#လူချမ်းသာ
#ခင်မျိုးချစ်
ဖိုးတေနှင့် အမာတို့ လင်မယားမှာ နာမည်အလိုက် တေလည်း တေ၊ မာလည်း မာလေသည်။ သူတို့ကို ပစ်တိုင်းထောင် လင်မယားဟု ခေါ်ကြသည်။ ဖိုးတေမှာ ခပ်ငယ်ငယ်က တေပေနေခဲ့သဖြင့် အမာနှင့် တွေ့သည့်အချိန်တွင် တလ ၆၀ ရသော၊ ကြွေးလည်ပင်ထိသည့် ရုံးစာရေးတဦး ဖြစ်သည်။ အမာမှာလည်း ကိုယ့်ထူးကိုယ့်ချွန်ရသော ရုံးစာရေးမ ဖြစ်သည်။ သူတို့နှစ်ဦးမှာ အလုပ် ချင်းတူ၊ လူရည်ချင်း နတ်ဖတ် နှုတ်ခမ်းပဲ့ချင်း မီးမှုတ်ခဲ့ကြလေသည်။
သူတို့နှစ်ဦးစလုံးပင် မိတ်ဆွေ အသိပေါလှသည်။ ချစ်ခင်သူ များလှသည်။ ထို့ကြောင့် ဖိုးတေနှင့် အမာတို့သည် တိတ်တိတ်ဆိတ်ဆိတ် လက်မှတ်ထား လက်ထပ်ရုံလောက်နှင့် ကိစ္စပြီးမည်ကို နှစ်ဖက် မိတ်ဆွေများက
“ဘယ် … ဒီလိုနဲ့ ပြီးမလဲ”
ဟု ဝိုင်းဝန်းစီမံကြသည်။ အိမ်ထောင်မှု ခမ်းနား ငွေကောက်ခံ၍ ဝယ်သူ ဝယ်၊ ထိုင်ဆိုအငြိမ့် ထည့်သူ ထည့် စသည်ဖြင့် တယောက် တလက် စီမံလိုက်ကြရာ သားသားနားနား မင်္ဂလာဆောင်တခု ဖြစ်သွားရုံမက အခြား မိတ်ဆွေ သင်္ဂဟများက လက်ဖွဲ့ကြသော အိမ်ထောင်ပစ္စည်း အဝတ်အထည်များ အမြတ်ရလိုက်သေးသည်။
မင်္ဂလာဆောင်မှာ ပျော်ပွဲစားသကဲ့သို့ နောက်ကြ ပြောင်ကြ ပျော်စရာကြီး ဖြစ်သည်။ သူငယ်ချင်းတွေက အမာ အား မင်္ဂလာစကားပြောရာတွင် ခနိုးခနဲ့ကြသည်။ အမာက သတို့သမီးပီပီ မျက်နှာမရဲ၍လောမသိ၊ ထ၍ နှုတ်ခမ်းပါကလေး နှင့် ရန်တွေ့လေသည်။
ဖိုးတေနှင့် အမာတို့မှာ မင်္ဂလာဆောင်တွင် လူကလွဲ၍ ဘာမှမစိုက်ရဘဲ အမြတ်ရလေသည်။ ဖိုးတေကား ရုံးက ထုတ်ပေးသည့် အသပြာငွေ ၁၈၀ ကို ကြွေးတွေ မြီတွေဆပ်ဖို့ စိတ်မကူးဘဲ အခွင့်ယူ၍ ထိုငွေနှင့် မင်္ဂလာဦး ခရီးထွက် လည်ပတ်လိုက်သေးသည်။
ဖိုးတေနှင့် အမာတို့သည် တလလျှင် ၂၀ ပေးရသော အခန်းကလေးတွင် အိုးအိမ်တည်ကြလေသည်။ ဖိုးတေ၏ လခမှာ တလ တလ ကဗူလီ ကုလားကြွေး အတိုးပေးရသည်နှင့် ကုန်လေသည်။
အမာ လက်ဖွာ လက်လွယ်လှသဖြင့် သူ့ကို မှီခိုတောင်းရမ်းသူ ဆွေမျိုးများကို သူ့လခနှင့် ပို့နေရသည်။ တလ တလ ကြွေးနှင့် ထွေးလုံးရစ်ပတ်နေကြရသော်လည်း စိတ်ညစ်ခြင်းမရှိ။ သူတို့မောင်နှံမှာ ပျော်ကြသည်။ ပဲရာဇာ ဟင်းချို၊ ငါးခြောက်ဖုတ်၊ ငရုတ်သီးထောင်းဟင်းများကို မြိန်မြိန်ရှက်ရှက် စားသောက်ကာ ကန်တော်ကြီး လမ်းလျှောက်ကြသည်။
