“ #န၀ရတ်ကိုးသွယ်_စီခြယ်အပ်သည်ကား ”
#ငြိမ်းကျော်
(၁)
ကြီးတော်ဒေါ်ပွင့်က ကျွန်တော့်ကို လှမ်းကြည့်ပြီး “ ဘယ်လို သဘောရသတုန်း ” ဟု မေးသည်။ ကျွန်တော်မဖြေသေး။ အမေနှင့် အဖေတို့ကို လှမ်းကြည့်လိုက်သည်။ အဖေသည် ဆေးပေါ့လိပ်တိုကို မီးညှိသည်။ အမေက ပြောင်းဖူးဖက်ဆေးပေါ့လိပ်ထိပ်ကို ရှေ့သွားဖြင့်ကိုက်ပြီးနောက် အဖေ့ မီးခြစ်အလာကိုစောင့်၏။ အဖေက မီးတို့ပေးနေစဉ်….
“ စဉ်းစားကြသေးတာပေါ့၊ ကြီးတော်ရယ် ”
ကြီးတော်သည် ဧည့်သည်တွေ တစ်ဇွန်း နှစ်ဇွန်းစားသွားသော လက်ဖက်အစ်ကို လှမ်းယူသည်။ လက်ဖက်သားကို ဇွန်းဖျားဖြင့် ခပ်ယူမြုံ့ရင်း…..
“ မခင်မြိုင်က အတော်ရိုးပါတယ်။ ကြီးတော်တို့ကတော့ မင်းနဲ့ ရှေ့သွားနောက်လိုက်ညီတယ်လို့ထင်တယ်။ သူ့မိဘကလဲရိုးရိုး၊ မောင်နှမသားချင်းကလည်း နှစ်ယောက်၊ သူ့အစ်မက သူ့အိမ်ထောင်နဲ့သူ၊ ရုတ်တရက် ကြည့်ရင်တော့ မြို့သူလို အချောအလှ မဟုတ်ဘူး။ ဒါပေမဲ့ ညိုချော၊ နဂိုရှိတယ်။ ပြင်ဆင်လိုက်ရင် အကြည့်ခံတယ် ”
“ သူ အတန်းကျောင်း ဘယ်လောက်အထိ နေခဲ့ဖူးလဲ ကြီးတော် ”
“ ခုနှစ်တန်းအောင်တယ်၊ မိန်းကလေးပဲ။ ဒီလောက်ဆို တော်ပြီ၊ အိမ်မှုကိစ္စ၊ ချက်ရေးပြုတ်ရေး ဘာမှလှည့်မကြည့်ရဘူး။ အနေအထိုင်တော်တယ်၊ မင်းနဲ့သာ စိမ်းတိမ်းတိမ်း၊ မင်းမိဘနဲ့က ရင်းနေပြီ။ မနှစ်ကတည်းက မင်းဘွဲ့ရပြီး အလုပ်ရလို့ မြို့မှာသွားကတည်းက၊ အင်း … တစ်နှစ်ခွဲလောက်တောင်ရှိပြီ ”
ကြီးတော်သည် ကျွန်တော့်ကို မခင်မြိုင်နှင့် နေရာချပေးချင်သည်။ အမေတို့ကို ပြောပြသည်။ “ ကိုယ့်တူကိုယ်ပြောပေါ့၊ ကျုပ်တို့ကတော့ ဘာပြောတတ်မှာတုံး၊ ဆိုင်နဲ့အိမ်၊ အိမ်နဲ့ဆိုင် ” ဟု အမေပြောခဲ့သည်။ “ မိန်းကလေးတွေရဲ့မိဘတွေကို တီးခေါက်ကြည့်မယ် ” ဟု ကြီးတော်ပြောသည်။ “ ခင်ဗျာ့သဘောပါပဲ မရီးရာ ” ဟု အဖေက အာဏာကုန်လွှဲခဲ့သည်။ ကျွန်တော့်ကိုပြောခါနီးတွင် ကြီးတော်က “ မင်းမြို့မှာ ရည်းစားသနံရှိနေလား ” ဟု မေးသည်။ “ မရှိပေါင်ဗျာ ” ဟု ကျွန်တော်ဖြေသည်။ ထိုအခါ “ ဒါဖြင့် ငါတို့သင့်ရာစီမံမယ် ” ဟု ပြောလေသည်။ အိမ်ထောင်ရေးကို စိတ်မကူးမိသော ကျွန်တော်က “ သဘောပဲဗျာ ” ဟု လွယ်လွယ်ပြောခဲ့သည်။
