက်လိုက်ပါ” ဟု သဲ့သဲ့သာ ပြောနိုင်ရှာ၏။
အမေသေပြီ။
ကြီးတော်ကြီး သေဆုံး၍ ရိုက်လိုက်သော သံကြိုးစာ ဖြစ်လေသည်။ စာရွက်ထဲရှိ အင်္ဂလိပ်စာ နှစ်လုံးမှာ ဝါး၍ ဝါး၍ သွားလျက် မျက်လုံးများကို ပြန်မှိတ်ထားလိုက်သည်။
(၇)
မကေသီသည် အိတ်ထဲမှ ဆန်ကို လက်နှင့် ကော်လိုက်ကာ “တပည့်တော်တို့ ရွှေဘိုမှာတော့ ဒါအကောင်းဆုံးဘဲ ဘုရာ့၊ ရွှေဝါ တောင်ထိပ်ပန်း” ဟု ပြောလိုက်သည်။
ခေမာရီမှာ မမြင်ဘူးသည့် ပစ္စည်းကို ငေးသလို ငေးငေးသာ ကြည့်နေသည်။
“ဒီအိတ်ကတော့ ပဲကြီးက နဲနဲ၊ ကုလားပဲ၊ ပဲကျား။ ဒါတွေက အရပ်က လှူလိုက်တာ၊ တပည့်တော် အရီက ဆီ ၂-ပိဿာ လှူလိုက်တယ်၊ အမေကတော့ ငွေ ၃၀-ပေးလိုက်တယ်”
မကေသီသည် အရပ်ပြန်၍ စုဆောင်း ရခဲ့သမျှ ပစ္စည်းများ အထုပ်ထဲမှ ဖြည်ပြကာ အားရပါးရ ပြောနေလေသည်။
ခေမာရီသည် ငေးကြည့်နေရင်းမှ မျက်နှာကလေး ညှိုးနေရှာသည်။ ကြီးတော်ကြီး ဆုံးပြီးမှ မည်သူမှလည်း ထောက်ပံ့မည့်သူ မရှိ။ ချို့ချို့ငဲ့ငဲ့ ရှိလှသည်။ အခြား သီလရှင်များကဲ့သို့ အလှူခံ သွားရအောင် ပြန်စရာ အရပ်ရယ်၊ အိမ်ရယ်လည်း မရှိ။ ကိုယ့်အရပ်ကိုယ် ပြန်သွားကြသော သီလရှင်များမှာ ချောင်ပြန်လာလျှင် ဆန်၊ ဆီ၊ ပဲ၊ အချို့က ကြက်သွန်၊ ငြုပ်သီး စသည်ဖြင့် စုဆောင်းလာခဲ့ကြသည်။ ခေမာရီမှာ စားဘို့ ဝတ်ဘို့ ပူလာရသည်။ ဝါတွင်းဝါပ စာချနေ၍ တပည့်များက ဟင်းတခွက်တော့ ကမ်းကြ၏။ အထောက်အပံ့ မရှိမှန်း သိကြ၍ ပဲတပြည်၊ ဆန်တစိတ်၊ ဆီတပုလင်း၊ သီလရှင် အချင်းချင်း စု၍ ပေးကြကမ်းကြသည်။
စားဝတ်နေရေးအတွက် ကတုံးပေါ် ထိပ်ကွက် ရသလိုပင် သူများ ပေးစာကမ်းစာကို မျိုမကျနိုင်၊ ကြာတော့ ယူရမှာ အားနာလာသည်။ သီလရှင်များ အလှူခံ ရလာတိုင်း ပေးကြကမ်းကြ သမျှနှင့် နေရသည်မှာ ပြတ်ပြတ်ငတ်ငတ် ရှိလှသည်။
