#ခံပွင့်
#ခင်နှင်းယု
“နန်းအလယ်၊
ပန်းစံပယ် မပေါ်ခိုက်ဟာမို့
အလိုက် တော်တန်သင့်အောင်လို့၊
ခံပွင့်ကိုကုံး။
နန်းရဝေ၊
မန်းမြေမှာ စံပယ်လှိုင်တော့
ခံပန်းခိုင် ယာယီ ရွေ့တယ်
တောလေ့ရွာသုံး။။”
* * *
ယုံရမှာ ခက်သော အကြောင်းတို့တွင် ဦးသာကျော် ကျွန်မကို ပြောသောပုံသည် သာ၍ ယုံကြည်ရန် ခဲယဉ်းလှပေသည်။ သူကတော့ သူပြောသော အကြောင်းအရာများသည် ပုံမဟုတ်ဟူ၍ ဆို၏။
“တကယ် ဖြစ်တာဗျာ၊ မခင်လေးဟာလဲ တကယ် ရှိနေပါတယ်၊ ကျုပ်တို့ ယာတောမှာကို ရှိနေပါတယ်” ဟူ၍ ဆို၏။ သူပြောသောပုံမှာ ရိုး၍ လှပသည်။ တပေါင်းလနှင့်လည်း လျော်ကန်သင့်မြတ် လှပေသည်။ သို့သော် ရွာ၏ အမည်ကိုမူ မဖော်ပေ။
နေခြည် ပျောက်ချိန်တွင် ယာတောပေါ်သို့ မြူမှုန်လေးများ သမ်းလာပုံကို ပြောပြေသောနေရာတွင် လွမ်းဆွတ်ဖွယ် ကောင်း၍ ပန်းချီဆန်လှ ပေသည်။
* * *
ကဗျာဆရာတို့က လရောင်ခြည်ကို ငွေရောင်ခြည်ဟု ဆိုသော်လည်း ယာတောသူတို့၏ မျက်လုံးတွင် ရွှေရောင်လို ဝါပြေပြေသာ မြင်တွေ့၍ နေရပေသည်။ အရှေ့မှ လထွက်လာလျှင် လအိမ်စောင့် နတ်သမီး၏ ဆံပင်များ ပြေ၍ လျောကျလာသလို လရောင်ခြည်သည် ညွတ်ပျော့၍ မြေသို့ ကျလာသည်။ လရောင်ခြည်နှင့် သိမ်းပြီးစ ယာခင်းပြင်တို့ တွေ့ထိသလို ဤလယ်ယာခင်းပြင်တို့တွင် ဦးသာကျော်တို့ ယာသမားတစ်စုနှင့် သခင်ကျော်ဇေယျတို့ တွေ့ကြသည်ဟု ဆို၏။
ရွာထဲမှာမူ အိမ်ရှေ့တိုင်းလိုလို ဘူးစင်ရှိ၏။ ဘူးစင်များ ကြားသို့ လရောင်သည် လူးလွန့်၍ ဝင်ရောက်လာတတ်၏။ ရွာပျိုချောတို့ကို လရောင်သည် တိုးဝင်၍ ရှာဖွေနေဟန် ရှိပေသည်။ ဤရွာရှိ အပျိုချောတို့ ဘူးစင်အောက်မှာညဥ့်တိုင်း ထိုင်နေတတ်သည် ဆို၏။ ရှေးတုန်းကမူ ဤဘူးစင်အောက်တွင် ဗိုင်းငင်ကြသည် ဆိုသော်လည်း ယခုတော့ ဤရွာတွင် ဗိုင်းငင်သည်ကို မတွေ့ရသည်မှာ ကြာလှပေပြီ။
ဤဘူးစင် အောက်တွင် သခင်ကျော်ဇေယျနှင့် မခင်လေးတို့ တွေ့ကြသည်ဟု ဆိုပြန်သည်။ သူသည် လရောင်ခြည်လိုပင် ဤယာတောသို့ တိုးဝှေ့ဝင်လာရင်း မခင်လေးကို တွေ့ရပေသည်။
ခင်လေး မိဘများသည် ယာခင်းရှင် ဖြစ်သော်လည်း ခင်လေးသည် ယာတောတွင် ကြာကြာ မနေတတ်ပေ။ မြို့မှာ ကျောင်းနေသည်က များ၏။ သို့သော် အိမ်ကို ပြန်ရောက်တိုင်း အမေက ယာတောသူလို နေရမည်ဟု ပြော၏။
နှင်းမှုန်သိပ်သော နံနက်တွင် အစောကြီးထ၍ ဆွမ်းချက်ရ၏။ ယာခင်းသို့ အလုပ်ဆင်းမည့် သူတို့အတွက် အမေနှင့် ထမင်းအတူ ချက်ပေးရသည်။
ညဥ့်တွင်လည်း လရောင်အောက်တွင် မြေပဲသီးများကို အခွံချွတ်၍ ပေးရ၏။ မြေပဲခွံ ချွတ်နေစဉ်တွင် အမေသည် သူ့ယာတော အကြောင်းကို ခဏ ခဏ ပြောပြ၏။
“ဘယ်ကိုပဲ ရောက်နေနေ အမေတို့ဆီတော့ ပြန်လာပါ သမီးရယ်”
အမေသည် စကားပြောတိုင်း မယုံမရဲ ရှိတတ်သည်။ အမှန်လည်း သူသည် ခင်လေးကို မယုံ။ ခင်လေးသည် တစ်နေ့သောအခါ ဤယာတောကို စွန့်ပစ်၍ မြို့သို့ ဝင်သွားမည်ဟု အမေက ထင်၏။