“ ဟိုကလည်း ဒေါ်အုံးမယ်သဘောလို့ ပြောလို့ တွေ့ဆုံဖို့ စီစဉ်ပြီးပြီ ” ဟု ကြီးတော် ၀မ်းသာအားရပြောသည်။ ထို့နောက် မိန်းကလေးအိမ်ဆီသို့ အလည်အပတ်သွားရန် ကျွန်တော်တို့မိသားစုကို ခေါ်သည်။ ကျွန်တော်တို့ ဦးစွာသွားရောက်ပြီးနောက် မခင်မြိုင်တို့မိသားစုက ကနေ့လာလည်ကြသည်။ မခင်မြိုင်သည် ကြီးတော်နှင့် သိကျွမ်းသည်မှစကာ ကျွန်တော်တို့အိမ်သို့ မကြာခဏလာလည်သည်။ မြို့မှာ အလုပ်သွားလုပ်နေသော ကျွန်တော်နှင့်ကား မဆုံဖြစ်ခဲ့။
“ သူ ဘာလုပ်လဲ ကြီးတော် ”
“ သူ့မိဘတွေက ယာထွက်ပစ္စည်းကောက်တယ်လေ။ အဲဒီအလုပ် သူကူလုပ်တာပေါ့ ” ဟု ကြီးတော်က ကျွန်တော့်ကို ဖြေလေသည်။
“ မခင်မြိုင် အသက်ဘယ်လောက်ရှိလဲ ”
“ မင်းထက်တော့ ငယ်တာပေါ့၊ ဆယ့်ကိုးနှစ်လောက်ရှိမယ်။ ခြောက်နှစ်၊ ခုနှစ်နှစ်ငယ်ပေမဲ့ သူက ကိုယ်လုံးကိုယ်ပေါက်ရှိတယ်။ သူ့အရပ်နဲ့သူ ကြည့်ကောင်းပြီးသား၊ သေသေချာချာကြည့် …. ကတော်ရုပ် ”
မခင်မြိုင်ကို လေ့တော့ လေ့လာခဲ့သည်။ နှစ်ဦးချင်း စကားတော့ မပြောဖူးသေး။ ကျွန်တော့်ကို ရှက်ရွံ့ရွံ့ဖြစ်နေပုံရသည်။ အေးတိအေးစက်နေတတ်သည်ဟု ထင်သည်။ ကျွန်တော်သဘောကျသော ဖျတ်လတ်တက်ကြွမှုမျိုး မတွေ့ရ။ အပြုံးအရယ် နည်းပါးသည်။ သွက်လက်ချက်ချာမှုမရှိဟု ကျွန်တော်တွက်သည်။ ကြီးတော်တို့ အမေတို့၏ အမြင်တွင် ညိုချောဟုဆိုသော်လည်း ကျွန်တော့်အမြင်တွင် ရွက်ကြမ်းရေကျို။
ကျွန်တော် အလုပ်လုပ်နေသောရုံးတွင် အမျိုးသားတွေ စိတ်မ၀င်စားဆုံး အမျိုးသမီးသမီးတစ်ယောက်ကို ပြေးပြီး သတိရသည်။ သူတစ်ပါး၏ စိတ်ဝင်စားမှုကို အလှအပဖြင့် ဆွဲဆောင်ရန် ကြိုးစားလွန်းသောကြာင့် ‘ မလှချင် ’ ဟု အမည်ဝှက်ပေးထားခြင်းခံရသော အမျိုးသမီး။ ကိုယ်ခန္ဓာအချိုးအဆစ်လှပသည်၊ မျက်နှာကျ ကြည့်ကောင်းသည်။ သို့သော် ဆွဲဆောင်မှုသတ္တိ မစုံလင်သကဲ့သို့ ရှိနေသည်။
‘ မလှချင် ’ သည်ပင် မခင်မြိုင်ထက် ပို၍ လှနေသေးသည်။
(၂)
