#ဂန္ထဝင်အိပ်မက်
( ပဉ္စမပိုင်း)
#မင်းလူ
ဈေးတို့၏သဘောသဘာဝမှာ နံနက်စောစောမှာ စည်ကားတတ်သည်။ နေမြင့်လာလျှင် ဈေးကွဲပြီ။ မွန်းလွဲညနေပိုင်းတွင် တစ်ကြိမ်စည်ကားသည်။ ညနေစောင်းလျှင် ဈေးပေါင်ကျိုးပြီ။ မမှောင်ခင် ဈေးပိတ်လေ့ရှိသည်။ ဒါက မြို့ပြဈေးတို့၏ ထုံးစံပင်ဖြစ်၏။
သူတို့ဘက်ပိုင်းမှာကျတော့ တစ်မျိုး။ ညနေစောင်းမှ ဈေးတန်းလေးက စတင်သက်ဝင်လှုပ်ရှားလာသည်။ ဈေးသည်တွေကလည်း ထိုအချိန်မှ ဆိုင်ကို စခင်းသည်။ မှောင်လာလေ စည်ကားလာလေဖြစ်၏။
သူတို့ရပ်ကွက်ရှိလူများသည် နံနက်အစောကြီးထပြီး လုပ်ငန်းခွင်ရှိရာသို့ သွားကြရသည်။ တစ်နေကုန် အလုပ်လုပ်ပြီး ဝင်ငွေရှာကြသည်။ ညနေစောင်းအလုပ်ကပြန်လာတော့မှ ပါလာတဲ့ငွေကလေးနှင့် ချင့်ချိန်ပြီး ဈေးဝယ်ကြရသည်။ လုပ်ငန်းခွင်ရှိရာနှင့် အိမ်နှင့် ခရီးကွာဝေးသူများမှာ မိုးချုပ်မှပင် ပြန်ရောက်တတ်သည်။ ထို့ကြောင့် ညမှောင်တော့မှ ဈေးစည်ကားခြင်း ဖြစ်၏။ လက်ဖက်ရည်ဆိုင်တွေဆိုလျှင်လည်း တစ်နေကုန် ခြောက်ကပ်နေပြီး ညကျမှ လူတဖွဲဖွဲ ဝင်လာတတ်၏။
ဈေးဝင်ဝယ်၊ အိမ်ပြန်ချက်ပြုတ်ပြီး ညရှစ်နာရီလောက်မှာ ညစာစားကြရသည်။ ပြီးတော့ တစ်နေကုန်ပင်ပန်းလာသမျှ ကျောဆန့်ပြီး အနားယူသူကယူ၊ လက်ဖက်ရည်ဆိုင် ထွက်သူကထွက်၊ ငွေကလေးနည်းနည်းပါးပါးပိုလျှင် ဗီဒီယိုရုံသွား။ ဘဝတွေက ဒီအတိုင်းကျင်လည်နေသည်။
ဈေးကလေးမှာ အဆောက်အအုံတွေ ဘာတွေနဲ့ အတည်တကျမဟုတ်။ လမ်း၏ ဘေးတစ်ဖက်တစ်ချက်မှာ ယာယီချခင်းပြီးရောင်းကြသော ပျံကျဈေးကလေးသာ ဖြစ်၏။ ပျံကျဈေးဖြစ်သောကြောင့် ဆိုင်နေရာတွေကို စနစ်တကျ နံပါတ်တပ်ထားခြင်းလည်းမရှိ။ သို့တိုင်အောင် သူတို့နည်း သူတို့ဟန်ဖြင့် နေရာသတ်မှတ်ပိုင်းခြားထားတာတော့ ရှိ၏။ တစ်ယောက်က ဗာဒံပင်ရှေ့ကဟာ ငါ့နေရာဟု သတ်မှတ်ထားလျှင် သူ့ဘေးက ဘယ်သူ၊ အဲဒီ ဟိုဘက်က ဘယ်သူ၊ မျက်နှာချင်းဆိုင်က ဘယ်သူဆိုပြီး ဆင့်ကဲ ဆင့်ကဲ မှတ်ထားလိုက်တော့ ပြီးရောပေါ့။
တစ်ခါတစ်လေမှာတော့ နည်းနည်းပြဿနာရှိ၏။ ထွက်နေကျဆိုင်က အကြောင်းကြောင်းကြောင့် အချိန်အတော်ကြာအောင် မထွက်ဖြစ်သောအခါ တခြားတစ်ယောက်က အစားဝင်ချင်ဝင်မည်။ ဘေးဆိုင်တွေက သူ့နေရာကိုချဲ့ပြီး ယူချင်ယူမည်။ နောင်အဆင်ပြေလို့ ပြန်ထွက်ချင်တဲ့အခါကျတော့ နေရာကပျောက်နေပြီ။ ထိုအခါ သူ့နေရာကို ပြန်တောင်း၊ တစ်ဖက်ကလည်း နင်မှမထွက်တော့ဘဲ၊ ပြီးတော့ ဒီလိုနေရာမျိုးက အပိုင်ယူထားလို့ရတာမှမဟုတ်ဘဲဆိုပြီး ငြင်းကြခုန်ကြ၊ ဆဲကြ ဆိုကြတာမျိုးတော့ ဖြစ်တတ်သည်။
