''#လှေအိမ်ကလေး''
#ခင်ခင်ထူး
(၁)
ဂေါဝိန်ဆိပ်ရဲ့အောက်ဘက်နားကို ကိုက်တော်တော်များများ လျှောက်လာလိုက်ရင် သံလျက်မော်လို့ခေါ်တဲ့ ချော်ဆိပ်မြစ်ကမ်းပါးကို တွေ့ရမှာပါ။ ဘကုန်းတွဲသင်္ဘောကြီးတွေ ၊ လှေတွေနဲ့ ၊ ကုန်တင်ကုန်ချလုပ်နေကြတဲ့ အလုပ်သမားတွေ ၊ ကုန်တင်ကားကြီးတွေ ၊ မြင်းလှည်းတွေ ၊ ဆိုက်ကားတွေ ပြီးတော့ မိုးကာတာလပတ်စကြီးတွေ အုပ်ဆိုင်းထားတဲ့ကုန်တွေကလည်း ဟိုတစ်ပုံ သည်တစ်ပုံ။ တလှုပ်လှုပ် တရွရွ ဥဒဟိုသွားလာနေကြတဲ့ လူတွေနဲ့။ အဲသည်မြင်ကွင်းတွေကို တာရိုးကြီးပေါ်ကနေ ဆီးကြည့်လိုက်ရင် အတိုင်းတိုင်း မြင်နေရတတ်တယ်။ ခပ်နီးနီးကလေးကပ်ကြည့်မယ်ဆိုရင်တော့ မြစ်ကမ်းပါးကို တွယ်ကပ်နေကြတဲ့ ဂျော်ဂျက်လှေကလေးတွေကို တွေ့ရမယ်။ သည်လှေကလေးတွေကတော့ ရေရဲ့သဘောအတိုင်း ကမ်းပါးနဲ့ ပူးတုံခွါတုံ။ ဧရာဝတီလှိုင်းကြက်ခွပ်တွေ စီးရင်း မူးရီနေကြလေရဲ့။
သူတို့အဖို့ ဒါဟာ အဆန်းတော့မဟုတ်ပါဘူး။ လှေကလေး ဘယ်နားရွေ့ရွေ့ လှေကလေးပေါ်ကနေ သူတို့ ဘယ်မှ ရွေ့မသွားဖို့ပဲမဟုတ်လား။ သည်လှေကလေးတွေဟာ ဧရာဝတီမြစ်ပြင်ကြယ်ကြီးနဲ့နှိုင်းစာရင် သေးငယ်လွန်းလှပေမယ့် ဧရာဝတီကိုတော့
အမိအရ တွယ်ကုပ်ထားတတ်ကြတယ်။ ဧရာဝတီလောက် သက်တမ်းမရင့်သေးပေမယ့် မြစ်ကြီးထက်တောင် ပိုပြီးအိုဟောင်းနေကြသလိုပဲ။ ရေပြင်အထက် တစ်တောင်သာသာလောက်မှာ ပေါ်နေတတ်တဲ့ လှေကလေးတွေဟာ လှိုင်းလူးခံသာရုံလေး မျှဉ်းလို့။
လှေလယ်ခေါင်လောက်မှာ ဝါးပေါင်းမိုးခပ်ကုပ်ကုပ်ကလေးကို ပလတ်စတစ်အုပ်ထားတယ်။ အဲသည်အမိုးကုပ်ကလေးမှာပဲ သူတို့ နေကြတယ်။ မိုးရွာအစို နေပူအခြောက်ဆိုပေမယ့် အဲသည်လှေကလေးတွေကပဲ သူတို့ရဲ့ဘဝတွေ မဟုတ်လား။
မနက်လင်းလာရင်တော့ သူတို့ ကုန်းပေါ်တက် အလုပ်လုပ်ကြတယ်။ ဟိုးအနောက်ဘက် မင်းဝံတောင်ကြောကြီးနောက်မှာ နေလုံးကြီးမြုပ်သွားပြီဆိုရင်တော့ လှေအိမ်ကလေးတွေဆီ သူတို့ ပြန်လာကြပြန်ရော။ တခါတလေ လှေအိမ်ကလေးတွေထဲက ထမင်းချက်တဲ့မီးခိုးငွေ့တွေ အမှောင်နဲ့ ရောနှောပျောက်ကွယ်သွားကြတာကိုကြည့်ရင်း ၊ စစ်ကိုင်းတောင်ရိုးက မီးပွင့်ကလေးတွေ တစ်ပွင့်ချင်းလင်းလက်လာပုံကို ငေးမောရင်း ၊ တာရိုးကြီးပေါ်က အိမ်အပြန်စက်ဘီးတွေကို အသံတိတ်နှုတ်ဆက်ကြရင်းနဲ့ သူတို့ဘဝတွေကို အနားပေးအပန်းဖြေတတ်ကြတယ်။