နှစ်ယောက်ချင်းထိုင်ကာ စကားပြောဖြစ်ခဲ့သည်။ သူတို့ အိမ်ဝိုင်းထဲက မန်ကျည်းပင်အောက်ရှိ ၀ါးကွပ်ပျစ်တွင် အတူထိုင်ကာ စကားစမြည် ပြောခဲ့သည်။ သူ့အမူအရာသည် တုံ့တုံ့ဆိုင်းဆိုင်း၊ အရှက်သည် လိုသည်ထက်ပို၍ စကားမစည်။ သနပ်ခါးဘဲကျား မျက်နှာကြောင့် အလှအပရှာ၍မရ။ သူ့ကိုကြည့်သော်လည်း ကျွန်တော်ရင်မခုန်မိ။ စိတ်လှုပ်ရှားစရာကင်းမဲ့သော အရုပ်နှင့် တွေ့ဆုံရသကဲ့သို့ ဖြစ်နေသည်။ သူ့မှာသာ တုန်တုန်ယင်ယင်ဖြစ်နေသည်။ ကျွန်တော့်မှာ မထူးခြား။
အိမ်ထောင်ရေး စကားပြောချင်စိတ် ပေါ်မလာ။ ထို့ကြောင့် လူကြီးတွေ စီစဉ်တာ မခင်မြိုင် ဘယ်လိုသဘောရလဲ။ ကို့ကို ဘယ်လိုသဘောထားလဲ၊ အိမ်ထောင်ရေးနှင့် ပတ်သက်ပြီး ဘယ်လိုဆုံးဖြတ်ထားသလဲတွေ ကျွန်တော်မပြောမိတော့။
အသိမိတ်ဆွေကဲ့သို့သော သဘောထားပြီး ကျွန်တော်ပြန်လာခဲ့သည်။ မဖြစ်နိုင်ပါဘူး အမေရာဟု အမေတို့ကို ကျွန်တော်ပြောခဲ့သည်။ မင်းယူရမှာ မင်းသဘောပေါ့ကွာဟု အဖေပြောသည်။ ဘာကို မကြိုက်တာလဲဟု ကြီးတော်ကမေးသည်။
“ ရေစက်မရှိသူကို တွေ့ရသလိုပဲ ”
“ ကလေးမလေးက တော်တယ်နော်၊ စီးပွားရေးလည်း လာဘ်မြင်တတ်ပြီး၊ ယောက်ျားကို ရိုကျိုးတဲ့ မျိုးရိုးကွယ့်၊ ပြန်မပြော နားမထောင်၊ ခေါင်းကြောမာမာ မဟုတ်ဘူး။ လင်ပြောသမျှ ပုတ်သင်ညိုလို ခေါင်းညိတ်ပြီး ကိုယ့်ခြေကိုယ့်လက် မလှုပ်တတ်တာမျိုးလည်း မဟုတ်ဘူး။ မြို့သူနဲ့စာရင်တော့ ခုနေတော့ နုံတုံတုံပေါ့။ ပင်ကိုထက်တယ်၊ ချိန်ဦး … စိုးဌေး ”
ပြန်ပြောရလျှင် အချေအတင်တွေသာဖြစ်မည်။ သဘောကျသူအနေနှင့် သော်လည်းကောင်း လူပကတိသာမက အရိပ်ကအစ အကောင်းအတော်။ သဘောကျရန် ခဲယဉ်းနေသူအဖို့သော် စောဒကတက်စရာချည်း။
“ ဇနီးတော်ဖို့ သူ့ကို စိတ်ကူးမရဘူး ကြီးတော် ”
ကြီးတော် စိတ်ပျက်သွားသည့်မျက်နှာကို ခုတိုင် မှတ်မိလျက်ရှိလေသည်။
(၃)
နှင်းရင်ရင်နှင့် ကျွန်တော် လက်ထပ်ရန် ဆုံးဖြတ်ပြီးသောအခါ အဖေနှင့် အမေကို ကျွန်တော် ငှားနေရာအိမ်သို့ အလည်လာရန် စီစဉ်ရသည်။ ကျွန်တော်က နှင်းရင်ရင်ကို အိမ်သို့ခေါ်သည်။ အိမ်မှာ ပထမဦးဆုံးဆုံပြီးနောက် နှင်းရင်ရင်တို့၏အိမ်သို့ အမေတို့ကို ခေါ်ရသည်။ အမေနှင့်အဖေသည် ၀င်းကြီးခြံကြီးထဲသို့ဝင်ရန် ခြေရွံ့နေမှန်း ကျွန်တော်သိသည်။ နှင်းရင်ရင်မိဘ၏ တိုက်ကြီးထဲသို့ လှမ်းဝင်ကြသော ခြေလှမ်းတွေက မ၀ံ့တ၀ံ့။ ခမည်းခမက်တွေချင်း တွေ့ဆုံသော ပထမပွဲသည် အရေးလှခဲ့သည်။
