#ပုလင်းချစ်သူ
#မင်းလူ
“ဒီအရက်ဟာ မကောင်းပါဘူးကွာ” ဟု သူက ရေရွတ်လိုက်သည်။ ထိုအခါ ဆိုင်ရှင်ကြားသွားပြီး
“ဒီအရက်ဟာ ဆိုင်က ထုတ်ပေးတဲ့အတိုင်းပါပဲဗျာ။ ကျွန်တော်က ဘယ်တော့မှ အကြံအဖန် မလုပ်တတ်ဘူးဆိုတာ အစ်ကိုကြီးသိပါတယ်။ အမြဲသောက်နေကျပဲ မဟုတ်လား”
သူက “ဟာ.. ဟာ” ဆိုလုပ်၍ လက်ကာပြသည်။ “ခင်ဗျား ဆိုင်အရက်ကို မကောင်းဘူးလို့ ပြောတာမဟုတ်ပါဘူး။ အရက်ဟာ ကျုပ်ကို ကောင်းကျိုးမပေးဘူးလို့ ပြောတာပါ”
“ကောင်းကျိုးမပေးရင် မသောက်နဲ့ဗျာ” ဟူ၍တော့ ပိုင်ရှင်ကဖြင့် ပြောလို့ မဖြစ်ချေ။ အရက်ရောင်းနေသူ တစ်ယောက်က အရက်ဆန့်ကျင်ရေး စကားကို ပြောနေလျှင် “မိမိရောင်းကုန်ပစ္စည်း၏ ဂုဏ်သိက္ခာကို ထိခိုက်စေသော စကားမျိုး မပြောမိပါစေနှင့်” ဆိုသော ခေတ်သစ်ရောင်းဝယ်ရေးဗျူဟာ သဘောတရားကို ဖောက်ဖျက်ရာကျမည် မဟုတ်လား။ ထို့ကြောင့် ဘာမှ ထပ်မပြောဘဲ ခပ်မဆိတ်နေလိုက်၏။
သောက်သုံးသူ ပုဂ္ဂိုလ်ကတော့ ဆက်၍ “ကျုပ် ဘာကြောင့် အရက်ကို စွဲစွဲမြဲမြဲ သောက်ဖြစ်နေသလဲ သိလား” ဟု မေးသည်။ ဆိုင်ရှင်၏ စိတ်ထဲတွင် “သွားပြီ… ဒီညတော့ ငါ ခံရပြီ” ဟုတွေးပြီး စိတ်ညစ်သွား၏။ လုပ်သက်ရင့်နေသော ဆိုင်ရှင်တစ်ယောက် အနေဖြင့် အရက်သမား အမျိုးမျိုးအကြောင်းကို ကောင်းကောင်းသိပြီးသားဖြစ်၏။ မူးလာလျှင် ရစ်တတ်သူ၊ အပျော်လွန်ပြီး သီချင်းဟစ်တတ်သူ၊ ငိုတတ်သူ၊ စကားကြော ရှည်တတ်သူ။
ဒီပုဂ္ဂိုလ်လို သူ့ဆိုင်မှာ နှစ်ပေါင်းများစွာ သောက်သုံးလာသူဆိုလျှင် ပိုတောင် သိသေးသည်။ အသောက်နည်းနည်းများသွားသည့် နေ့မျိုးဆိုလျှင် အခုလိုပင် စကားစတတ်သည်။ ဒါဆိုလျှင် သူ၏ အသည်းကွဲ ဇာတ်လမ်းကြီးကို ရှည်လျားထွေပြားစွာ ပြောပြပေတော့မည်။ ဒီအကြောင်းကလည်း အကြိမ်ပေါင်း ဘယ်လောက်တောင် ပြောခဲ့ပြီးပြီလဲမသိ။ ကြားရဖန်များ၍ ရိုးအီနေပြီဖြစ်သော ဇာတ်လမ်းကြီးဖြစ်သော်လည်း ကျိတ်မှိတ်ပြီး နားထောင်ပေးရပေလိမ့်မည်။ နေ့စဉ်လာနေကျ ဖောက်သည်တစ်ယောက်ကို ကျေနပ်အောင် ၀န်ဆောင်မှုပေးဖို့ တာဝန်ကရှိသည်။
ဝယ်သူဘက်က အမြဲမှန်သည်ဟူသော စကားမှာ အရက်ဆိုင်များအတွက် ပိုပြီးသင့်လျော်သည်။ အနည်းဆုံး တစ်စိတ်တစ်ပိုင်းလောက် သောက်ကြတာပဲဟာ မမှန်ဘဲ ဘယ်နေပါ့မလဲ။ တချို့ဆို မှန်ရုံမက မှောက်တောင်မှောက်သွားကြသေးသည်။
အကြမ်းပန်းကန်ကလေးထက် ယောင်ယောင်လေးမျှကြီးသော ဖန်ခွက်ထဲမှ တစ်ဝက်သာသာ ရှိနေသော အရက်ကို ရေမရောဘဲ တစ်ချက်တည်း မော့ချလိုက်သည်ကို မြင်သဖြင့် ဇာတ်လမ်းစတော့မည်ဖြစ်ကြောင်း သိလိုက်၏။