အဲသည်လှေအိမ်ကလေးတစ်လုံးထဲမှာ မိဂျိုးဆိုတဲ့ ကောင်မလေးရှိတယ်။
(၂)
မိဂျိုးရဲ့အဖေ ကိုကြွက်သိုးက သည်ကမ်းနားမှာ သဲထမ်းတဲ့အလုပ်သမားတစ်ယောက်ပေါ့။ ကိုကြွက်သိုးက သဲထမ်းလို့ပန်းသမျှ ညဘက်အရည်ကလေး တစ်ခွက်တစ်ဖလားနဲ့ ဝမ်းချလိုက်ရမှ ကျေနပ်အားရတဲ့သူ။ ကိုကြွက်သိုးအဖို့ သည်မူးရီရီအရသာကို တစ်နေ့မှ လက်လွှတ်ခံတာမဟုတ်ဘူး။ သဲထမ်းခငွေဆိုတာကလည်း မိသားစုစားဖို့ထက် အရက်ဆိုင်ကဒေါ်တုတ်မကိုပေးဖို့က ပိုများနေတတ်တယ်။
အခုတော့ သူ့မိန်းမ မငွေတိုးကလည်း ဘာမှမပြောတော့ပါဘူး။ မပြောဆို သူတို့မိသားစုခြောက်ယောက်အိုးကြီးကို သမီးကလေးမိဂျိုးက ထိန်းထားနိုင်ခဲ့တာကလည်းပါတာပေါ့။ မိဂျိုးက ဟောသည် မြစ်ဆိပ်ကမ်းနားတစ်ခွင်မှာတော့ မရှိမဖြစ်လိုအပ်နေတဲ့ အဝယ်တော်ကလေးပါ။ ဆယ်နှစ်သမီး အထွေထွေအဝယ်တော် မိဂျိုးဆိုပါတော့။
အရပ်ပုပျပ်ပျပ် ၊ အသားကမည်းမည်း ၊ ပိန်ပိန်ပါးပါး ၊ ဘိုကေပြားချပ်ချပ်နဲ့ဆိုတော့ အမှတ်တမဲ့ကြည့်ရင် မိဂျိုးကို ကောင်လေးတစ်ယောက်လို့ထင်ရရဲ့။ ဒါပေမဲ့ ရှင်မီးအင်္ကျီ ၊ စပ်ထမီကလေးတွေက မိဂျိုးရဲ့မိန်းကလေးဘဝကို လှစ်ပြထားတယ်။
မိဂျိုးက စပ်ထမီကလေးကို ခါးပုံစကလေးထွက်အောင်ဝတ်ပြီး ဖိုသီဖတ်သီပါပဲ။ အဲဒီခါးပုံစကလေးက သူရတတ်သမျှသော လုပ်အားခငွေစက္ကူကလေးတွေ ထည့်သိမ်းရာ နေရာကလေးပေါ့။ သူ့ခါးပုံစထဲ ပိုက်ဆံထည့်ထားရင်များ လိပ်နေအောင်ကို ကျစ်ထုပ်ထားတယ်။ ဘာမှမရှိဘူးဆိုရင်တော့ သည်ခါးပုံစကလေးက ဖတ်လတ် ဖတ်လတ်နဲ့။
ကမ်းနားမှာ စပ်ထမီကလေးတလွှားလွှားနဲ့ မိဂျိုးကို နေကုန်နေခန်း တွေ့ရတတ်တယ်။ သင်္ဘောသားတို့ ၊ လှေသူကြီးတို့ ၊ မော်တော်ပိုင်တို့ကအစ ကုန်သည်ပွဲစားမကျန် အလုပ်သမားတွေ အလုပ်သမတွေအဆုံး မိဂျိုးကို မသိသူရယ်လို့မရှိဘူး။ မခင်တဲ့သူလည်း မရှိဘူး။မရှိဆို မိဂျိုးက သူတို့ရဲ့လက်စွဲတော်ကလေးမဟုတ်လား။