နှင်းရင်ရင်၏ အစ်မနှင့် ဒေါ်ဒေါ်တို့က အမေတို့အိမ်သို့ အလည်လိုက်ကြသည်။ တောကြေးရတတ်အိမ်၊ သုံးပင်ငါးပင်ခြေတံရှည်၊ ပျဉ်ထောင်သွပ်မိုး၊ ကျွန်းလုံးတိုင်ထူအိမ်၊ နှင်းရင်ရင်သည် ရောက်စမို့ ကျေးလက်အငွေ့အသက်တွေကို ထူးဆန်းပြီး သဘောကျနေ၏။ နှင်းရင်ရင်တို့ ပြန်သွားသောအခါ အမေက ……
“ သူ ဒီမှာနေနိုင်တာအံ့ရော၊ သူတို့နေတာထိုင်တာနဲ့ ဘာမှမဆိုင်ဘူး။ နောက်ချေးနံ့၊ နှမ်းဖတ်နံ့၊ ၀က်စာ ကြက်စာနံ့တွေ ခံနိုင်တယ်။ ဒီကလေးမ အဆင့်အတန်းနဲ့ မင်းလိုက်နေပြီး သူ့အဆင့်အတန်းအတိုင်း မိဘလက်ထဲမှာလို ထားရမှာ ”
“ သူကြိုက်ရင် သူရှာပေါ့၊ သူ ရှာဖွေကျွေးပေါ့၊ ဆင်ပေါ့၊ ထားပေါ့ ”
အဖေက သဘာဝစကား ပြောသည်။
ကျွန်တော်နှင့် နှင်းရင်ရင် လက်ထပ်သောအခါ မြို့သညာသာ ရှိလင့်ကစား ရွာကြီးတစ်ရွာသာဖြစ်သော ကျွန်တော့် ဇာတိအရပ်က တစ်ယောက်ချင်းမလာနိုင်။ ငါးဦးကော်မတီ လူကြီးငါးဦး၊ ပဲသူဌေး၊ နှမ်းသူဌေး၊ ငရုတ်သူဌေး၊ လေးငါးဦးသာ လာနိုင်ကြသည်။ လက်ဖွဲ့ပစ္စည်းတွေကို ထိုလူကြီးတွေမှတစ်ဆင့် လူကြုံပါးသည်။
မခင်မြိုင်တို့ မိသားစုက ပင်နီတစ်အုပ်၊ ပင်ဖြူတစ်အုပ်၊ အညာစောင်ခြောက်ထည် လက်ဖွဲ့သည်ကို ခုတိုင် မှတ်မှတ်ရရရှိနေ၏။
မခင်မြိုင်သည် နောက်သုံးနှစ်သာသာတွင် ယောက်ျားယူသည်။ သူ့မင်္ဂလာဆောင်သို့ ကျွန်တော်တို့လင်မယား သွားကြသည်။ မခင်မြိုင်၏ အိမ်တွင် ဧည့်ခံသည်။ နှင်းရင်ရင်သည် ထိုမင်္ဂလာဆောင်သို့ ခြောက်ယောက်စာ ထမင်းစားပန်းကန်တစ်စုံ လက်ဖွဲ့သည်။ မင်္ဂလာဆောင်ကို အကြောင်းပြုပြီး အမေတို့အိမ်တွင် သုံးလေးငါးရက်နေရန် ကျွန်တော် စိတ်ကူးသည်။ နှင်းရင်ရင်က …
“ သမီးလေးကို အောက်မေ့တယ် ”
အမေတို့က သူ့စကားကို အဟုတ်ထင်ကြမည်။ တောရပ် တောရွာနံ့ကို ခေါင်းကိုက်သည်ဟု ရောက်ပြီးခဏတွင် သူ ပြောထားသည်။ ကလေးကို သူနို့တိုက်သည်မဟုတ်၊ နို့ဘူးတိုက်သည်။ သူထိန်းသည်မဟုတ်၊ နာနီကလေးထိန်းက ထိန်းသည်။ ဗိုလ်ချုပ်ဈေးရှိ အသိမိတ်ဆွေတွေ၏ ဆိုင်တွေသို့ နေကုန်သွားပြီး ပစ္စည်းဝယ်သောသူ၊ ကျွန်တော့်ရုံးခန်းသို့ လေးနာရီအရောက်လာပြီး ရုပ်ရှင်ညပွဲကြည့်ရန် ပြောသောသူ၊ ကလေးနှင့်သူ အဝေးကြီး။