တစ်ခါတစ်လေကျတော့လည်း ဆိုင်နားနီးချင်း မသင့်မတင့် ဖြစ်တာမျိုး ကြုံရသည်။ ထိုအခါ အော်ကြီးဟစ်ကျယ် စကားများကြ၊ ဆော်မယ် နှက်မယ် လုပ်လို့ ဘေးက ဝိုင်းဆွဲကြရ၊ နောက်ကျတော့လည်း တဟီးဟီး တဟဲဟဲ ရယ်မောကြ၊ သူတို့ဘဝနဲ့ သူတို့တော့ ဟုတ်သလိုလိုပါပဲ။
ညဘက်ကျမှ စည်ကားသော ဈေးဖြစ်သဖြင့် ဒီဇယ်မီးခွက်ကလေးတွေ ထွန်းထားကြသည်။ ဘက်ထရီမီးချောင်းတွေကိုလည်း ကြိုကြားကြိုကြား မြင်ရသည်။ အဝေးမှ လှမ်းကြည့်လိုက်လျှင် ဘုရားပွဲဈေးတန်းလေး တစ်ခုလို ဖြစ်နေ၏။
များသောအားဖြင့်တော့ ကန်စွန်းရွက်၊ ချဉ်ပေါင်ရွက်၊ ပဲသီး၊ ခရမ်းချဉ်သီး၊ ရုံးပတီသီး၊ ငရုတ်သီးစိမ်း၊ နံနံပင် စသော ဟင်းသီးဟင်းရွက်များ၊ ကြက်သွန်၊ ငရုတ်သီးမှုန့်၊ နနွင်းမှုန့်၊ ဆား၊ မဆလာ စသော မီးဖိုချောင်သုံးပစ္စည်းများ၊ အာပြဲခြောက်၊ ငါးဖောင်ရိုးခြောက်နှင့် အမည်မသိရသော ငါးသေး ငါးဖွဲခြောက်များ၊ ကြက်ဥ၊ ဘဲဥ၊ ဝက်အူချောင်း၊ ဝက်ဆီဖတ် စသည်များသာရှိသည်။
ဆီရောင်းသူက တစ်ကျပ်သား၊ နှစ်ကျပ်သား၊ ငါးကျပ်သား စသည်ဖြင့် ပလပ်စတစ်အိတ်ကလေးများတွင် အဆင်သင့် ထည့်ပေးထားသည်။ ဆန်ကလည်း တစ်လုံးနှစ်လုံးမှစ၍ တစ်ပြည်အထိ ကြွပ်ကြွပ်အိတ်များဖြင့် ထည့်ထားသည်။ အဆင်သင့် ယူသွားရုံပင်ဖြစ်၏။ (စူပါမားကတ်ကြီးတွေမှာ ဘာစမာတီဆန်တို့၊ ဂျက်စမင်ဆန်မွှေးတို့ကို ပက်ကင်လှလှလေး ထုပ်ပြီး ရောင်းသလိုပေါ့လေ။)
မုန့်ဟင်းခါးဆိုင်၊ အသုပ်ဆိုင်၊ အကြော်ဆိုင်တို့ရဲ့ ဟိုဘက်ချောင်ကျကျ တစ်နေရာမှာတော့ ဒီလိုရပ်ကွက်မျိုးအတွက် မရှိမဖြစ်သော ဆိုင်ကလေးတစ်ဆိုင်လည်း ရှိ၏။
အရက်ပုန်းဆိုင်ကလေးပင်ဖြစ်၏။ ဘီအီးနှင့် တောအရက်တို့ရသည်။ တောအရက်ဆိုသော်လည်း ဟိုးတောထဲတောင်ထဲမှာ ချက်တာတော့ မဟုတ်ပါ။ သူတို့မြို့နယ် အစွန်အဖျားရှိ ချောင်ကျသော နေရာတွေမှာ ကိုယ်တိုင်ချက်လုပ်ကြခြင်းသာဖြစ်၏။ ဒီဂရီကလည်း မှန်လှသည်မဟုတ်။ ပြင်းပြီဆိုလျှင် အက်ဆစ်မျိုချရသလို ထူပူသွားစေပြီး ပျော့ပြီဆိုလျှင်တော့ အရက်ထဲ ရေရောထားတာလား၊ ရေထဲ အရက်ရောထားတာလား မသိနိုင်အောင်ပါပဲ။
ဈေးကလည်း အလွန်သက်သာသည်။ ဘီအီးဈေး၏ ထက်ဝက်လောက်သာရှိ၏။ တချို့ကတော့ ထိုအရက်များသည် စနစ်တကျ ချက်လုပ်ထားတာမဟုတ်သောကြောင့် အန္တရာယ်ရှိသည်ဟု ဆိုကြသည်။ သူတို့အခေါ် 'ဖောလျှော'ဆိုသော ရောဂါဖြစ်၏။ တောအရက် သောက်ဖန်များလျှင် အသားအရေ ပွစိစိဖြစ်လာသည်။ အသည်းကိုထိခိုက်သောကြောင့် ဖောလာခြင်း ဖြစ်၏။ မကြာခင် သေတော့သည်။ ထို့ကြောင့် ဖောလျှောဟု ခေါ်တွင်ခြင်းဖြစ်၏။ သို့ရာတွင် သူတို့ကတော့....