" မိဂျိုးရေ ..... အကြော်နဲ့ ကောက်ညှင်းပေါင်းဝယ်ပေးပါဦး "
" ကွမ်းယာသုံးထုပ်ပါ ဆွဲခဲ့ဟေ့ .... ရော့ .. "
ပေးလိုက်တဲ့ပိုက်ဆံကို လက်နဲ့ဆုပ်ပြီး တာရိုးပေါ်ကို မိဂျိုး ပြေးတက်ခဲ့တာပဲ။ ဟိုတုန်းကတော့ သည်ကမ်းနားမှာ ဈေးသည်တွေ ရှိကြပါတယ်။ အခုတော့ တာရိုးကြီးခြားထားတဲ့ ခပ်ဝေးဝေးရပ်ကွက်ကလေးထဲ သွားဝယ်မှရတာပါ။ သည်တာရိုးမြင့်မြင့်ကြီးပေါ်ကို တက်လိုက် ဆင်းလိုက် ဆင်းလိုက် တက်လိုက်နဲ့ပဲ ဖိနပ်မပါတဲ့ မိဂျိုးရဲ့ခြေဖဝါးတွေက တာရိုးကြီးနဲ့ ရင်းနှီးနေပြီ။ အဲသည်လို ဈေးဝယ်ပေးတဲ့အတွက် မိဂျိုး ပိုက်ဆံရတယ်။ ရတဲ့ပိုက်ဆံကို ခါးပုံစကလေးထဲ
ထည့်လိပ်ထားလိုက်တာပဲ။
မနက်တုန်းက ကုန်ထမ်းသမားတွေကို ဆေးလိပ်ဝယ်ပေးတာရယ် ၊ ကားသမားတွေအတွက် ကွမ်းယာဝယ်ပေးတာရယ် ၊ သဲလှေအလုပ်သမတွေက လက်ဘက်ရည်ဝယ်ခိုင်းတာရယ် အားလုံးပေါင်းတော့ အခုမနက် မိဂျိုးရဲ့ခါးပုံစထဲ ပိုက်ဆံတစ်ရာလောက် ရသွားပြီ။ ခါးပုံစကလေးကို မကြာမကြာ စမ်းကြည့်ရင်း မိဂျိုး စိတ်တွက်တွက်ကြည့်နေမိတာပါ။
" မိဂျိုးရေ .... ဟဲ့ ..... ကောင်မလေး ... ခေါ်နေတာကို ရော့ ..... ပုလင်း .. "
မိဂျိုး ဝမ်းသာအားရ ပြေးသွားလိုက်တယ်။ အဲသလိုပုလင်းသမားတွေဆီကမှ လေး ငါးဆယ် ရတတ်တာကိုး။
" အဖြူလား ... ဦးလေး "
" အေး .... ငါးကြင်းအရေခွံကြော်လည်း ဝယ်ခဲ့ .... ပိုတာ ညည်းယူလိုက် ... "
ပုလင်းကလေးကို လက်နဲ့ပိုက်ပြီး တာရိုးကြီးပေါ် မိဂျိုး ပြေးတက်ခဲ့ရပြန်ရော။ အဲသလို အဝယ်တော်အလုပ်ကို မိဂျိုးလုပ်လာတာ တစ်နှစ်လောက် ရှိရော့မယ်။ အတန်းစာ ဟုတ်တိပတ်တိ မသင်ဘူးခဲ့ပေမယ့် ငွေစက္ကူအမျိုးအစားလောက်တော့ မိဂျိုး သိတာပေါ့။ ပေါင်းတာ နှုတ်တာမျိုး မိဂျိုးနားမလည်ပေမယ့် အမ်းတာတွေမျိုးကိုကျ မိဂျိုး သိနေပြန်ရော။ တခါတလေ ဈေးသည်ထက်တောင် မိဂျိုးက လည်ချင်လည်နေသေးတာပါ။
ခိုင်းမယ့်သူမပေါ်သေးရင်တော့ တာရိုးခြေက ညောင်ကြပ်ပင်ကြီးအောက်မှာ အဖော်တွေနဲ့ မိဂျိုး ကစားနေတတ်တယ်။ ညောင်ကြပ်ပင်ကြီးအောက်မှာ မိဂျိုးရဲ့အဖော်တွေက အများကြီးရယ်။ ရပ်ကွက်ကလေးထဲက ကလေးတွေတော့ မဟုတ်ပါဘူး။ မိဂျိုးတို့လို လှေအိမ်ကလေးတွေထဲက ကလေးတွေရယ် ၊ တခြားတဲတွေက ကလေးတွေရယ်ပေါ့။