“ မင်းမိန်းမက အပျိုတုန်းကအတိုင်း ပိုပြည့်ပြီး ပိုလှတောင် လှလာသေးတယ်၊ ခင်မြိုင်နဲ့တော့ ကွာတာပေါ့ကွယ်၊ ဟိုကလေးမလေးလည်း မင်းကိုမရပေမယ့် ကံတယ်မဆိုးလှသေးပါဘူး။ ခု သူယူတာ ဂျုံရောင်း၊ ဂျုံဝယ်လုပ်နေတဲ့ ကောင်လေး၊ ရွယ်တူပဲ။ အချမ်းသာကြီးထဲကတော့ မဟုတ်သေးဘူးပေါ့ ”
ကြီးတော် ဒေါ်ပွင့်က နှင်းရင်ရင်၏ ကွယ်ရာတွင် ကျွန်တော့်ကို ပြောပြသည်။
(၅)
အမေတို့အိမ်သို့ သောကြာနေ့ ညနေရုံးဆင်းလျှင် ရရာကားဖြင့် ကျွန်တော်သွားသည်။ အဆင်မပြေပါက စနေနေ့မနက်စာ စားပြီးချိန်တွင် သွားသည်။ သုံးလေးနာရီ ကြာပြီးနောက် အမေတို့အိမ်သို့ရောက်သည်။ အိမ်ထောင်သက် ရှစ်နှစ်၊ သမီးသူငယ်တန်း ကျောင်းတက်ချိန်တွင် ကျွန်တော်စိတ်ပင်ပန်းလာသည်။ နှင်းရင်ရင်၏ အထက်အောက် မောင်နှမ ညီအစ်မတွေအားလုံး အိမ်ထောင်ပြုကုန်ကြသည်။ နှစ်ယောက်ကသာ အိမ်ခွဲသွားသည်။ ကျန်လေးယောက်က တိုက်ကြီးထဲတွင် ကိုယ့်အခန်း၊ သူ့အခန်း နေကြ၍ အနေမကျဉ်းကျပ်။ ကိုယ့်စားအိုးနှင့်ကိုယ်၊ ပြဿနာမှရှိ။
နှင်းရင်ရင်၏ အထက်အစ်မနှင့် အောက်ညီမသုံးဦးတို့သည် လင်ပြိုင်ဝါဒထူထောင်သည်နှင့်အမျှ ကျွန်တော် နားမသက်သာ။ စိတ်မသက်သာ။ ကံကောင်းထောက်မသောကြောင့် လစာ ရှစ်ရာမပြည့်သော လက်ထောက်ညွှန်ကြားရေးမှူးရာထူးရခဲ့သည်။ “ ကိုယ့်အမျိုးသားက လထညွှန်မှူးလေ ” ဟူသော နှင်းရင်ရင်ပြောနေကြအပြော။ “ ကျွန်မယောက်ျားက ဆရာဝန်၊ အစိုးရအလုပ်မလုပ်ချင်လို့ ဆေးခန်းဖွင့်ထားတာ၊ သိပ်ဆေးလိုက်တာ၊ တစ်နေ့ တစ်ထောင်အောက်ထစ် ” ဟူသော သူ့အစ်မ၏အသံ၊ “ ကျွန်မ အမျိုးသားက ဂျပန်သင်္ဘောလိုင်းကို ပြောင်းလိုက်တယ်။ စက္ကင်းအော်ဖစ်ဆာ စာမေးပွဲဖြေထားတယ်။ ဆွီဒင်လိုင်းကိုကူးဖို့၊ အခု ကားပို့တာ နှစ်စီး ” ဟူသော ညီမ၏ အပြော။ “ တို့အမျိုးသားက အရှေ့အလယ်ပိုင်း ကုလရုံးမှာ၊ အဲဒီကနေ တိုကျိုကိုပြောင်းမယ်၊ တို့လိုက်ဖို့ စီစဉ်ထားတာ ပတ်စ်ပို့ရတော့မယ် ” ဟူသော သူ့ညီမအငယ်ဆုံး၏ စကား။