ရုံးအားသည့် စနေ တနင်္ဂနွေနေ့များတွင် အင်္ဂလိပ် ရုပ်ရှင်ရုံများကို လည်ပတ်ကြည့်ကြသည်။ တခါတရံ အလွန် ဘိုင်ကျသည့်အခါများတွင် ညဥ့် ၉ နာရီမှ ၁၂ နာရီပြီးသော နောက်ဆုံးပွဲကို အိမ်မှ လသာသာ ခြေကျင် လျှောက်လာကြ သည်။ ရုပ်ရှင်ရုံနားတွင် ပြသည့်အချိန်တွင် ရစ်သီရစ်သီလုပ်နေကြ၍ လူသိပ်မကျပ်သည်ရှိသော် ရှက်ကြောက်ရမည့် အသိ မတွေ့သည်ရှိသော် တမတ်တန်းက လက်မှတ်ခံ၍ ဝင်ကြည့်ကြလေသည်။ ပွဲပြီးလျှင် ဘတ်စ်ကားခ ကုန်မည့် ပိုက်ဆံ တပဲကို ကြံရည် နှစ်ပြားဖိုးစီ ဝယ်သောက်ကာ အေးမြသောစိတ်ဓာတ် ချမ်းမြေ့သောနှလုံးနှင့် အိမ်သို့ ပြန်ကြကုန်၏။
သူတို့နှစ်ဦးစလုံး၏ မိဘဆွေမျိုးများမှာ ခေကြသူ မဟုတ်ကြပေ။ သူတို့ကိုယ်က တေကြ ပေကြလွန်း၍ ဖြစ်သည်။ ချမ်းသာ၍ မိမိထံကျမည့် ဆွေမျိုးနှင့် ဆင်းရဲသဖြင့် မိမိကျရမည့် ဆွေမျိုး နှစ်မျိုးနှစ်စားတွင် သူတို့သည် ဒုတိယ အမျိုးအစားကိုသာ အသိလုပ်ကြသည်။ ဘယ်သူ့ကိုမှ မျက်နှာငယ်ခံ အကူအညီတောင်းခြင်း မရှိကြချေ။ သူတို့ ညားကြပြီး ၆ လလောက်ရှိလျှင် ဖိုးတေ၏ မိခင်ကြီးလာ၍ သားနှင့် ချွေးမ ဘယ်လိုနေကြသည်ကို ကြည့်လေသည်။ သင်းတို့နှစ်ဦး နေပုံထိုင်ပုံတွေကို အလွန်စိတ်ပျက်စွာနှင့် သူ့မြို့သို့ ပြန်သွားပြီးနောက် ဖိုးတေ၏ ကြွေးများ ဆပ်ရန် ငွေပို့လိုက်သည်။ နောက်ထပ် ကြွေးမတင်စေနှင့်၊ လိမ်လိမ်မာမာနေကြရန် စာရေးလိုက်သည်။
မကြာမီ အမာတွင် သားဦးယောက်ျားလေး မွေးဖွားလေသည်။ သားကလေး မဖွားမီ တလတွင် ဖိုးတေသည် လခ ၁၅၀ ရသော အလုပ်တခုကို ပြောင်းရသည်။ သူတို့လင်မယားအဖို့၌ အလိုအလျောက် ဖြစ်လာရမည်ဟူသော စကား မှန်လေသည်။ ဖိုးတေနှင့် အမာတို့သည် အင်္ဂလိပ် ရုပ်ရှင်ကြိုက်သော ဝါသနာအပြင် စာဖတ်ဝါသနာပါသည်။ အားလပ်သည့်နေ့များတွင် စာအုပ်အဟောင်းဆိုင်များမှ မဂ္ဂဇင်း ဂျာနယ် စာအုပ်များ ရှာဖွေဝယ်ယူကြသည်။
ညဥ့်နက်သန်းခေါင်အထိ စားပွဲတင် မှန်အိမ်မီးရောင်အောက် ပက်လက်ကုလားထိုင်ပေါ်တွင် ဖိုးတေက သူ့သဘောတွေ့သော စာများကို အသံထွက်အောင် ဖတ်သည်။ အမာကား ကြမ်းပေါ်ထိုင်ကာ ခွေးမကလေးပမာ သူ့ချစ်လင်၏ဒူးပေါ်တွင် မေးတင်လျက်နားထောင်နေသည်။ သားသမီးရတော့မည်ဟု သိသောအခါ ကလေးနှင့် ပတ်သက်သည့် စာအုပ်စာတမ်းများကို ဖတ်ကြလေတော့သည်။ သားကလေးနှင့်ပတ်သက်သည့် မွေးသည့်နေ့မှာပင် မွေးသဖခင် ဖိုးတေသည် အားရပါးရ နမ်းရှုံ့၍ ဘယ်အဖေများ ကလေးကို မွေးမွေးချင်းနမ်းသလဲဟု သူ့သူငယ်ချင်းတွေကို ချဲလင့်လုပ်လိုက်သေးသည်။