ထင်လည်း ထင်စရာပေပဲ။ လူတိုင်းလိုလိုက ခင်လေးသည် လှပသည်ဟု ဆို၏။ ဤအလှသည် ယာတောနှင့် မတန်ဟုလည်း ဆိုကြသည်။ အမေကတော့ ထိုစကားများကို ကြားတိုင်း ခေါင်းတွင်တွင် ခါ၏။
“ခက်ပဲ ခက်ရချည့်ရဲ့။ ယာတောက ထွက်တဲ့ အလှဟာ ယာတောနဲ့ ဘာလို့ မတန်ရမှာလဲ။ မိန်းကလေး မကြားပါစေနဲ့။ မိန်းကလေး ကိုယ်ဟာ ယာတောအနံ့ နံနေတယ်” ဟု အမေက ပြောတတ်သည်။
ခင်လေးက ဆရာမ ဖြစ်ချင်သည် ဆို၍သာ အမေက ကျောင်းထားပေးရသည်။ မြန်မာလို အလယ်တန်းပြ ဆရာဖြစ် ဖြေနေဆဲတွင် ခင်လေးသည် သခင်ကျော်ဇေယျနှင့် သိလာသည်။ သခင်ကျော်ဇေယျသည် သူတို့ရွာသို့ လာနေကျ ဖြစ်သည်မှာ ကြာပေပြီ။ ခင်လေးနှင့်တော့ ယခုမှပင် တွေ့ဆုံကြပေသည်။
ခင်လေးတို့ရွာမှ ယာသမားများကို သခင်ကျော်ဇေယျက လာ၍ စည်းရုံးရသည်ဟု ဆိုသည်။ ယာသမားတိုင်း လိုလိုက သခင်ကျော်ဇေယျကို သိသည်။
ထိုစဉ်က သခင်ကျော်ဇေယျသည် မြေပဲကြော်နှင့် ရေနွေးကြမ်းကိုသာ နှစ်သက်ခဲ့ပေသည်။ ယာခင်းပြင်ကို ကျော်ဖြတ်လာသော ယာတော၏ လေအေးကို နှစ်နှစ်ခြိုက်ခြိုက် ရှူရှိုက်ခဲ့ရ၏။ ချိုအေးသော တောပန်းရနံ့ ရိုးရိုးကိုသာ သူနှစ်သက်ပါသည်ဟု ဆိုသည်။
အမှန်မှာမူ ဘူးစင်အောက်သည် ယာတောကို စာဖွဲ့ရာနေရာ ဖြစ်ပေသည်။ ဤဘူးစင်အောက်တွင် သခင်ကျော်ဇေယျနှင့် ခင်လေး တွေ့ဆုံခြင်းကို အမေကတော့ မနှစ်သက်ပေ။
သို့သော် ဦးသာကျော် ကိုယ်တိုင်က “ကောင်းသောတွေ့ခြင်း” ဟု ဆိုသည့်အတွက် အမေက မငြင်းဆန်ပေ။ ပင်နီဖျင်ကြမ်း အင်္ကျီနှင့် ပခုက္ကူ လုံချည်တို့မှာ သခင်ကျော်ဇေယျသည် ဤယာတောတို့နှင့် မကင်းကွာလှကြောင်းကို ပြနေ၍ အမေက ကျေနပ်ရပေသည်။ သို့သော် အမေက စိတ်ထဲမှာ ထင့်နေ၏။
“ဘာကိုများ အမေစိတ်ထင့်ရပါလိမ့်”
အမေတို့ ရွာမှ ထွက်သော် လမ်းဘေး တစ်လျှောက်တွင် နှင်းဆီရိုင်းပင်များ အလေ့ကျပေါက်၍ နေသည်။ ဤလမ်းလေးမှပင် သခင်ကျော်ဇေယျသည် ခင်လေးကို လှည်းနှင့် ခေါ်ဆောင်၍ လာသည်။ နံနက်အစောကြီး ထလာရ၍ နှင်းများမှာ လမ်းကို မမြင်နိုင်လောက်အောင် ပိတ်ဆို့၍ နေသည်။ အညာဆောင်း၏ နံနက်ခင်းလေသည် အေးစက်၍ သွက်လက်လှသည်။ ခင်လေးက သခင်ကျော်ဇေယျ ဘေးတွင် ကပ်၍ ကွေးကွေးလေး ထိုင်ကာ လိုက်ပါလာသည်။ တောပန်းရနံ့ ချိုချိုလေးများသည် ခင်လေးကို နှုတ်ဆက်ကြ၏။ သူသည် အမေ့အိမ်ကလေးကို မြင်ရနိုးနှင့် လည်ဆန့်၍ ကြည့်သည်။ သို့သော် နှင်းများ ပိတ်နေ၍ အမေ့အိမ်ကို မမြင်ရသည့် အခါဝယ် သခင်ကျော်ဇေယျ ဘေးတွင် ပု၍ ငြိမ်နေလိုက်သည်။ မျက်လုံးထဲတွင်မူ မျက်ရည်များက ဝိုင်း၍ နေပေသေးသည်။
အမေကတော့ ဘုရားပင် ဖြောင့်အောင် ရှိမခိုးနိုင်ပေ။ လှည်းသံ ပျောက်သည်အထိ နှင်းထုထဲသို့ မျှော်ကြည့်၏။