“မိန်းမတစ်ယောက်ရဲ့ သုံးလက်မလောက်သာ ရှည်တဲ့ လျှာက ခြောက်ပေလောက်မြင့်တဲ့ ယောက်ျားကြီး တစ်ယောက်ကို ဘုံးဘုံးလဲကျသွားစေနိုင်တယ်ဆိုတဲ့ စကားကို ခင်ဗျား ကြားဖူးသလား”
“ကြားဖူးတာပေါ့၊ ခင်ဗျားပဲ ပြောပြောနေတာ အကြိမ်တစ်ရာလောက်ရှိနေပြီ” ဟု စိတ်ထဲက ပြန်ပြောမိသည်။ နှုတ်ကတော့.. “အင်း.. ဆိုစမ်းပါဦး” ဟု စကားထောက်ပေးလိုက်ရ၏။
“မိန်းကလေးတစ်ယောက်ရဲ့ ပါးစပ်က ထွက်တဲ့စကားတစ်ခွန်းဟာ သိပ်ကြောက်ဖို့ ကောင်းတယ်နော်။ အဲဒီစကားတစ်ခွန်းကြောင့် ကျုပ်မှာ အခုလို အရက်ကို အဖော်ပြုနေရတဲ့ အသောက်သမားကြီးလုံးလုံး ဖြစ်ခဲ့ရတာပဲ”
စကားကို ခဏရပ်လိုက်ပြီး ဘေးပတ်ဝန်းကျင်ကို မျက်လုံးကစားကြည့်လိုက်သည်။ သူ့စကားကို စိတ်ဝင်စားသူ အခြားရှိ မရှိ အကဲခတ်ခြင်းဖြစ်၏။ ထိုင်ခုံ၏ ရှေ့ဘက်ခြမ်းမှာ တန်းလျက်ထိုင်နေသော လူအုပ်စုက သူတို့ဘာသာ ငြင်းခုန် ပြောဆိုနေကြသည်။ သူ့ကို ရှိတယ်လို့တောင် မထင်၊ လက်ဝဲဘက်ထောင့်စွန်းမှာ တစ်ယောက်တည်းထိုင်နေသူကတော့ နားစွင့်နေဟန်တူသည်။ သူ အားတက်သွားဟန်ဖြင့် ဆက်ပြောသည်။
“အစကတော့ ကျုပ်ကလွဲရင် တခြားဘယ်သူကိုမှ စိတ်ကူးထဲတောင် မထည့်ပါဘူးတဲ့လေ။ သူနဲ့ စတွေ့တဲ့အချိန်မှာ ကျုပ်ဟာ ပညာတစ်ပိုင်းတစ်စနဲ့ ကျောင်းကထွက်ထားတဲ့အချိန်၊ အလုပ်အကိုင်ကလဲ မည်မည်ရရ မရှိသေးဘူး။ ဒါပေမယ့် ပညာတွေ၊ ရာထူးတွေ၊ ဂုဏ်တွေ၊ ငွေတွေဆိုတာ ပကာသနတွေပါတဲ့။ ချစ်တာသာ ပဓာနပါတဲ့။ အချစ်စစ်၊ အချစ်မှန်နဲ့ တည်ဆောက်တဲ့ ဘ၀သာလျှင် ကျောက်သားကျောက်ဆောင်လို ခိုင်မြဲပါတယ်တဲ့။ ကောင်းလိုက်တဲ့ စကားတွေ”
ဆိုင်ရှင်၏ စိတ်ထဲက “အင်း ဒီနေရာမှာ မရယ်ချင်ဘဲနဲ့ ဖျစ်ညှစ်ပြီး ရယ်တော့မယ်” ဟု တွေးသည်။ ကြိမ်ဖန်များစွာ နားထောင်ခဲ့ရပြီးဖြစ်သဖြင့် ဘယ်နေရာမှာ ဘာစကားပြောပြီး ဘယ်အမူအရာ လုပ်တော့မယ် ဆိုတာကအစ မှတ်မိနေပြီ။ ဟုတ်လည်း ဟုတ်သည်။ ထိုပုဂ္ဂိုလ်က
“ဟား ဟား ဟား ဟား” ဆိုပြီး အသံကို တစ်ဆင့်မြှင့်၍ ရယ်သည်။
ပြီးတော့.. “ဟား ဟား တညင်းသီးတစ်လုံးလောက် ပေးစမ်းပါ”
“ဗျာ”
ဆိုင်ရှင်သည် ရုတ်တရက်မို့ ကြောင်သွား၏။ ပြီးမှ “သြော် ဟုတ်ကဲ့” ဆိုပြီး တညင်းသီးပြုတ်တစ်လုံးကို သတ္တုပန်းကန်ပြား အသေးစားလေးထဲထည့်ပြီး ပေးလိုက်၏။ ထိုပုဂ္ဂိုလ်က တညင်းသီးကို တစ်ကိုက်ကိုက်သည်။ ဖန်ခွက်ထဲ အရက်ထည့်သည်။ ပလတ်စတစ်ခွက်ထဲက ရေကိုရောသည်ဆိုရုံမျှ ထည့်သည်။ တစ်ဝက်လောက် မော့ချလိုက်သည်။ ပြီးမှ..