“ ကြားလား မောင်၊ ရင်တို့ကို ရိတာ၊ အစိုးရကားနဲ့ မိန်းမဈေးသွားတာ လိုက်ပို့တာတွေ ဘာတွေဟာတဲ့၊ အစိုးရငွေ ဖြုန်းတီးတာတဲ့။ တိုင်းပြည်ငွေ အစိုးရငွေတဲ့၊ ကိုယ်ပိုင်ကားဝယ်ဖို့ ကြိုးစားပါမောင်ရာ၊ သူတို့က ညီအစ်မစိတ်မရှိကြဘူး။ ပြိုင်နေတာ၊ မောင့် လို ဂုဏ်သရေရှိလူကြီးရဲ့ မယားမဖြစ်ရလို့ မနာလိုနေကြတာတွေလေ ”
အပေါ်ဆုံးကြယ်သီး ထက်ခြမ်းကွဲနေသည်ကို မမြင်ယောင်ဆောင်ပြီး နှင်းရင်ရင် ပြောသည်။ ရုံးသွားခါနီးတွင်မှ ထိုင်းနေသော ပုဆိုးကို မီးပူ အပူမြှင့်ပြီး တိုက်ထားသောကြောင့် အ၀တ်မှာ အငွေ့ပြန်လျက်ရှိ၏။ မြန်မြန်သွေ့ခြောက်အောင် ဖြန့်ပြီး ခါနေသူ ကျွန်တော်က …..
“ အေးပါ၊ ဖြစ်လာမှာပါ မိန်းမရာ ” သူ မမြင်အောင် သက်ပြင်းချရလေသည်။
(၆)
ခင်မြိုင်က ကလေးတစ်ဖက်နှင့် အလုပ်လုပ်သည့်အကြောင်း၊ ဂျုံရောင်း ဂျုံဝယ်သာမက အလှကုန် အ၀တ်အထည်ကိုပါ မြို့နီးချုပ်စပ်သို့ သွားရောင်းတတ်ကြောင်း၊ နှစ်နှစ် သုံးနှစ်အတွင်း၌ပင် အဝေးပြေးကားဂိတ်ရှိ ဆိုင်တစ်ဆိုင် ၀ယ်နိုင်ကြောင်း အမေပြောပြသည်။ ဒုတိယကလေး မွေးပြီးချိန်၌ ကလေးက အကျိုးပေး၍လား၊ ခင်မြိုင်ကြိုးစား၍လား မပြောနိုင်။ စီးပွားတရိပ်ရိပ် တက်လာကြောင်း၊ ဒေါ့ဂျစ်တစ်စီး ၀ယ်ထားပြီဖြစ်ကြောင်း လူမှုရေး လှူရေး၊ တန်းရေး သိတတ်ကြောင်း၊ ခင်မြိုင့်ယောက်ျားသည် ခင်မြိုင်နည်းတူ ကြိုးစားကြောင်း၊ ရိုးသားကြောင်း အဖေပြောသည်။
ကျွန်တော့် အိမ်ထောင်သက် ဆယ့်လေးနှစ်တွင် ခင်မြိုင်တို့မိသားစုသည် ရွှေဂုံတိုင်ဘက်တွင် ခြံဝယ်ပြီး တိုက်ဆောက်သည်။ ခင်မြိုင်သည် ကျွန်တော့်ရုံးသို့ လာလည်သည်။ အိမ်သို့ လာလည်သည်။ ဘာမျှမကြာဟု ထင်ရသောအချိန်အတောအတွင်း၌ ခင်မြိုင်သည် တဖြည်းဖြည်းပြောင်းလဲမှန်းမသိ ပြောင်းလဲလာ၍ဖြစ်မည်။ မှတ်မှတ်ထင်ထင် သတိမထားမိ။
နှင်းရင်ရင် ကိုးကွယ်နေသောဆရာက ယောက်ျားရာထူးတိုးတက်ရန် ဇနီးဖြစ်သူတွင် န၀ရတ်ကိုးသွယ်လက်စွပ်ဝတ်ထားရမည်ဟု ဓာတ်စကားဆိုသောကြောင့် မခင်မြိုင်ထံ ဆက်သွယ်ရသည်။ ရတနာကုန်သည် တစ်ပိုင်းဖြစ်နေသော မခင်မြိုင်က ကျွန်တော်တို့အိမ်သို့ လာလည်သည်။