“အမေတော့ ရွာအပြင် ထွက်တဲ့လမ်းကို ဘယ်တော့မှ မရောက်ဖူးဘူး” ဟု အမေသည် မိန်းမဖော်လေးကို ပြောပြနေသည်။ ယခုမူ ဤလမ်းဘေးမှ သမီး ထွက်သွား၍ အမေသည် ထိုတောလမ်း ရှိရာသို့ ခြေဦးမျှပင် မလှည့်တော့ပေ။
ဦးသာကျော်သည် သူ့ပုံပြင်ကို ခင်လေးလိုက်သည့် အခန်းတွင် ခဏ ရပ်၍ ထားသည်။ သူ့မျက်လုံးထဲတွင် နှင်းမှုန်များ ဖုံးအုပ်နေသော ယာတော၏ နံနက်ခင်းကိုပင် မြင်၍ နေလေသလား။ ဘာအကြောင်းကြောင့် ရပ်နေသည်ကိုတော့ ဖွင့်ဟ မပြောပေ။ နောက်တစ်ခန်းဆက်တွင်မူ တပေါင်း၏ ပန်းချီနှင့် ထိုပန်းချီကားအောက်တွင် လှုပ်ရှားမှုများ အကြောင်းကို ဆက်၍ ပြောပြန်သည်။
တပေါင်းသည် ဟောင်း၍ သစ်သောလ ဖြစ်၏ဟု သူ ရိုးရိုးပင် ဆိုပါသည်။ အိုမင်းရင့်ရော်သော ရွက်ဟောင်းတို့သည် မကြာခင်ကပင် မြေသို့ လျောကျ သက်ဆင်း၍ လာကြသည်။ ရွက်အိုတို့သည် တစ်ခါကမူ အကိုင်းများထက်တွင် သူတို့၏ လှပတင့်တယ် ပျိုမျစ်ခြင်းများကို လောကသားတို့အား ပြခဲ့လေသည်။ ကောင်းကင်လေသည် သာလျှင် သူတို့၏ ရှူရှိုက်ရာ ဖြစ်ခဲ့ပေသည်။
“ယခုတော့လဲ အိုမင်းရင့်ရော်လာပြီ ဆိုတော့ ဆိုးလိုက်သည့် ကံကြမ္မာပေပဲ။ မြေတွင် ခဏရပ်နား၍ အဘိုးအိုသည် တရားရိပ်တွင် ခိုအောင်းသလို ခဏတာတော့ မသေခင် နားလိုက်ချင်ပါရဲ့”။ သို့သော် ပူပြင်း၍ သွက်လက်သော လေက ရွက်အိုရွက်ဟောင်းများကို မောင်း၍ ထုတ်၏။ ပင်အောက်တွင် အနားမရဘဲ လေမောင်းနှင်ရာသို့ ပြေးကြရပြန်သည်။
ရွက်ဟောင်းများသည် မြေတွင် ပြန့်ကျဲ၍ ဖရိုဖရဲ ပြေးလွှားကြရင်း သစ်ပင်များထက်သို့ မော်၍ ကြည့်၏။ အကိုင်းများ ပေါ်တွင် သစ်လွင်သော ရွက်နုများသည် ဝတ်လွှာ အစိမ်းနုများကို လွှမ်းခြုံ၍ နေရောင်ခြည်တွင် လှပလေစွ။ တောတန်းဆီမှ တပေါင်းလေရူးသည် တောပန်းတို့၏ ရနံ့တို့ကို စုပေါင်း သယ်ယူလာ၏။ ရွက်ဟောင်းကြီးများသည် ငယ်စဉ်က သူတို့ဘဝကို ပြန်လည် အောက်မေ့မိသည်။ လူသားသာ ဆိုလျှင်လည်း မျက်ရည် တောက်တောက်ယို လိုက်ပါ၏။ သူတို့ လောကကို ထွက်ပြူစတုန်းကလည်း သည်လိုပင် တပေါင်းလ မဟုတ်ပါလော။ ပျိုမျစ်သစ်လွင်သော အရွယ်တွင် နေရောင်ခြည်ကို လှုံ၍ တောပန်းရနံ့တို့ ပြွမ်းသော ကောင်းကင်လေကို ရှူရှိုက်ရသည်မှာ ဘဝနိဗ္ဗာန် ပေတည်း။ ယခုတော့ လေတိုက်လိုက်တိုင်း ပြေးရလွှားရသည်မှာ မောလှပါတကား။
ဤသို့ အဟောင်းများ ကြွေလျော၍ အသစ်တို့ ပြန်လည် မွေးဖွားလာချိန်ဝယ် ဦးသာကျော်တို့ ရွာတွင် တော်လှန်ရေးသည်လည်း ပေါက်ဖွားလာခဲ့သည်ဟု ဆို၏။ တောတန်းနှင့် မဝေးသော ဤရွာပြင်လမ်း အနီးတွင် ဂျပန်ကို တိုက်ရင်း ကျဆုံးသွားသော ရဲဘော် ရွာသားများ၏ သွေးကွက်များလည်း ရှိသည်ဟူ၍ ဦးသာကျော်က ဆိုပြန်သည်။