“မိန်းမတွေရဲ့ စိတ်သဘောထားဟာ ဟောဒီ တညင်းသီးလိုပဲ စားခါစမှာတော့ ချိုသလိုလို ဆိမ့်သလိုလိုနဲ့ ဆီးသွားတော့မှ နံမှန်းသိတယ်”
လက်ဝဲဘက်ထောင့်စွန်းမှာ ထိုင်နေသူက ထိုစကားကို သဘောကျပြီး ပြုံးလိုက်သည်။ အားပေးထောက်ခံသလို ဖြစ်သွားသဖြင့် ကျေနပ်ပြီး ဆက်ပြောမည်အပြု ဆိုင်ရှေ့ဘက်ခြမ်းအုပ်စု၏ အသံက ကျယ်လောင်လာသည်။ လူများ၏ အာရုံက ထိုအုပ်စုဆီ ရောက်သွားသည်။ ထိုပုဂ္ဂိုလ်က ထိုအုပ်စုကို မကျေမနပ် ကြည့်လိုက်သည်။ တစ်ခုခု လှမ်းပြောမလို လုပ်ပြီးမှ မပြောဖြစ်။ ဖန်ခွက်ထဲမှ လက်ကျန်အရက်ကိုသာ မော့သောက်လိုက်သည်။ အရက်ထပ်ငှဲ့ပြီးနောက် တစ်ငုံငုံပြန်သည်။ ရေ မရောတော့။ ငြင်းခုန်သံတွေ လျော့ပါးသွားတော့မှ ဇာတ်လမ်းကို ဆက်နိုင်သည်။
“သူ့မိဘတွေက သူ့ကို ကျုပ်နဲ့ သဘောမတူဘူးလေ။ ပညာလည်း တစ်ပိုင်းတစ်စ၊ အလုပ်အကိုင်လည်း အတည်တကျမရှိ၊ ငွေလည်း မရှိ၊ ဘွဲ့ထူးဂုဏ်ထူးလည်း မရှိ၊ မိဘကျောထောက်နောက်ခံကလည်း မတောင့်တင်းတဲ့သူနဲ့ သူတို့သမီးကို ဘယ်နည်းနဲ့မှ သဘောမတူနိုင်ဘူးတဲ့။ သူတို့ကလည်း ဒီလောက် ချမ်းချမ်းသာသာကြီး မဟုတ်ပါဘူးဗျာ။ စားနိုင်သောက်နိုင်လောက်သာပါ။ ဒါပေမယ့် အငြိမ်းစားအရာရှိကြီးဆိုတဲ့ ဂုဏ်ကလေးတာ့ မောက်နိုင်သေးသပေါ့လေ။ နောက်ပြီး သူတို့ သမီးကလည်း လှသကိုး။ သူ့ကို လိုချင်တဲ့သူတွေကလည်း သူဌေးသားတွေ၊ အရာရှိပေါက်စတွေ၊ ကျုပ်ကလွဲရင် အလားအလာကောင်းတဲ့ လူတွေချည်းပဲ။ သူတို့မိဘတွေကလည်း သမီးချောရှိတဲ့ မိဘတွေရဲ့ ထုံးစံအတိုင်း သူတို့သမီးကို အနိမ့်ဆုံး ရှေ့တက်လမ်းရှိတဲ့ အရာရှိကတော်ဖြစ်ဖို့ မှန်းတာပေါ့။ ကျုပ်ကိုတော့ ကလေကချေ အဆင့်အတန်း မရှိတဲ့ကောင်၊ တစ်သက်လုံး လူမွေးလူတောင် ပြောင်မယ့်ကောင် မဟုတ်ဘူးဆိုတဲ့ စွပ်စွဲချက်တွေနဲ့ အမျိုးမျိုး ရှုတ်ချခဲ့တာပေါ့”
ပုလင်းထဲမှာ အရက်ကုန်သွားပြီ။ အရက်သမားတို့ ထုံးစံအတိုင်း ကုန်နေပြီမှန်း သိသိကြီးနှင့် ပုလင်းအ၀ကို ဖန်ခွက်မှာ တေ့ပြီး မှောက်ချလိုက်သေးသည်။ လက်ကျန်လေးငါးစက် ကျလာ၏။
“တစ်ပိုင်းလောက် လုပ်စမ်းပါဦး”