ကလေးတွေအားလုံးက ကမ်းနားမှာ တွေ့သမျှအလုပ်တွေ အကုန်လုပ်ကြတယ်။ ဆန်အိတ်တွေ ၊ ပဲအိတ်တွေ ၊ ကြက်သွန်အိတ်တွေ ၊ မီးသွေးအိတ်တွေတင်ကြရာကနေ ပေါက်ကျလာတာတွေကို ကျုံးကြတယ်။ ထင်းတွေ ဝါးတွေ ရေထဲမျောလာရင် လိုက်ဆယ်ကြတယ်။ တွဲသဘောကြီးတွေနဲ့ သယ်လာတဲ့မြေဆီအိတ်တွေ ၊ ဘိလပ်မြေအိတ်တွေ ၊ ကတ္တရာပုံးကြီးတွေထဲက ဖိတ်လျှံကျလာတတ်တာတွေကိုလည်း စောင့်လုတတ်ကြရဲ့။
အခုရက်ပိုင်း ကတ္တရာတွဲသင်္ဘောကြီးတွေ အလာများနေတယ်။ မြစ်ထဲကို လျှံကျလာတဲ့ ကတ္တရာစေးတွေကို ရေကူးဆယ်ကြဖို့စောင့်နေကြတဲ့ ကလေးတွေဆိုရင် ရေတွေစိုရွှဲလို့။ တချို့က ကိုယ်တုံးလုံးနဲ့ တစ်ကိုယ်လုံး ပဲကြီးရေပွလို ဖောသွပ်ဖောရောင်နဲ့။ ရသမျှပစ္စည်း အတိုအစလေးတွေကို စုပြီး တစ်ရာ ရရ ၊ နှစ်ရာ ရရ ကုန်းပေါ်က ဝယ်သူတွေဆီ ပြေးရောင်းကြတယ်။ ရတဲ့ပိုက်ဆံကို ဆန်ဝယ်ဖို့ သူတို့အိမ်တွေဆီ ပြန်ပေးကြရတယ်။
(၃)
" တစ်ရာ .... တစ်ရာ့နှစ်ဆယ် .... သည်ငါးကျပ်နဲ့ဆို ....... တစ်ရာ့အစိတ် ... "
" မိဂျိုးရေ .... ဟေ့ .... မိဂျိုး .... နင့်အမေက ပိုက်ဆံပေးလှည့်ပါဦးတဲ့ ... "
အေးမိစံအသံကြောင့် ပိုက်ဆံတွက်နေတဲ့ မိဂျိုးရဲ့လက်ကလေး ဆတ်ခနဲ တုန်သွားတယ်။
" လက်ထဲမှာ ပိုက်ဆံမပြည့်သေးဘူး .... ဆန်တစ်ခွက်ဆိုရင်တောင်မှ ငွေက နှစ်ရာပြည့်မှ "
လက်ထဲငွေတွေကို စပ်ထမီခါးပုံစလေးထဲ ပြန်ထည့်လိုက်တယ်။ နေက ညောင်ကြတ်ပင်ကြီးတည့်တည့်ကို ရောက်နေပြီ။ ဧရာဝတီမြစ်ကြီးထဲက ရေတံလျှပ်တွေက တဖျပ်ဖျပ်ခါလို့။
" ငါ .. ပိုက်ဆံမပြည့်သေးဘူး အေးမိစံရယ် "
" နင်ကော ပေးခဲ့ပြီလား "
" အေး .... ပေးခဲ့ပြီ "
မိဂျိုးမျက်နှာကလေး ညှိုးကျသွားတယ်။ လှေအိမ်ကလေးထဲကနေ အမေ မျှော်လှရောပေါ့။ အမေ့ခမျာ ကလေးတွေထိန်းရ ၊ လှေထဲ စိမ့်ဝင်လာတဲ့ရေတွေ ပက်ထုတ်ရနဲ့ ထမင်းဆာနေရောပေါ့။ သက်ပြင်းကိုချရင်း ဧရာဝတီမြစ်ကြီးထဲက အရောင်တဖိတ်ဖိတ်လက်နေတဲ့ ရေတံလျှပ်တွေကိုပဲ မိဂျိုး ငေးကြည့်နေမိတယ်။
" ဟော .... ငတွတ်တို့ လာပြီ ... "