“သခင့်မိန်းမ ဘဝတုန်းက သူ့ယောက်ျား နိုင်ငံရေးကို လွတ်လွတ်ကျွတ်ကျွတ် လုပ်နိုင်ဖို့အတွက် ခင်လေးဟာ ကျောင်းဆရာမလေး လုပ်ရတယ်။ အမေရွာကိုတောင် ပြန်မလာနိုင်ဘူး။ ခုတော့ တော်လှန်ရေးအတွက် သူ့ယောက်ျားကို ကူညီဖို့ ရွာကို ခင်လေး ပြန်လာခဲ့ပါတယ်”
ဤနေရာတွင်လည်း ဦးသာကျော်သည် သူ၏ ပုံပြင်ကို ခပ်ဆန်းဆန်း ပြော၍ ပြပြန်သည်။
ရွာအပြန်လမ်း ဘေးရှိ လက်ပံပင်ကြီး အောက်မှာ ထမင်းတောင်းကို ရွက်ကာ ခင်လေးသည် သခင်ကျော်ဇေယျနှင့် သူတို့ရှိရာ တောအုပ်ငယ် အတွင်းသို့ လာရသည်ဟု ဆို၏။
“တစ်ခါ တစ်ခါတော့လည်း တခြားရွာသားတွေကို ပို့ခိုင်းတယ်”
လက်ပံပင်ကြီး အောက်တွင် ခင်လေး ခြေရာများသည် ချောင်းဖြစ်လုအောင် ခေါက်တုံ့လူးလာ ခဲ့ပေသည်။။ ရွက်ဝါကြွေများသည်လည်း နေရောင်ကြောင့် သွေ့ခြောက်ရသည့် အထဲတွင် ခင်လေး၏ ခြေထောက်အောက်တွင် ကြေမွပျက်စီးလာရ ပြန်သည်။
“သခင်ကျော်ဇေယျကို ခင်လေး ဘယ်လို ကူညီခဲ့တယ် ဆိုတာ အမှန်အတိုင်း သိချင်ရင် အဲဒီ လက်ပံပင်ကြီးနဲ့ မြေကြီးကို မေးကြည့်ပါလား”
အလို ကျွန်မသည် ဦးသာကျော် စကားကို အံ့ဩရ ပြန်သည်။
“လက်ပံပင်ကြီးနှင့် မြေကြီးကို”
“ဟုတ်ပါတယ်။ လူဆိုတာတွေက အမှန်ကို ပြောခဲပါတယ်။ မြေကြီးကတော့ မလိမ်ပါဘူး။ သင်္ခါရတွေနဲ့ ဖောက်ပြန်ပြောင်းလဲ နေတဲ့ အကြောင်းတွေကို အစဉ် စောင့်ကြည့်နေတာ မဟုတ်လား”
ကျွန်မသည် ဦးသာကျော်၏ မျက်လုံးများကို စိုက်၍ ကြည့်မိပြန်သည်။ သူ့မျက်လုံးများသည် ကောင်းမွန်စွာ တောက်ပနေ၍ သူ့စကားကို သံသယကင်းရှင်းစွာ ဆက်၍ နားထောင်နေလိုက်သည်။
လူသားများ၏ ဖောက်ပြန် ပြောင်းလဲမှုကို လည်းကောင်း၊ အဖြစ်မှန် စိတ်ရင်းကို လည်းကောင်း မြေကြီးသာလျှင် အသိဆုံး ဆို၏။ ရွက်ဟောင်းများကို တပေါင်း၏ လေပူသည် မောင်းနှင်ရှင်းလင်း ပစ်သလို တော်လှန်ရေးသည် ဖက်ဆစ်၏ ဟောင်းနွမ်း ဆိုးယုတ်မှုများကို အပြင်းအထန် တိုက်ထုတ်၍ ပစ်လေသည်။
ထိုသောအခါ ဖက်ဆစ်သွေးသည်လည်း မြေသို့ကျ၏။ တော်လှန်ရေး၏ သားများ သွေးသည်လည်း မြေသို့ ကျ၏။ သို့သော် ဘယ်သွေးစက်များသည် ဖက်ဆစ်၏ သွေး၊ ဘယ်သွေးကွက်များသည် တော်လှန်သူတို့၏ သွေးဟူ၍ မြေကြီးသည်သာလျှင် ပို၍ သိပါ၏ဟု ဆိုလေသည်။
တော်လှန်သူတို့သည် ပြေးကာလွှားကာ တိုက်ခိုက်ရင်း သူတို့ခြေရာများ သည်လည်း မြေပေါ်တွင် နစ်၍ နစ်၍ ကျန်ရစ်၏။ တစ်ခါတစ်ရံ ပမာဒလေခ ချွတ်ယွင်း၍ မှတ်တမ်းတင်သူတို့က တော်လှန်သူအစစ် အချို့တို့အား မှတ်တမ်းတွင် မတင်ရစ်မိသော်လည်း မြေကြီးကမူ ဘယ်သူသည် တော်လှန်သူအစစ် ဆိုသည်ကို သိသည်ဟု ဆိုပါသည်။
တော်လှန်ရေးပြီး၍ အေးချမ်းသော အချိန်တွင် တော်လှန်ရေးတွင် ပါဝင်သူတို့အား အခွင့်အရေး ပေးခဲ့၏။ ဤအချိန်တွင်လည်း ရောင်တော်ပြန်တို့က “သူတို့သည် ဖက်ဆစ်ကို တော်လှန်ခဲ့ပါသည်” ဟု လက်သီးလက်မောင်း တန်းကာ အခွင့်အရေး ဆိုကြလေသည်။ ထိုသောအခါ မြေကြီးသည် ဟက်ဟက်ပက်ပက် ရယ်၏။ မြေသားသည် ပုထုဇဉ်မျှသာတည်း။