ဆိုင်ရှင်က ပုလင်းကို ယူသည်။ ကတော့တပ်ပြီး ပလတ်စတစ်ပုံးထဲက အရက်ကို လောင်းထည့်လိုက်သည်။ လုပ်နေကျမို့ တစ်ပိုင်းထက် ပိုသွားခြင်း၊ လျော့သွားခြင်းမရှိ။ ပုလင်းကို လှမ်းပေးပြီး နောက်ဘက် ၀ိုင်းတစ်ဝိုင်းမှ မှာသော ပုစွန်ခြောက်သုပ်အတွက် ကြက်သွန်လှီးရင်း ဆက်ပြောသည့် ဇာတ်လမ်းကို ကြားနေရ၏။
“ဟိုကောင်မကလည်း သူ့မိဘတွေရဲ့ သံယောင်ကို လိုက်ပြောလာပြီလေ။ ကျောင်းပြန်တက်ပါလားတဲ့။ ပညာတတ်ထားတော့ ဘာပဲဖြစ်ဖြစ် အောက်မကျဘူးပေါ့တဲ့။ ကျုပ်ကလည်း ပညာဆိုတာ ကျောင်းမှာ သင်ရတာမဟုတ်ဘူး။ လက်တွေ့ဘ၀မှာ လူတွေကြားထဲမှာ သင်ယူရင်လည်း ရပါတယ်လို့။ အဲဒီတော့ တစ်မျိုး ထပ်ပြောလာပြန်ရော”
ဆိုင်ရှေ့ခြမ်းမှာ ထိုင်သောအုပ်စုက ငွေရှင်းပြီး ထထွက်သွားကြသည်။ သူတို့က အရက်တစ်လုံးလောက်ကို လူလေးငါးယောက်သောက်ပြီး မူးတတ်ကြသူတွေ ဖြစ်၏။ အမြည်းတွေ တစ်မျိုးပြီးတစ်မျိုး မှာစားရင်း စကားပြောကြ၊ ငြင်းကြ ခုန်ကြသူတွေ ဖြစ်၏။ သူတို့မရှိတော့ အနှောင့်အယှက်ကင်းသွားသည်။
“အဲဒီတော့” စကားပြန်ဆက်မည်အပြု နောက်ဘက်ပိုင်းက ကြက်သွန်ဖြူတောင်းသဖြင့် ဆိုင်ရှင်က လှမ်းပေးရသောကြောင့် ခဏစောင့်ရသေးသည်။
“ဘာပြောလာသလဲဆိုတော့ ဘာလဲဗျာ”
ပြောလက်စကို မေ့သွားဟန်တူသည်။ စကားထောက်ပေးမလားဟု ဆိုင်ရှင်ကို ကြည့်သည်။ တကယ်တော့ ဆိုင်ရှင်သည်လည်း နားသာထောင်နေရသည်။ သူ့အလုပ်နှင့်သူ ရှုပ်နေသဖြင့် လုံးစေ့ပတ်စေ့ အာရုံမစိုက်နိုင်။ နဂိုကတည်းကလည်း စိတ်ဝင်စားမှုနည်းသောကြောင့် ကြားတစ်ချက် မကြားတစ်ချက် ဖြစ်နေခဲ့၏။ ချက်ချင်းစကားမထောက်နိုင်သောကြောင့် သူပြောတာ ဂရုတစိုက် နားမထောင်ရ ကောင်းသလားဆိုသော မျက်နှာထားဖြင့် ထိုပုဂ္ဂိုလ်က စိုက်ကြည့်သည်။ ပြီးတော့ အရက်ခွက်ကို ယူ၍ တရှိန်ထိုး မော့ချလိုက်သည်။ ဆိုင်ရှင်လည်း နားစွန်နားဖျား ကြားနေရသော စကားလုံးများကို အလောသုံးဆယ် ပြန်စဉ်းစားလိုက်ရ၏။ တကယ်တော့ ဒီဇာတ်လမ်းကို အကြိမ်ပေါင်းများစွာ ကြားနာခဲ့ရပြီးဖြစ်သဖြင့် စကားလုံးတစ်လုံးချင်းကအစ မှတ်မိနေပြီ။ ဇာတ်လမ်း၏ ဘယ်အပိုင်းနားရောက်နေပြီဆိုတာ မျက်ခြည်ပြတ်သွားလို့သာ စကားထောက်ရ ခက်နေခြင်းဖြစ်၏။ ထို့ကြောင့် စိတ်မှန်းနှင့်