ခေမာရီသည် ဝမ်းနည်းစွာဖြင့်ပင် “ချောင်” နှင့် ခွာလိုက်ရသည်။ ကိုယ့်အရပ် ကိုယ့်အိမ်ဆို၍ ချောင်သာလျှင် ဖြစ်သည်။ နှစ်ပေါင်းများစွာ နေခဲ့သည့် ချောင်နှင့် ခွဲခွာခဲ့ရသည့်အတွက် ရှိုက်ပြီး ငိုမိလေသည်။
“ရန်ကုန်မှာ အထောက်အပံ့ မရှိဘဲ ကိုယ့်ဘာသာကိုယ် အလှူခံပြီး နေနိုင်ကြတဲ့ သီလရှင်တွေ ပြည့်လို့ပါ၊ လိုက်သာ လိုက်ခဲ့ပါ”
ရန်ကုန်မှ ဘုရားဖူးလာသော မသုခက အပြောကောင်းလွန်း၍ ဖြစ်ချင်ရာ ဖြစ်တော့ဟု ပိုင်းဖြတ်ကာ သီလရှင် တပည့်များထံ၌ စားရိတ်ငွေကလေး အလှူခံကာ တခါမှ မရောက်ဘူးသော ရန်ကုန်သို့ လိုက်သွားလေသည်။
ဘောင်ဒရီလမ်းရှိ ဦးပြားတောရတွင် မသုခနေသော ဇရပ်၌ မသုခနှင့်အတူ နေလေသည်။ ရန်ကုန်သို့ ရောက်ခဲ့ရာ နေမှု စားမှုအတွက် ဘယ်လိုလုပ်ရမလဲဟု အတော် စိတ်ရှုပ်သည်။ ပါလာသည့် ပိုက်ဆံမှာလည်း မကြာခင် ကုန်သွားတော့မည်။
“မသုခ ဒီတခါ ဆန်ခံ ထွက်သွားရင် တပည့်တော်လဲ လိုက်မယ် ဆွမ်းဆန်ခံတဲ့ ဘန်း ငှားပေးပါ”
မသုခမှာ ခေမာရီအတွက် ဇရပ်တွေ ရှိရာသို့ သွားကာ ဘန်းလည်၍ ငှားပေးလေသည်။ ဦးပြေားတောရ၌ နေထိုင်ကြသော သီလရှင်များမှာ အများအားဖြင့် မြို့ဘိတ်၊ တောဘိတ် ဆန်အလှူခံ ထွက်ကြသည်။ ဘန်းရှင်များအားလုံး ထွက်ကြမည်ဖြစ်၍ ဘယ်သူကမှ မငှားနိုင်ပေ။
“ဆရာလေးရယ် ... တောဘိတ် မြို့ဘိတ် မလိုက်ပါနဲ့၊ အများနဲ့ဆိုတော့ အများသွားသလို သွားရမှာ၊ ဆရာလေးက မာတာ မဟုတ်တော့ သွားနိုင်မှာ မဟုတ်ဘူး၊ ဒီတော့ ကြားဘိတ် ထွက်ပါ၊ ကိုယ်နားချင်ရာနား၊ သွားချင်ရာသွား ရတယ် ဘုရာ့”
ဥပုသ်နေ့ လွန်မြောက်၍ (၁) ရက်နေ့တွင် နံနက် စောစောစီးစီး မသုခနှင့် ဆန်ခံ ထွက်ခဲ့ ကြသည်။ ကျောက်ကာ ဘန်းကလေးထဲ၌ ဘန်းကုန်း ငယ်ငယ်ကလေး တခု၊ ဒန်ချိုင့်ပုလေး တလုံး၊ ပိတ်အိတ်ကလေး တအိတ်ထည့်ကာ ဘန်းကိုယ်စီ ရွက်လျက် ထွက်ခဲ့ကြသည်။
“လာဘ်ဦး မပယ်ရဘူး ...၊ လာဘ်ဦးပယ်ရင် လာဘ်တိတ်တတ်တယ်၊ အဲဒီတော့ သေချာတဲ့ အိမ်က စမှ ဖြစ်မယ် ...”