* * *
မိုးရာသီ စ၍ လာလျှင် လေသည် လေပူ လေရမ်းများ မဟုတ်တော့ပေ။ တောင်ဘက်မှသာ တစ်သမတ်တည်း တိုက်ခတ်၍ လာလေသည်။
အက်ကွဲ၍ မာကျောသော မြေတို့သည်လည်း စိုထိုင်း၍ ညိုလာ၏။ ရေတွင်လည်း မိုးသက်နှင့် ရေငွေ့တို့ ပါ၍ လာလေသည်။
ပန်းပွင့်တို့သည်လည်း အိပ်ရာမှ နိုးကြကုန်၏။ သစ်ပင် အားလုံးသည် မိုးစက်အောက်တွင် စိမ်းလန်းလာကြ လေသည်။ တပေါင်း၏ ပူပြင်းခြင်းနှင့် ပြင်းထန်စွာ ပြောင်းလဲခြင်း၏ နောက်ပိုင်းတွင် မိုးဦးကဲ့သို့ သိပ်သည်း၍ အေးချမ်းသော ဥတု လာရသည်မှာ ဓမ္မတာပေတည်း။
ဤသို့ မိုး၏အစတွင် ခင်လေးသည် ဒုတိယအကြိမ် သခင်ကျော်ဇေယျ ထံသို့ လိုက်ဖို့ ပြင်ရပြန်သည်။
ယခုတစ်ခါ သွားရသည်မှာ ရန်ကုန်သို့ ရောက်မည်ဖြစ်၍ အမေ့ကို ခေါ်သော်လည်း အမေက မလိုက်ပေ။
မိုးဦးကျစ ဖြစ်၍ ရွာလမ်းသည် ဖုန်မထူတော့ပေ။ လှည်းဘီးများသည် မြေအိအိပေါ်တွင် နစ်၍ နစ်၍ သွား၏။ အမေသည် အိမ်ဝမှပင် မျက်စိတစ်ဆုံး မျှော်၍ ကြည့်၏။ လှည်းလမ်းကြောင်း နှစ်ခုသည် အမေ့ရှေ့မှ ရှည်၍ ရှည်၍ ထွက်သွားကြသည်။
ဦးသာကျော်တို့ လူစုကတော့ သခင်ကျော်ဇေယျတို့အား ရွာသားတို့ ကျဆုံးသော တောတန်းလေးနား အထိ လိုက်၍ ပို့၏။
ပထမတစ်ခါ ထွက်ခွါစက နှင်းဖုံးနေ၍ ရွာကို မမြင်ရပေ။ ယခုတစ်ခါမူ မျက်ရည်ဖုံးနေ၍ ခင်လေးသည် ရွာကို မျှော်ကြည့်သော်လည်း မမြင်ရပေ။ တောတန်းမှာတော့ မိုးရေကြောင့် သစ်ရွက်များ စိမ်းလန်းလာကြ၏။
ချိုသော ပိတောက်၏ ရနံ့တို့သည်လည်း တောတန်း တစ်လျှောက်တွင် လှိုင်နေပေသည်။ အားလုံးသော သဘာဝသည် မိုးတစ်ဖြိုက် ရွာအပြီးတွင် ပြန်လည် သစ်ဆန်း လာသလို ရွှင်လန်း၍ နေပေသည်။
“အားလုံးကတော့ သစ်နေသလိုပါပဲ၊ ဒါပေမယ့် လေက စိုထိုင်းထိုင်းကြီး အစ်ကိုရယ်” ဟု ခင်လေးက ပြောလိုက်သည်။
“အေးပေါ့၊ ဘယ် အားလုံးတော့ ပြောင်းလဲမလဲကွယ်။ တစ်ခုခုတော့ စိုထိုင်းထိုင်း ဖြစ်နေဦးမှာပေါ့”
အားလုံးသော သစ်ပင်လေးများက ထိုးထိုးထောင်ထောင် လှုပ်လှုပ်ရှားရှားနှင့် သူ့ကို နှုတ်ဆက်၏။ မိကျောင်းနွယ်ပန်းများ ကလည်း ဖွေး၍ နေပေသည်။ သူသည် လက်ကို ဝှေ့ယမ်းကာ ပန်းကလေးများကို နှုတ်ဆက်လိုက်လေသည်။ ယခုလို အသိုင်းအဝိုင်းများမှ ခွဲထွက် သွားရတော့လည်း ဝမ်းနည်းသလိုလို ဖြစ်လိုက်မိသည်။ မြင့်သော လက်ပံပင်ကြီးကို ဖြတ်ကျော် အသွားတွင်မူ သူသည် မော့၍ မကြည့်တော့ပေ။
* * *
ခင်လေး ထွက်ခွာသွားပြီးမှ သူ့ကိုယ်စား အမေ့ထံသို့ စာများ လာခဲ့လေသည်။ ဦးသာကျော်က ခင်လေးထံမှ စာလာတိုင်း အမေ့ကို ဖတ်ပြရ၏။ စာများ လာသည်မှာ တစ်စောင်နှင့် တစ်စောင် ဝေးကွာလွန်း၍ အမေသည် သူ့ကိုများ သမီးလေးက မေ့သွားပြီလားဟု ထင်သည်။
စာတစ်စောင်တွင်မူ သူ့ဘဝကို ခင်လေးက ဖော်ပြလိုက်၏။
"အမေရယ် ...