သားကလေး အပါကို စာအုပ်များတွင် ပါသည့်အတိုင်း စနစ်တကျမွေးရာ ရှေးလူကြီးများ၏ ဆိုမြည် ကြိမ်းမောင်းသည့်ကြားထဲကပင် သန်မာထွားကျိုင်းလာလေသည်။ အစားအသောက်မှာ သူဌေးသား အရာရှိကြီးသားပမာ အကောင်းအမွန်များ ကျွေးမွေးသဖြင့် ပိုက်ဆံကုန်လှသော်လည်း နာမကျန်း၍ခေါ်ရသော ဆရာဝန်နှင့် ဆေးစရိတ် ကုန်သည်နှင့်ကာမိသည်ဟု ဖိုးတေလင်မယားက စာရင်းချ၍ ပြသည်။ သူတို့တရားနှင့် သူတို့ မှန်နေကြသည်။
နံနက်တိုင်း ဖိုးတေသည် တရုတ်ဆိုင်ကဝယ်သော ၂ ကျပ် ၈ ပဲတန် ကြိမ်လက်တွန်းလှည်းတွင် သူ့သားကို ထည့်တွန်းကာ ကန်တော်ကြီးစောင်းသွား၍ လေညင်းခံသည်။ ထိုအခိုက် အမာသည် ဖိုးတေ ရုံးမသွားမီစားရန် ထမင်း ဟင်း ပြင်ဆင်သည်။ ဖိုးတေ ပြန်လာ စားသောက်ပြီး ရုံးသွားလျှင် အမာနှင့် ကလေးသာ အိမ်၌ ကျန်ခဲ့သည်။ သူတို့မှာ မရှိမရှားဘဝတွင် ရောင့်ရဲကာ စိတ်ပျော်ရွှင်နေကြသော်လည်း အချို့လူကြီးများက
“ရှေ့ရေး နောက်ရေး မတွေးတတ်တဲ့ ကောင်မလေးနဲ့ ကောင်ကလေးပဲ” ဟု ညည်းညူကြသည်။
အချို့ ဂုဏ်ပကာသနကိုသာ ချစ်ခင်သော မိတ်ဆွေ၊ ဆွေမျိုးများက အထင်သေးကြသည်။ ဖိုးတေ နှင့် အမာ တို့ကား သူတို့၏ သာယာသော အိမ်တွင်းလောကလောက်ကိုသာ ဂရုစိုက်ကြလေသည်။ သူတို့၏ ရွှင်လန်း ကြည်လင် သော စိတ်နှလုံးကြောင့် လူချစ်လူခင် မိတ်ဆွေ ပေါသည်။ စိတ်သဘောတူညီသော ဆွေမျိုးများက ချစ်သည်။ ထို့ကြောင့် မိတ်ဆွေ အတုအယောင်နှင့် ရွှေရှိမှ မျိုးတော်ချင်သော ဆွေမျိုးများကို သူတို့၏ မိတ်ဆွေစာရင်းတွင် ထည့်စဉ်းစားစရာ မလိုတော့ပေ။
အပါ တနှစ်သားတွင် အရှေ့အာရှကမ္ဘာစစ်ကြီး ဖြစ်လာ၏။ ဖိုးတေ အမာတို့ မိသားတစုမှာ ကြောက်အား လန့်အားနှင့်ပြေးကြရာ အပြေးမတတ်ကြသဖြင့် အင်္ဂလိပ် အပြေး၊ ဂျပန်အဝင် စစ်မြေပြင် အလယ်ခေါင်၌ ပိတ်မိနေကြ သည်။ အမြောက်ချက်ပေါင်း ၂၈ ချက် အပစ်ခံရသောနေ့မှာ အမာ အသက် ၂၈ နှစ် ပြည့်သောနေ့ပင် ဖြစ်သည်။ ဘုရင် ဧကရာဇ်မွေးနေ့မှာသာ အမြောက်ပစ်၍ ကျင်းပနိုင်သည် မဟုတ်ပါ။ ဒါမျိုးတော့ အမာလည်း ကြွားနိုင်ပါသေးသည်။
မိမိအလိုသာဖြင့် မိုက်မိုက်ကန်းကန်း သေချင်သေ၊ ဘယ်မှ မပြေးဘူး။ ဖိုးတေ စိုးရိမ်ကြီးပြီး ပြေးလို့သာ ပစ္စည်းကုန်၊ လူမသေရုံကျန်သည်ဟု ဖိုးတေအား အမာသည် အပြစ်တင်၍ မပြီးနိုင်ရှိလေသည်။ ဒါမျိုးတော့ မဆန်းလှပါ။ ကမ္ဘာဦးအစက အာဒံနှင့် ဧဝတို့ရှိခဲ့ရာ မာရန်နတ်၏ ဖြားယောင်မှုကြောင့် မဧဝက သစ်သီးစားမိသောအခါ