“ဟိုလေ.. ငွေဆိုတာ တန်ဖိုးသတ်မှတ်ထားတ့ စက္ကူတစ်မျိုးပဲ ဆိုတာပေါ့”
ဟု ပြောလိုက်၏။ ထိုပုဂ္ဂိုလ်က “အဲဒီနေရာ မရောက်သေးပါဘူး”ဆိုပြီးမှ သူပြောမည့်စကားကို ဆိုင်ရှင်က ကြိုပြီး သိနေသဖြင့် မျက်မှောင်တစ်ချက် ကုတ်လိုက်သည်။ ဆိုင်ရှင်ကလည်း ပြဿနာတော့ တက်ပြီထင်တယ်ဟု တွေးလိုက်ရ၏။ သို့ရာတွင် ထိုပုဂ္ဂိုလ်က ဇာတ်လမ်းဆက်ဖို့သာ ပဓာနဖြစ်နေသောကြောင့်
“ဒီလိုမဟုတ်လား။ သူ့ငွေစုစာအုပ်ထဲက ငွေနဲ့ အရင်းအနှီးလုပ်ပြီး စီးပွားရှာပါလားလို့ တိုက်တွန်းတယ်လေ။ ကျုပ်က ငြင်းလိုက်တယ်။ ခါးခါးသီးသီးကို ငြင်းလိုက်တယ်။ ကျုပ်က ငွေမမက်ဘူး။ ငွေဆိုတာ အဲ ခုနက ပြောသလိုပဲ တန်ဖိုးသတ်မှတ်ထားတဲ့ စက္ကူတစ်မျိုးပဲ။ ငွေထက် တန်ဖိုးရှိတာက သစ္စာတရား၊ ကောင်းပြီ။ မင်း ကိုယ်နဲ့ လိုက်ခဲ့။ ဘ၀ထဲကို ဆင်းခဲ့၊ ဘ၀ကို အခြေခံကစပြီး တည်ဆောက်မယ်။ ဟား အဲဒီလိုလဲပြောလိုက်ရော.. ငါးပိရည်နံ့ရတဲ့ အယ်ဇေးရှင်းခွေးလို တွန့်ခနဲ ဖြစ်သွားတာပဲ။ အဲဒီမှာ ပဋိပက္ခ ဖြစ်ကြတာပေါ့။ လိုက်ရဲလား။ လိုက်ခဲ့။ မလိုက်ရဲဘူးလား၊ တွဲထားတဲ့လက်ကို ဖြုတ်လိုက်။ ဒါပဲ ဒါပဲ”
ဆိုင်မှာ လူရှင်းသွားပြီ။ အချိန်အကြာဆုံး ထိုင်နားထောင်ခဲ့သည့် လက်ဝဲဘက်ထောင့်စွန်းမှာ ထိုင်နေသူပင် ထသွားခဲ့ပြီ။ ဆိုင်ရှင်လည်း ပစ္စည်းတွေကို တောင်းတွေထဲကို မသိမသာ ကဲ့ထည့်ပြီး သိမ်းဆည်းစပြုနေပြီ။ ဇာတ်ကြောင်းပြောသူ၏ ရှေ့က ပုလင်းထဲမှာလည်း အရက်ကုန်နေပြီ။
“ငါးကျပ်ဖိုးလောက် လုပ်စမ်းပါဦး။ လပ်စ်ကပ်ပေါ့”
ဆိုင်ရှင်က တောင်းထဲရောက်နေသော ပုလင်းတစ်လုံးကို ပြန်ထုတ်၍ ဖန်ခွက်ထဲ ပိုပိုသာသာ ငှဲ့ထည့်ပေးသည်။ ထိုပုဂ္ဂိုလ်က ထရပ်ပြီး ဖန်ခွက်ကို ယူသည်။ တစ်ချက်တည်း မော့ချသည်။ ကျသင့်ငွေ ရှင်းပြီး နှုတ်ဆက်ထွက်ခွာသွား၏။ ဆိုင်ရှင်လည်း သက်ပြင်းတစ်ချက်ချလိုက်ပြီး ပစ္စည်းတွေ ဆက်သိမ်းနေသည်။
………………………………..