ဟိုတုန်းကတော့လဲ သူ နိုင်ငံရေး လွတ်လွတ်ကျွတ်ကျွတ် လုပ်နိုင်အောင်လို့ ဆရာမ လုပ်နေရတာနဲ့ မအားရဘူး။ အခုတော့ အမေ့သမီးဟာ သခင့်မိန်းမ မဟုတ်တော့ဘူး။ အစ်ကိုတစ်ယောက် ပါလီမန်အတွင်းဝန် ဖြစ်သွားပြီ။ ဒါပေမယ့်လည်း မီးဖိုချောင်ထဲက မထွက်ရလို့ အမေ့ဆီ စာမရေးနိုင်ဘူး အမေရယ်။
ဒီစာ ရေးနေတုန်းလေ အစ်ကို တင်းနစ်ရိုက်က ပြန်လာလို့ သမီး လိမ္မော်ရည် ဖျော်ပေးရဦးမယ်။ အစ်ကိုလေ အခု ကျန်းမာရေးအတွက် နေ့တိုင်း နေ့တိုင်း တင်းနစ်ရိုက်တယ်။
ပြောင်းလဲတာတွေကို အမေ့ကို ပြောရဦးမယ်။ အခု အစ်ကို တင်းနစ်သွားရိုက်တဲ့ အိမ်ဟာလေ ပဂ္ဂီတို့အိမ် အမေရဲ့။ အစ်ကိုက ပြောတယ်။ ပဂ္ဂီတို့ဟာ အစ်ကိုနဲ့ တစ်မြို့ထဲ သူငယ်ချင်းတဲ့။ ဒါပေမယ့် အစ်ကို သခင်ကျော်ဇေယျ ဘဝတုန်းက ဆိုရင် လှည့်လို့တောင် မကြည့်ဘူးတဲ့။ အစ်ကိုတို့ဟာ လူရှုပ်တွေ၊ သခင်ဆင်းရဲတွေ ဆိုပြီး အစ်ကိုတို့ကို အဖက်မလုပ်ဘူးတဲ့။ အခုတော့ အစ်ကိုတို့ကို သူတို့အားလုံး ခင်မင်ကြပါတယ်လေ။ ဒါကြောင့် သမီးလည်း ဝမ်းသာပါတယ် အမေရယ်"
ဦးသာကျော်သည် စာကို ခဏရပ်နား၍ အမေ့ကို လှည့်ကြည့် လိုက်၏။ အမေ့မျက်လုံးတွင် တစ်စုံတစ်ခု နားမလည်သလိုဟန် ပေါက်နေသည်။
ဦးသာကျော် စာဖတ်စဉ် အမေက “တင်းနစ်” နှင့် “ပဂ္ဂီ” ဆိုသည်မှာ ဘယ်လို အဓိပ္ပါယ် ရှိသည့်အကြောင်းကို ဦးသာကျော်ကို မေး၍ ကြည့်ရ၏။ စာကို ဆက်ဖတ်ပြန်သည်။
“နေ့လယ်ဆိုလည်း အမေရယ် ပေါင်မုန့် ထောပတ်သုတ်နဲ့ ကာဖီကို အစ်ကို့ဆီ ပို့ရတော့ နေ့ခင်းမှာလည်း မအားနိုင်ဘူး၊ အမေ့ဆီကို လာလည်း လာချင်တယ်။ ငွေလည်း ပို့ချင်တယ်။ ဒါပေမယ့် သခင်က ဖြစ်လာတဲ့ အတွင်းဝန်ဆိုတော့ ကျွေးရ၊ မွေးရတာနဲ့ မနားရဘူး အမေ။ ငွေကလည်း ပိုလှတယ် မရှိဘူး”
အမေက စာဖတ်ရင်း ပြုံး၏။ သမီးသည် သူ့ကို ဒါလောက် သတိရလျှင်ပဲ ကျေနပ်ပါပြီ။
ဦးသာကျော်ကတော့ သခင်ကျော်ဇေယျ သူတို့ဆီ တစ်ခေါက်တစ်လေ လာစေချင်သည့် အကြောင်း ပြော၍နေသည်။ သခင်ကျော်ဇေယျ မလာသည်မှာ သွားကတည်းက ယခုအထိဆိုလျှင် (၄) နှစ်တိတိ ရှိသွားပေပြီ။ နောက်လများတွင် ခင်လေးထံမှ စာများ ခဏ ခဏ ရောက်သည်။
“အမေရယ် ခုတစ်လောတော့ အလုပ်အားတာနဲ့ စာ ခဏ ခဏ ရေးနိုင်တယ်။ အစ်ကိုက အိမ်မှာ သိပ်မရှိတော့ အလုပ်အားတာပေါ့ အမေရဲ့။ ည ဆယ်နာရီ ဆယ့်တစ်နာရီ လောက်မှပဲ အိမ်ကို ပြန်လာတယ်”
အမေသည် ယခုတလော သမီးထံမှ စာ ခဏ ခဏ လာ၍ ပျော်၏။ သမီးလေးများ ကိုယ်တိုင်လာလျှင် ဘယ်လောက်များ ပျော်လိုက်မည်နည်း။ နောက်တစ်ခါ ရောက်လာသော စာကို အမေက ဘယ်လို အဓိပ္ပါယ် ကောက်ရမှန်း မသိပေ။ ဦးသာကျော်ကတော့ အသံတုန်နေသည်။ ခင်လေးက စာရေးတိုင်း အစချီပုံကိုက “အမေရယ်” ဟူ၍ တိုင်တည်သံလိုလို ၊ အားကိုးသံလိုလို စ၍ စ၍ ရေးတတ်သည်။ ယခုစာကလည်း အမေ့ကို တိုင်တည်သံပေလား။