"မဖောလည်း လျှောချင်လျှောတာပါပဲကွာ၊ ဒါမှမသောက်လည်း ရေသောက်ပြီးမူးဖို့ပဲရှိတယ်"
ရေဆိုတာတောင် ရေသန့်ဗူး ဝယ်သောက်နိုင်တာမဟုတ်။ ရေသန့်ဗူးကလည်း တောအရက်တစ်ပုလင်းထက် ဈေးပိုကြီးနေတာကိုး။ သူတို့ခမျာမှာက နိုင်ငံခြားစံချိန်မီချက်လုပ်ထားသော အရက်ကောင်းကောင်းတွေလည်း မသောက်နိုင်။ ဘီယာဆိုင်လည်း မထိုင်နိုင်တော့ ဒီဆိုင်ကလေးတွေကို အားကိုးရတော့တာပါပဲ။ ငွေကလေး နည်းနည်းပါးပါး ရွှင်လာလျှင် ဘီအီးစစ်စစ်ကလေး ကိုင်ရတာပေါ့လေ။
အမြည်းတွေကတော့ ဒီလိုဆိုင်မျိုးရဲ့ထုံးစံအတိုင်း ပဲခြမ်းကြော်သုပ်၊ လက်ဘက်သုပ်၊ အာပြဲခြောက်၊ တညင်းသီးပြုတ်။ ဘဲဥသုပ်ဆိုတာ အကောင်းစားအမြည်းလေ။
တစ်နေကုန် ပင်ပင်ပန်းပန်း အလုပ်လုပ်ခဲ့ရတာဆိုတော့ ဒါကလေးဝင်သွားမှ အကိုက်အခဲအညောင်းအညာပြေပြီး ပေါ့ပါးသွားတတ်တာကလား။ အရက်သောက်လျှင် ဒဏ်ကြေတယ်လို့ ဆေးပညာက လက်ခံသလား၊ မခံသာလားတော့ မသိ။ သူတို့ကတော့ ခွေးတောက်ရွက် ဟင်းချိုကလေးနဲ့များ တွဲဖက်ပြီး မျှောချလိုက်ရရင် တကယ့်လာဘ်တစ်ပါးဟုပဲ ထင်နေသူများဖြစ်၏။
တော်စတွိုင်းသည် ဒီဈေးကလေးကို စိတ်ဝင်စားခဲ့တာကြာပြီ။ ဒီဈေးကလေးအကြောင်း ဝတ္ထုတစ်ပုဒ်ရေးချင်နေသည်။ ထို့ကြောင့် ဈေးတန်းထဲ ဟိုဒီလျှောက်ရင်း လေ့လာသည်။
သူက ဝတ္ထုရေးလျှင် စိတ်ကူးနှင့်ရေးလေ့မရှိ။ အကြောင်းအရာတစ်ခုကို စေ့စေ့စပ်စပ်လေ့လာသည်။ ဖြစ်နိုင်လျှင် ကိုယ်တိုင်ဝင်ရောက် ခံစားကြည့်ချင်သည်။ အနည်းဆုံး အနီးကပ်တော့ ကြည့်ရှုမှတ်သားတတ်သည်။ ထို့ကြောင့်လည်း သူ့ဝတ္ထုတိုတွေက သရုပ်ပီပြင်ခြင်းဖြစ်သည်။ ထို့ကြောင့်လည်း သူ့ဝတ္ထုတစ်ပုဒ် တစ်ပုဒ် ထွက်လာဖို့ အချိန်တွေကြာခြင်းဖြစ်၏။
သူက အခြေခံလူတန်းစားတွေအကြောင်း ရေးတာများသည်။ သူတို့ဘာလုပ်နေကြသလဲ၊ ဘယ်လိုဝတ်စားဆင်ယင်ကြသလဲ၊ ဘယ်လိုနေထိုင်စားသောက်ကြသလဲ အချက်အလက် ရှာရတာ သိပ်မခဲယဉ်း။ အရေးကြီးတာက သူတို့၏ စရိုက်ကိုပေါ်အောင် ရေးနိုင်ဖို့ ဖြစ်၏။ သူတို့ပြောတဲ့ စကားအသုံးအနှုန်းတွေ၊ လေယူလေသိမ်းတွေကအစ၊ အမိဖမ်းနိုင်မှ ဝတ္ထုက အသက်ဝင်မည်။ ဒါမှမဟုတ်လို့ကတော့ ဝတ္ထုဆန်သော သုတဆောင်းပါးလို ဖြစ်နေလိမ့်မည်။ ဝတ္ထုဆိုလျှင်တော့ ဘာအကြောင်းအရာပဲရေးရေး ရသမြောက်ဖို့၊ အနုပညာကောင်းဖို့တော့ လိုအပ်သည်ဟု သူထင်၏။
ဈေးဝယ်သူ မိန်းမတစ်ယောက်သည် ပုစွန်ဆိတ်သည်နှင့် အချေအတင် ငြင်းခုန်နေကြ၏။ ဖြစ်ပုံမှာ ပုစွန်ဆိတ်သည်က တစ်ပုံငါးဆယ်နှင့် အော်ရောင်းနေသည်။ ဝယ်သူမိန်းမသည် ပထမတစ်ခေါက်ဖြတ်သွားစဉ်က လှမ်းကြည့်သွားသည်။ နောက်တစ်ခေါက်ပြန်လျှောက်အလာတွင်....
"လာနော်...လာနော်.. ပုစွန်ဆိတ်ကလေးတွေ၊ လျှော့လိုက်ပြီ၊ လျှော့လိုက်ပြီ၊ တစ်ပုံလေးဆယ်နဲ့ပဲ ယူသွား..."
ပုစွန်ဆိုတာ ကြာရှည်သိုလှောင်ထားလို့ ရတာမဟုတ်။ ဒီနေ့မရောင်းရလျှင် နောက်နေ့ကျတော့ ပုပ်ကုန်တာ။ ဒီတော့ မြန်မြန်ရောင်းကုန်အောင် လျှော့ရတာလေ။ တစ်ပုံငါးဆယ်ကနေ လေးဆယ်ကို လျှော့လိုက်ပြီ ဆိုတော့ ဝယ်သူမိန်းမလည်း စိတ်ဝင်စားသွားသည်။ ထပ်ဆစ်လို့ ရချင်လည်း ရနိုင်သည် ဆိုပြီး ဆိုင်ရှေ့မှာ ဝင်ထိုင်လိုက်သည်။
"မလျှော့တော့ဘူးလား" ဟုမေးသည်။
ဈေးသည်က...