ငတွတ်က ပုဆိုးကို စလွယ်သိုင်းပြီး ရောက်လာတယ်။ တစ်ကိုယ်လုံးလည်း ကတ္တရာစေးတွေနဲ့ မည်းလို့။
" ဒီနေ့ ဘော်လုံးထုကြေး ကစားကြမယ်ဟေ့ ... သည်မှာ ငါ ဘော်လုံး ဝယ်လာတယ် "
" အံမယ် ... ငတွတ် .. နင် ဘယ်ကရလဲ "
" ကတ္တရာလေဟာ .... ဒီနေ့ နေပူတော့ ကတ္တရာစေးတွေ တအားလျှံကျတာ။ ငါ ဟိုးရေလယ်အထိ ကူးဆယ်ရတာပေါ့။ အမေ့ကိုလည်း ဆန်ဖိုးပေးခဲ့ပြီ။ ပိုတာ ငါ့ဘာသာ ဘော်လုံးဝယ်လာတာ "
" နင့်နှယ်ဟာ ... ပိုက်ဆံပိုတာများ .. မိဂျိုးကို ချေးရောပေါ့ ... ဒီမှာ သူ ပိုက်ဆံမပြည့်သေးလို့ .. "
ငတွတ်မျက်နှာမှာ အပျော်တွေပျောက်သွားပြီး ညောင်မြစ်ကြီးပေါ် ဆောင့်ကြောင့်ထိုင်ချလိုက်တယ်။
" သိမှ မသိပဲဟာ "
ညောင်ရွက်တွေက လေပူတွေကို သိမ်းယူပြီး ရွှဲကနဲ မှုတ်ထုတ်လိုက်တယ်။ ဘော်လုံးကလေးကို လက်ထဲညှပ်လှည့်ရင်း ငတွတ်က
" ဟာ ... ဟုတ်ပြီ ... ငါ ဖိုးထောင်ဆီက သွားချေးပေးမယ် ... နင် ဘယ်လောက်လိုသေးလဲ မိဂျိုး "
" တစ် ... တစ်ရာ "
" ရမှာပါဟာ ... ရော့ ... ဘော်လုံး ခဏယူထား "
ငတွတ်ပြေးထွက်သွားရာကို မိဂျိုး ငေးကြည့်နေလိုက်တယ်။ ကမ်းနားကိုဆင်းသွားပြီး မကြာဘူး။ ငတွတ် ပြန်ရောက်လာတယ်။
" ရော့ ... တစ်ရာ သွား .. သွား ... နင့်အမေကို အမြန်ပြန်ပေးချေဟာ ... ကစားချင်လှပြီ "
ပိုက်ဆံတွေကို လက်နှင့်ဆုပ်ပြီး လှေကလေးရှိရာကို မိဂျိုး အပြေးပြန်လာခဲ့တယ်။ အမေကတော့ အငယ်ကောင်ကို ခါးထစ်ခွချီပြီး လှေထဲကရေတွေ ပက်ထုတ်နေလေရဲ့။
" မိဂျိုးရယ် .... ငါဖြင့် မျှော်လိုက်ရတာ ... နေမြင့်လှပြီလေ.. "
မငွေတိုးက ရေပက်နေတဲ့ သံပန်းကန်အစုတ်လေးကို ချပြီး ပိုက်ဆံလှမ်းယူတယ်။ အမေ့ကို ရေကူပက်ပေးချင်ပေမယ့် ငတွတ်တို့နဲ့ ဘော်လုံးကစားချင်နေတာနဲ့ပဲ ကုန်းပေါ်ကို မိဂျိုး အပြေးပြန်တက်ခဲ့တယ်။
" မိဂျိုးရေ ဖိုးထောင်ကိုတွေ့ရင် ပြောလိုက်စမ်းပါဟေ့ ... ဒီမှာ ဆန်မဝယ်ရသေးဘူးလို့ "