“ကိုအာဒံ ရှင့်ကြောင့် ဒီလိုဖြစ်တာ။ ဒီနေ့မှ ရှင်က ကျွန်မနဲ့အတူ တောလည်မလိုက်ဘဲ ဘာလို့ ချန်နေရစ် ခဲ့တာလဲ။ ကျွန်မတဦးတည်း ထွက်သွားလို့ ဒီလို ဖြစ်ရတာ။ ပြီးတော့ တကယ်ဆိုရင် ရှင်ဟာ ကျွန်မရဲ့ လင်သခင် မဟုတ်ဘူးလား။ ငါ မပါဘဲ ဘယ်မှမသွားနဲ့လို့ တားထားလိုက်ပါတော့လား”
ဟု မြည်တွန်ခဲ့သည် မဟုတ်ပါလား။
ဤသို့ မြည်တွန်တောက်တီးရင်းပင် သူတို့မိသားစုတစု ရန်ကုန် ပြန်ဆင်းလာကြသည်။ ရှေးက သူတို့ သိသော ရန်ကုန် မဟုတ်။ မျက်စိသူငယ် ဖြစ်နေကြသည်။ မိတ်ဆွေ သူငယ်ချင်းများဆီလည်း မကပ်ဝံ့။ အလိုလို ရှက်ကြောက် အားငယ်နေကြသည်။ သူတို့ကိုတွေ့သူ တဦးတလေက အမြင်မတော်၍ ကလေး မုန့်ဖိုးပဲဖိုး ပေးကြသည်။ အလုပ်အကိုင်လည်း မရဖြစ်တာ၊ အကြံတုံး ဉာဏ်တုံး ဖြစ်နေစဉ် ဖိုးတေ၏ ဖိနပ်ထောင်သူ သူငယ်ချင်းတဦးက ဖိနပ်များ ထုတ်ပေး၍
“မင်းတို့ လောက်အောင် ယူစား၊ ပိုတာပေး”
စီမံကန်းလုပ်ပေးမှ ဖိုးတေတို့ အသက်ဆက်မိရုံ ဖြစ်သွားသည်။ ဖျင်တို တထွာ အသပြာ တဆင့်မျှ ပေးမည့်သူ မရှိသည့်အခါတွင် ထိုမိတ်ဆွေကောင်း၏ စေတနာကို အဘယ်သူ ကျေးဇူးမတင်ဘဲ ရှိနိုင်ပါမည်နည်း။
လမ်းဘေး ပလက်ဖောင်းပေါ်တွင် ဝါးခုနှစ်ချောင်း သက်ငယ် ခုနှစ်ပျစ်နှင့် တဲဆိုင်ကလေး ဆောက်၊ ဖိနပ် ရောင်းချပါသော်လည်း ကော်ပိုရေးရှင်းအမိန့်ကြောင့် တဖျက်တည်း ဖျက်နေရသဖြင့် နောက်ဆုံး၌ ပလက်ဖောင်းပေါ်တွင် ရွက်ဖျင်းခင်း၍ ရောင်းရသည့်အဖြစ်သို့ ရောက်လေတော့သည်။ မိတ်ဆွေအချို့မှာ မကြည့်ရက်နိုင်ကြ၊ ရှက်ရှာလိမ့်မည်ဟု ထင်၍ ရှောင်သွားကြသည်။ ထိုလူများအချင်းချင်း ဖိုးတေတို့အား ဘယ်လို ကူညီရမည်ကို တိုင်ပင်ကြသည်။
ဖိုးတေနှင့် အမာကား ရှက်မည်ဝေးစွ။ ဖွတ်နှစ်ကောင် ပြာရထားတွင်မွဲ မျက်နှာပြောင် သားနှင့် ကြွားကြွားဝင့်လျက်ပင် ရှိကြသည်။
သူတို့၏ကံမှာ တနေ့သော် အလှည့်ကြုံရပြန်လေသည်။ အမာကို ယခင်က လုပ်ဖူးသည့်နေရာတခုတွင် အလုပ် ပေးလာသည်။ စင်စစ်ရခြင်းရလျှင် ဖိုးတေ အလုပ်ရခြင်းကို အမာ ပိုမိုလိုလားသည်။ ထိုအလုပ်ကို အမာ ငြင်းလိုက်သည်။ ဈေးကလေးရောင်း၍ မနက် ခြောက်ချက် ည ခြောက်ချက် နေရတာက ကောင်းသေးသည်ဟု အောက်မေ့လိုက်သည်။ သို့သော်
“မိအမာရဲ့ နင့်ကို အလုပ်နားလည်လို့ ခေါ်တာပါဟဲ့၊ နင် မလုပ်ရင်တို့မှာ အခက်တွေ့နေပါလိမ့်မယ်။ တို့ကို မကူညီတော့ဘူးလား” ဟု ပြောကြရာ ဖိုးတေက
“အားနာပါတယ် အမာရာ … လုပ်လိုက်ပါကွာ၊ ခဏဖြစ်ဖြစ်ပေါ့” ဟု ကူညီပြောလေသည်။ ထိုအခါ မိတ်ဆွေများက အားတက်၍ –