မသုခ၏ စကားများသည် ခေမာရီ၏ နားထဲတွင် ခါးသီး၍ သွားလေသည်။ မသုခသည် ဘောင်ဒရီလမ်းထဲရှိ နှစ်ထပ်အိမ် ဝင်းခြံထဲသို့ ရှေ့ကသွား၍ နောက်မှဖြေးဖြေး လိုက်ဝင်ရလေသည်။ တိုက်ရှေ့တွင် ရပ်နေကြသည်။
သီလရှင်များ မြင်၍ တိုက်ထဲမှ ကလေးမ တယောက်သည် လဘက်ရည် ပန်းကန်လုံးနှင့် ဆန်ထည့်ကာ ထွက်လာလေသည်။ သီလရှင် နှစ်ယောက်အား လဘက်ရည် ပန်းကန်တလုံးစာကို တဝက်စီ ခွဲလောင်းကာ ပြန်ဝင်သွားလေ၏။
ဒေါ်သုခလည်း ဘန်းကုန်းကလေးထဲမှ ဆန်ကို ဆန်အိတ်ထဲသို့ မှန်းလောင်းထည့်ရင်း “ကန်တော့ပါသေးရဲ့ ပြောလွှတ်မလားလို့ ပူလိုက်ရတာ လာဘ်ဦးကောင်းတယ် ဆရာလေး” ဟု ခေမာရီ ကြားလောက်အောင် ဝမ်းသာအားရ တိုးတိုး ပြောလိုက်သည်။
ခေမာရီမှာ ဘန်းကုန်းကလေးထဲမှ ဆန်ကိုကြည့်ကာ စိတ်ပျက်မိသည်။ တော်တော်ဝေးဝေး လျှောက်မိလျှင် တိုက်တတိုက်သို့ ဝင်ပြန်လေသည်။ တိုက်ရှေ့၌ နှစ်ယောက်သား ရပ်နေကြသည်။ လူစသူစ မမြင်၊ တိုက်ကြီးမှာ တိတ်ဆိတ်နေလေသည်။
တိုက်ထဲမှ လူရိပ်လိုလို မြင်လိုက်လျှင် မသုခသည် အသံကုန် ဟစ်၍ အော်လိုက်သည်။
“ဒါနဆန်များ မေတ္တာရပ်ခံပါတယ်ရှင် ...”
အသံကျယ်လွန်း၍ ခေမာရီမှာ လန့်သွားသည်။ တိုက်ထဲမှ မိန်းမကြီး တယောက် ပေါ်လာကာ အိမ်ပေါက်ဝသို့ပင် ထွက်မလာဘဲ “မယ်သီလရှင်များကလဲ ဘာနေ့မို့ ဆွမ်းခံနေတာလဲ၊ ကန်တော့ပါသေးရဲ့တော် ...” ဟု ပြန်အော်လိုက်ကာ ကွယ်ပျောက်၍ သွားလေသည်။
“ဒီမိန်းမကြီးက ဘယ်နေ့မှ လောင်းတာ မဟုတ်ဘူး ... ဒီလိုဘဲ”
မသုခသည် နာကျည်းသည့် အသံဖြင့်ပြောရင်း ခပ်ဆောင့်ဆောင့်ကလေး နင်းထွက်လာသည်၊ အတော်ကလေး သွားမိပြန်သောအအခါ လမ်းကြား တစ်ခုထဲသို့ ချိုးဝင်ခဲ့ကြသည်။ လမ်းထဲတွင် သစ်ပင်များ ထူထပ်လျက် အိမ် တအိမ်မှ မမြင်ရချေ။ သစ်ပင်အုပ်များ ကျော်လွန်၍ သွားမှပင် အိမ်ကလေး တအိမ် တွေ့ရသည်။