ဒီနေ့ ခါတိုင်းထက် ပိုသောက်မိသည်။ တစ်ခါတစ်ခါတော့လည်း ဒီလိုပါပဲ။ ထမင်းစားတဲ့ လူတွေတောင်မှ စားလို့မြိန်သွားတဲ့အခါ ဗိုက်ပြည့်အင့်သွားအောင် စားတတ်ကြသေးတာပဲ မဟုတ်လား။ ထားပါတော့.. ဒီနေ့ သောက်လို့ မြိန်သွားတယ်လို့ပဲ။ ဒီလိုအခါမျိုးတိုင်းမှာ သတိရသည့်စိတ်က ပြန်လည်နိုးကြားလာတတ်သည်။ ကပ်လျက် လိုက်ပါလာတာကတော့ နာကြည်းခြင်း။
ကြာတော့လည်း ကြာခဲ့ပါပြီ။ သို့ရာတွင် လုံးလုံးလျားလျား မေ့ပစ်ဖို့တော့ မဖြစ်နိုင်သေး။ သတိရစရာ အကြောင်းအချက်တွေက သူ့အလိုလို ပေါ်ပေါက်လာတတ်၏။ အထူးသဖြင့် အခုလို မိုးနှင်းတွေ ကျနေသည့်အခါမျိုး။
နောက်ဆုံးအကြိမ် တွေ့ဆုံပြီး တစ်သက်တာအဖို့ နှုတ်ဆက်လမ်းခွဲခဲ့တုန်းကလည်း ဒီလိုပင် မိုးနှင်းတွေ မှိုင်းမှုန်နေခဲ့သည်။ ကျောခိုင်းလမ်းလျှောက်လာရင်း ဟားတိုက် ရယ်မောပစ်လိုက်သောအခါ နှင်းမှုန်တွေ ကစဥ့်ကလျား လွင့်ထွက်သွားသည်ကို သတိတရရှိ၏။
ခုလည်း ဟိုတုန်းကလို ရယ်ပစ်လိုက်ချင်စိတ်ပေါက်လာသည်။ ထို့ကြောင့် ဟားတိုက်ရယ်ပစ်လိုက်၏။ သူ လျှောက်လာသည့်လမ်းသည် လူအတော် ရှင်းနေ၏။ ထို့ကြောင့် သူ့ရယ်သံကို ဘယ်သူမှ ဂရုတစိုက် နားထောင်နေခြင်းမရှိ။ လမ်းဘေးရှိ အိမ်တွေထဲက အိပ်မပျော်သေးသူ တစ်ယောက်တလေကတော့ ကြားကောင်းကြားနိုင်သည်။
ထိုသို့ တွေးလိုက်မိတော့မှ သူလျှောက်လာသည့် လမ်းကို သတိပြုမိသည်။ သူ့အိမ်သို့ ပြန်သောလမ်းမဟုတ်၊ အလို ဒီကုန်းတက်ကလေးဟာ..။
ရုတ်တရက် ရပ်လိုက်သည်။ ညာဘက်ကို ကြည့်သည်။ ပုဏ္ဍရိတ်ပင်၊ ခြံစည်းရိုးပန်းခြံ ကွက်လပ်ငယ်၊ ပြီးတော့ ခန့်ညားထည်ဝါသော နှစ်ထပ်တိုက်ကြီးသည် မိုးနှင်းတွေကြားမှာ တိတ်ဆိတ်စွာ ရပ်တည်နေသည်။
ကြည့်စမ်း၊ ခြေလှမ်းတွေက ဒီနေရာ ရောက်အောင် အလိုအလျောက် သယ်ဆောင်ခဲ့တာပါကလား။ သူသည် တိုက်ကြီးကို ငေးစိုက်ကြည့်လိုက်သည်။ အင်းပေါ့လေ.. နှစ်ထပ်တိုက်ပေါ်က လူဆိုတော့ မြေကြီးပေါ်ကို ခုန်ချဖို့ ပိုပြီး ခက်တာပေါ့။
“တိုက်ပေါ်ကနေ မြေကြီးပေါ်ကို မဆင်းရဲတာက ဆင်းရဲမှာကြောက်လို့၊ ဟုတ်တယ်၊ ဆင်းရဲမှာ ကြောက်လို့ မဆင်းရဲတာ” သူတွေးနေသည်ဟု ထင်သည်။ တကယ်က ပြောနေခြင်းဖြစ်၏။ အတွေးတွေက စကားလုံးများအဖြစ် အသံထွက်လာခြင်းဖြစ်၏။
“ဟား ဟား”
သူ တစ်ချက် ရယ်လိုက်သည်။ ရယ်သံက အတော် ကျယ်လောင်သွား၏။ သို့ရာတွင် သူက ဂရုမစိုက်တော့။ ရင်ထဲမှာ ပြည့်ကျပ်မွန်းသိပ်နေသည့် ခံစားချက်တွေက ပွင့်အန်ထွက်လာပြီ။ သူသည် တိုက်အိမ်ကြီးကို စိုက်ကြည့်ရင်း အော်ပြောလိုက်သည်။
“ကျွန်ယုံတော့ တစ်ဖက်ကန်း၊ သားသမီးယုံတော့ စုံလုံးကန်းတဲ့။ ချစ်သူကို ယုံတော့ ဘ၀ပါ ကန်းတော့တာပေါ့။ ဟုတ်စ ခင်ဗျားကြောင့် ကျုပ်ဘ၀ ကမ်းမမြင် လမ်းမမြင် ဖြစ်နေပြီဗျ သိရဲ့လား၊ ဗျို့ မခင်မှီ”
…………………………………….