“ကဲပါဟာ … နင့် အားကိုးလို့ ပြောနေတာပဲ ငြင်းမနေပါနဲ့” ဟု ထပ်ပြောကြပြန်သည်ကို အမာမှာ ခေါင်းညိတ်လိုက်ရပြန်သည်။
“ရှင် အားနာတတ်တာနဲ့တော့ ဒုက္ခပါပဲ၊ ရှင့်မှာဖြင့် နေရာတကာ အားနာနေတာပဲ” ဟု ရှေ့နေလိုက်မိသော ဖိုးတေကို မကျေနပ်နိုင် ဖြစ်မိပြန်သည်။
အမာသည် ဖိုးတေကို အိမ်တွင် ကလေးနှင့်ထား၍ အလုပ်လုပ်ရသည်ကို မပျော်ပိုက်ချေ။ သူ၏မိတ်ဆွေများ အပေါ်တွင် စောင့်သိအပ်သည့် ဝတ္တရားကြောင့် အောင့်အည်းနေရလေသည်။ ဂျပန်ဖက်ဆစ်ခေတ်တွင် အလွန်းသင့်လျှင် သင့်သလို အလုပ်အကိုင် ပေါသည့်ခေတ်၌ အမာသည် မတုန်မလှုပ် ကျောက်ရုပ် ၏လုပ်နေ ၏ခဲ့သည်။
“ညည်းနှယ်အေ … နေနိုင်ရန်၊ ကိုယ့်လင် အလုပ်မရှိတာများ ကြံဖန်လုပ်ပေးလိုက်ရောပေါ့”
ဟု မဲ့ရွဲ့ အပြစ်တင်နေကြလေသည်။ ဟိုလူ သည်လူ ကပ်ရပ်တောင်းပန်သည့်အလုပ်ကို အမာ သည်လမ်းပေါ် ဈေးတောင်းချ ရောင်းရသည်ထက် ရှက်သည်။
“ဒီလို စကားမျိုး ဘယ်သူ့ကိုမှ သွားပြောလိမ့်မယ် မထင်နဲ့၊ မေ့မှားလို့ ပြောမိရင် လျှာကို လှီးပစ်လိုက်မယ်”
ဟု အမာက ပြောသည်။ ထိုအခါ ဖိုးတေက
“ဒီလို စကားမျိုးတော့ ဘယ်သူ့ကိုမှ မေ့မှားလို့တောင် မပြောမိပါစေနဲ့၊ အိမ်ကြီးရှင်မ၊ ဒေါ်အမာရယ်”
ဟု ထပ်ခါတလဲလဲ သတိပေးရလေသည်။ ဖိုးတေသည် မကြာမီ ဘယ်သူ့မှ မကပ်ရဘဲနှင့်ပင် အလုပ်တခုရရာ အမာလည်း အလုပ်က ထွက်လိုက်လေသည်။
ဂျပန်ခေတ် တခေတ်လုံး လခစားအလုပ်က လွဲ၍ မလုပ်မကိုင်တတ်သော ဖိုးတေနှင့် အမာတို့မှာ ဆီ၊ ကြက်သွန် မပါသော ဟင်း ထမင်းကို လည်ချောင်း မြေလှန် စုံကန်မျှောခဲ့ကြသည်။ အဝတ်အစားမှာ အစုတ်စုတ်ဖြစ်၍ ကူလီလောက်မှ မပြောင်တော့ချေ။
သားကလေး အပါမှာ စောင်၊ စားပွဲ ခင်းများကို ချုပ်ထားသော အင်္ကျီနှင့် နေပူ မိုးရွာမရှောင် ဖိနပ်မပါဘဲ သွားတော့သည်။ ငယ်ငယ်က ကရင်းကရိုက်ကားစ်၊ ဂိုလ်ဒင်ပတ်ဖ်တွေ ကျွေးလာခဲ့သော်လည်း ယခုအခါ ဖွဲနုမုန့် မရွေး ဘိန်းမုန့် တို့ကို အဆာပြေရုံ စားရသည်။ နံနက်စောစော တွင် ဘိန်းမုန့်ပူပူကို ဟိုလက် သည်လက် ပြောင်းရင်း
“ဘိန်းမုန့် … ဘီးမုန့် … ဘီးညန်း … ”
ဟု ကလေးဘဝ သီချင်းလုပ်ဆိုနေသော အပါကလေးကို မြင်ရလျှင် အဘယ်မိဘ၏ စိတ်နှလုံး မထိခိုက်ဘဲ ရှိပါမည်နည်း။
ဂျပန် ပြေးမည့်နှစ် ဆောင်းတွင်းမှာ အလွန်ချမ်းလှသည်။ အိမ် မလုံမခြုံတွင် လေတွေက တဟူးဟူး၊ နှင်းတွေက တပေါက်ပေါက်နှင့်၊ တညတွင် အပါကလေးမှ ပြာမဲ တုန်ချိနေသည်။ ဘာလုပ်ရမှန်းမသိ ယောင်နနဖြစ်နေကြပြီးမှ သတိရ၍ အမာက ထင်းမီးများထည့်ကာ နွေးစေမှ ကလေး အပူအငွေ့ဝင်လာတော့သည်။