ထိုအိမ်မှာ မသုခ၏ ပစ္စည်းလေးပါး ဒါယကာနှင့် တူလေသည်။ အိမ်ထဲ၌ ရင်းရင်းနှီးနှီး ဝင်ထိုင်ကာ ရေအိုးစင်က ရေခပ်၍ ခေမာရီအား ကမ်းပေးလေသည်။ ထိုင်မိ၍ မကြာခင်တွင် “မစိန်ရေ” ဟု ပါးစပ်က ခေါ်ရင်း အိမ်ထဲသို့ ဝင်သွားလေသည်။ ပန်းကန်ပြား နှစ်ချပ် ကိုင်လျက် အိမ်ထဲမှ “မစိန်” နှင့် ထွက်လာကြသည်။ ထောင်ထားသည့် သင်ဖြူးကို ဆွဲချ၍ ခင်းသည်။ ဘန်းနှင့် ရွက်လာသော ဒန်ချိုင့်ကလေးကို ဖွင့်ကာ ပန်းကန်ထဲသို့ ထမင်း ယူထည့်လျက် “လာ ဆရာလေး ... စားလိုက်တာ အေးတယ်” ဟု ခေမာရီအား ထမင်းစား ခေါ်နေသည်။ နံနက်စာကို ထိုအိမ်၌ပင် ဇရပ်က ချက်ယူလာကြသော ငါးပိချက်၊ ဆူးပုပ်ရွက် တို့စရာနှင့် စားလိုက်ကြရသည်။ ထိုအိမ်ကအထွက် မစိန်က နို့ဆီဘူးနှင့် ဆန်အပြည့် တယောက်တလုံးစီ လောင်းလိုက်လေသည်။ အိမ် နောက်ဖေးရှိ စပယ်ပင်တွေ အခင်းလုပ် စိုက်ထားသော လမ်းမြှောင်အတိုင်း လျှောက်ခဲ့ကြသည်။ အခင်းစိုက်သော ခြံတွေကို တခြံပြီး တခြံ ကျော်ဖြတ်ကာ သွားနေကြသည်။ တအိမ်နှင့် တအိမ် အတော်ပင် လှမ်းလေသည်။
ထိုလမ်းမြှောင်မှ လွန်လျှင် လမ်းမသို့ ရောက်လာကြသည်။ လမ်းဘေးရှိ အိမ်များကို တအိမ်မကျန် ဝင်ရပ်ကြသည်။ အိမ့်စေ့ ဆိုသလိုပင် မလွတ်တမ်း ထွက်လောင်းကြသည်။
ကြွေဇွန်းနှင့် တဇွန်းစီ။
မသုခသည် ရှေ့က ပြာပြာ ပြာပြာနှင့် ခပ်သွက်သွက် လှမ်းလျက် “မြန်ုမြန်လျှောက် ဆရာလေး ... ရှေ့ကအိမ်က ဘကြီးက သီတင်းတိုင်း တယောက် ငါးပြား လှူတယ် ...၊ လာ ... လာ မြန်မြန်လျှောက်”
အိမ်အတွင်းသို့ ဝင်သွားကြရာ ခွေးကြီး တကောင်က ဝုတ်-ဝုတ် ဟောင်လျက် ထွက်လာလေသည်။ ခေမာရီလည်း ကြောက်အား လန့်အားဖြင့် ခြံအပြင်ဘက်သို့ လှည့်ထွက် ပြေးလေသည်။ ခွေးမှာ ခေမာရီ နောက်သို့ပင် လိုက်ဟောင် နေလေသည်။
ခေမာရီသည် ခြံအပြင် လမ်းမဘက်သို့ ပြန်ရောက်သောအခါ ဒူးများ တဆတ်ဆတ် တုန်နေသဖြင့် ခေါင်းပေါ်က ဘန်းကိုချလျက် မသုခအား ထိုင်စောင့် နေရသည်။
မသုခ ပြန်ထွက်လာလျှင် “မသုခ ပြန်ကြပါစို့ ...” ဟု ဆီး၍ ပြောလိုက်သည်။ “အခုတော့မှ ဘုရား ... နောက်ဆုတ်လို့ မဖြစ်ဘူး၊ ရှေ့ဆက်သွားမှ ဖြစ်မယ်၊ အသွားပူ အပြန်ပူနဲ့ ညနေမှ အေးအေး ပြန်တာပေါ့၊ မောရင် ဖြည်းဖြည်း နားလျှောက်ပါ ...”