"အမေရယ်
သမီး ရိုသေစွာ စာရေးလိုက်ပါတယ်။ တပေါင်းလဆန်းရင် အမေ့ဆီကို သမီး ပြန်လာခဲ့ပါမယ်။ အမေနဲ့ ဦးသာကျော် ရွာပြင်လမ်းကို လာပြီး ကြိုနေပါ"
“ဟယ် အမလေး သမီးလေး ပြန်လာမယ်”
အမေက ထိုစာပိုဒ်ကို ကြားရချိန်တွင် ပျော်လွန်း၍ အသားများ ဆတ်ဆတ်တုန် နေသည်။
"သမီးလေ ဒီတစ်ခါ အမေနဲ့အတူ နေသွားတော့မယ်။ အမေ့ကိုရော ယာတောကိုရော သမီး ဘယ်တော့မှ မခွဲဘူး၊ သမီးပြန်လာမယ့် အကြောင်းကို ဘယ်သူ့ကိုမှ မပြောနဲ့နော်"
ဦးသာကျော်ကမူ စာကို ခဏ ရပ်ထား၏။ ဤစာ၏ အဓိပ္ပါယ်မှာ ဘယ်လိုများပါလိမ့်။
“အမေရယ် ဝမ်းမနည်းနဲ့နော်။ အပြောင်းအလဲဆိုတာ လောကရဲ့ ဓမ္မတာဆိုတာ အမေ သိပြီးသားပါပဲ၊ ပြောင်းလဲတတ်တဲ့ သဘောကို ထာဝရတရားအဖြစ် ယူဆထားတဲ့ သမီးစိတ်ကသာ မှားတာပါ အမေ”
ဤနေရာတွင် အမေက ဦးသာကျော်လက်ကို ခဏ ဖမ်းကိုင်၍ ထားလိုက်ကာ “သူ ဘာကို ရေးနေတာလဲကွ” ဟု မေးပြန်သည်။ ဦးသာကျော်သည် ခေါင်းကို ဖြည်းဖြည်း ခါလိုက်ကာ ဆက်၍ ဖတ်ပြန်သည်။
“အစ်ကိုလေ သိလား၊ အစ်ကိုရယ် ပဂ္ဂီနဲ့ မနက်ဖြန် လက်ထပ်ကြတော့မယ်။ သမီး ဒီမှာ ဘယ်လိုနေလို့ ဖြစ်မလဲ။ သမီးမှာ အပြစ်တွေ အများကြီးရှိတယ်လို့ အစ်ကိုက ပြောတယ်။ ဘယ်လို အပြစ်တွေ ရှိသလဲလို့ သမီး သိချင်လိုက်တာ။ အစ်ကို့ကို မမေးရဲလို့ မမေးတော့ဘူး အမေ။ ကိုယ့်အပြစ်ကိုယ် မသိတာကိုက သမီးရဲ့ အပြစ်ပဲ ထင်ပါရဲ့။ အဲဒီ ပဂ္ဂီ ဆိုတာလေ အမေ မှတ်မိမှာပေါ့။ တစ်ခါက အစ်ကိုပြောတဲ့ 'တို့များ သခင်ဘဝတုန်းက ဆိုရင် တို့ကို လှည့်မကြည့်ဘူး။ သခင်စုတ်၊ သခင်ဆင်းရဲတွေ ဆိုပြီး နှာခေါင်းရှုံ့တယ်' ဆိုတဲ့ မိန်းမပေါ့ အမေ။
သမီးပြန်လာခဲ့မယ်။ ဆက်ဆက်ကြိုပါ။
ကျန်းမာချမ်းသာပါစေ။
သမီးခင်လေး”
ဦးသာကျော်က စာရွက်ကိုကိုင်ကာ ငိုင်နေသည်။ အမေကတော့ ပြုံး၍နေသည်။
“သမီး ပြန်လာတာဟာ မှန်တာပေါ့ မောင်သာကျော်” ဟု ဆို၏။
“မဟုတ်ပါဘူး အမေရယ်။ တစ်ခုခုတော့ တစ်ခုခုပဲ၊ သူတို့ အဟောင်းကို အားလုံးများ စွန့်ပစ်ကြပြီလား။ တကယ်ဆို ခင်လေးဟာ သခင်ဘဝတုန်းက ဒုက္ခအတူခံပြီး လုပ်ကျွေးခဲ့တာတွေ၊ တော်လှန်ရေးတုန်းက ကူညီခဲ့တာတွေကိုတော့ ထောက်ဖို့ ကောင်းပါသေးတယ်။ သူတို့ဟာ လုပ်ဖော်လုပ်ဖက်တွေကို မေ့ရက်လိုက်တာ”