"လျှော့ပြီးသားလေအစ်မရဲ့၊ တစ်ဆယ်တောင် လျှော့ထားတာ"
ဝယ်သူအမျိုးသမီးက ပုစွန်အပုံတွေကိုကြည့်ပြီး မျက်မှောင်ကျုံ့သွားသည်။ တစ်ခုခု မှားယွင်းနေကြောင်းရိပ်မိလိုက်သည်။ ဘာပါလိမ့်ဟု စဉ်းစားသည်။ ဟုတ်ပြီ။ ပထမတစ်ခေါက် ကြည့်သွားတုန်းက ပုစွန်ဆိတ်အပုံက သုံးပုံပဲ ရှိသည်။ ခုကြည့်လိုက်တော့ လေးပုံဖြစ်နေသည်။
သူဟိုဘက်လျှောက်နေတုန်း အချိန်အတွင်းမှာ သုံးပုံထဲက နည်းနည်းစီခွဲပြီး လေးပုံဖြစ်အောင် ပွားထားခြင်းဖြစ်သည်။ ဒီလိုဆိုတော့ နဂိုက တစ်ပုံငါးဆယ်နှင့်ရောင်းလျှင် သုံးပုံအတွက် တစ်ရာ့ငါးဆယ်ပဲရမည်။ ခုလိုလေးပုံခွဲပြီး လေးဆယ်နှင့်ရောင်းတော့ တစ်ရာ့ခြောက်ဆယ်ရမည်။ ဈေးလျှော့တယ်ဆိုခါမှ တစ်ဆယ်တောင် ပိုမြတ်တဲ့သဘော ဖြစ်နေ၏။ ပညာသားပါလှသော ရောင်းဝယ်ရေး ဗျူဟာပဲ။
"အစ်မ ဒါမျိုးတော့ လုပ်ဖို့မကောင်းဘူး၊ စောစောက ကျွန်မကြည့်သွားတုန်းက သုံးပုံပဲရှိတာ"ဟု ဝယ်သူမိန်းမက ပြောလိုက်သည်။
ဈေးသည်က "မဟုတ်ပါဘူး၊ စောစောကတည်းက လေးပုံပါပဲ"
"ကျွန်မသေသေချာချာမြင်တာပါ၊ စောစောကထက်စာရင် အပုံတွေက သေးသွားတာကြည့်ပါလား" ဝယ်သူက ထပ်ပြီး သက်သေထူသည်။
"အမယ်၊ တစ်ပုံမှာ ပုစွန်ဆိတ် ဘယ်နှစ်ကောင်ရှိတယ် ဆိုတာကော ရေတွက်ထားသေးလား မသိဘူး"ဟု ဈေးသည်က ပြန်ငေါ့သည်။
ဝယ်သူကလည်း မခေလှပါ။ "အစ်မ ဈေးလျှော့ရောင်းတာကလည်း ကုမ္ပဏီတွေက အထူးလျှော့ဈေးဆိုတာပါပဲလား"
ခေတ်မီသော ဥပမာဖြစ်သဖြင့် တော်စတွိုင်း နားစွင့်ရင်းပြုံးလိုက်မိ၏။
"ကဲ...ကဲ...သုံးဆယ့်ငါးကျပ်ပဲ ယူသွားတော့၊ ပုစွန်ဆိတ်ခေါင်းတွေထဲမှာ လက်ငင်းကံစမ်းမဲပါသေးတယ်"ဟုဈေးသည်က နောက်ပြောင်ရင်း အလျှော့ပေးလိုက်သည်။ သူတို့အရောင်းအဝယ်တည့်သွားကြသည်။
တော်စတွိုင်းသည် ဈေးဝယ်သူတွေကို အကဲခတ်ကြည့်သည်။ ဝယ်သူ မိန်းမအများစုသည် ဈေးထဲရောက်လျှင် သင့်တော်ရာဆိုင် ဝင်ပြီး တစ်ခါတည်း တန်းဝယ်တာမျိုး သိပ်မရှိ။ တစ်ဆိုင်ပြီးတစ်ဆိုင် ဝင်ပြီး စနည်းနာပြီးမှ ဝယ်တတ်သည်။
ဈေးဝယ်တယ်ဆိုတာ ကြည့်တော့ လွယ်မလိုလိုနဲ့ အတော် တွက်ရချက်ရ ဦးနှောက်စားရသည့် ကိစ္စဖြစ်၏။ ဘာတွေပေါလဲ၊ ဘာတွေဈေးသက်သာသလဲ စုံစမ်းရသည်။ ရာသီအချိန်အခါကိုလည်း နားလည်ရသည်။ မိုးကုန်ခါစမှာ ငါးပုစွန်ပေါတတ်သည်။ ဆောင်းရာသီမှာ ဟင်းသီးဟင်းရွက် လှိုင်လှိုင်ထွက်သည်။ ဆီရှားသော အချိန်မှာ ဝက်သားဈေးတက်သည်။ ဒါတွေကို သိရမည်။
ကိုယ့်မှာရှိတဲ့ငွေနဲ့ အဆင်အပြေဆုံးဖြစ်အောင် တိုင်းထွာချင့်ချိန် ဝယ်တတ်ရမည်။ ဈေးပေါတိုင်းလည်း ဝယ်လို့ဖြစ်တာမဟုတ်။ ဥပမာ ကြက်ဥတွေ အဝင်များလို့ ဈေးကျနေသည်။ သို့ရာတွင် အိမ်မှာ စားမယ့်လူများသည်။ ကိုယ့်မှာရှိတဲ့ငွေက အားလုံးအတွက် လောက်ငအောင် မဝယ်နိုင်တာမျိုး ရှိသည်။ ဒီတော့ ကိုယ့်မှာရှိတဲ့ငွေရယ်၊ စားမယ့်ပါးစပ်ပေါက်ရယ်၊ ကုန်ဈေးနှုန်းရယ်ကို သဟဇာတဖြစ်အောင် ချိန်ကိုက်တတ်ဖို့ လိုသည်။
ဒီလိုကိစ္စတွေမှာ မိန်းမတွေက အလွန်တော်သည်။ ဘယ်လောက်ညံ့တဲ့သူဖြစ်ဖြစ် ဒီနေရာတော့ သင်္ချာပါမောက္ခထက်ပိုပြီး တွက်ချက်တတ်သည်။ ယောက်ျားတွေက ဒီလိုကိစ္စမျိုးကြုံလျှင် ဘာလုပ်ရမှန်းမသိ ဖြစ်တတ်သည်။