ခေမာရီမှာ ဘယ်ရောက် ဘယ်ပေါက်နေမှန်း မသိ၊ တလမ်းကျော် တလမ်းဖြတ် မသုခနောက် တကောက်ကောက် လိုက်နေရသည်။ တအိမ်ဝင် တအိမ်ထွက်နှင့် သွားကြရင်း မောပန်းလာ၍ သစ်ပင်တပင် အောက်တွင် ဘယ်လောက် ရှောက်ရအုံးမလဲ ဟု ခရီးကို မှန်းဆကာ အတော်ကြီး မောနေလေသည်။
“ဟေး ... အရာ ကြာဝတ် ကြာဝတ်”
မသုခ ဘာပြောလိုက်ပါလိမ့်ဟု လှည့်ကြည့်လိုက်ရာ မသုခက မေးထိုးပြသည်။
အင်္ကျီချွတ်နှင့် ကုလားကြီးတယောက် တဲကလေးမှ ပြေးထွက်လာပြီးလျှင် ဒိုဘီထဲမှ လက်နှင့်နှိုက်၍ ဆန်တဆုပ်စီ ထည့်ပြီး ပြန်ဝင်သွားလေသည်။
ကုလားတဲ- ကုလားအိမ် ရှေ့များတွင် ရပ်တိုင်းပင် မသုခသည် “အရာ ... ကြာဝတ် ကြာဝတ်” ဟု ပါးစပ်က ခပ်ကျယ်ကျယ် အော်ပြောလေသည်။
ခေမာရီကား ခြေကို မသယ်ချင်အောင် ဖြစ်လာလေသည်။ ထိုင်နေ၍လည်း မဖြစ်၊ ခြေထောက်များမှာ ဒရွတ်ဆွဲလျက် နေပြီ။ ချွေးဒီးဒီးကျအောင် လျှောက်ခဲ့ရသည်။ နောက်ဆုံး ဈေးကြီးသို့ ရောက်သွားလေသည်။
“ဆရာလေး ဒီနားမှာ ထိုင်စောင့် နေ ... အခုဘဲ လာမယ်”
မသုခသည် သူ့ဘန်းထဲမှ ဆန်များကို ခေမာရီ ဘန်းထဲသို့ ပြန်လောင်းထည့်ကာ ဘန်းအလွတ် ရွက်လျက် လူတွေကြားမှ ဈေးရုံထဲသို့ တိုးဝင်သွားလေသည်။ ခေမာရီသည် လူသွားလမ်းဘေး သမံတလင်းပေါ်၌ ထိုင်ကာ ရှေ့မှဖြတ်လျက် တိုးခွေ့သွားကြသော လူတွေကို ကြည့်ရင်း မျက်စေ့ နောက်လာသည်။ အတန်ကြာမှ မသုခ ပြန်ထွက်လာသည်။ မသုခ ဘန်းထဲ၌ ကြက်သွန်ဥ နှစ်ဥ သုံးဥ၊ ငြုပ်သီး တဆုပ်လောက်၊ ဖရောင်းတိုင် အနီအဝါ သုံးတိုင်၊ ကွမ်းသီးစိပ် သုံးလေးခြမ်း၊ ကွမ်းရွက်တထပ်၊ အာပြဲငါးခြောက် သုံးလေးကောင်၊ ချဉ်ပေါင်ရွက်၊ ကန်စွန်းရွက် စုံစိနေအောင် နည်းနည်းစီ ပါလာသည်။
“မနဲ တိုးခွေ့ပြီး အလှူခံရတာ ဘုရာ့”
ခေမာရီသည် ဘန်းထဲမှ ပစ္စည်းများကိုလည်း မကြည့်လို၊ လူတွေကိုလည်း မမြင်သလို၊ ဘယ်လို ဖြစ်နေမှန်း မသိ၊ ငိုင်လျက်သာ နေမိသည်။ ငါးခြောက်ဆိုင်ရှင် အဒေါ်ကြီးသည် ခေမာရီတို့ ဘန်းထဲမှ ဆန်များကို ပြည်တောင်းနှင့် ချင်တွယ်နေသည်။ သူ့ ပြည်တောင်းမှာ သီလရှင်များ ဆန်လာရောင်းလျှင် ဝယ်ရန် ဆန်ဆိုင်က ပြည်တောင်းထက် နို့ဆီဘူးတဝက် ပိုလုပ်ထားသော ပြည်တောင်း ဖြစ်သည်။
“သုံးပြည်နဲ့ လေးလုံး ဆိုတော့ ...”