ညနေ လက်ဖက်ကလေး နှစ်ရိုးသုံးရိုး စားမိလိုက်သဖြင့် မျက်စိကြောင်ပြီး အိပ်လို့မရဘဲ ဖြစ်နေသည်။ အိပ်ရာပေါ် လှဲပြီး မျက်စိမှိတ်ထားလိုက်သည်။
ပတ်ဝန်းကျင်တစ်ခုလုံး တိတ်ဆိတ်နေ၏။ ဆိတ်ငြိမ်ရပ်ကွက်ဖြစ်သောကြောင့် အတန်ငယ် ညဥ့်နက်သည်နှင့် လူသံ ကားသံ မကြားရတော့။ ဘေးမှာ အိပ်မောကျနေသော အိမ်ကလူထံမှ အသက်ရှူသံ ပြင်းပြင်းကိုသာ မှန်မှန်ကြားနေရသည်။
ခဏကြာတော့ အပြင်ဘက်က စကားပြောသံသဲ့သဲ့ ကြားရသည်။ နောက်တော့ အသံက ပိုကျယ်လာသည်။ စကားလုံးက မသဲမကွဲ။ ဒီအသံကို ကြားဖူးသလိုလိုတော့ ရှိသည်။ ရပ်ကွက်ထဲက တစ်ယောက်များလား။
“ဗျို့ မခင်မှီ”
ဆိုသော အသံကို ကြားသောအခါ ဆတ်ခနဲ ခေါင်းထောင်ထမိ၏။ နာမည်တပ်ပြီး ခေါ်လိုက်တာပါလား။ နားစွင့်လိုက်သောအခါ..
“ဒီမှာ ဟိုအရင်တုန်းက ပြောခဲ့ဖူးတဲ့ သစ္စာစကားလေးတွေ ပြန်ကြားချင်လို့ ဆင်းခဲ့ပါဦးဗျ”
အလို ဘုရား ဘုရား။ သူပါလား။ သူ ခုထိ ဘာမှ မပြောင်းလဲသေးပါကလား။ အိမ်ကလူတွေ အအိပ်ဆတ်သူ မဟုတ်လို့ တော်ပါသေးရဲ့။
“တိုက်ကြီးပေါ်က ဆင်းခဲ့ပါဗျ မခင်မှီရဲ့။ စကားလေး တစ်ခွန်းလောက် ပြောချင်လို့ပါ”
စိုးရိမ်စရာ အခြေအနေဖြစ်လာပြီ။ ကြာလျှင် အိမ်ကလူ နိုးကောင်းနိုးလာနိုင်သည်။ ပိုဆိုးတာက မိမိ၏ နာမည်ကို အော်ကြီးဟစ်ကျယ် ခေါ်ခေါ်နေခြင်းပင်ဖြစ်၏။ ရပ်ကွက်က လူကြီးလူကောင်းတွေချည်း နေသောနေရာ။ ဒီထဲမှာ အိမ်ကလူတွေက ပိုမိုမြင့်မားသော ဂုဏ်ဒြပ်ကို ပိုင်ဆိုင်ထားသူ။ အိမ်က လေးလေးစားစား ရှိကြသည်။ ခုလို မိမိနာမည် တပ်တပ်ပြီး အော်နေတာကို ဘေးအိမ်ကလူတွေ ကြားလျှင်…
“ဆင်းခဲ့ပါဗျ.. မဆင်းရဲဘူးလား၊ အေးပေါ့လေ။ တိုက်ကြီးပေါ်မှာ နေနေရတော့ ဘယ်ဆင်းရဲပါ့မလဲ။ ဗျို့ မခင်မှီ ဒီမှာလေ မခင်မှီရဲ့”
တရားလွန်လာပြီ။ ဒီလောက် စော်ကားလာတာကိုတော့ သည်းမခံနိုင်တော့ဘူး။ ခုတင်ပေါ်မှ အသာဆင်းလိုက်သည်။ ဧည့်ခန်းဘက် ထွက်လာသည်။ တယ်လီဖုန်းကို ကောက်ကိုင်၍ နံပါတ်နှိပ်လိုက်သည်။
“ရဲစခန်းကပါလားရှင်။ ဟုတ်ကဲ့။ အကူအညီတစ်ခု တောင်းချင်လို့ပါ။ ကျွန်မ အိမ်ရှေ့မှာ အရက်မူးသမားတစ်ယောက်လာပြီး ရမ်းကားနေလို့ပါရှင်။ ကျွန်မလား ဒေါ်ခင်မှီပါ။ အိမ်လိပ်စာက…”
တယ်လီဖုန်းချပြီး နားပြန်စွင့်လိုက်သည်။ အပြင်မှာ သူရှိနေတုန်း။ ဟိုတစ်ချိန်က ပြောခဲ့ဖူးသည့် စကားကို အော်ဟစ်ရေရွတ်နေသည်။ ခဏမျှ အသံတိတ်ဆိတ်သွားပြီးနောက် ကားတစ်စီး၏ စက်သံကို ကြားရသည်။ ခြံဝင်းရှေ့မှာ ရပ်သည်။ အပြန်အလှန် စကားပြောသံတွေ ကြားရသည်။ ပြတင်းပေါက်နားသို့ လျှောက်သွားပြီး လိုက်ကာကို အသာဖယ်၍ ကြည့်လိုက်သောအခါ..