ဟိုလူတစ်ယောက်ကိုပဲကြည့်။ ထိုသူမှာ အသက်ငါးဆယ်ဝန်းကျင် လောက်ရှိမည်။ ပိန်ပိန်ခြောက်ခြောက် ညိုညိုညစ်ညစ် ဖြစ်၏။ ခါးကြားမှ ကြွပ်ကြွပ်အိတ် အဟောင်းတစ်လုံးကို ခေါက်ပြီး ထိုးထားသဖြင့် ဈေးဝယ်လာမှန်းသိသာသည်။ အလုပ်ကအပြန် ဝင်ဝယ်ခြင်းဖြစ်မည်။
သူသည် ချီတုံချတုံဖြစ်နေဟန်ဖြင့် ခဏတွေဝေနေသည်။ ထို့နောက် ဆုံးဖြတ်ချက်တစ်ခု ချလိုက်ပုံရသည်။ ဈေးတန်းကို လွန်သွားအောင် ဆက်လျှောက်သွားပြီးနောက် အရက်ဆိုင်ထဲ ဝင်သွားလေသည်။
ဒီလူ ဘယ်လိုလူမျိုးဖြစ်မလဲ။ အိမ်မှာ ဆာလောင်မွတ်သိပ်စွာ စောင့်စားနေကြသော မိသားစုကို မညှာတာဘဲ တစ်ကိုယ်ကောင်းဆန်တဲ့ လူလား။ ကိုယ့်မှာ ဝင်ငွေ အနည်းငယ်သာရှိတယ် ဆိုလျှင်လည်း မတတ်သာတဲ့အဆုံး ချဉ်ဖတ်စုံနှင့် ငါးပိရည် ဝယ်သွားလျှင် တစ်နပ်စာတော့ ဖြစ်သွားနိုင်တာပဲ မဟုတ်လား။
ဒါမှမဟုတ် အခြေအနေကို ရင်မဆိုင်ရဲလောက်အောင် သတ္တိနည်းလို့ ကြံမိကြံရာ ထွက်ပေါက်ရှာတဲ့လူမျိုးလား။
နောက်တစ်ခုက မိသားစုမရှိသူ လူပျိုကြီးလည်း ဖြစ်နိုင်၏။ သူ့မှာ ရှိတဲ့ငွေနဲ့ ဟင်းလျာဝယ်ပြီး ချက်စားတာထက်စာလျှင် တောအရက်တစ်ပိုင်းနဲ့ အမြည်းနည်းနည်းပါးပါး စားသောက် လိုက်တာကမှ စရိတ်ငြိမ်းပြီး တွက်ခြေကိုက်သေးတယ်ဟု ဆုံးဖြတ်လိုက်တာလည်း ဖြစ်ကောင်းဖြစ်နိုင်သည်။
* * * * *
မှော်ရုံဟေဝန်သည် သာယာလှပလွန်းသည်။ မြင့်မားပြီးအုံ့ဆိုင်းနေသော သစ်ပင်ကြီးများပေါ်တွင် ငှက်မျိုးစုံတို့ ပျော်ပါး မြူးထူးနေကြ၏။ နေရာတိုင်းမှာ ပန်းတွေပွင့်နေကြသည်။ အရောင်အသွေးစုံသော ကော်ဇောကြီးတစ်ချပ် ခင်းထားသလိုဖြစ်နေသည်။ ကျောက်ကမ်းပါးယံမှ ရေတံခွန်များဖြာကျနေသည်။ အောက်ခြေတွင် ရေအိုင်တစ်ခုရှိပြီး စမ်းချောင်းငယ်များအဖြစ် ခွဲထွက် စီးဆင်းနေကြ၏။
စမ်းချောင်းဘေးရှိ ကျောက်တုံးပေါ်တွင် ရိုမီယိုနှင့် ဂျူးလိယက်တို့ ထိုင်နေကြ၏။ ရိုမီယိုက ငှက်ကလေးတွေကို မော့ကြည့်နေစဉ် ဂျူးလိယက်က စမ်းချောင်းထဲမှာ ကူးခတ်နေသော ရွှေငါးကလေးများကို ကြည့်နေ၏။
သူတို့နှစ်ယောက် အပြန်အလှန် ချစ်ကြပုံမှာ ဘယ်သူမှ မီနိုင်မယ်မထင်။ တစ်ယောက်ကိုတစ်ယောက် မျက်စိအောက်က အပျောက်မခံ ဆိုတာထက်ပိုသည်။ ကိုယ့်ချစ်သူကို သူများကြည့်တာတောင် မခံနိုင်။ မြို့ကြီးပြကြီးမှာဆိုလျှင် တစ်ယောက်မဟုတ် တစ်ယောက်ကြည့်တာတော့ ခံရမှာပဲ။ ထို့ကြောင့် ဘယ်သူမှ မကြည့်နိုင်အောင် လူသူမရှိသည့် တောတောင်ထဲမှာ လာနေခဲ့ခြင်းဖြစ်၏။
တစ်ရက်မှာ ရိုမီယိုက ဟင်းစားအရှာထွက်နေစဉ် လေပြင်းမုန်တိုင်း ကျလာသည်။ သူတို့၏ ဂေဟာဖြစ်သော ကျောက်ဂူရှိရာသို့ မပြန်နိုင်။ နောက်တစ်နေ့ မနက်ကျမှ မုန်တိုင်းစဲ သွားသဖြင့် ဂျူးလိယက်နှင့် ပြန်ဆုံကြသည်။ သူတို့နှစ်ယောက်မှာ တစ်ညတာ ခွဲခွာခဲ့ရတဲ့အတွက် ခုနစ်ရက်တိုင်တိုင် လွမ်းဆွေးကြရလေသည်။
ဂျူးလိယက်သည် စမ်းချောင်းလေးထဲက ရွှေငါးကလေးတွေကို လိုက်ဖမ်းရင်း ဆော့ကစားနေသည်။ ငါးကလေးတွေက အလွန်လျင်သဖြင့် ဖမ်းရခက်သည်။ တစ်ခါတစ်ရံ လက်ခုပ်ထဲရောက်ပြီးမှ ဆယ်လိုက်လျှင် လျှောကနဲ လွတ်ထွက်သွားတတ်သည်။ ဒါကိုကြည့်ပြီး ဂျူးလိယက်ပျော်နေသည်။ သူ၏ ရယ်သံလွင်လွင်သည် စမ်းချောင်းရေစီးသံနှင့် အပြိုင် ကျောက်နံရံကိုရိုက်ခတ်နေ၏။