အဒေါ်ကြီး ဆက်၍ မပြောဘဲ စိတ်တွက် တွက်နေလေသည်။
“အဒေါ့်ပြည်တောင်းက အသာကြီး လုပ်ထားတာ၊ နဲနဲ ပိုပေးပါ အဒေါ်ရယ်” ဟု မသုခက ပြောလိုက်ရာ ခေမာရီမှာ သည်တော့မှပင် ဆန် အရောင်းအဝယ် လုပ်နေမှန်းကို ရိပ်မိတော့သည်။ ခေမာရီသည် မျက်လုံးတွင် လည်လာသော မျက်ရည်စများကို ပါးပေါ်သို့ စီးမကျရန် မျက်နှာကို မလှုပ်ခါဘဲ စိတ်ကို တင်းထားရသည်။ မိမိဘဝကား တကိုယ်ချင်း တကောင်ကြွက် အားကိုးရာမဲ့ အခြေပါတကား ...။
(၈)
ဆွမ်းခံ ပြန်ခဲ့သည့် နေ့ကပင် ဇရပ်တွင် ဘုံးဘုံးလဲလျက် လူမမာကြီး ဖြစ်နေခဲ့ရာ မင်းကတော်နှင့်သာ မတွေ့ခဲ့လျှင် ခေမာရီသည် လောကကို ရင်မဆိုင်သည့် အဖြစ်နှင့် တလက်စတည်း ကိစ္စငြိမ်းသွားမည် ဖြစ်၏။ အိပ်ရာထဲတွင် ခေါင်းမထူနိုင်၍ ပက်လက်ကလေး နေခဲ့ရသည့် နေ့ရက်များကြောင့် ခေမာရီမှာ သီလရှင် ရုပ်နှင့် မတူတော့ချေ။
မြေနီရောင် ခါးဝတ်ကို ဝတ်စားထားသော်လည်း လက်တဆစ်ခန့် ရှည်ထွက်နေသော ဆံပင်များသည် ဖန်ကတုံးကို ဖုံး၍ ထားသည်။ တနေ့သော်လည်း သက်သာနိုး၊ တနေ့သော်လည်း ခေါင်းထူနိုးနိုးနှင့် ဝေဒနာမှာ တမျိုးပြီး တမျိုး ထွေသာ လာသည်။ ယခုတော့ ထွေရုံတင်မက၊ သဲတောင် လာသည်။ ဝေဒနာသာ အရေးကြီးသည်၊ ဆံပင်ကို အရေးမကြီးနိုင် ...။ “မသုခရယ် ... တပည့်တော် သေရင် ရေချိုးတဲ့အခါ ဆံပင်ပါ ရိတ်ပေးလိုက်ပါနော် ... ” ဟု မှာထားပြီးသား ဖြစ်သည်။
ဦးပြားတောရဇရပ်သို့ လင်နှင့် စိတ်ကောက်ကာ၊ ဥပုသ်ရက်ရှည် လာစောင့်နေသော ဝန်ထောက်ကတော် ဒေါ်ခင်ခင်သည် ခေမာရီ အဖြစ်ကို သနားမိသည်။ မသုခ ဆန်ခံသွားလျှင် ဇရပ်တွင် တယောက်ထဲ ကျန်ရစ်ရှာသော လူမမာကို မျက်စိအောက်တွင် မနေသာတိုင်း ဖေးမပြုစု ပေးလေသည်။ မင်းကတော်မှာ ဇရပ်တွင် တလ ကိုးသတင်း စိတ်ကောက်နေပြီးနောက် ဝန်ထောက်မင်းက လိုက်ခေါ်၍ အိမ်ပြန်သွားသည့်တိုင် ဂရုဏာမကင်းသော ခေမာရီထံသို့ မကြာခဏ လာ၍ ကြည့်ရှာသည်။