ဖိုးထောင်အမေရဲ့အသံကြောင့် မိဂျိုးရဲ့ပါးစပ်ကလေး ဟောင်းလောင်းပွင့်သွားတယ်။ ကလေးကိုနို့တိုက်ရင်း ငါးမြှားနေတဲ့ ဖိုးထောင်အမေရဲ့မျက်နှာမှာလည်း အမေ့လိုပဲ ချွေးတွေ သံတွေနဲ့ပါလား။ မိဂျိုးရင်ထဲ မကောင်းဖြစ်သွားတယ်။ ညောင်ပင်အောက်မှာတော့ ငတွတ်တို့ ဘော်လုံးပစ်တမ်း ကစားနေကြပြီ။ မိဂျိုး ဝင်မကစားတော့ပဲ ကမ်းနားကို ဆင်းခဲ့တယ်။
" ငါ့ကို ခိုင်းမယ့်သူ ပေါ်ပါစေ "
(၄)
သည်နှစ် သင်္ကြန်ရေတိုးမိုးက တအားကြီး ရွာချလိုက်တယ်။ မိဂျိုးတို့လှေကလေးထဲမှာ မြစ်ရေတွေထက် မိုးရေတွေက ပိုများနေတော့တာပေါ့။ မိဂျိုးလည်း အလုပ်မသွားနိုင်သေးဘူး။ အမေပင်ပန်းမှာစိုးတာနဲ့ပဲ လှေဝမ်းထဲဆင်းပြီး ရေတွေကို ပုံးနဲ့ ခပ်ထုတ်ပစ်ရတယ်။
" လေးဆယ့်ငါး ... လေးဆယ့်ခြောက် ... လေးဆယ့်ခုနစ် ... "
လက်မောင်းအောင့်လာတာနဲ့ ရေပုံးကိုချပြီး မိဂျိုးလက်တွေကို သုံးလေးချက် ဆန့်ထုတ်ပစ်လိုက်တယ်။ သည်လှေကလေးကို အဖေတို့ဝယ်တုန်းက ငါးထောင်ပဲ ပေးရတယ်ပြောတယ်။ ခုနေဝယ်ရင် ဘယ်လောက်ပေးရမယ်မှန်း မိဂျိုးမသိပေမယ့် အမေကတော့ လှေကလေး ဖာဖို့ ထေးဖို့ ငွေလိုတယ်ပြောနေတာကြာပြီ။ ဝါဆို ဝါခေါင်ဆိုရင် ရေတွေက ကြီးလာတော့မှာ။ မြစ်ရေကလျှံ လှိုင်းတွေကပုတ်နဲ့ ဧရာဝတီမြစ်ထဲ မျောသွားကြတဲ့လှေပေါင်းကလည်း မိဂျိုးမျက်စိရှေ့တင် မနည်းတော့ဘူး။ ဟိုးတစ်နှစ်ကဆို မိဂျိုးတို့လှေကလေး မြုပ်မျောမျောသွားတာ အလိုက်ကောင်းလွန်းလို့သာ ရွှေကြက်ယက်သောင်စွန်းက ပြန်ရခဲ့တာ။ အဲသည်တုန်းက လှေကလေးက အခုလောက် မအိုသေးဘူး။ မနာသေးဘူး။ သည်နှစ်တော့ ရေမကြီးခင် ဖာရထေးရမယ်လို့ အမေ ပြောပြောနေပေမယ့် ဘယ်လောက်ကုန်မလဲဆိုတာ မိဂျိုး မသိပါဘူး။
" မိဂျိုးရေ ... ဟေ့ .. မိဂျိုး .. "
ကုန်းပေါ်က ခေါ်သံကြားတာနဲ့ ခေါင်းမော့ကြည့်လိုက်တော့ အဝတ်လျှော်တဲ့ ဒေါ်ဘီဘီ။ ရေစိုအဝတ်ကြီးနဲ့ဆိုတော့ အဝတ်လျှော်ရင်း ထလာပုံရတယ်။
" ညည်းဘော်ဒါ ဦးဗလတို့ ရောက်နေတယ် ... ညည်းကို အခေါ်ခိုင်းလို့အေ့ .. "
လက်ထဲကရေပုံးကို ဝုန်းခနဲပစ်ချပြီး စပ်ထမီကလေးကို ပြင်ဝတ်လိုက်တယ်။ ဦးဗလတို့သင်္ဘောဆိုက်ရင် မိဂျိုးတို့ မုန့်ဖိုးတွေ အများကြီးရတတ်တာကိုး။
" အမေရေ .. အမေ .... "