ကဲ … နှိပ်စက်လိုက်စမ်းဟဲ့ … လောကဓံ၊ နင်ပဲ နှိပ်စက်နိုင်မလား၊ တို့ပဲ ခံနိုင်မလား … ဟု အမာက အန်တု ကြုံးဝါးခဲ့သည်။
ကိုရွှေဂျပန်များ ကြွကြပြီ။ ဖိုးတေနှင့် အမာတို့ ကံမှာ ပြောင်လာလေသည်။ အင်္ဂလိပ် ပြန်ဝင်မှ သူတို့၏ ပညာ အစွမ်းအစကလေးနှင့် ကြံစည်သောကိစ္စများမှာ အထမြောက်စပြုလာသည်။ အပါ ကလေးကို ကျောင်းထားရပြီ။
“အမာရေ … တို့များ ဒီသားလေး တယောက်တည်းရှိတာလည်း တမျိုး ကံကောင်းတာပဲ။ ကလေးတွေ များနေရင် သာဆိုးမယ်။ လူမစွမ်း နတ်မတာလိုပေါ့” ဟု ဖိုးတေက ပြောရာ အမာက
“အစစ်ပေါ့ ကိုဖိုးတေ … စစ်အတွင်း သူများတွေ ဟောတယောက်၊ ဟောတယောက် မွေးနေကြတာ၊ အမာ ဒီတယောက်နဲ့ ရပ်တန်းကရပ်နေတာ အမာဖြင့် ဝမ်းသာလို့ မဆုံးဘူး၊ အမာတို့ သိပ်ကံကောင်းတာပဲနော်”
ဟု သူတို့လင်မယားမှာ ဝမ်းသာစရာမရှိ ကြံဖန်ဝမ်းသာနေကြလေသည်။ ဂျပန်ခေတ်တွင် အဆိုးတကာ့ အဆိုးဆုံး များတွေ့ရပြီသော ဖိုးတေနှင့် အမာမှာ ဘယ်အဖြစ်မျိုး ရောက်ရောက် ကိစ္စမရှိဟု အောက်မေ့နေကြသည်။
ဖိုးတေနှင့် အမာတို့သည် စစ်မဖြစ်မီ အချိုးအတိုင်း ရုပ်ရှင်ကလေးကြည့်လိုက်၊ စာအုပ်အဟောင်း ဆိုင်သွား စာအုပ်တွေ ဝယ်လာ၊ အိမ်ကျ တယောက်တလဲ ဖတ်လိုက်၊ သားကလေး အပါ တွတ်တီးတွတ်တာ ပြောသည်ကို သဘောတွေ့ ပျော်နေလိုက်။ သူတို့ဘဝနှင့် သူတို့ ကျေနပ်နေကြပြန်လေသည်။
လင်မယားနှစ်ယောက် အချိန်တန် အလုပ်သွား အိမ်ပြန်။ အားသည့်နေ့ အိမ်တွင် စာဖတ်ချင်း ဖတ်၊ ဂိုင်ဖော သည့်နေ့ဆိုလျှင် ရုပ်ရှင်ကြည့်၍ သူတို့ရတတ်သမျှနှင့်နေကြသည်။ အလုပ်ရာထူး တိုးတက်ဖို့ စိတ်မပူပန်ရုံမက တခါတရံ လူလျှော့ အလုပ်ဖြုတ်ပစ်မည်ကိုပင် ဂရုမစိုက်ဘဲ တဦး အလုပ်မရှိတော့လည်း တဦး အလုပ်ရှိသေးတာပဲ။ ရတတ်သမျှနှင့် လောက်အောင်နေပေါ့ဟု ခပ်အေးအေး နေကြသည်။
သူတို့ကား အပြင်လောကကို ဂရုမပြုဘဲနေခဲ့ရာ၊ တနေ့သော် သူတို့ မမျှော်လင့်သော အဖြစ်အပျက် တခု တွေ့ရသည်။
သတင်းစာများတွင် ဦးဖိုးတေ ဆိုသူ မင်းကြီး ရာထူးရကြောင်း ပါလေသည်။ ထိုအခါ
“အမာ့ ယောက်ျား ကိုဖိုးတေ ဖြစ်မှာပေါ့ကွ။ ဝန်ကြီး ဦးဟိုသင်းရဲ့ ယောက်ဖရဲ့ မယားပါသားနဲ့ ကြိုက်ဖူးတဲ့ ကောင်မလေးအိမ်က ခွေးက ကိုဖိုးတေကို ကိုက်ဖူးသေးတာပဲ”
စသဖြင့် ထင်ကြေးပေးကြလေသည်။ လာရောက် မေးမြန်းသူများကို ဖြေရလွန်းသဖြင့်
“ကိုဖုိုးတေရေ … သတင်းစာကနေပြီး ဖြေရှင်းပုံ ပေါ်နေပြီ”