“အို ... ဒါတွေ ဘာမှ မပြောပါနဲ့ကွယ်။ သမီးလေးမှာ အပြစ်ရှိတယ်တဲ့။ ဒီအပြစ်ကို ကျေးဇူးတင်လိုက်တာ။ သမီးလေး ပြန်လာတော့မယ်၊ ယောက်ျားဆိုတာက သူတို့ မြတ်နိုးလာရင် အပြစ်တောင်လို ပုံနေပေမယ့် မမြင်ဘူးကွဲ့။ မုန်းလာပြီဆိုရင် မြူမှုန်လောက်ကို မြင်းမိုရ်တောင်လို အကျယ်ချဲ့တာပဲ။ ဘုရားမလို့ သမီးလေး ချောချောမောမော ပြန်ရောက်ပါစေ”
အမေသည် လက်နှစ်ဖက် ယှက်ကာ ဘုရားကိုလည်း တ၏။ ပါးစပ်မှလည်း ပြုံးသည်။ မျက်ရည်များလည်း လည်၍ နေသည်။
* * *
ခင်လေး ပြန်ရောက်မည့် ညနေစောင်းတွင် အမေနှင့် ဦးသာကျော်လည်း ရွာပြင်လမ်းတွင် စောင့်၍ နေသည်။ ဘယ်တုန်းကမျှ ရွာပြင်လမ်းသို့ မထွက်သော အမေသည် ယခုတစ်ခါ ပထမဆုံး ရောက်လာခြင်း ဖြစ်သည်။
တောတန်း တစ်ထောင့်မှ လှည်းရိပ်မည်းမည်း ထွက်လာလျှင် အမေ့ ရင်များသည် တဆတ်ဆတ်ခုန်၍ လာသည်။ ဤလမ်းမှပင် သမီးလေး ထွက်သွား၍ ဤလမ်းမှပင် ပြန်လာခဲ့သည်။ နေရောင်သည် အပူရှိန်လျော့၍ ရွှေရောင် ဖျော့ဖျော့လေးသာ တောတန်း သစ်ပင်ထိပ်များပေါ်တွင် တင်နေရစ်သည်။ ချုံတန်းများ၏ အောက်ခြေတွင်တော့ မြူများ ဆိုင်းစပြုလာသည်။
“ဒီနေရာမှာပေါ့ အမေ။ ရွာသား သုံးယောက် ကျတာ” ဟု ဦးသာကျော်က ပြော၏။ သူညွှန်ပြသော လက်ပံပင်ကြီး အောက်တွင်တော့ သွေးစက်များ မရှိတော့ပေ။ လှည်းသည် သူတို့အနား ရောက်လာ၍ လက်ပံပင် အောက်တွင် ရပ်လိုက်၏။
ခင်လေးသည် လှည်းနောက်မြီးမှ ခုန်ဆင်း၍ အမေ့ဆီကို ဖြည်းဖြည်း လျှောက်လာသည်။ အမေ့လက်များကို သူက တင်းတင်းကျပ်ကျပ် ဆုပ်ထားသည်။ အမေသည် စကားတစ်လုံးမျှ မပြောနိုင်ပေ။
“သမီး ပြန်လာပြီ အမေ”
တစ်ခါမျှ မတွေ့ဖူးသည့် လူတစ်ယောက်ကို ကြည့်သလို အမေသည် ခင်လေး၏ ပခုံးကိုကိုင်၍ မျက်နှာကို စေ့စေ့ကြည့်၏။
“နောက်တစ်ခါ ပြန်မသွားနဲ့နော် သမီး”
ခင်လေးသည် ခေါင်းကို ဖြည်းဖြည်း ညိတ်လိုက်၏။ သူ့မျက်လုံးမှ မျက်ရည်များသည် မြေပေါ်သို့ ခုန်၍ ကျသွားသည်။ ဤမြေကွက်မှာ ရွာသွားတို့ ကျဆုံးစဉ်က သွေးစွန်းခဲ့သော နေရာ ဖြစ်သည်။
ရွာသို့ အဝင်လမ်းအတိုင်း လမ်းလျှောက်၍ လာကြသည်။
ဤမျက်ရည်စက်များ ကျသောနေရာတွင် ယခုအခါ ခံပန်းပင်ချုံတို့သည် အစုလိုက် ပေါက်နေသည်ဟု ဆို၏။
သို့သော် ထိုခံပွင့်များသည် ခင်လေး၏ အသည်းနှလုံးကိုပင် ကိုယ်စား ပြုလေသလော၊ ကျဆုံးသွားရရှာသော ရဲဘော်တို့၏ သွေးစက်ကိုပင် ကိုယ်စားပြုလေသလော ဆိုသည်ကို ဦးသာကျော်က ဖွင့်ဟ၍ ပြောမသွားပေ။
(ဤဝတ္ထုတွင် ပါရှိသော သခင်ကျော်ဇေယျမှာ သခင်ကျော်ဇေယျနှင့် လုံးဝ မပတ်သက်ပါ။)
-----------------
ခင်နှင်းယု
မြဝတီ၊ မတ်လ၊ ၁၉၅၅။
Credit to Myat Htoo Aung
[ မြန်မာဝတ္ထုတိုများ ပေ့ခ်ျမှကူးယူပါသည်။ပေ့ခ်ျအား ကျေးဇူးတင်ပါသည်။]
No comments:
Post a Comment