ကုန်းပေါ်မှာ အဝတ်ရေစိုတွေလှမ်းနေတဲ့ အမေ့ကိုခေါ်ရင်း ကုန်းပေါင်ပေါ်ကနေ လွှားခနဲ ခုန်ချလိုက်တယ်။
" အမေ ... ကျုပ် သွားတော့မယ်။ ဦးဗလတို့သင်္ဘော ရောက်နေပြီတဲ့ .. "
" အေး .. အေး .. သွား .. သွား "
ကမ်းနားဘက်ကို အပြေးလာခဲ့တဲ့မိဂျိုးတစ်ယောက် ဦးဗလတို့ရဲ့ နှစ်ထပ်သင်္ဘောပြားပြားကြီးကို မြင်လိုက်ရရင်ပဲ ဝမ်းသာသွားမိတယ်။ ကုန်းပေါင်ကြီးနှစ်ချပ်ခင်းထားတဲ့ အပေါ်ကနေ တဒုန်းဒုန်းပြေးတက်လာတဲ့ မိဂျိုးကို ဦးလေးဗလက လက်တွေ မြှောက်ပြလို့။
" ဦးလေးဗလ "
" အေး ... ငါဖြင့် ရောက်ကတည်းက နင့် မတွေ့လို့ မေးနေတာဟဲ့ .. "
" ရေပက်ထုတ်နေလို့ ဦးရဲ့ .. မနေ့ညက မိုးတွေရွာချလိုက်တာလေ ... သမီးတို့လှေကလေး မြုပ်တော့မလို့ ... "
" ကဲပါ .. ညည်းတို့လှေ မြုပ်တာ မမြုပ်တာ အရေးမကြီးဘူး ...ဒေါ်ရုပ်ဆိုးကြီးဆီ သွားပေးပါဦး .. "
ဦးဗလတို့လာရင် ဒေါ်ရုပ်ဆိုးတို့အိမ်ကို မိဂျိုး သွားပြောပေးရတယ်။ ဘာမှန်းတော့ မသိပါဘူး။ ဦးဗလတို့သင်္ဘော ရောက်ပြီလို့ ပြောရုံပါပဲ။
" ရော့ ... ဟောဒါ ညည်းအတွက်မုန့်ဖိုး .. "
ဦးဗလက ခုံပေါ်မှာတင်ထားတဲ့ ငွေစက္ကူစည်းကြီးတစ်စည်းထဲက တစ်ရွက်ကို ဆွဲထုတ်ပြီး မိဂျိုးကို လှမ်းပေးတယ်။ မိဂျိုးမျက်လုံးတွေတောင် ပြာသွားရဲ့။ ငွေတစ်ထောင်တန်ကြီးဆိုတာတော့ မိဂျိုး သိတာပေါ့။
(၅)
တာရိုးပေါ်အပြးတက်လာတဲ့ မိဂျိုးရဲ့ခြေထောင်တွေက ဘီးတပ်ထားသလို အောက်မေ့ရရဲ့။ ဗြောင်းဗြောင်းပြေးနေတဲ့ မြင်းတစ်ကောင်လို သွက်လက်နေတဲ့မိဂျိုးကို အခုနေ တကယ့်မြင်းတစ်ကောင်ကတောင် ယှဉ်နိုင်မှာမဟုတ်ဘူး။ တာရိုးကြီးပေါ် တက် ၊ ရပ်ကွက်ကလေးကို ကျော် ၊ လမ်းမကြီးအတိုင်း သွား ၊ လမ်းသွယ်ကလေးထဲ ချိုး ၊ နောက်တစ်လမ်း ထပ်ကူး ၊ ညာဘက်ကို ကွေ့ ၊ တိုက်ဝါကြီးကို ပတ် ၊ မိဂျိုး မမောပါဘူး။ မိဂျိုးရဲ့စပ်ထမီခါးပုံစကလေးထဲမှာ ငွေတစ်ထောင်ကြီးများတောင် ရှိနေပြီလေ။