ရိုမီယိုသည် သူ၏လေးကို ကြိုးအသစ်လဲတပ်နေသည်။ ဒီလေးကြီးသည် သူ၏လက်စွဲတော် ဖြစ်သလို သူနှင့် ဂျူးလိယက်တို့၏ အောင်သွယ်တော်ကြိုးလည်းဖြစ်၏။ ဒီလေးကြီး၏ အစွမ်းကြောင့်ပင် မြားပစ် ပြိုင်ပွဲတွင် အဓိက ပြိုင်ဘက်ဖြစ်သော နီရိုးဘုရင်ကို အနိုင်ယူနိုင်ခဲ့ခြင်းဖြစ်၏။
ထိုစဉ်က ရိုမီယိုမှာ ဖိတ်စာမပါသဖြင့် ပြိုင်ပွဲဝင်ခွင့်မရှိဟု နီရိုးဘုရင်က ကန့်ကွက်ခဲ့သေးသည်။ ဖိတ်စာလိုမလို ငြင်းကြခုံကြရသေးသည်။ နောက်ဆုံး ဒိုင်အဖွဲ့က ရိုမီယိုကို ဝင်ပြိုင်ခွင့်ပြုခဲ့သည်။
ပြိုင်ပွဲတွင်ရိုမီယို အနိုင်ရရှိသောအခါ နီရိုးဘုရင်က လုံးဝမကျေနပ်။
"ဒီမှာရိုမီယို၊ မင်းမှတ်ထားလိုက်စမ်း၊ နီရိုးဆိုတဲ့ကောင်ဟာ သူလိုချင်တာကို ဘယ်တော့မှလွယ်လွယ်နဲ့ လက်လျှော့တတ်တဲ့လူမျိုးမဟုတ်ဘူးကွ"
ဟု ကြုံးဝါးသွားခဲ့သည်။
ရိုမီယိုသည် လေးကြိုးတပ်ပြီးသွားသည်။ ကြိုးအလျှော့အတင်းကို စမ်းသည်။ ကြိုးကို လက်နှင့်ခတ်ကြည့်ရာ ထောင်ခနဲမြည်သွားသည်။ သူကျေနပ်သွား၏။ ကျည်တောက်ထဲက မြားတံတစ်ချောင်းကို ယူသည်။ လေးပေါ်တင်ပြီး ခပ်လှမ်းလှမ်းရှိကျွန်းပင်ကြီးဆီ စမ်းသပ်ပစ်ခတ်လိုက်၏။ မြားတံသည် အလင်းရောင်တန်းတစ်ခုလို ဝင်းခနဲလက်ခနဲပြေးထွက်သွားသည်။
ရုတ်တရက်ကြည့်လျှင် ပစ်မှတ်ကို လွဲချော်သွားသည်ဟုထင်ရ၏။ အမှန်မှာမြားတံသည် လုံးပတ်လက်တစ်ဖက်စာမျှ ရှိသော ကျွန်းပင်ကြီးကို ထုတ်ချင်းခတ်ဖောက်ထွက်သွားခြင်းသာဖြစ်၏။ မြန်လွန်းပြင်းထန်လွန်းလို့ မမြင်လိုက်ရခြင်းပါပဲ။
ထိုစဉ်မှာပင် ဂျူးလိယက်၏ အရေးတကြီးခေါ်သံကိုကြားသဖြင့်လှည့်ကြည့်သည်။
"မောင်တော်... ဟိုမှာကြည့်ပါဦး၊ ရွှေသမင်လေး လှလိုက်တာ၊ ဂျူးဂျူးလိုချင်တယ်"
သမင်လေးတစ်ကောင်သည် တောစပ်တစ်နေရာမှ သူတို့ရှိရာကို မျက်လုံးလေး ကလယ်ကလယ်လုပ်ရင်းကြည့်နေသည်။
ရိုမီယိုက လေးနှင့်မြားကို အသင့်ပြင်ပြီး ချိန်ရွယ်လိုက်၏။ ဂျူးလိယက်က အလန့်တကြားတားမြစ်သည်။
"မပစ်ပါနဲ့၊ အရှင်ဖမ်းပေးပါ မောင်တော်"
ရိုမိယိုတစ်ချက်တွေသွားသည်။ သူသည် လေးအတတ်မှာ တစ်ဖက်ကမ်းခတ်သူသာဖြစ်၏။ မြားပစ်ပြိုင်ပွဲမှာတုန်းက ရော်ဘင်ဟုတို့၊ လေးသည်ကျော်ကြီး ဝီလျံတဲတို့ကို အနိုင်ယူခဲ့သူဖြစ်၏။ ဒီလိုလူမျိုးက သမင်ကို အရှင်လိုက်ဖမ်းပေးရမယ်ဆိုတော့....
"ဘာလဲ၊ ဖမ်းမပေးနိုင်ဘူးပေါ့..ဟုတ်လား၊ သိပါတယ်....သိပါတယ်၊ အခုတော့ အချစ်တွေလျော့ကုန်ပြီမဟုတ်လား၊ ဟိုအရင်မရခင်တုန်းက မောင်တော်ဆိုခဲ့တဲ့သီချင်းကို မမှတ်မိတော့ဘူးပေါ့လေ"
ရိုမီယိုသည် ဂျူးလိယက်ကို ချစ်ရေးဆိုခဲ့စဉ်က ရဲတိုက်ရှေ့မှာ သွားဆိုခဲ့သည့် သီချင်းကိုသတိရလိုက်သည်။
"♪♫...ဘာလိုချင်လဲအချစ်ရေ....ကိုယ့်ကိုပြော...အပ်ကစပြီး ပန်းရထားကြီးထိ ကိုယ်ဖန်ဆင်း... မရဘူးဆိုတာမရှိစေရဘူး.... ပြောသာချလိုက် ပြောသာချလိုက်...အို...♫♪"
မိန်းမတစ်ယောက်၏ သုံးလက်မလောက်သာ ရှည်သောလျှာသည် ခြောက်ပေမြင့်သော ယောက်ျားကြီးတစ်ယောက်ကို လိုရာစေခိုင်းနိုင်သည် ဆိုသောစကားသည် အလွန်မှန်၏။ ရိုမီယိုသည် ခြေဆောင့်ပြီး ပူဆာနေသော ဂျူးလိယက်ကို တစ်ချက်ကြည့်ပြီး....