ဆေးဝါးတွင်မက၊ ဓာတ်စာကလေးများ ဝယ်ခြမ်းလာသည်။ တခါတလေလည်း ငွေစကလေးများ ပေးကမ်း လှူဒါန်း သွားသည်။ လေမလျှောက်၍ ခြေထောက် တဘက်မှာ ကောင်းကောင်းပင် မသန်တော့၊ ခေမာရီသည် အိပ်ရာထဲတွင် မကြာခဏ ဆိုလိုပင် ခြေထောက်ကို လှုပ်ရွေ့ကြည့်သည်။
ခြေထောက်ကို လှုပ်ကြည့်လျှင် မျက်ရည်များ လည်နေ၏။ ကြက်သီးများ ထလာ၏။
“လူကျန်းမာလို့ ဒီခြေထောက်တွေ မသန်ရင်တာ့ ဆွမ်းဆန်ခံဖို့ အခက်ဘဲ မင်းကတော်ရယ် ...”
ခေမာရီသည် စိတ်တွင်းက သူများ မကြားအောင် သေလိုက်ပါတော့ဟု နေ့တိုင်း ဆုတောင်းနေလေသည်။
ခြောက်လလောက် ရှိလာသည်။
လူက ထူနိုင်ထနိုင် လာသော်လည်း ခြေထောက်ကို ကြာကြာ မထောက်နိုင်သေး၊ အိပ်ရာမှ ထလျှောက်လျှင် မသုခ တွဲထူမှပင် လျှောက်နိုင်လေသည်။ မသုခသည် ဆွမ်းဆန်ခံ၍ ရသမျှကို ရောင်းကာ တတ်အားသ၍ ပြုစုရှာသည်။ မသုခ ပင်ပင်ပန်းပန်း ရှာဖွေ ပြုစုနေရတာကို မကြိုက်နိုင်ချေ။ သူများကို ဒုက္ခပေးနေရသည့် ဘဝကို နေ့ရှိသ၍ စိတ်ပျက်လာသည်။ သည်ဘဝကို စိတ်ပျက်ရသည့်အထဲ ခေါင်းက ဆံပင်တွေကလည်း တနေ့ထက်တနေ့ ရှည်လာ၍ စိတ်ညစ် လာသဖြင့် မသုခကို ဓားနှင့် ကပ်ကျေး တောင်းရသည်။
“မာမှ တုံးလိုက်ပါ ... ကောင်းကောင်းမှ မမာသေးဘဲ ဘယ်ရိတ်လို့ ဖြစ်မလဲ၊ မမာတုန်း မရိတ်ကောင်းဘူး”
ခေမာရီသည် မျက်မှောင်ကုတ်လျက် စိတ်အိုက်သွား လေသည်။ သို့သော် သက်ပြင်းချ၍ မျက်မှောင် ဖြေလိုက်ကာ ဆုပ်မိလုနီးနီး ရှိနေသော ဆံပင်ကို အသာသပ်ရင်း ဆံတိုနှင့် စိတ်တမျိုးပင် ပေါက်လာသည်။ စိတ်တမျိုး နောက်နေသော ခေမာရီကို မင်းကတော်က အကဲခတ်မိသည်။