ဦးဗလတို့သင်္ဘောကြီး ကမ်းက မခွါမချင်း နောက်ထပ်မုန့်ဖိုးတွေ အများကြီးရဦးမယ်။ အပျော်တွေ လွန်နေလိုက်ပုံများ။ ဒေါ်ရုပ်ဆိုးတို့အိမ်ကျော်သွားတာတောင် မိဂျိုး သတိမထားလိုက်မိဘူး။ နောက်ပြန်လှည့်လိုက်ရတယ်။ ဒေါ်ရုပ်ဆိုးကြီးတို့အိမ်ကတော့ ထုံးစံအတိုင်း အိမ်ဝင်းတံခါးက ပိတ်လျက်သား။ စက္ကူပန်းခြုံအုပ်အုပ်ကြီးက အိမ်ကိုကွယ်ထားလေတော့ လူရိပ်လူခြည်ကို မိဂျိုး မမြင်ရပါဘူး။
" ဒေါ်ကြီးဆိုး ... ဒေါ်ကြီးဆိုး ... "
တံခါးကို တအားကြီးလှုပ်ခေါ်တော့မှ အိမ်ထဲက လူထွက်လာတယ်။ တော်ပါသေးရဲ့။ ဒေါ်ရုပ်ဆိုးကြီးနဲ့ တန်းတွေ့လို့။ နို့မို့ဆို ခြံရှေ့အုတ်ခုံပေါ် ထိုင်စောင့်ရဦးမှာ။ ဒေါ်ရုပ်ဆိုးကတော့ မြင်နေကျအတိုင်း မိတ်ကပ်တွေ နှုတ်ခမ်းနီတွေ ဗရပျစ်နဲ့။ နဖူးပေါ် အုပ်နေတဲ့ ငှက်သိုက်လို ဆံပင်အမောက်ကြီးကိုတော့ မိဂျိုး အမုန်းဆုံးပဲ။
" ဟဲ့ .. ကောင်မလေး .. ဦးဗလတို့ ရောက်နေပြီလား "
မိဂျိုးတောင် ဘာမှ မပြောရသေးဘူး။ သူက သိနှင့်နေပြီ။
" ဟုတ်ကဲ့ ... ဦးဗလက ဒေါ်ကြီးဆိုးကို အပြောလွှတ်လိုက်လို့ "
ဒေါ်ရုပ်ဆိုးကြီးက မိဂျိုးကို ပြုံးပြပြီး စက္ကူပန်းရုံကြီးအောက်ကို လှမ်းကြည့်တယ်။ စက္ကူပန်းပင်ကြီးကို ဝိုင်းပတ်ထားတဲ့ခုံတန်းပေါ်မှာ လက်သည်းနီဆိုးနေတဲ့မိန်းမကို အခုမှပဲ မိဂျိုး မြင်မိတာပါ။
" အေး ... အေး .. ငါနဲ့ တွေ့ခဲ့တယ်လို့ပဲ ပြောလိုက် "
မိဂျိုးလုပ်ပေးရမှာက ဒါပါပဲ။ ဒေါ်ရုပ်ဆိုးကြီးရဲ့ခြံရှေ့မှာ ရပ်ပြီး သည်စကားလေးတစ်ခွန်း ပြောလိုက်ရုံကလွဲလို့ ခြံထဲတောင် မိဂျိုး ခြေမချလိုက်ရပါဘူး။ ခပ်သုတ်သုတ်ကလေးပဲ မိဂျိုးပြန်ခဲ့တယ်။ မိဂျိုးရဲ့ အပြန်ခြေလှမ်းတွေက အသွားတုန်းကထက်တောင်
ပိုပြီးသွက်လက်နေသလားပဲ။ လှေအိမ်ကလေးဆီ မိဂျိုး ရောက်ချင်လှပြီလေ။ အမေ့ကို ပိုက်ဆံပေးချင်လှပြီ။ မိဂျိုးရဲ့ရင်ထဲမှာတော့ ရေယိုပေါက်တွေများနေတဲ့ သူတို့လှေအိမ်ကလေးကို အကောင်းပကတိ ဖြစ်သွားစေချင်တဲ့ဆန္ဒကလွဲလို့ ဘာရှိမှာတဲ့လဲ။ လောလောဆယ် မိဂျိုးသိချင်နေတာက ဟောဒီငွေနဲ့ လှေအိမ်ကလေးကို ဖာထေးလို့ လောက်ပါ့မလားဆိုတာပါပဲ။
---------------
ခင်ခင်ထူး
လှည်းယာဉ်ကြော့ ဝတ္ထုတိုများ
[ အဆွေတော် ဘလော့ဂ်မှ ကူးယူပါသည်။ ဘလော့ဂ်ဂါအား ကျေးဇူးတင်ပါသည်။]
No comments:
Post a Comment