ဟု အမာက ညည်းလေသည်။ ခင်မင်သော မိတ်ဆွေများက ဝမ်းသာကြသည်။ အစက အထင် အမြင် သေးနေကြသူများက မနာလိုစိတ် မကင်းစွာနှင့်ပင် အရေးတယူ ခေါ်ပြောလုပ်ကြသည်။ အမျိုးတော်သည့် အဒေါ်ကြီး တဦးသည် ရှေးက ဖုတ်လေသည့်ငါးပိ ရှိလေသည်ဟု မအောက်မေ့ခဲ့သော်လည်း ယခုအခါ အရေးတယူ လုပ်ကာ ဘယ် အကူအညီပေးရမည် စသဖြင့် မေးမြန်းဖော်ရလေသည်။
“မင်းကြီးဖြစ်လို့ တို့အိမ်တောင် လာမလည်ဘူး”
ဟု ပြောမှ ဖိုးတေနှင့် အမာမှာ မဟုတ်ကြောင်း ရှင်းရပြန်သည်။
“မသိပေါင်တော် … တို့က ဝန်ကြီးဦးဟိုဒင်းရဲ့ ယောက်ဖရဲ့ မယားပါ သား … (လ) … ဖိုးတေကို ကြိုက်ဖူးသေးတာမို့ ဟုတ်မှာပဲ ထင်လိုက်တယ်။ မင်းတို့ကလည်း ဒီလို လူကြီးတွေဆီ သွားပြုတွေ့ပါလား။ ဒီလိုနေလို့ ဘယ်ဖြစ်မလဲ”
ဟု အကြံပေး ဆုံးမစကားပြောသွားလေသည်။
အမာမှာ လက်နှစ်ဖက်နှင့် ရင်ဘတ်ကို ဇာတ်ဟန်နှင့် ခတ်တီးကာ
“ခက်မှ ခက်ရလေနော်၊ ကိုယ့်ဘာသာ ကိုယ့်ဘဝနှင့် ပျော်ပျော်နေလည်း မနေရသေးဘူး။ မင်းကြီးဖြစ်မှ ခေါ်ချင်တဲ့ မိတ်ဆွေ ဆွေမျိုတွေကို ငဲ့ညှာပြီး ဟိုလူ ဒီလူတွေဆီ သွားပြီး ကယ်မပါ၊ ကြည့်ရှုပါနှင့် မွဲသွေ့သွေ့မျက်နှာနဲ့ အောက်ကျခံ ပြောရဦးမယ်လို့ ဖြစ်နေပြီ ကိုဖိုးတေ”
ဟု ပြောရာ ဖိုးတေက
“သူတို့ မခေါ်ချင်လည်း နေပေါ့ကွ၊ ဘာဆိုင်လဲ … ဘာလို့ အောက်ကျခံပြီး ပြောရမလဲ” ဟု ဆိုလိုက်လေသည်။
“မဖြစ်ဘူး … မင်းကြီး မဟုတ်တာနဲ့ ကိုဖိုးတေကို အမျိုးရယ်လို့ စကားထဲ ထည့်ပြောရမှာ ရှက်ရှာတဲ့ သူတွေ သနားလွန်း လို့ပါ။ ဖြစ်မှဖြစ်ရလေ။ သူတို့မှာ အမာတို့ လင်မယားအတွက် အတော် မျက်နှာငယ်၊ ဂုဏ်ငယ် နေရှာတော့မှာပဲ၊ သနားလိုက်ပါဘိတော့တယ်။ ကျွတ် … ကျွတ် … ကျွတ်”
ဟု သောလုံးထုတ် နေပြန်သည်။
အမာသည် လောကကြီးတခုလုံးကို လက်ပိုက်ရပ်ကြည့်ကာ သရော်ရယ်မောလေတော့သည်။ ဖိုးတေကား ဆေးလိပ်ကိုခဲလျက် သူ့ဇနီးနှင့် လောကကြီး စစ်ပြိုင်နေပုံကို ရွှင်ပြုံးစွာ စောင့်ကြည့်နေလေသည်။
သူတို့၏ အသက်များမှာ မငယ်ကြတော့ပြီ။ သုံးဆယ်က စွန်းထွက်လာလေပြီ။ ထို့ကြောင့် ဖိုးတေ နှင့် အမာ နှစ်ဦးစလုံးပင် သူတို့၏ ကိုယ်ခန္ဓာမှ နှုတ်ဆက် ထွက်ခွာစပြုနေသော အရွယ် နုနယ် ပျိုမျစ်ခြင်းကို တတ်နိုင်သ၍ ဆိုင်းငံ့အောင် ကြိုးစားကြသည်။ သူတို့သည် ရှေးကထက် ပို၍ အဝတ်အစားကို ပိုဂရုစိုက်တတ်သည်။ အမာသည် သူ့အရွယ်နှင့် လိုက်အောင် ဆံပင် မမောက်တမောက်ကလေး စသည်တို့ဖြင့် ပြုပြင်လာသည်။