ဂွမ်းကပ်ဘူးတွေ ထုတ်ပြသည်။
မခင်မြိုင်သည် အသားအတော်ဖြူလာသည်။ သင့်တင့်လျောက်ပတ်စွာ ဖြီးလိမ်းထားသောကြောင့် ခန့်နေ၊ လှနေသည်။ ကျေးတောသူဟု ကျိန်တွယ်ပြီး ပြောသည့်တိုင် ယုံနိုင်ဖွယ်မှရိတော့သော ရုပ်ရည်၊ အလုပ်နှင့်လက် မပြတ်အောင် အလုပ်လုပ်နိုင်သောသူ၊ အိမ်တွင်အိမ်ဖော်မထား၊ ကလေးထိန်းမထားဟု သိရသည်။ ရင်တို့ကတော့ မွေးကတည်းက အိမ်ဖော်နာနီနဲ့ဆိုတော့ အကျင့်ပါနေတာခက်တယ်ဟု ကျွန်တော့်မိန်းမက ပြောသည်။
“ ကြည့်လေ၊ ရင်ရင် ကြိုက်တာ ယူပေါ့ ”
သူရွေးပြီးသောအခါ မခင်မြိုင်က ကက်ဆီယို ဂဏန်းတွက်စက်ဖြင့် ပစ္စည်းဖိုးတွက်သည်။ တစ်ထောင်ကျော်၊ ဆယ်စွန်းသည်။ နှင်းရင်ရင် ငွေမပြည့်၊ ကျွန်တော့်ကို မောင့်ငွေဖြည့်ဟု ပြောသည်။ လက်ဖက်ရည်မသောက်၊ ဆေးလိပ်ဖြတ်ပြီး စုခဲ့ရသော ငွေထဲက လေးရာကျော် ပေးခဲ့ရသည်။ အနီရော၊ အပြာရော တစ်ဆင်စာရှိတယ်။ လိုချင် အရင်းနဲ့ယူ၊ ဖဲ့ပေးလည်း ရတယ်ဟု မခင်မြိုင်က ပတ်ဘလစ်ကာကားကို စက်နှိုးရင်းလိုက်ပို့သော ကျွန်တော်တို့နှစ်ယောက်ကို ပြောလေ၏။ ကျွန်တော် မျက်လုံးပြူးသွားရသည်။
အားလုံးစုနေသော တိုက်ဖြစ်သောကြောင့် ခြံစည်းရိုးပြင်ဆင်ခ၊ တိုက်ဆေးသုတ်ခ၊ ရေပိုက်ပြင်ခ၊ ကြမ်းခင်းအရောင်တင်ခ၊ တယ်လီဖုန်းခ၊ လျှပ်စစ်မီးခ အချိုးကျထည့်ရသောစရိတ်တွေ ရှင်းရခါနီးတွင် အနီအပြာ တစ်ဆင်စာဒုက္ခကို သွေးလန့်နေသည်။ အမေတို့ထံတွင် လက်ဖြန့်ရလွန်း၍ လက်ကောက်ဝတ် ဆတ်ခေါက်လိုက်ခဲ့ပေပြီ။
အိမ်ကိစ္စအားလုံးကို ကျွန်တော်ချည်းတာဝန်ယူရ၊ ကလေးကျောင်းပို့ ဈေးဝယ်၊ ကလေးတွေ စာစစ်၊ ညနှင့် အားလပ်ရက်တွင် ကားအငှားလိုက်မောင်း၊ ပစ္စည်းဝယ်ရောင်းပွဲစားတစ်ပိုင်း၊ ကျွန်တော်သည် အိမ်ရှင်ထီးဖြစ်မှန်းမသိ ဖြစ်လာချိန်တွင် မခင်မြိုင်ကို သတိရသည်။
မည်သူ၏ လက်သူကြွယ်တွင် ကိုးမျိုးသော ရတနာလက်စွပ်ဝတ်ထိုက်သည်ကိုပါ မဆီမဆိုင် တွေးနေမိလေသည်။
----------
ငြိမ်းကျော်
ရင်ခုန်ပွင့်မဂ္ဂဇင်း အမှတ်(၁၃)၊ အောက်တိုဘာလ၊ ၁၉၈၇
[ ငြိမ်းကျော်ပေ့ခ်ျမှကူးယူပါသည်။ပေ့ခ်ျအား ကျေးဇူးတင်ပါသည်။]
No comments:
Post a Comment