"ရ...ရမှာပေါ့"
ဟု ပြောလိုက်ရလေသည်။
ရိုမီယိုက ဂျူးလိယက်ကို ဂူထဲမှာ ဝင်နေဖို့ ဘယ်သူလာလာ ဘာသံကြားကြား ထွက်မလာဖို့ အထပ်ထပ်မှာပြီး သမင်နောက်ကိုလိုက်သွားသည်။ သမင်ကလေးသည် ရိုမီယိုလိုက်လာတာမြင်သောအခါ တောအုပ်အတွင်းသို့ လှစ်ခနဲ ဝင်ပြေးသည်။ မျက်ခြည်ပြတ်လောက်အောင် မပြေး။ လှမ်းမြင်သာရုံလောက်ကနေ ရပ်ကြည့်နေပြန်သည်။ ရိုမီယိုလိုက်လာပြီဆိုမှ ဆက်ပြေးပြန်သည်။ ဒီလိုနဲ့ မျှားခေါ်သွားရာ တောနက်သထက်နက်လာသည်။ ခရီးအတော်ဝေးဝေးကို ရောက်လာသည်။
ထိုအချိန်တွင် ဂျူးလိယက်သည် ကျောက်ဂူထဲမှာ စောင့်မျှော်နေ၏။ သမင်လေးတစ်ကောင် လိုက်ဖမ်းတာ ဒီလောက်တောင် ကြာရသလား။ ပြန်လာရင်တော့ စိတ်ကောက်ပစ်လိုက်ဦးမယ်ဟု တွေးနေသည်။
ထိုစဉ်မှာပင် အပြင်ဘက်က 'နောင်....နောင်'ဆိုသော မောင်းတီးသံကြားရ၏။ အသာချောင်းကြည့်လိုက်တော့ ဆီးသီး၊ ရှောက်သီးဝိုင်း၊ ဂွေးသီးတို့ကို တွန်းလှည်းကလေးဖြင့် လိုက်ရောင်းသော 'နောင်နောင်သည်'ကို တွေ့လိုက်ရ၏။
ဂျူးလိယက် သွားရည်ယိုလာသည်။ ဒီတောထဲကိုရောက်ပြီးမှ ခုလိုချဉ်ချဉ်ငန်ငန်စပ်စပ်အရသာမျိုး မစားရတာကြာပြီ။
အမှန်တော့ သူနားလည်ဖို့ကောင်းသည်။ ဒီလိုတောထဲတောင်ထဲမှာ ဘယ်က နောင်နောင်သည် ရှိမလဲ။ တော်ရုံ ဆင်ခြင်စဉ်းစားတတ်သူဆိုလျှင်ပင် မသင်္ကာစရာကောင်းမှန်း တွေးသိနိုင်၏။ သို့ရာတွင် မိန်းမတို့စိတ်က တစ်မျိုးပဲ။ သုံးလက်မလောက်ရှည်သော သူတို့၏လျှာသည် ယောက်ျားကြီးတစ်ယောက်ကို ချုပ်ကိုင်နိုင်သော်လည်း လက်တစ်ဆုပ်စာလောက်ရှိသည့် ဂွေးသီးစိမ်းစိမ်းကလေး၏ ဖြားယောင်းမှုကိုတော့ မတွန်းလှန်နိုင်။
"နောင်....နောင်.....နောင်"
မောင်းသံက ထပ်မံဖိတ်ခေါ်ပြန်သည်။ သူသည် ဘာကိုမှမစဉ်းစားတော့ဘဲ ဂူအပြင်ကိုထွက်လိုက်သည်။ နောင်နောင်သည်ရှိရာသို့ လျှောက်သွားသည်။ နောင်နောင်သည်မှာ သူ့ကိုပြုံးကြည့်ပြီး ကြိုဆိုနေ၏။ ဒီအသည်မြင်ဖူးသလိုလိုရှိပါတယ်၊ အရင်က သူနေထိုင်ခဲ့ရာ ရဲတိုက်ရှေ့ကို လာတတ်တဲ့အသည်များလား။ တွန်းလှည်းနားရောက်တော့....
"ဂွေးချိုသီးတစ်လုံး ဘယ်လောက်လဲ"
ဟု မေးလိုက်စဉ်တွင်....
"ဟား ဟား....ဟား...ဟား"
နောင်နောင်သည်က တဟားဟား ရယ်လိုက်သည်။ ထိုစဉ်မှာပင် ဝုန်းခနဲမီးခိုးလုံးကြီးပေါ်လာပြီး တွန်းလှည်းနေရာတွင် မြင်းရထားကြီးတစ်စင်းဖြစ်သွားသည်။ နောင်နောင်သည်ကလည်း စောစောကလို ပိန်ပိန်သေးသေးမဟုတ်တော့ဘဲ အလွန်ထွားကျိုင်းသော လူကြီးတစ်ယောက်ဖြစ်သွား၏။ ဂျူးလိယက်သည် လန့်သွားပြီး လူထွားကြီးကိုကြည့်လိုက်သည်။
"ဟင်...နီရိုးဘုရင်"
ဟုရေရွတ်ရင်း မေ့မျောသွား၏။ နီရိုးဘုရင်သည် ဂျူးလိယက်ကို ပွေ့ပြီးမြင်းရထားပေါ်တင်လိုက်သည်။ ထို့နောက် အရှိန်ပြင်းစွာမောင်းထွက်သွားသည်။ သူ၏ ကျယ်လောင်သော ကြောက်မက်ဖွယ်ရယ်သံများသာ ပဲ့တင်ထပ်၍ကျန်ရစ်ခဲ့လေသည်။
ရိုမီယိုသည် တောထဲသို့ အတော်ကြီးကျွံဝင်ပြီးခါမှပင် မိမိလှည့်စားခံလိုက်ရပြီဖြစ်ကြောင်း သိလိုက်ရသည်။ ချက်ချင်းနောက်ကြောင်းပြန်လှည့်သည်။ သို့ရာတွင် တောကနက်လွန်းသဖြင့် မျက်စိလည်လမ်းမှားနေပြီး ရက်အနည်းငယ်ကြာမှပင် ကျောက်ဂူရှိရာသို့ပြန်ရောက်သည်။