“စိတ်ပျိုကိုယ်နု” ဝါဒကို လက်သပ်မွေးကာ သူတို့ကိုယ် သူတို့ ပျော်လည်း ပျော်၊ နုလည်း နုအောင် လုပ်နေကြသည်။ အသက် ၄၀ အရွယ်နီးလာပြီဖြစ်၍ မက်ဆေး ခြယ်နေကြဟန် တူသည်။
ဖိုးတေနှင့် အမာတို့မှာ ဤသို့ ပျော်ပျော်နေတတ်သလို နေကြသည့်အတွက် မမျှော်လင့်သော စကားများ ကြားရသည်။
“ဖိုးတေ နဲ့ အမာတော့ နှစ်ယောက်စလုံး အလုပ်လုပ်၊ ကလေးကလည်း တစ်ယောက်တည်း သိပ် ပိုက်ဆံတွေ စုမိမှာပဲ။ သူတို့ နေတာ ကြည့်ပါလား”
ဟူ၍ တမျိုး။
“သူတို့ လင်မယား ရာထူးတွေ ဘာတွေ ရအောင် ဘယ်ကြံမလဲ၊ အခု သူတို့နှစ်ယောက်စလုံး လုပ်စာနဲ့ သုံးမှမကုန်ဘဲ” ဟူ၍ တဖုံ။
“ခင်ဗျားတို့တော့ သိပ်ဟန်ကျနေတာပဲ”
စသဖြင့် သူတို့အား တိုက်ရိုက်လည်း ပြောကြသေးသည်။
ဤကဲ့သို့ အချောင် အထင်ကြီးခံနေရသည်ကို ဖိုးတေက ရယ်သည်။ အမာကား စိတ်တိုမိသည်။
“ရှင်ကတော့ ရယ်နေ၊ အဲဒါက အချောင် ဓားပြရိုက်ခံရမယ့်အပေါက်။ လူတွေ့တိုင်း ဒါမျိုးချည်း အမေးခံ နေရာတာ ရှင် သွားလေရာ သတိနဲ့သာ သွားပေတော့”
ဟု ဒေါနှင့် မောနှင့် အမာက ရယ်ဖွယ်နှောသည့်အခါ နှောလေသည်။
ဖိုးတေတို့ လင်မယားမှာ စေတနာ့ဝန်ထမ်း အလုပ်တွေနှင့် အားရသည် မရှိ။ တဖားဖားနေရသည်ကို အပျော်ကြီး ပျော်နေရသဖြင့် မကောင်းသော စိတ်များအတွက် သူတို့မှာ အချိန်မရှိ။ ဤသို့ နေရခြင်းသည်ပင် သူတို့အတွက် ကောင်းမှုကုသိုလ်တရပ် မဟုတ်ပါလော။
တနေ့လုံး ခြေကုန်လက်ပန်းကျ၍ လာရာမှ ဖိုးတေနှင့် အမာတို့သည် ရေမိုးချိုး အဝတ်အစားသန့်များ လဲခြင်းဖြင့် စိတ်ရာလူပါ လန်းဆန်းစေပြီးလျှင် သားကလေး အပါနှင့်အတူ တံခါးဝတွင်ထိုင်ကာ လမင်းကြီးကို ကြည့်ရင်း စကာပြောနေကြသည်။ အပါလေးမှာ စကားများရင်း ဖိုးတေ၏ ပေါင်ကို ခေါင်းအုံးကာ အိပ်ပျော်သွားပြီ။
တနေ့လုံး ဘယ်ရောက်၊ ဘာလုပ်၊ ဘယ်သူနှင့် တွေ့ စသည့် အာလာပသလ္လာပများမှာ စကား အမျှင်မပြတ်နိုင်ဘဲ ရှိစဉ် ကောင်းကင်ယံမှ ကြယ်ကလေးတခု ကြွေကျသည်ကို မြင်သော ဖိုးတေက
“အမာရေ … ဟောဟိုမှာ မြင်ရဲ့လား၊ လိုတဲ့ဆုကို တောင်းလိုက် မြန်မြန်တောင်းလိုက်” ဟု ပြောလျှင်
အမာသည် စဉ်းစားမနေဘဲ
“ကျွန်မ ယနေ့ ယခု စိတ်ချမ်းသာခြင်းကို တသက်လုံး စိတ်ချမ်းသာရာ ရပါစေသတည်း”
ဟု သူတို့လက်ရှိ “လူချမ်းသာ” ဘ၀၏ တည်မြဲမှုကိုသာ ပတ္ထနာပြုလိုက်လေသတည်း။
------------------
ခင်မျိုးချစ်
တိုင်းရင်းသူမဂ္ဂဇင်း၊ အတွဲ-၂၊ အမှတ်-၆၊
[ ရွှေဇင်ဦးဘလော့ဂ်မှ ကူးယူပါသည်။ဘလော့ဂ်အား ကျေးဇူးတင်ပါသည်။]
No comments:
Post a Comment