“ခင်တို့က သနားလို့ ပြောတယ်မှတ်ပါ ဆရလေး ...၊ ကျမအဖို့မှာ တယောက်အတွက် ဘာမှ ဝန်မလေးပါဘူး၊ အဖော်တောင် ရပါသေးတယ်၊ ဆုံးသာ ဆုံးဖြတ်ပါ ... ”
မင်းကတော်မှာ အဖော် လိုနေပေသည်။ အိမ်တွင် မိန်းမကြီး တယောက် ကိုယ့်ထဲက ရှာထားဖို့ လိုနေသည်။ ဝန်ထောက်မင်းမှာ မိမိအပြင် “တိတ်တိတ်” ရှိသေး၍ ညဥ့်အိပ်ညဥ့်နေ မိန်းမဖော်လည်း လိုချင်သည်။ အိမ်တွင် ခိုင်းစေထားသော ကလေးမ ကလေးများ ရှိ၍ အိမ်ကလူအတွက် အလစ်မပေးရန် အိမ်ထဲ၌ မိန်းမကြီးကြီး အစောင့်တယောက် ရှိမှလည်း ဖြစ်မည်။ ဒီ့အပြင် ဖဲဝိုင်းတွင် လူမစုံ၍ တအိမ်လိုလျှင် ဖြည့်မည့် အဖော်တောင် ဖြစ်နိုင်သေးသည်။
“စဉ်းစား မနေပါနဲ့တော့ ဆရာလေးရယ် ... ၊ ဆရာလေး ဘဝဟာ တယောက်ထဲရယ်၊ ထောက်ပံ့မယ့် လူလဲ ရှိတာ မဟုတ်ဘူး၊ ခြေထောက်က ကောင်းကောင်း မသန်တာကြီး၊ ဆွမ်းဆန် ခံနိုင်အုံးမလား၊ သီလရှင် အဝတ်ချွတ်လို့လည်း ငရဲမကြီးပါဘူး၊ လူဝတ်နဲ့လည်း သီလရှိရင် ဖြစ်တာပါဘဲ၊ ကျမအဖို့ ဘာမှ တာဝန်ကြီးတာ မဟုတ်ဘူး၊ စိတ်ချမ်းသာ ကိုယ်ချမ်းသာ အေးအေးချမ်းချမ်း နေရမှာပါ၊ လူဝတ်လဲမယ် မဟုတ်လားဟင် ...”
မျက်လွှာကလေးများ စင်းစင်းကျနေသည့် မှေးနေသော ခေမာရီ၏ မျက်လုံးများသည် တဘဝသို့ လှမ်းမျှော်နေသည်။ အတန်ကြာတော့မှ ခေမာရီသည် မင်းကတော်အား ခေါင်းငြိမ့် ပြလိုက်သည့် အခါ၌ အသက်ပါ ပါသွားသလို ငြိမ်ကျသွား လေသည်။
“ဆံစုနဲ့ စုစည်း ပေါင်းထုံးရင် ဆံပင်တိုတွေ ဝင်ပါတယ်”
မင်းကတော်သည်အလိုက်မသိ အားတက်သရော ရွှန်းရွှန်းဝေဝေ ပြောနေလေသည်။ ခေမာရီသည် အသေလို ငြိမ်နေရာမှ ရှက်လည်း ရှက်လှစွာ ဝမ်းလည်း နည်းလှစွာဖြင့် ပြုံးလိုက်ရလေသည်။
----------------
ဂျာနယ်ကျော် မမလေး
Thursday, 28 July 2016
[ အလင်းရောင် ဘလော့ဂ်မှ ကူးယူပါသည်။ ဘလော့ဂ်ဂါအား ကျေးဇူးတင်ပါသည်။]
No comments:
Post a Comment