ဂျူးလိယက်ကားမရှိတော့။ မြင်းရထား ဘီးရာများကို မြင်တော့ဒါ နီရိုးဘုရင်လက်ချက်ပဲ ဆိုတာခန့်မှန်းမိသည်။ ထို့ကြောင့် နီရိုး၏မြို့တော်သို့လိုက်လေသည်။
လမ်းမှာ သူ့မိတ်ဆွေများကို တွေ့ရသည်။ သူရဲကောင်းများဖြစ်ကြသော ဓားတညံ၊ ပေါသိုး၊ အားသိုး၊ ဟာကြူလီ၊ အာချိလိ၊ ဒေးဗစ်၏လောက်လွှဲတပ်ဖွဲ့တို့ဖြစ်ကြ၏။
သူတို့အားလုံးက ရိုမီယိုဘက်က ဝင်ရောက်ကူညီဖို့ ကတိပြုကြသည်။ အားလုံးအသီးသီးတာဝန်ခွဲပြီး နီရိုး၏ ရောမမြို့တော်ကိုဝင်တိုက်ကြသည်။ သူတို့၏ တိုက်ခိုက်မှုကြောင့် ရောမမြို့တော်ကြီး မီးဟုန်းဟုန်းတောက်လောင်နေသည်။
နီရိုးဘုရင်ကတော့ ထိတ်လန့်တုန်လှုပ်ခြင်း လုံးဝမဖြစ်သည့်ပြင် 'ငါ၏ဘုန်းကံကြောင့် ရောမမြို့တော်ကြီးသည် ညအချိန်မှာပင် နေမွန်းတည့်ချိန်ကဲ့သို့ ထိန်ထိန်လင်းပေသည်'ဟု အဓိပ္ပါယ်ရသော သီချင်းတစ်ပုဒ်ကို သီဆိုရင်း ဗျပ်စောင်းကို တီးနေလိုက်သေးသည်။
သူ့စိတ်ထဲတွင်ရိုမီယိုလို အချစ်ရူးကလေးတစ်ယောက်က သူ့ကိုယှဉ်နိုင်လိမ့်မည်ဟု မထင်။ သူ၏ ခိုင်ခံထူထဲသော ရဲတိုက်ကြီးကို ဖောက်ထွင်းပြီး သူ၏ မြို့စောင့်တပ်မှူး ဂိုလိုက်ယက်ကို ကျော်ဖြတ်လာနိုင်လိမ့်မည်ဟု မယုံကြည်။
သို့ရာတွင် ဟာကြူလီက ခံတပ်မြို့ရိုးကို ဖြိုဖျက်ပစ်လိုက်သည်။ ဂိုလိုက်ယက်သည်လည်း ဒေးဗစ်၏ လောက်လွှဲထိမှန်ပြီး ကျဆုံးသွားရ၏။ ရိုမီယိုပစ်လွှတ်လိုက်သော မြားတစ်စင်းသည်လည်း နီရိုးဘုရင်၏ လက်ဝဲဘက် ရင်အုံကို ဖောက်ထွင်းဝင်ရောက်ပြီး နှလုံးသားကိုထုတ်ချင်းခတ် ထိမှန်သွား၏။
ရိုမီယိုသည် ဂျူးလိယက်ကိုချုပ်နှောင်ထားရာ အဆောင်သို့ အလျင်အမြန်ပြေးဝင်သွားသည်။ သို့ရာတွင် နောက်ကျလေပြီ။ ဂျူးလိယက်သည် နီရိုးဘုရင် လက်တွင်းသက်ဆင်းရတာထက်စာလျှင် သေရတာကမှကောင်းသေးသည်ဆိုပြီး အဆိပ်သောက်၍ မိမိကိုယ်မိမိ အဆုံးစီရင်သွားခဲ့လေသည်။ ရိုမီယိုမှာ ဖြေမဆည်နိုင်အောင် ယူကျုံးမရဖြစ်ရ၏။
"မောင်တော့်အပေါ်တင်ရှိနေတဲ့အချစ်ကြွေးတွေကို နောက်ဘဝကျမှပေးဆပ်ပါရစေတော့"
ဟု မြည်တမ်းရင်း သူ့ရင်ဝကို ဓားနှင့်ထိုးစိုက်ချလိုက်လေသည်။
အလက်ဇန်းဒါးဒူးမား၏ နောက်ဆုံးထုတ်ဝေသော ဝတ္ထုစာအုပ်၏ဇာတ်လမ်းဖြစ်၏။
ထိုစာအုပ်ထွက်လာပြီးနောက် စာပေနယ်ထဲမှာ လှုပ်လှုပ်ခတ်ခတ်ဖြစ်သွား၏။ တချို့က အတွေးဆန်းသစ်ပုံကို သဘောကျကြသည်။ အရေးရဲသည်။ လမ်းသစ်တီထွင်မှုတစ်ခုဖြစ်သည်ဟု ချီးကျူးကြသည်။ တချို့ကတော့ ဂန္တဝင်ကိုဖျက်ဆီးဖို့ကြံစည်ခြင်းဖြစ်သည်ဟု စွပ်စွဲပြီး ဝေဖန်ကန့်ကွက်ကြသည်။
ဒူးမားကတော့ ဘယ်သူတွေ ဘာပြောပြော တွန့်ဆုတ်သွားခြင်း မရှိဘဲ သူ့ဟန်အတိုင်း ဆက်ရေးသည်။ မကြာခင်မှာပင် ရာဇဝင်နောက်ခံဝတ္ထုတစ်အုပ်ထပ်ထွက်လာသည်။ စာအုပ်အမည်ကတော့ 'လင်ကွန်းမင်းသားကြီး'ဟူ၍ဖြစ်လေ၏။
-----------
မင်းလူ
on Friday, February 1, 2013
( ဇာတ်သိမ်းဆက်ရန်) .....
[ လူဗိုလ်ဟူသည်ဘလော့ဂ်မှကူးယူပါသည်။ ဘလော့ဂ်ဂါအားကျေးဇူးတင်ပါသည်။]
No comments:
Post a Comment