အပြင်မှာ မိုးနှင်းတွေ ကျနေသည်။ မှုန်ဝါးဝါး မီးရောင်အောက်တွင် ရဲနှစ်ယောက်က လူတစ်ယောက်၏ လက်မောင်း တစ်ဖက်တစ်ချက်ကိုင်၍ လင်းရိုဗာကားပေါ် တွန်းတင်လိုက်သည်ကို တွေ့ရ၏။ နှစ်တွေကြာညောင်းလာသော်လည်း မှတ်မိနေသေးသည်။ သူမှ သူအစစ်။ သက်ပြင်းတစ်ချက် ချလိုက်မိ၏။ အိပ်ရာပေါ် ပြန်တက်ပြီး မျက်စိမှိတ်ထားလိုက်သည်။ အိမ်က လူက အိပ်မောကျနေဆဲ။ သူကတော့ ဒီည အိပ်လို့ပျော်လိမ့်မည် မထင်တော့။
……………………………………………..
“သူများ အိမ်ရှေ့မှာ ဘာဖြစ်လို့ သွားပြီး အနှောင့်အယှက် ပေးချင်ရတာလဲ။ အရက်လဲ အရမ်းမူးနေသေးတယ်”
တာဝန်မှူးက ပြောလိုက်သည်။ သူက ဘာမှ ပြန်မပြောဘဲ နေသည်။ တာဝန်မှူးက ဆက်ပြောသည်။
“အင်းလေ.. ဒီညတော့ စခန်းမှာပဲ နေရလိမ့်မယ်။ မနက်ကျတော့ အာမခံပေးမယ့်လူကို အကြောင်းကြားပေါ့။ ကဲ သူ့ကိုယ်ရေး ရာဇ၀င် မှတ်တမ်းယူထားလိုက်”
ရဲတပ်ဖွဲ့ဝင်တစ်ယောက်က သူ့ကို စားပွဲတစ်လုံးဆီ ခေါ်သွားပြီး ထိုင်ခိုင်းသည်။
“ကဲ ပြော၊ နာမည်ဘယ်သူလဲ” သူက မပြောဘဲ နေသဖြင့်
“ပြောလေဗျာ”
“ကြော့မောင်”
“အဖေနာမည်၊ မှတ်ပုံတင်အမှတ်”
သူက တစ်ခုစီကို ခပ်လေးလေး ဖြေနေသည်။
“အသက်” သူ တစ်ချက်မော့ကြည့်ပြီး
“ဒါက အရေးကြီးလို့လား”
“အရေးကြီးတာပေါ့။ ကိုယ်ရေးရာဇ၀င်ဆိုတာ အကုန် အပြည့်အစုံယူရတာပဲ။ ကဲ ပြောဗျာ။ အသက်ဘယ်လောက် ရှိပြီလဲ”
သူက နံရံကို ငေးကြည့်နေပြီးမှ ခပ်ဆိုင်းဆိုင်း ဖြေလိုက်သည်။
“ခြောက်ဆယ့်ငါးနှစ်”
-------------
မင်းလူ
(နှင်းဆီ၊ ဖေဖော်ဝါရီ၊ ၁၉၉၄)
[ မျက်ရှု သုတ၊ ရသ မဂ္ဂဇင်း ဘလော့ဂ်မှ ကူးယူပါသည်။ မျက်ရှု မဂ္ဂဇင်း အား ကျေးဇူးတင်ပါသည်။]
No comments:
Post a Comment